1 Ohwe exɔn nu, Pilatu na gbe ɖɔ e ni kplan Jezu bo ze lanba do xo e, 2 bɔ sɔja lɛɛ sɔ owun do lɔn axɔlugbakɔn ɖokpo, bo ze xwe n'i, bo lɛ ze awu ɖaxo vɛvɛ cɛcɛ ɖe bo do n'i. 3 Ye nɔ sɛ yi nukɔn etɔn, bo nɔ ɖɔ: "Mi kan xwe se, axɔlu Jwifu lɛɛ tɔn." Bo nɔ xo tomɛ n'i. 4 Pilatu lɛɛ tɔn wa agaji, bo ɖɔ na ye ɖɔ: "Mi ɖoto; un na yi kplan omɛ mitɔn wa na mi, nɛ mi na ze nywɛ ɖɔ un ma mɔ nu ke wu un na hɛn bo na do da hwɛ n'i ɖe gɛ" 5 Exɔn, Jezu tɔn, bo le awu vɛvɛ ɖaxo lɔ mɛ, bɔ axɔlugbakɔn lɔ le ota n'i. Pilatu ɖɔ na ye ɖɔ: "Omɛ lɔ ke." 6 Ke vɔsa-namawutɔgan lɛɛ kpo sinsɛnxɔcɔtɔ lɛɛ kpo mɔ ɛ ɔ, ye d'axwa, bo ɖɔ:"Ka ɛ nyi akluzu ji! Ka ɛ nyi akluzu ji!" Pilatu ka ɖɔ na ye ɖɔ: "Mi kplan ɛ, bo yi ka ɛ ɖo akluzu ji mye lɔsu, ɖo nyɛ ma mɔ nu ke wu un na da hwɛ n'i lɔ ɖe gɛ." 7 Jwifu lɛɛ ka yi gbe n'i ɖɔ: "Mi ɖo osɛn, bɔ osɛn exɔn byɔ ɖɔ e ni hu i; ɖo e ɖɔ emye bo nyi ovi Mawu tɔn." 8 Ke Pilatu se le e, obu lɛ ɖi i d'e ji, 9 bɔ e lɛ kplan Jezu byɛ hɔn lɔ mɛ, bo kanse wi ɖɔ: "Bɔ a ka sɔn?" Jezu ma ka kɛ nu gɛ, 10 bɔ Pilatu ɖɔ n'i ɖɔ: "Nyɛ wɛ a bɔnu doo? A ma nywɛ ɖɔ un ɖo acɛ bo na jo we nyi te, bo lɛ ɖo acɛ bo na ka we ɖo akluzu ji?" 11 Jezu ka yi gbe n'i ɖɔ: "Mawu ma na gbe etɔn wu we gɛ, a ma sigan ɖo acɛ ti ɖo ji e gɛ; exɔn wu wɛ mɛ ke jo un lɔ hu hwɛ xu we." 12 Bɛ sɔn hwe exɔn nu, Pilatu jɛ dindin le ke e na blo ɖo, bo na ɖe Jezu nyi te. Jwifu lɛɛ ka jɛ axwa do ji, bo ɖɔ:"E nyi a a ɖe omɛ exɔn nyi te hun a nyi axɔlu Hlɔma tɔn we hwannyi gɛ; ɖo mɛ ke sɔ eɖe axɔlu ɔ, gu wɛ e fɔn do axɔlu Hlɔma tɔn ji." 13 Ke Pilatu se le e, e ɖe Jezu tɔn, bo wa flɔn hwɛɖokpo lɔ ji, ɖo tɛn ke mɛ e tɛ okpɛn acɔnu tɔn ganji lɛɛ kɔn nyi, bɔ e nɔ ylɔ ɖɔ: "Gabata" ɖo Eble egbe mɛ. 14 Dindin wayi xwe kpo osɔ, bɔ ye ko le sɔ oxwe lɔ nu ɖ'anyi, do yi gan wyawe mɛ ha ɔ, Pilatu ɖo na Jwifu lɛɛ ɖɔ: "Axɔlu mitɔn ke." 15 Jwifu lɛɛ ka d'axwa, bo ɖɔ: "E hu ! E hu i! E ka ɛ nyi akluzu ji." Pilatu ka kanse ye ɖɔ: "Ma ka axɔlu mitɔn ɖo akluzu mitɔn ɖo akluzu ji wɛ? Vɔsa-namawutɔgan lɛɛ yi gbe n'i ɖɔ: "Mi ma sɔ ɖo axɔlu ɖevo zɛ axɔlu Hlɔma tɔn wu gɛ." 16 Bɔ Pilatu jo Jezu na ye, na ye na yi ka ɛ ɖo akluzu ji. 17 Jezu ɖiɖa akluzu etɔn, bo tɔn sɔn toxo lɔ mɛ; e le yi fi ɖe, bɔ e nɔ ylɔ fi lɔ ɖɔ "takago", bɔ Eblee lɛɛ nɔ ylɔ fi exɔn ɖɔ Golugɔta. 18 Flɛn wɛ ye ka Jezu ɖo akluzu ji le; e lɛ ka omă awe ɖevo ɖo akluzuji; mɛ ɖkpo le aɖisi xwe etɔn, mɛ awegɔ le amyɔ xwe etɔn, bɔ Jezu le cɛncɛn mɛ. 19 Pilatu wlan oxogbe ekɔ, bo ze ɖo akluzu lɔ ji le oji bo ɖɔ: "Jezu Nazalɛti tɔn; axɔlu Jwifu lɛɛ tɔn." 20 Susu Jwifu lɛɛ tɔn mɔ nu ke e wlan exɔn bo xa, ɖo otɛn ke mɛ e ka Jezu ɖo lɔ ma dɛɛn do toxo lɔ gɛ. Xogbe exɔn lɔɔ, e wlan do Eblee gbe mɛ bo wlan do Latɛɛn gbe mɛ, bo lɛ wlan do Gɛnsingbe mɛ. 21 Jwifu lɛɛ we vɔsa-namawutɔgan lɛɛ wa yi ɖɔ na Pilatu ɖɔ: "Jwifu lɛɛ xɔlu mɛ a ɖo na wlan gɛ; nu ke a ɖo na wlan lɔ ke:"Omɛ ekɔ ɖɔ emye wɛ nyi axɔlu Jwifu lɛɛ tɔn." 22 Pilatu ka yi gbe na ye bo ɖɔ: "Nu ke un wlan ɔ, un wlan wɛ." 23 Ke sɔja lɛɛ ka Jezu ɖo akluzu ji vɔ, ye bɛ awu etɔn lɛɛ, bo ma ɖo donu enɛ, bɔ mɛ ɖokpo ɖokpo ze etɔn. Ye lɛ ze awu etɔn ɖaxo ke ma ɖo titɔxwi ɖe gɛ, bo nyi avɔ ɖokpo sɔn oji kaka wa odo. 24 Sɔja lɛɛ ɖɔ le yeɖee cɛncɛn ɖɔ: "Mi ma le vun awu ekɔ gɛ. Mi wa na mi na nyi akɔ do, bo na nyɔ mɛ ke tɔn wɛ e na nyi lɔ." Onu nyi le, na nu ke Mawuxowema lɔ ɖɔ na do jɛ. E wɛ nyi ɖɔ: "Ye ma awu ce lɛɛ, bo nyi akɔ do awu ce ɖaxo lɔ." 25 Jezu we onɔ, kpe onɔ we nɔvi nyɔnu Mali ke nyi Klopasi we asi lɔ kpo, kpo do Mali Magidalanu lɔ kpo le te, le akluzu Jezu tɔn lɔ kpa. 26 Ke Jezu mɔ onɔ, bo ka mɔ ahwanvi etɔn ke e nyi wan na lɔ le te le akpa n'i ɔ, e ɖɔ na onɔ ɖɔ: "Anɛɛ, ovi towe xɛn!" 27 Bo ka lɛ ɖɔ na ahwanvi lɔ ɖɔ: "Anɔwe xɛn!" Sɔn gbe exɔn gbe ɔ, ahwanvi lɔ kplan Jezu we nɔ do xwe etɔn gbe. 28 Exɔn godo, ke Jezu nywɛ ɖɔ nu kpo fo lo ɔ, e ɖɔ: "Kɔmɛ le ci un! Na nu ke e wlan do Mawuxo wema mɛ lɔ na do jɛ. 29 Ozɛn ɖe ka le flɛn, bɔ vɛɛn hwihwan tawun gɔ ɛ, sɔja lɛɛ ka nylɔ xumɛkoca d'e mɛ, bo ze slɛ izɔpukpo nu, bo dlɛn ɖo onu n'i. 30 Ke Jezu nu vɛɛn hwihwan lɔɔ, e ɖɔ: "Nu lɛɛ kpo vɔ lo!" Bo do okɔ do, bonu. 31 Ogbe exɔn gbe, gbɔjɛzan Jwifu lɛɛ tɔn kpo sɔ, bo jɛ do Dindinwayixwe gbe. Jwifugan lɛɛ ma ka jlo na mɛ ke e ka lɛɛ ni nɔ akluzu ji azan exɔn gbe gɛ, ɖo azan ɖaxo ɖe wɛ nyi azan exɔn. Ye yi byɔ gbe Pilatu ɖɔ e na gba afɔxu na mɛ ke e ka lɛɛ, bo ɖe ye jɛ te. 32 Pilatu na gbe ye, bɔ sɔja lɛɛ, yi gba afɔxu na mɛ awe ke e ka ɖo akluzu ji xa Jezu lɛɛ; ye gba afɔxu na mɛ tintan lɔ, bo gba na mɛ awegɔ lɔ. 33 Ke ye wa jɛ Jezu ji, ye mɔ ɖɔ e ko ku, bɔ ye ma sɔ xaji bo gba afɔxu n'i gɛ. 34 Amɔ, sɔja ɖokpo tɔ hwan adaja mɛ n'i, bɔ tloloɔ, ohun kpo sin kpo sa kɔn nyi anyi. 35 Mɛ ke nɔ otɛn etɔn mɛ, bo nɔ wɛ ɖe kunnu na, bɔ kunnu ɖiɖe etɔn ka nyi xonugbo. Eyɔ nywɛ ɖɔ xonugbo wɛ emye le ɖɔ, nɛ mye lɔsu na ɖinu. 36 Onu exɔn lɛɛ kpo jɛ, na nu ke e ko wlan ɖ'anyi ɖo Mawuxowema mɛ lɔ na do jɛ; e wɛ nyi ɖɔ: "E ma le gba oxu etɔn ɖokpo gee gɛ." 37 E ka lɛ wlan le akpa ɖevo xwe le Mawuxowema mɛ ɖɔ: "Ye na mɔ mɛ ke ye tɔ ohwan lɔ." 38 Exɔn godo, omɛ ɖe le, bɔ e nɔ ylɔ ɛ dɔ Jozɛfu; Alimateenu wɛ; e lɔsu le ahwanvi Jezu tɔn lɛɛ mɛ. E ka mɔ nɔ jlo bo na ɖe xlɛ ɖɔ emye bo le ahwanvi Jezu tɔn lɛɛ mɛ gɛ; ɖo e nɔ le ɖibu na Jwifugan lɛɛ. Omɛ exɔn yi mɔ Pilatu, bo byɔ ɛ Jezu we cyɔ, bɔ Pilatu na ɛ gbe, bɔ e yi ze cyɔ lɔ. 39 Nikodɛmu ke zɔn zan gbe ɖokpo, bo yi mɔ Jezu ɔ lɔsu wa Jezu we cyɔ kɔn. Nikodɛmu kple mila kpo alowɛsi kpo, bo hɛn, bɔ e na yi nudagan gban ha. 40 Ye ɖiɖa Jezu we cyɔ, bo lilɛ akwanuvɔ ɖe do e, bo sa mila kpo alowɛsi kpo ke e cankple lɔ n'i, le ke Jwifu lɛɛ ko nɔ blo ɖo na cyɔ hwɛ kpo nɔ ɖi lɔ. 41 Jikpa ɖe ka le fi ke e ka Jezu ɖo akluzu ji le, bɔ cyɔ do yɔyɔ ɖokpo le e mɛ, bɔ e ma ko ɖi mɛti d'e mɛ kpɔn gɛ. 42 Flɛn wɛ ye ɖi Jezu ɖo, ɖo cyɔ do lɔ ma dɛɛn do flɛen gɛ, bɔ Jwifu lɛɛ ka kole gbɔjɛzan lɔ we nu sɔ ɔn.