¹ Hwenu ke na Jezu se ɖɔ Falizinu lɛ bo se ɖɔ e bo ɖo ahwanvi hugan Jaan, bo lɛ nylɔ mɛ do tɔmɛ hugan ² Jaan, hwe exɔn nu Jezu lɔsu ma ka le nylɔ mɛti do tɔmɛ gɛ. ³ Jesu lɛkɔ sɔn Judee do lɛ lɛkɔ yi Galile tomɛ. ⁴ E le dandan mɛ n'i bɔ e ɖo na gbɔn Samali tomɛ. ⁵ E wa jɛ toxo ke e nɔ ylɔ ɖɔ Sica mɛ le Samali. Toxo ɖe wɛ kpo le akpa na ogle ke Jakɔbu ze jo na ovi etɔn Jozɛfu. ⁶ Flɛn wɛ dotɔ Jakɔbu tɔn le. Do zɔnlin ke Jezu ɖi u, agbɔ kpe e bɔ e flɔn anyi le dotɔ lɔ kpa. Gan wyawe ko le xo le hwe exɔn nu. ⁷ Nyɔnu Samalinu ɖokpo wa osin dun gbe bɔ Jezu le ɖɔ n'i ɖɔ: «Na un osin na ma nu.» ⁸ Ɖo ahwanvi Jezu tɔn lɛ ko yi toxo lɔ mɛ hwe exɔn nu do yi nuɖuɖu xɔ gbe. ⁹ Nyɔnu ke sɔn Samali tomɛ lɔ le ɖɔ na Jezu ɖɔ: «Naɖe wɛ e nyi ɖo bɔ yɔ ke nyi Jwifu le byɔ osin nunu wu nyɛ ke nyi Samalinu?» Ɖo Jwifu lɛ kpo Samalinu lɛ kpo mɔ nɔ jɛ kpɔ gɛ. ¹⁰ Jezu yi ogbe n'i ɖɔ; «Na a nyɔ nunina Mawu tɔn kpo mɛ ke le ɖɔ na we ɖɔ: "Na un osin ma nu"; yɔ lɔsu na ko byɔ osin wi bɔ e na na we osin ogbɛ tɔn lɔ.» ¹¹ Nyɔnu lɔ ɖɔ n'i ɖɔ: «Mɛsi, dotɔ lɔ siso, a ka ma hɛn tɔka gɛ, bɔ wɛ a na mɔ osin ogbɛ tɔn lɔ le?» ¹² Mi nyi mɛxo na Jakɔcu mye tɔ ke na mi dotɔ kɔ ke eyɔ lɔsu nu kaka jɛ ovyɛ lɛ kpodo kanlin etɔn lɛ kpo ji wɛ?» ¹³ Jezu yi gbe bo le ɖɔ n'i ɖɔ: «Kɔmɛ na lɛ ci mɛɖe kpekpe ke nu osin ekɔ.» ¹⁴ Mɛɖe kpekpe ke na nu osin ke nyɛ na na ɛ, kɔmɛ ma na lɛ ci gbeɖe. Osin ce ke un na na ɛ na trɔzun osin dodonu ɖaxo ke na le kɔn kaka do yi ogbɛ mavɔ-mavɔ. ¹⁵ Nyɔnu lɔ le ɖɔ n'i ɖɔ: «Mɛsi, bo na un osin ke xo a le ɖɔ xɔn na kɔmɛ ni nɔ kpɔn do le ci un gbeɖe ba gɛ; lexa ke ma nɔ kpɔn sɔ lɛ wa dun osin le fikɔ ba gɛ.» ¹⁶ Jezu yi gbe n'i ɖɔ: «Yi bo yi ylɔ asuwe do wa, bɔ mi na zɔn do wa.» ¹⁷ Nyɔnu lɔ yi gbe na Jezu bo le ɖɔ n'i ɖɔ: «Un ma ɖo asu ti gɛ.» Jezu yi gbe n'i ɖɔ: «A ɖɔ xojɔxo.» ¹⁸ Asu atɔɔn xɛn a ko ɖe, bɔ mɛ ke kpo yɔ kpo lɛ le okpɔ din ma lɛ nyi asuwe gɛ. Xojɔxo wɛ a ɖɔ. ¹⁹ Nyɔnu lɔ yi gbe n'i ɖɔ: «Mɛsi, un mɔ ɖɔ oxoyiɖɔtɔ sɔn Mawu de wɛ a nyi. ²⁰ Mye tɔ lɛ ko sɛn ɛ le oso kɔ ji, amɔ aka ɖɔ Jeluzalɛmu bɛ bo nyi nɔtɛn ke ye bo na sɛn ɛ le.» ²¹ Jezu ɖɔ n'i ɖɔ: «Ɖinu na un nyɔnu. Hwe lɔ nu na wa bɔ e ma na nyi oso ekɔ ji alo Jeluzalɛmu wɛ mi na sɛn Otɔ lɔ le gɛ.» ²² Mi le sɛn nu ke mi ma nywɛ gɛ. Mye le sɛn nu ke mi nywɛ, ɖo hwɛnlɛngan Jwifu lɛ de wɛ e sɔn. ²³ Hwe lɔnu na wa, bɔ e ko wa, hwenu ke mɛsɛntɔ xojɔxo tɔn lɛ na sɛn Otɔ lɔ gbɔn alɔgɔ Yɛ Ɖeɖovo lɔ tɔn mɛ, kpodo nugbo mɛ kpo; ɖo mɛsɛntɔ nugbo lɔ tɔn ke Otɔ lɔ le ɖin lɛ xɛn. ²⁴ Mawu, Oyɛ wɛ e nyi, bɔ mɛ ke na sɛn lɛ ɖo na sɛn le gbigbɔmɛ kpodo nugbomɛ. ²⁵ Nyɔnu lɔ yi gbe n'i ɖɔ: «Un nywɛ ɖɔ Mɛsi lɔ na wa, mɛ ke ye ylɔ ɖɔ Klisi lɔ. Hwenu ke e na wa, e na wa na mi tinmɛ nu lɛ kposese ton.» ²⁶ Jezu ɖɔ n'i ɖɔ: «Nyɛ wɛ nyi Klisi lɔ, nyɛ mɛ ke le ɖɔ xo na we kɔ.» ²⁷ Hwe exɔn nu ahwanvi Jezu tɔn lɛ ko lɛkɔ wa. Nukpaca ye ɖo ye do mɔ Jezu le ɖɔ xo xa nyɔnu, yemɛti ka ma kɛ nu bo ɖɔ: «Etɛ wutu a le ɖɔ xo xa nyɔnu?.» ²⁸ Nyɔnu lɔ jo nuke mɛ e nɔ ɖu osin lɔ do tololo bo do wezun yi toxo lɔ mɛ bo yi ɖɔ na mɛ lɛ ɖɔ: ²⁹ «Mi wa kpɔn dahwe ekɔ, mɛ ke nɔ ɖɔ nu ke un wa lɛ kposese na un. E ma nyi Klisi lɔ wɛ?» ³⁰ Ye do wezun sɔn toxo lɔ mɛ gbɛtɔ lɛ bo yi Jezu lɔ de. ³¹ Hwe exɔn nu, ahwanvi etɔn lɛ le xo do kɔ n'i ɖɔ: « Ɖu nu Mesi.» ³² Jezu ɖɔ na ye ɖɔ: «Un ɖo nu ke na ɖu bɔ mi ma nywɛ gɛ.» ³³ Hwe exɔn nu, ahwanvi lɛ le ɖɔ le yeɖe mɛ ɖɔ: «Alo mɛɖe hɛn nuɖuɖu wa n'i wɛ?» ³⁴ Jezu ɖɔ na ye ɖɔ: «Ojlo Mawu tɔn kpodo azɔn Mawu tɔn lɔ kpo hɛn wa cicɛmɛ wɛ nyi nuɖuɖu ce.» ³⁵ Mi nɔ kpɔn nɔ ɖɔ ɖɔ "onu yiya lɔ bo lɛ kpo sunzan ɛnɛ gɛ". Nyɛ le ɖɔ na mi: «Mi ze ota bo nyi nukun kpɔn ogle lɛ mɛ, ɖo sinsɛn lɛ ko bya bɔ ye na do ya ye. ³⁶ Mɛ ke le ya nɔ yi sunzan fo kwa bo nɔ lɛ kpli sinsɛn na gbɛ mavɔ-mavɔ, na me ke do kpo mɛ ke ya kpo na sigan do jawa do kpɔ. ³⁷ Nugbo wɛ, olo dido kɔ sɔgbe: «Mɛɖe nɔ do bɔ mɛɖyɛ nɔ ya.» ³⁸ Un ɖo mi ɖo xlan na mi na do ya nu ke mi ma do gɛ. Mɛɖevo lɛ ko wa azɔn lɔ bɔ mye lɛ mi le ɖu ale azɔn ke ye wa tɔn. ³⁹ Samalinu susu ɖinu na Jezu ɖo kunnu ɖiɖe nahwe lɔ tɔn ke ɖɔ: «E ɖɔ nu ke un nɔ wa lɛ bisese na un.» ⁴⁰ Hwenu ke na Samalinu lɛ wa ede, ye byɔ ɛ na na do nɔ okpɔ xa ye, bɔ ye lɛ nɔ flɛn na azan awe. ⁴¹ gbɛtɔ susu lɛ ɖinu ɖo oxo Jezu tɔn wutu. ⁴² Mɛ lɛ le ɖɔ na nyɔnu lɔ ɖɔ: «Mi ma ɖinu ɖo nu ke a ɖɔ wutu kɛɖɛ gɛ, mi ɖinu ɖo mye lɔsu mi se bɔ mi lɛ mi lɛ ɖo nu nyinywɛ ɖɔ mɛ ekɔ yi wɛ nyi hwɛnlɛngantɔ ogbɛ lɔ bisese tɔn. ⁴³ Azan awe xɔn lɛ godo, Jezu lɛ sɔn flɛn bo yi Galile tomɛ. ⁴⁴ Ɖo Jezu lɔsu ko ɖɔ ɖɔ ye mɔ nɔ do yɛyi na oxoyiɖɔtɔ ɖe le oto etɔn mɛ gɛ. ⁴⁵ Hwenu ke Jezu wa Galile, Galilenu lɛ yi. Ye mɔ nu ke Jezu blo lɛ kposese le Jeluzalɛmu hwenu ke ye le ɖu oxwe, ɖo ye lɛ lɔsu yi oxwe lɔ tɛnmɛ. ⁴⁶ Jezu lɛ lɛkɔ wa Kanaan le Galile tomɛ, fike e ze osin do trɔzun ahan le lɔ. Axɔsuzɔnwatɔ ɖe le bɔ ovyɛ le j'azɔn le Kapɛnaumu tomɛ. ⁴⁷ Hwenu ke na e se ɖɔ Jezu bo lɛ kɔ sɔn Judee bo do le sɔn yi Galile tomɛ, e yi Jezu de bo le do kɛnklɛn n'i ɖɔ ni bo wa gbɔ azɔn na ovi sunnu mye tɔn. Ɖo e bo ja kuku gbe. ⁴⁸ Bɔ Jezu le ɖɔ n'i ɖɔ: «Na mi ma mɔ ɖexlɛ kpo nukpacamɛ lɛ kpo gɛ, mi ma le ɖinu gɛ. ⁴⁹ Azɔn wa na axɔsu tɔ lɔ le ɖɔ: «Hwɛnlɛn do un hwɛ kpo co ovi ce na ku.» ⁵⁰ Jezu ɖɔ n'i ɖɔ: «Yi xwe towe gbe, ɖo ovi towe le gbɛ.» Dahwe lɔ ɖinu na nu ke Jezu ɖɔ n'i. ⁵¹ Hwenu ke dahwe lɔ le lɛkɔ yi oxwe etɔn gbe, azɔnwatɔ etɔn lɛ kpe e bo le ɖɔ n'i ɖɔ ovyɛ bo le ganji. ⁵² Dahwe lɔ le kanse wu ye ɖɔ gan na mu mɛ wɛ ovi ce lɔ mɔ eɖe mɛ? Ye yi gbe n'i ɖɔ: «Ovyɛ bo mɔ eɖe mɛ le osɔ ke wa yi le gan ɖokpo mɛ, bɛ zozo lɔ bo lɛ sɔn e ji.» ⁵³ Ovi lɔ otɔ wa le flin ɖɔ osɔ ke wa yi, le gan exɔn lɔmɛ pɛpɛpɛ bɛ Jezu bo le ɖɔ n'i ɖɔ ovi etɔn bo le gbɛ. E na bɔ eyɔ kpodo oxwe etɔn gbe kpo ɖinu na Jezu. ⁵⁴ Exɔn wɛ nyi nujiwu awegɔ ke Jesu blo hwenu ke e lɛ sɔnJUdee tomɛ bo do wa yi Galile tomɛ.