¹ Oxo lɔ ko le sɔn bibɛmɛ. Oxɔ lɔ le okpɔ xa Mawu bɔ oxo lɔ lɛ nyi Mawu. ² Oxo lɔ le okpɔ xa Mawu le bibɛmɛ. ³ Do gbɔn oxo lɔ mɛ wɛ Mawu blo nu lɛ kposese le, nuti ma nyi biblo oxo lɔ mɛ vo gɛ. ⁴ Oxo lɔ mɛ wɛ ogbɛ le, bɔ ogbɛ lɔ wɛ nyi hihɔn na gbɛtɔ lɛ kposese. ⁵ Hihɔn lɔ ɖi do zinvlun lɛ mɛ bɔ zinvlun lɛ ma kpego bo ci i gɛ. ⁶ Jaan nyi gbɛtɔ ɖokpo bɔ Mawu ɖo xlan. ⁷ Jaan wa ɖi kunnuɖetɔ ɖokpo na si gan do ɖe kunnu na hihɔn lɔ, bɔ mɛ bi na do ɖinu do gbɔn eyɔ mɛ. ⁸ Jaan ma nyi hihɔn lɔ gɛ, e wa na si do nyi kunnuɖetɔ na hihɔn lɔ. ⁹ Hihɔn lɔsu lɔsu ke na ɖe zinvlun sɔn gbɛtɔ lɛ kposese mɛ wɛ e nyi do wa gbɛ lɔ mɛ. ¹⁰ Hihɔn lɔ le ogbɛ lɔ mɛ, bɔ ye da ogbɛ lɔ do gbɔn eyɔ mɛ, amɔ ogbɛ lɔ ma nyɔ ɛ wi gɛ. ¹¹ E wa etɔnnɔ lɛ de, amɔ togun etɔn lɔsu ma yi gɛ. ¹² Mɛ ɖekpekpe ke gbɛ yi i bo ɖinu n'i, e na ye hihlɔn bɔ ye na do nyi ovi Mawu tɔn. ¹³ Ke ye nyi do gbɔn ojlo Mawu tɔn mɛ. E ma ji ye do gbɔn ojlo ohun, agbaza alo gbɛtɔ tɔn kpo mɛ gɛ. ¹⁴ Oxo lɔ nyi gbɛtɔ bo le mi mɛ. Mi mɔ gigo etɔn, gigo ke ma kpe awe gɛ bo sɔn Mawu Otɔ lɔ de, bo gɔ kpo fɛnu kpo, kpodo xojɔxo kpo. ¹⁵ Jaan mɛ nylɔdotɔmɛtɔ lɔ ɖe kunnu n'i kpo do ogbe yi ji kpo ɖɔ: «Yi wɛ nyi mɛ ke wu un ɖɔ xo do ɖɔ:"mɛ ke na jɛ godo na un le nukɔn na un; ɖo e ko le jɛ nukɔn na un."» ¹⁶ Do gbɔn gɔtunfla etɔn mɛ, mi mɔ fɛnu ɖe jɛ ɖe ji yi. ¹⁷ Moyizi wɛ na mi osɛn do gbɔn Mawu we ojlo mɛ, Jezu klisi ji wɛ fɛnu lɔ kpo nugbo lɔ kpo gbɔn. ¹⁸ Mɛti ma mɔ Mawu kpɔn gɛ. Jezu Ovi ɖokponɔ ke sɔn Mawu de, bo nɔ Mawu Otɔ lɔ kpa do zan gbɛ wɛ na bɔ mi do nyɔ Mawu wi. ¹⁹ Hwenu ke na Jwifu lɛ sɛ avɔsanuxlemawutɔ kpodo Levi kpo sɔn Jeluzalɛmu na do yi kan xo se Jaan do Jezu go, oxo kanse yetɔn le ɖɔ na Jaan ɖɔ: «Mɛ wɛ a nyi?» ²⁰ Jaan ɖɔ na ye taun do le ɖe kunnu ɖɔ: «Nyɛ mɛ nyi Klisi lɔ gɛ.» ²¹ Ye lɛ le kanse u Jaan lɔ ɖɔ: «Etɛ wɛ anyi lo? Yɔ wɛ nyi Eli lɔ?» Jaan yi gbe na ye ɖɔ: «Nyɛ mɛ nyi Eli gɛ.» Ye lɛ kanse Jaan ɖɔ: «Yɔ wɛ nyi oxoyiɖɔtɔ sɔn Mawu de lɔ?» Jaan yi gbe bo ɖɔ na ye ɖɔ: «Ewo, nyɛ mɛ gɛ.» ²² Bɔ ye le ɖɔ na Jaan ɖɔ: «Mɛ wɛ a nyi, bɔ etɛ wɛ a nɔ ɖɔ do ɖewe go yɔ lɔsu? Ɖɔ na mi na mi na do nyɔ ogbe ke mi na yi ɖo na mɛ ke ɖo mi ɖo xlan lɛ. ²³ Jaan yi gbe na ye ɖɔ: «Un nyi ɖi le ke oxoyiɖɔtɔ Ezai ko ɖɔ ɖo "ogbe mɛ ke le do axwa le gbetoto mɛ ɖɔ: Mi blo omɔ ɖo ganji na Aklunɔ.» ²⁴ Falizinu lɛ sɛ mɛɖe lɛ do bɔ ye le flɛn bo le kanse Jaan ɖɔ: ²⁵ «Etɛ wutu wɛ a le nylɔ mɛ lɛ do tɔmɛ aka ma nyi Klisi, Eli alo oxoyiɖɔtɔ sɔn Mawu de gɛ?» ²⁶ Jaan yi gbe na ye do le ɖɔ na ye ɖɔ: «Omɛ nylɔdotɔmɛ osin tɔn wɛ nyɛ le blo. Le cɛncɛn mitɔn, gbɛtɔ ɖe le bɔ mi ma ka nywɛ wi gɛ. ²⁷ Gbɛtɔ ke xo un le ɖɔ, ye mɔ nyɛ, eyɔ wɛ ye na mɔ. Un ma trɛ jɛxa na tru afɔkpa kan etɔn lɔsu gɛ.» ²⁸ Onu ekɔ lɛ kposese le jɔ le Betani le akpaxwe ɖyɛ na tɔ judɛn tɔn lɔ, fike Jaan le nylɔ mɛ lɛ do tɔmɛ le. ²⁹ Anyihɔngbe etɔn, Jaan mɔ Jezu bɔ e ja ede. Jaan ɖɔ: «Mi kpɔn lɛngbɔvi Mawu tɔn ke na wa ɖe ohwɛ sɔn gbɛlɔmɛ.» ³⁰ Mɛ ke xo un ɖɔ e bo hugan lɔ xɛn. Ye mɔ ynɛ, eyɔ wɛ ye na mɔ, ɖo eyɔ ko le jɛ nukɔn na nyɛ. ³¹ Un ma nywɛ wi gɛ, amɔ na Izrayɛli toxo na do nwyɛ ɖɔ nyɛ wa do nylɔ gbɛtɔ lɛ do tɔmɛ wɛ. ³² Jaan ɖe kunnu ɖɔ: «UN mɔ Oyɛ Ɖeɖovo lɔ jɛte sɔn oji ɖi ahwanlɛnxɛ bo wa jɛ do e ji.» ³³ Un ma nywɛ wi gɛ, amɔ mɛ ke sɛ un do ɖɔ ma nylɔ gbɛtɔ lɛ do tɔmɛ, ɖɔ na un ɖɔ: «Mɛ ke ji a na mɔ Oyɛ Ɖeɖovo lɔ na jɛte ɖo bo na nɔ omɛ lɔ ji, mɛ exɔn wɛ nyi mɛ ke na nylɔ mɛ do Oyɛ Ɖeɖovo lɔ mɛ.» ³⁴ Un mɔ bo lɛ ɖe kunnu na ɖɔ eyɔ wɛ nyi Ovi gbɛɖe Mawu tɔn. ³⁵ Anyihɔngbe etɔn, hwenu ke Jaan le te kpodo ahwanvi etɔn awe kpo, ³⁶ ye mɔ Jezu wa le din gbɔn flɛn, bɔ Jaan ɖɔ: «Mi kpɔn ɛ, eyɔ xɛn Lɛngbɔvi Mawu tɔn.» ³⁷ Ahwanvi awe lɛ se Jaan ɖɔ lexa, ye xodo Jezu. ³⁸ Okɔlilɛ bo kpɔn godo Jezu tɔn mɛ, e mɔ ye xodo e, bɔ Jezu ɖona ye ɖɔ: «Nutɛ mi le ba?» Ye yi gbe n'i ɖɔ: "Mɛsi, bɔ wɛ a nɔ nɔ?" ³⁹ Jezu yi gbe na ye ɖɔ: «Mi wa bo wa kpɔn.». Bɔ ye wa bo wa mɔ nugbo fike Jezu nɔ nɔ. Ye nɔ kpɔ xa ɛ le azan xɔn lɔ gbe, ɖo e ko le xo gan wyawe le hwe exɔn nu. ⁴⁰ Mɛ ɖokpo le ye mɛ awe ke se Jaan ɖɔ oxo bɔ ye xodo Jezu lɛ mɛ, a na mɔ Simɔɔ Pyɛɛ nɔvyɛ Andle. ⁴¹ E mɔ nɔvyɛ Piyɛɛ jɛ nukɔn bo le ɖɔ n'i ɖɔ: «Mi mɔ Klisi lɔ.» ⁴² E hɛn wa Jezu de bɔ Jesu kpɔn ɛ bo ɖɔ n'i ɖɔ: «A nyi Simɔɔ ovi Jaan tɔn, bɛ sɔn din ye na ylɔ we ɖɔ Pyɛɛ (Awyan).» ⁴³ Anyihɔngbe etɔn, hwenu ke Jezu le lɛkɔ yi Galile, Jezu kpe Filipu bo ɖɔ n'i ɖɔ "xo do un". ⁴⁴ Filipu, Andle kpo Pyɛɛ kpo wɛ nyi oto ɖokpo lɔ mɛ nu Betsaida. ⁴⁵ Filipu kpe Natanaɛli bo le ɖɔ ni ɖɔ: «Mi kpe mɛ ke Moyizi kpo oxoyiɖɔtɔ lɛ kpo ɖɔ xo do lɔ, Jezu Nazalɛti tɔn ke nyi ovi Jozɛfu tɔn.» ⁴⁶ Natanaɛli le ɖɔ n'i ɖɔ: «Onu ɖagbe ɖe si sɔn Nazalɛti tomɛ?» Filipu yi gbe n'i ɖɔ: «Wa bo wa kpɔn.» ⁴⁷ Jezu mɔ Natanaɛli ja e de bo le ɖɔ n'i ɖɔ: «Izlayɛli vi nugbonɔ ke awo ti ma le gbɛzan etɔn mɛ gɛ ɖokpo ke.» ⁴⁸ Natanaɛli ɖɔ na Jezu ɖɔ: «Naɖe wɛ a hɛn ɖo do nyɔ un wi?» Jezu yi gbe n'i bo ɖɔ n'i ɖɔ: «Hwɛ co na Filipu na do ylɔ we hwenu ke a le figitin gɔ, un ko mɔ we bo nyɔ we wi.» ⁴⁹ Natanaɛli yi gbe: «Mɛsi, a nyi Ovi Mawu tɔn nugbo, a nyi Axɔlu Izlayɛli tɔn nugbo.» ⁵⁰ Jezu yi gbe n'i ɖɔ: «A ɖinu ɖo un ɖɔ na we ɖɔ un bo mɔ we le figitin gɔ?» A na mɔ nu ke hugan le lɛ. ⁵¹ Bɔ Jezu ɖɔ n'i ɖɔ: «Nugbo, nugbo mɛ, a na mɔ oji na hun, bɔ wɛnzagun Mawu tɔn lɛ na nɔ yi oji bo na nɔ wa odo do ovi gbɛtɔ tɔn lɔ ji.