¹ Exɔn godo, Jwifu lɛ we oxwe ɖokpo le Jeluzalɛmu, bɔ Jezu yi Jeluzalɛmu. ² Lɛngbɔ lɛ we ohɔn ji le Jeluzalɛmu, otɔ lilɛ xwegbe tɔn kleun ɖokpo le bɔ le Eble lɛ we ogbe mɛ ye nɔ ylɔ ɛ ɖɔ Betɛsda bo ɖo ohɔn mɔnu atɔɔn. ³ Le ohɔn lɛ mɔnu, azɔntɔ susu nɔ wa mlɔn anyi le flɛnbo nɔ le ote kpɔn hunhunhun osin lɔ tɔn. A na mɔ azɔntɔ ɖi nukungbanɔ lɛ, afɔgbonɔ lɛ, kpodo kplibɔnɔ lɛ kpo. ⁴ Ɖo wɛnzangun Aklunɔ tɔn ɖokpo nɔ jɛte do otɔ lɔ mɛ hwe ɖenu do hunhun osin lɔ. Mɛɖe kpekpe ke jɛte do tɔlɔmɛ hwenu ke wɛnzangun lɔ hunhun otɔ lɔ nƥ mɔ azɔnhɛngbɔ azɔn ɖe kpekpe ke e na bo le jɛ. ⁵ Dahwe ɖokpo le jɛ azɔn ɖin eko blo oxwe ogban-atɔɔn-nukun-atɔn bo le flɛn. ⁶ Hwenu ke Jezu mɔ dahwe lɔ le anyimimlɔ, e ko nywɛ ɖɔ azɔn lɔ le e ji ɖin e ko dɛɛn, bɔ Jezu ɖɔ n'i ɖɔ: «A ba na mɔ azɔnhɛngbɔ yi?» ⁸ Dahwe azɔntɔ lɔ yi gbe n'i ɖɔ: «Mɛsi, un ma ɖo mɛɖe bɔ e na nɔ ze un do otɔ lɔ mɛ hwenu ke wɛnzangun lɔ jɛte bɔ otɔ lɔ nɔ hunhun gɛ. Kaka na yi flɛn mɛɖevo ko nɔ jɛ nukɔn na un.» ⁷ Jezu ɖɔ n'i ɖɔ: «Cite bo ze ozan towe bo ɖi zɔnlin.» ⁹ Azɔn ɖokpo azɔn ɖokpo, dahwe lɔ cite bo ze ozan etɔn bo ɖi zɔnlin. Gbɔjɛzangbe ɖokpo wɛ. ¹⁰ Jwifu lɛ le ɖɔ na mɛ ke mɔ azɔnhɛngbɔ lɔ ɖɔ: «Gbɔjɛ zangbe wɛ nyi egbe, ye ma na ogbe bɔ aze ozan towe gɛ.» ¹¹ E yi gbe na ye ɖɔ: Mɛ ke gbɔ azɔn na un ɖɔ nyɛ ni bo ze ozan nyɛ tɔn bo ɖi zɔnlin.» ¹² Ye le kanse wi ɖɔ: «Mɛ wɛ nyi mɛ ke ɖɔ na we ɖɔ yɔ ni bo ze ozan towe bo ɖi zɔnlin?» ¹³ Mɛ ke mɔ azɔnhɛngbɔ yi lɔ ma trɛ nyɔ mɛ ke gbɔ azɔn n'i lɔ wi lɔsu gɛ, ɖo Jezu gbɔn nugɔ nugɔ bo tɔn sɔn ye mɛ ɖo togun lɔ su. ¹⁴ Exɔn wayi godo, Jezu mɔ mɛ ke egbɔ azɔn na lɔ le amisaxɔmɛ bo le ɖɔ n'i ɖɔ: «Yi ke a mɔ azɔnhɛngbɔ yi, nɔ kpɔn lɛ hu hwɛ gbeɖe, e ma nyi le gɛ nu ke nyla xu lexa wɛ na wa we.» ¹⁵ Dahwe lɔ yi bo yi ɖɔ na mɛ lɛ ɖɔ Jezu bɛ bo nyi mɛ ke bo gbɔ azɔn na mye lɔ. ¹⁶ Exɔn wutu wɛ Jwifu lɛ nya ogbe Jezu tɔn na do wa danu xa ɛ ɖo egbɔ azɔn na mɛ le gbɔjɛ zangbe wutu. ¹⁷ Jezu ɖɔ na ye ɖɔ: «Tace le wa zɔn kaka do jɛ odin, nyɛ lɔsu un ɖo na w'azɔn. ¹⁸ Jwifu lɛ le din i bo na hu i, ɖo e ma sɔ nyi egba osɛn gbɔjɛzangbe tɔn kɛɖɛ gɛ, ɖo e nɔ lɛ ylɔ Mawu ɖɔ otɔ ɔ lɔsu bo nɔ lɛ jlɛ eɖe xa Mawu. ¹⁹ Jezu yi xo bo le ɖɔ na ye ɖɔ: «Xojɔxo xojɔxo mɛ, ovi lɔ ma si blo nuti zɛ na nu ke e mɔ bɔ Otɔ blo gɛ; nu ke Otɔ lɔ blo bisese, Ovi lɔ lɔsu le blo. ²⁰ Ɖo Otɔ lɔ nyi wan na Ovi lɔbo nɔ xlɛ nu ke e blo bisese wi, bo na lɛ xlɛ nu ke hugan ekɔ lɛ bisese wi na e na do nyi nu kpaca na mi. ²¹ Ɖi le ke Otɔ lɔ nɔ fɔn mɛ ke ko ku lɛ ɖo, bo nɔ na ye ogbɛ elɔsu tɔn, le pɛpɛ wɛ Ovi lɔ lɔsu nɔ na ogbɛ mɛ ke jlo e lɛ ɖo. ²² Ɖo Otɔ lɔ mɔ nɔ da ohwɛ na mɛɖe gɛ, amɔ e ze ohwɛdida lɔ ze jo na Ovi lɔ. ²³ Na mɛ lɛ kposese na do ze gigo na ovi lɔ ɖi le ke ye nɔ ze na Otɔ lɔ ɖo. Mɛ ke ma ze yɛyi na ovi lɔ gɛ, ma ze na Otɔ ke sɛ ɛ do lɔsu gɛ. ²⁴ Nugbo nugbo mɛ, mɛɖe kpekpe ke ɖoto oxo ce bo lɛ ɖinu na mɛ ke ɖo un ɖo xlan, e ɖo gbɛ mavɔ-mavɔ Mawu tɔn, bɔ ohwɛdida ma sɔ nyi etɔn gbeɖe, na do ɖɔ e sɔn oku mɛ bo ogbɛ mɛ. ²⁵ Nugbo nugbo mɛ, un le ɖɔ na mi, hwe lɔnu wa bɔ odin wɛ. Mɛ ke ko ku lɛ na se ogbe Ovi Mawu tɔn lɔ tɔn, bɔ mɛ ke bɔ mɛ ke na ɖoto lɛ na mɔ ogbɛ. ²⁶ Otɔ lɔ ɖo ogbɛ le eɖe mɛ, Ovi lɔ lɔsu ɖo ogbɛ, ɖo Otɔ lɔ wɛ na ɛ. ²⁷ Bɔ Otɔ lɔ na acɛ Ovi lɔ bɔ e na do dahwɛ ɖo yi wɛ nyi ovi gbɛtɔ tɔn. ²⁸ Ni nɔ kpɔn nyi onu bo kpaca mi gɛ, ɖo hwe lɔnu na wa bɔ mɛ ke ɖoto ogbe etɔn le yɔdomɛ lɛ bisese na tɔn aga. ²⁹ Mɛ ke wa ɖagbe lɛ kposese na mɔ fɔn sɔn ku ogbɛ tɔn yi; bɔ fɔn sɔn ku hwɛdida tɔn wɛ e na nyi na mɛ ke wa onu nyinyla lɛ kposese. ³⁰ Un ma kpe nuti go na blo nyɛ lɔsu gɛ. Un nɔ dahwɛ lɔ do gbɔn nu ke Tace ɖɔ na un mɛ, bɔ owhɛdida ce sɔgbe. Un mɔ nɔ ba na wa nu ke jlo un gɛ, amɔ ojlo mɛ ke ɖo un ɖo xlan lɔ tɔn wɛ un nɔ wa. ³¹ Na na nyi kunnuɖetɔ nyɛ lɔsu tɔn, kunnuɖiɖe ce ma si nyi xojɔxo gɛ. ³² Mɛɖevo le ɖe kunnu na un, bɔ un nyɔ ɛ ɖɔ kunnuɖiɖe etɔn do nyɛ go nyi xojɔxo. ³³ Mi sɛ owɛn do Jaan mɛ nylɔdotɔmɛtɔ lɔ bɔ e ɖe kunnu do xojɔxo lɔ go. ³⁴ Hwe exɔn nu kunnu ɖiɖe nyɛ tɔn ma sɔn gbɛtɔ de gɛ. Un le ɖɔ na mi na mi na do mɔ hwɛnlɛngan. ³⁵ Jaan ciɖi tɔci ke na ye ta bo na bɔ ye le mɔ nu, bɔ e jlo mi hwe ɖenu bɔ mi nɔ awajijɛ mɛ le hihɔn etɔn mɛ. ³⁶ Amɔ kunnu ɖiɖe nyɛ tɔn ehugan Jaan tɔn, ɖo azɔn ke Tace ɖɔ ma hɛn wa cicɛ mɛ, azɔn ke un le hɛn wa cicɛ mɛ ko le ɖe kunnu do awye ɖo Otɔ lɔ wɛ ɖo un ɖo xlan. ³⁷ Otɔ ke sɛ un ɖo lɔsu ɖe kunnu do awye. Mi ma se ogbe etɔn kpɔn, mɔ ɖokpo lɔ mi ma lɛ mɔ ninɔmɛ etɔn kpɔn le hwe tinu gɛ. ³⁸ Oxo etɔn ma le mimɛ gɛ, ɖo mi ma ɖinu na mɛ ke e ɖo ɖo xlan lɔ gɛ wutu. ³⁹ Mi nɔ kpɔn nu do nu wiwlan lɛ ji ɖo mi nɔ mɔ ɖɔ mye lɛ bo na mɔ ogbɛ mavɔ-mavɔ le e mɛ. Onu wiwlan ɖokpo xɔn lɔ nɔ lɛ ɖe kunnu do nyɛ go. ⁴⁰ Bɔ mi ma si wa dye bo na do mɔ ogbɛ yi gɛ. ⁴¹ Gigo ce ma sɔn gbɛtɔ lɛ de gɛ. ⁴² Amɔ, un nywɛ ɖɔ mi ma ɖo wan nyinyi na Mawu le mye lɛ lɔsu mɛ gɛ. ⁴³ Un wa le Tace we nyikɔ mɛ bɔ mi ma yi un gɛ. Na mɛɖe wa le nyikɔ etɔn lɔsu mɛ, mi na yi. ⁴⁴ Mi nyi wan na na do ze gigo na miɖe lɛ lɔsu, amɔ mi mɔ nɔ ba gigo ke sɔn Mawu lɔ kponɔ de gɛ. Naɖe wɛ mi na ɖinu ɖo? ⁴⁵ Mi nɔ kpɔn nɔ lin ɖɔ nyɛ na do hwɛ wu mi le Mawu nukɔn gɛ. Moyizi ke mɛ mi ze adɔgbigbo mitɔn ɖo wɛ nyi mɛ ke na do hwɛ wu mi. ⁴⁶ Na mi ɖinu na Moyizi, mi ɖo na ɖinu na ny ɛlɔsu, ɖo Moyizi lɔsu wlan nu bo ɖɔ xo do nyɛ lɔsu go. ⁴⁷ Na mi ma ɖinu na nu ke Moyizi wlan lɔ gɛ, naɖe wɛ mi na ɖinu na oxo ce lɛ ɖo?