¹ Le Falizinu lɛ mɛ, Jwifu lɛ we gan ɖokpo le bɔ nyikɔ etɔn nɔ nyi Nikodɛmu. ² Nikodɛmu yi Jezu de le zanmɛ ɖokpo bo le ɖɔ na Jezu ɖɔ: «Mɛsi, mi mɔ nukunnu jɛ e wu ɖɔ nukplɔnmɛtɔ ɖaxo ɖokpo wɛ anyi bo sɔn Mawu de, ɖo mɛti ma si blo nujiwu ke a le blo xɔn lɛ na Mawu ma le kpɔ xa ɛ gɛ.» ³ Jezu yi gbe n'i ɖɔ: «Nugbo nugbo lɔ mɛ Nikodɛmu, na mɛɖe ma ɖo jiji yɔyɔ lɔ gɛ, a ma kpego gbeɖe na byɔ axɔluɖuta Mawu tɔn lɔ mɛ gɛ.» ⁴ Nikodɛmu yi gbe na Jezu ɖɔ: «Naɖe wɛ ye na vɔ mɛɖe ji yɔyɔ ɖo mɛ lɔ xɛn ko kpo nyɔxo? E na lɛ vɔ byɔ onɔ we adɔmɛ bɔ onɔ na lɛ ɛ vɔ ji wɛ?» ⁵ Jezu yi gbe n'i ɖɔ: «Nugbo nugbo mɛ Nikodɛmu, na gbɛtɔ ɖe ma ɖo jiji osin kpodo Oyɛ Ɖeɖovo lɔ tɔn kpo gɛ, e ma si byɔ axɔluɖuta Mawu tɔn mɛ gbeɖe.» ⁶ Nu ke ye nyi le agbaza mɛ, agbaza tɔn wɛ e nyi, bɔ nu ke ye ji gbɔn Oyɛ Ɖeɖovo lɔ mɛ, gbigbɔ wɛ e nyi. ⁷ Ni nɔ kpɔn nyi nukpacamɛ nu na we na un do ɖɔ: «Le dandan mɛ, a ɖo na ɖo jiji yɔyɔ.» ⁸ Jɔhɔn nɔ nyi do yi fike jlo e, a nɔ se axwa etɔn, a ka mɔ nɔ mɔ fike e snɔ kaka do nyɔ fike e xwe gɛ. Lexa pɛpɛpɛ wɛ e le na mɛ ke ye ji do gbɔn Oyɛ Ɖeɖovo lɔ we adali. ⁹ Nikodɛmu yi gbe na Jezu ɖɔ: «Bɔ naɖe wɛ e nɔ yi ɖo?» ¹⁰ Jezu yi gbe n'i ɖɔ: «A nyi osɛnkplɔnmɛtɔ gan ɖokpo le Izlayɛli tomɛ, bo ma nywɛ gɛ wɛ? ¹¹ Nugbo nugbo lɔ mɛ, mi le ɖɔ xo na mi do nu ke mi mɔ nukunnu jɛ e go, kpodo nu ke mi le ɖe kunnu etɔn na mi bɔ mi mɔ lɛ kposese go, co mi gbɛ kunnu ɖiɖe mitɔn lɛ. ¹² Na mi ma le ɖinu na onu anyizan ji tɔn ke un le ɖɔ xo na mi do e go lɛ gɛ, naɖe wɛ mi na ɖinu ɖo hwenu ke un na wa le ɖɔ xo na mi do nu ke nyi axɔluɖuta Mawu tɔn lɛ go ɖo? ¹³ Mɛti ma yi oji na e ma nyi Ovi gbɛtɔ ke sɔn oji bo wa lɔ gɛ. ¹⁴ Ɖi le ke Moyizi ze odan do ji ɖo le ogbetoto mɛ, lexa wɛ ovi gbɛtɔ tɔn lɔsu na yi oji ɖo. ¹⁵ Hwe exɔn nu mɛɖe kpekpe ka na ɖinu n'i na mɔ ogbɛ mavɔ mavɔ. ¹⁶ Mawu nyi wan na ogbɛlɔ do lee, e sɛ ovi ɖokponɔ etɔn ɖo xlan, na mɛɖe kpekpe ke ɖini n'i ma na yi zomɛ gbeɖe amɔ e na ɖo gbɛ mavɔ mavɔ. ¹⁷ Mawu ma sɛ ovi etɔn ɖoxlan na e na do da ohwɛ na gbɛtɔ lɛ gɛ, amɔ na gbɛtɔ lɛ ni do mɔ hwlɛngan gbɔn ovi lɔ mɛ. ¹⁸ Mɛɖe kpekpe ke ɖinu na ovi lɔ ma na mɔ hwɛ dida Mawu tɔn yi gɛ. Amɔ hwɛ dida wɛ e ko nyi na mɛɖe kpekpe ke ma na ɖinu na ovi lɔ gɛ, ɖo e ma ɖinu na nyikɔ ovi ɖokponɔ Mawu tɔn lɔ gɛ. ¹⁹ Nu ke wutu ohwɛ dida nyi yetɔn wɛ nyi ɖɔ, hihɔn lɔ wa ogbɛlɔmɛ bɔ ye nyi wan na zinvlunhugan hihɔn lɔ, ɖo azɔn yetɔn lɛ nyla wutu. ²⁰ Mɛɖe kpekpe ke nyi wan na ohwɛ ko gbɛ wan na hihɔn lɔ bo gbɛ na do wa hihɔn lɔ nu ɖo azɔn etɔn lɛ na wa jɛ agbaungba wutu. ²¹ Mɛɖe kpekpe ke zan walɔ ɖagbe ko le nyi hihɔn lɔ tɔn. Azɔn etɔn na Mawu nɔ nyi nu bo nɔ ɖexlɛ. ²² Exɔn godo Jezu kpodo ahwanvi etɔn lɛ kpo yi Jude we anyizan ji. Jezu nɔ flɛn le okpɔ mɛ xa ahwanvi etɔn lɛ, bo nylɔ mɛ lɛ do tɔmɛ. ²³ Le Enɔ, ke le akpa na Salim, Jaan le nylɔ me do tɔmɛ gbe. Otɔ susu le fi lɔ. Mɛ le le wa eɖe bɔ e le nylɔ ye do tɔmɛ. ²⁴ Hwe exɔn nu, e ma ko su Jaan do gankpamɛ gɛ. ²⁵ Ahwanvi Jaan tɔn lɛ le jɛ tagba kpodo mɛ ɖevo ɖokpo ke nyi Jwifu. Ye le ɖɔ xo do lɛwe ɖi le ke osɛn yetɔn ko ɖɔ ɖo. ²⁶ Ye yi Jaan de bo le ɖɔ n'i ɖɔ: «Mɛsi, mɛ ke kpo yɔ kpo nɔ kpɔ le Judɛntɔ lɔ to bɔ a ɖe kunnu na, e le nylɔ mɛ do tɔmɛ bɔ mɛ lɛ kposese le do wezun yi ede.» ²⁷ Jaan yi gbe na ye ɖɔ: «Gbɛtɔ de ma si mɔ nuɖe yi na e ma ko na ɛ sɔn sɛxwe gɛ.» ²⁸ Mye lɔsu lɛ na ɖe kunnu na un ɖɔ nyɛ bo ɖɔ: "Un bo ma nyi Klisi lɔ gɛ" ɖe "E bo sɛ un do jɛ nukɔn n'i kpoun bɛ." ²⁹ Mɛ ke tɔn nyi asi wɛ nyi asu lɔ. Amɔ asu lɔ we hadoe ke le flɛn le te kpoun le awajijɛ mɛ na do se ogbe asu lɔ tɔn. Un le awajijɛ mɛ bɔ awajijɛ ce lɛ gɔ. ³⁰ E jɛ ɖo e ɖo na yi oji bɔ nyɛ ɖo na wa do. ³¹ Mɛ ke sɔn oji e le oji na lu lɛ kposese. Mɛ ke sɔn anyizan ji e nyi anyizanji tɔn bo nɔ ze eɖe jo na nu ke nyi anyizan ji tɔn lɛ. ³² Mɛ ke sɔn oji, e le oji na nu lɛ kpo. E nɔ ɖe kunnu na nu ke e mɔ bo se; amɔ mɛti mɔ nɔ yi gbe na kunnu ɖiɖe etɔn gɛ. ³³ Me ke yi gbe na kunnu ɖiɖe etɔn ɖe gbe na ɖɔ Mawu bo nyi nugbo. ³⁴ Me ke Mawu sɛdo, e nɔ ɖɔ oxo Mawu tɔn lɛ , ɖo Mawu nɔ na Oyɛ ɖeɖovo kposese wi. ³⁵ Otɔ lɔ nyi wan na ovi lɔ bo ze nu lɛ kposese do alɔ etɔn mɛ. ³⁶ Mɛɖe kpekpe ke ɖinu na ovi lɔ na mɔ ogbɛ mavɔ mavɔ, me ke gbɛ onu ɖi na ovi lɔ lɛ, ye ma na mɔ ogbɛ gɛ, amɔ xomɛsin Mawu tɔn wɛ na kɔn do ye ji.