¹ Azan etɔn atɔn godo, alɔ wiwle asu kpo asi kpo ɖokpo tin le Kanaan. Mali, Jezu onɔ lɔsu yi tɛnlɔmɛ. ² Jezu kpodo ahwanvi etɔn lɛ kpo yi tɛnlɔmɛ., ɖo ye ylɔ ye lɔsu e gba. ³ Hwenu ke na ahan ke mɛ lɛ le nu lɔ vɔ kposese, Mali Jezu onɔ le ɖɔ na Jezu ɖɔ: «Ye ma sɔ ɖo ahan nunu ba gɛ, ɖo ahan yetɔn bisese vɔ.» ⁴ Jezu yi gbe na Mali ɖɔ: «Nyɔnu, etɛ wɛ nyi ce le mɛ? Hwenu ce ma ko wa gɛ.» ⁵ Mali wa le ɖɔ na jonɔyitɔ lɛ ɖɔ: «E ɖɔ nuɖe na mi, mi blo do e ji.» ⁶ Osinnuzɛn okpɛntɔn ayizɛn ɖe lɛ le flɛn bɔ Jwifu lɛ nɔ zan osin lɔ do klɔ afɔ kpodo alɔ kpo.Ozɛn lɔ ɖokpo nɔ hɛn osin nujlɛkpo awe do yi atɔn, bɔ ye nɔ zan le nuwiwa yetɔn lɛ hwenu. ⁷ Jezu ɖɔ na ye ɖɔ: «Mi dun osin vɔvɔ kaka ni wa onu na ozɛn lɔ ɖokpo ɖokpo yetɔn.» ⁸ Bɔ Jezu le ɖɔ na jonɔ yi tɔ lɛ ɖɔ: «Mi ba bo ze yi jo na nuɖuɖu na mɛ tɔ lɛ.» Bɔ ye blo xojɔxo. ⁹ Hwenu ke jonɔyitɔ gan lɔ do nu, e mɔ ɖɔ e bo ma nyi osin gɛ, le ahan bɛ. E ma nyɔ fike ahan lɔ sɔn gɛ, mɛ ke ka ba n'i lɛ nywɛ. Jonɔyitɔ gan lɔ ylɔ asu lɔ bo le ɖɔ n'i ɖɔ: ¹⁰ «Ahan ganji ke nyɔ lɔ wɛ ye nɔ na jonɔ lɛ jɛ nukɔn. Mɛ lɛ kpo wɛ nywɛ. Bɔ exɔn godo, ye nɔ wa na ahanke ma jɔ hun ganji gɛ lɔ hwenu ke agbɔ ko kpe mɛ lɛ. Yɔ a hɛn ahan ɖagbe lɔ wu kaka jɛ odin.» ¹¹ Nubudo nukɔntɔn ke Jezu blo le Kanaan Galile tomɛ hɛn. Jezu ɖe gigo etɔn xlɛ, bɔ ahwanvi etɔn lɛ ɖinu n'i. ¹² Exɔn wayi godo, e jɛte yi Kapɛnaumu tomɛ, eyɔ kpodo onɔ, nɔvyɛ kpodo ahwanvi etɔn lɛ kpo, bɔ ye nɔ flɛn na azan kpɛɖe. ¹³ Paskwa Jwifu lɛ tɔn le sɛkpɔ bɔ Jezu sɔnu yi Jeluzalɛmu tomɛ. ¹⁴ Jezu mɔ le sinsɛnxɔ Jeluzalɛmu tɔn mɛ yinbu, ogbɔ, kpodo ahwanlɛnsatɔ lɛ kpo. Akwacɛnamɛtɔ lɔsu flɔn flɛn le sinsɛnxɔ lɔ mɛ. ¹⁵ Jezu blo oba okan tɔn ɖokpo, lo bo ze do yan mɛ lɛ bi kaka do jɛ kanlin lɛ ji le sinsɛnxɔ lɔ mɛ. Akwacɛtɔ lɛ, Jezu hɔ tavo yetɔn lɛ kposese, lo bo bɛ akwa yetɔn lɛ kposese kɔn nyi gbe. ¹⁶ Jezu ɖɔ na ahwanlɛnsatɔ lɛ ɖɔ: «Mi yawu bɛ onu ekɔ lɛ sɛ sɔn fi bleun. Atɛ we xwegbe ma nyi ajɔ xwe gɛ, oɖe xo xwe wɛ e nyi.» ¹⁷ Ahwanvi etɔn lɛ wa le flin ɖɔ e bo nyi wiwlan ɖɔ: «Akpakpa oxwe towe gbe tɔn le bi un ɖi ozo ha.» ¹⁸ Acɛkpanamɛtɔ Jwifu tɔn lɛ le nyi gbe n'i ɖɔ: «Etɛ wɛ a blo bɔ e nyi oxlɛ nu ke a le blo lɛ tɔn?» ¹⁹ Jezu yi gbe na ye ɖɔ: «Mi gba sinsɛnxɔ kɔ yi do bɔ azan atɔn mɛ, un na ze do yi ji.» ²⁰ Bɔ acɛkpanamɛtɔ Jwifu tɔn lɛ yi gbe n'i ɖɔ: «Sinsɛnxɔ ke mi ze oxwe kanɖe-atɔɔn-nukun-ɖokpo do gba, e wɛ yɔ na ze azan atɔn do blo?» ²¹ Jezu le ɖɔ xo do sinsɛnxɔ ke yi gbɛtɔ nyi nyi etɔn go. ²² Ewɛzɔn, hwenu ke Jezu fɔn sɔn mɛ kuku lɛ mɛ, ahwanvi etɔn lɛ flin ɖɔ Jezu bo ɖɔ lexa. Bɔ ye ɖinu na oxo Mawu tɔn bo sɔ ɖinu na oxo Jezu tɔn. ²³ Le Paskwa hwenu ke ye le Jeluzalɛmu, gbɛtɔ susu ɖinu na yinkɔ etɔn do gbɔn nujiwu ke e le blo lɛ mɛ. ²⁴ Amɔ Jezu ma ɖeji do ye mɛti go gɛ, ɖo e nyɔ ye mɛ bisese wi. ²⁵ E ma ba ɖɔ gbɛtɔ lɛ ni ɖe kunnu n'i do gbɛtɔ ɖe go gɛ, ɖo eyɔ, e nyɔ gbɛtɔ we ayixamɛ wi.