¹ Aklunɔzan gbe zanfunu hwenu ke zinvlun kpo le te ɔ, Mali Magidalanu yi Jezu we cyɔ do kɔn, bo mɔ ɖɔ e ɖe okpɛn ke le Jezu we cyɔ lɔ nu gɛ. ² Exɔn, E do wezun bo yi Piyɛɛ de, kpo ahwanvi ɖyɛ ke Jezu yi wan na lɔ kpo, bo ɖɔ na ye ɖɔ: "Ye ɖe Aklunɔ sɔn yɔdo etɔn mɛ, bɔ mi ma nyɔ fike ye sɔ ɛ ɖo gɛ. ³ Bɔ Piyɛɛ kpo ahwanvi ɖyɛ lɔ kpo tɔn, bo wle omɔ do yɔdo lɔ kɔn. ⁴ Ye mɛ awe lɛɛ kpo wɛ bɛ wezun; ahwanvi ɖyɛ ka zɛ Piyɛɛ wu, bo yi yɔdo lɔ kɔn jɛ nukɔn. ⁵ E fɛ, bo kpɔn yɔdo lɔ mɛ, bo mɔ avɔ ke e lilɛ do e lɛɛ le flɛn; e ma ka byɛ emɛ gɛ. ⁶ Sinmɔɔ Piyɛɛ wa gbɔn godo, bo byɛ yɔdo lɔ mɛ, bo mɔ avɔ ke e lilɛ do e lɛɛ le flɛn; ⁷ e lɛ mɔ avɔ ke e bu ɖo ta na Jezu lɔ, e ma ka le ɖyɛ lɛ mɛ gɛ; e le mimlan ɖo vo. ⁸ Exɔn godo, ahwanvi ɖyɛ ke jɛ nukɔn na Piyɛɛ wa yɔdo lɔ kɔn lɔ lɔsu byɛ yɔdo lɔ mɛ; e mɔ bo ɖi nu. ⁹ Nu ke Mawuxowema ɖɔ lɔ bo ɖɔ Jezu na fɔn sɔn ku lɔ, ye ma mɔ do na gɛ; ¹⁰ bɔ ahwanvi awe exɔn lɛɛ lɛkɔ yi oxwe yetɔn lɛɛ gbe. ¹¹ Mali le te le yɔdo lɔ kɔn, bo le avi vi ɔn, bɔ hwekenu e le vi avi ɔ, e fɛ yi do, bo kpɔn yɔdo lɔ mɛ ɖxlan. ¹² E mɔ wɛnzangun Mawu tɔn awe le fi ke e ze Jezu we cyɔ ɖo, bɔ ye do onu wewe; mɛ ɖokpo flɔn afɔligbe , bɔ mɛ ɖokpo flɔn taligbe; ¹³ bɔ ye kanse wi ɖɔ: "Nyɔnu! Etɛ we avi wɛ a ka le vi?" E ka yi gbe na ye ɖɔ: "Ye ɖe Aklunɔ ce sɛ, bɔ un ma nyɔ fike e zee ɖo gɛ." ¹⁴ ke e ɖɔ le ɔ, e lilɛ, bo mɔ Jezu le te, e ma ka nywɛ ɖo ewɛ gɛ. ¹⁵ Jezu ka ɖɔ ni ɖɔ: "Nyɔnu! Etɛ we avi wɛ a ka le vi? Mɛ wɛ a le din?" Mali ka do sin ɖɔ jikpakpɔntɔ lɔ wɛ sin, bo ɖɔ n'i ɖɔ: "Mɛɖaxo! Enyi yɔ wɛ sɔ ɛ sɔn fifihun, bo ɖɔ fike a sɔ ɛ ɖo lɔ na un, nɛ ma yi ze e." ¹⁶ Bɔ Jezu ylɔ ɛ ɖɔ: "Mali!" Bɔ e lilɛ, bo ylɔ ɛ do Ebleegbe mɛ ɖɔ: "Hlabuni"; (tinmɛ etɔn wɛ nyi Mɛsi.) ¹⁷ Jezu ɖɔ n'i ɖɔ: "Nɔ kpɔn hɛn un ɖo te gɛ, ɖo un ma ko yi Otɔ lɔ de le sɛxwe gɛ; amɔ, yi ɖɔ na anɔevi lɛɛ ɖɔ un xwe Atɛe ke nyi Otɔ mye lɔsu de; un xwe Mawu ce ke nyi Mawu mye lɔsu tɔn de." ¹⁸ Bɔ Mali Malidalanu lɔ yi ɖɔ na ahwanvi Jezu tɔn lɛɛ ɖɔ: "Un mɔ Aklunɔ!" Bɔ e do owɛn ke Jezu do lɔ ye. ¹⁹ Ogbe exɔn gbe Aklunɔzan gbe hwelɛkɔ ɔ, Jezu we ahwanvi lɛɛ yi su hɔn do ta; ɖo ye le ɖibu na Jwifugan lɛɛ, bɔ Jezu wa le te, le cɛncɛn yetɔn, bo ɖɔ na ye ɖɔ: "Fifa na nɔ kpɔ xa mi!" ²⁰ Ke e ɖɔ le na ye godo, e xlɛ alɔ etɔn lɛɛ kpo adaja etɔn kpo ye. Ke ye mɔ Aklunɔ yetɔn lɔ, e vivi na ye kaka. ²¹ Jezu lɛ le ɖɔ na ye ɖɔ: "Fifa na nɔ kpɔ xa mi. ²² Ɖi le ke Otɔ lɔ ze un ɖoxlan ɖo o, nyɛ lɔsu un ze mi ɖoxlan." Ke e ɖɔ lee, e fun jɛhɔn do ye ji, bo ɖɔ na ye ɖɔ: "Mi yi Oyɛ ɖeɖovo. ²³ Mi ze ohwɛ sɔkɛ mɛɖee, e na lɛ sɔn okɔ n'i, mi ma ka ze ohwɛ sɔkɛ mɛɖe gɛ ɛ, e na nɔ okɔ n'i." ²⁴ Mɛ ke nyi Tɔmaa le ahwanvi etɔn wyawe lɛɛ mɛ bɔ e nɔ lɛ ylɔ ɛ ɖɔ hoho lɔ ma le kpɔ xa ye hwekenu Jezu wa gɛ. ²⁵ Ahwanvi ɖyɛ lɛɛ wa ɖɔ n'i ɖɔ: "Mi mɔ Aklunɔ!" Tɔmaa ka yi gbe na ye ɖɔ: nɛ un ma mɔ gansokpa ke le alɔ etɔn mɛ lɛɛ, bo sɔ alɔvi ce d'e mɛ, bo ma mɔ suhwankpa ke le adaja etɔn mɛ lɔ, bo ze alɔ ce do adaja etɔn mɛ gɛ, hun un ma le ɖi gɛ. ²⁶ Azan etɔn cantɔngɔ gbe lɔ ɔ, ahwanvi Jezu tɔn lɛɛ ko lɛ suhɔn do ta, le fi ɖokpo lɔ, bɔ Tɔmaa le ye mɛ ogbe exɔn gbe. Ohɔn lɔ le susu co Jezu wa le cɛncɛn yetɔn, bo ɖɔ: "Fifi na nɔ kpɔ xa mi." ²⁷ E ka ɖɔ na Tɔmaa ɖɔ: "Dlɛn alɔvi towe ɖi fi, bo kpɔn alɔ ce mɛ. Dlɛn alɔ towe, bo ze do adaja ce mɛ; nɔkpɔn xonukpɔn gɛ, bo ɖi nu." ²⁸ Tɔmaa yi gbe n'i ɖɔ: "Aklunɔ ce, Mawu ce!" ²⁹ Jezu ka ɖɔ n'i ɖɔ: "Ke amɔ un wɛ zɔn bɔ a ɖi nu na un? Onu wɛ nyɔ na mɛ ke ma mɔ un gɛ, bo ka ɖi nu lɛɛ." ³⁰ Jezu jlɛ onu susu ɖevo lɛɛ le ahwanvi etɔn lɛɛ we nukɔn; e ma ka wlan ye do wema ekɔ mɛ gɛ. ³¹ Amɔ, e wlan ekɔ lɛɛ, nɛ mi na ɖi nu ɖɔ Jezu wɛ nyi Klisi Mawu vi lɔ, bɔ nɛ mi ɖi nu, mi na mɔ gbɛ gbɔn e ji.