¹ Ke Jezu fan kwe exɔn na Otɔɔ godo, eyɔ kpo ahwanvi etɔn lɛɛ kpo d'asa sedlɔn we otɔ lɔ jɛ aga ɖyɛ ji. ² Jikpa ɖe ka le flɛn, bɔ ye byɛ mɛ. Judasi ke jlo na sa Jezu lɔsu nyɔ filɔ wi, ɖo Jezu kpo ahwanvi etɔn lɛɛ kpo ko nɔ kple le flɛn tɛgbɛ. ³ Exɔn, Judasi kplan sɔjahwan lɛɛ kpo sinsɛnxɔcɔtɔ ke vɔsanu-xwlemawutɔgan lɛɛ, kpo Falizei lɛɛ kpo na ɛ lɛɛ kpo, bɔ ye yi jikpa lɔ mɛ. Ye hɛn zogbɛn, bo hɛn zohwin kpo alinnyanu kpo ɖo alɔ mɛ. ⁴ Jezu ka ko nyɔ nu ke na gbo e lɛɛ kpokpo, bo sɛ yi nukɔn yetɔn, bo ɖɔ: "Mɛ wɛ mi le din?" ⁵ Ye yigbe n'i ɖɔ: Jezu Nazalɛtinu lɔ wɛ mi le din" E ka ɖɔ na ye ɖɔ: "Nyɛ ke." Judasi ke le sa ɛ ɖu lɔ lɔsu le ye mɛ. ⁶ Ke Jezu yigbe na ye bo ɖɔ nyɛ ke ɔ, ye mɛ kpokpo zɔn agwɛ agwɛ , bo yi jɛ anyi. ⁷ Jezu lɛɛ kanse ye azɔn awegɔ ɖɔ: "Mɛ wɛ mi ka le din?" Bɔ ye lɛɛ yi gbe n'i ɖɔ: "Jezu Nazalɛtinu lɔ wɛ mi le din." ⁸ Jezu ka ɖɔ na ye ɖɔ: "Un ko ɖɔ na mi ɖɔ nyɛ wɛ; enyi nyɛ jɛn wɛ mi le din, hun mi o jo omɛ ekɔ lɛɛ do, na ye ni yi." ⁹ E ɖɔ le, na oxo ke elɔsu ko ɖɔ d'anyi ɔ na do jɛ; e wa nyi ɖɔ: " Mɛ ke a na un lɛɛ ɖe kpekpe ma bu gɛ." ¹⁰ Simɔɔ Piyɛɛ ka kpla ohi , bo sun ohi etɔn sɔn akpa mɛ, bo xu vɔsanu-xwlemawutɔ ɖaxo we mɛsɛntɔ ɖokpo, bo kpa oto etɔn aɖisixwe tɔn. ¹¹ E nɔ ylɔ mɛsɛntɔ exɔn ɖɔ Malukusi. Jezu ka ɖɔ na Piyɛɛ ɖɔ: "Ze ohi towe do akpa etɔn mɛ. Awuvɛ kɔfo ke Otɔɔ ɖɔ nyɛ ni nu, un ma le nu gɛ wɛ?" ¹² Exɔn godo, sɔjahwan lɛɛ kpo mɛ ke le ye nu lɔ kpo, kpo sinsɛnxɔcɔtɔ Jwifu lɛɛ tɔn kpo wle Jezu, bo bla ɛ. ¹³ Ye to kplan ɛ ze yi Hanna de hwɛkpo. Hanna exɔn wɛ nyi asitɔ na Kayifu ke le vɔsana-xwlemawutɔ ɖaxo nyi ɔ le oxwe exɔn mɛ. ¹⁴ Kayifu exɔn wɛ ko kplɔn nu Jwifugan lɛɛ ɖ'anyi ɖɔ: "Mɛ ɖokpo ku do oto lɔ kpokpo ta mɛ, e nyɔ xu oto kpokpo na ku." ¹⁵ Sinmɔɔ Piyɛɛ kpo ahwanvi ɖevo kpo xodo Jezu. Ahwanvi exɔn lɔ, vɔsanu-xwlemawutɔ ɖaxo lɔ nywɛ wi; exɔn wutu wɛ eyɔ xodo Jezu bo byɛ oxwe lɔ gbe. ¹⁶ Piyɛɛ ka ci hɔntogbo ji; exɔn, ahwanvi ke vɔsanu-xwlemawutɔ ɖaxo lɔ nywɛ ɔ lɛ kɔ bo wa ɖɔ xo na nyɔnu hɔnjinɔtɔɔ, bo kplan Piyɛɛ byɛ oxwe gbe. ¹⁷ Nyɔnu hɔnjinɔto ɔ ka kanse Piyɛɛ ɖɔ: "Yɔ lɔsu ma le omɛ exɔn we ahwanvi lɛɛ mɛ al?" Bɔ Piyɛɛ ma le ye mɛ gɛ." ¹⁸ Mɛsɛntɔ lɛɛ kpo sinsɛnxɔcɔtɔ lɛɛ kpo flɔ akan, bo le te bo lilɛ do, bo le ozo lɔ xu ɔn, ɖo vivɔ gbɛ. Piyɛɛ lɔsu le te le ye mɛ, bo le ozo xu ɔn. ¹⁹ Vɔsanu-xwlemawutɔ ɖaxo kan xo se Jezu do ahwanvi etɔn lɛ wu, bo lɛ kan xo se wi do nu ke e nɔ kplɔn mɛ lɔ wu. ²⁰ Bɔ Jezu ka yi gbe n'i ɖɔ: "Agbawungba wɛ un ɖɔ xo na mɛ lɛɛ kpo le. Tɛgbɛ wɛ un ka nɔ kplɔn nu mɛ lɛɛ le kplɔngbasa lɛɛ, kpo sinsɛnxɔ mɛ kpo, fi ke Jwifu lɛɛ kpo nɔ kple le. Un ma ɖɔ nuti le nugɔ gɛ. ²¹ Etɛ wu wɛ a ka le kan nu se un? Kan nu ke un ɖɔ lɔ se mɛ ke un ɖɔ xo na lɛɛ, ɖo ye lɛɛ wɛ nyɔn nu ke un kplɔn ye lɛɛ." ²² Ke Jezu ɖɔ le e, sinsɛnxɔcɔtɔ ɖokpo le flɛn, bo xo tomɛ n'i, bo ɖɔ: "Le wɛ a na yi gbe na vɔsa-namawutɔ ɖaxo lɔ ɖo o?" ²³ Jezu ka yi gbe n'i ɖɔ: "Enyi un ɖɔ xo nyi do hun bo ɖe xo ke un ɖɔ gbɔ lɔ xlɛ; e ka nyi xo ganji wɛ un ɖɔ, etɛ wutu a ka xo tomɛ na un?" ²⁴ Jezu le bibla le, bɔ Hanna nyi i do xlan Kayifu vɔsa-namawutɔ ɖaxo lɔ de. ²⁵ Sinmɔɔ Piyɛɛ le te, bo le xu zo le flɛn, bɔ ye kanse wi ɖɔ: "Yɔ lɔsu ma le ahwanvi omɛ exɔn tɔn mɛ?" E ka gbɛ, bo ɖɔ: "Eeo, nyɛ ma le ye mɛ gɛ!" ²⁶ Vɔsa-namawutɔ ɖaxo we mɛsɛntɔ ke Piyɛɛ kpa to na lɔ we mɛ ɖokpo kanse Piyɛɛ ɖɔ: "Un ma mɔ yɔ kpo omɛ exɔn kpo le jikpa lɔ mɛ?" ²⁷ Piyɛɛ ka lɛ gbɛ, bɔ tlolo kpowun, koklo d'ase. ²⁸ Ye kplan Jezu sɔn Kayifu xwegbe, bo kplan ɛ ze yi tokpɔngan Hlɔmanu lɛɛ tɔn we hɔnmɛ zaanfunu tɛɛn. Amɔ, Jwifu lɛɛ ma ka byɛ hɔn lɔ mɛ gɛ, ɖo ye taa wa ɖu su, bɔ oxwe ɖuɖu na wa gbo ye. ²⁹ Exɔn wutu wɛ ¨Pilatu gbɔ bo tɔn, bo wa mɔ ye, bo kanse ye ɖɔ: "ohwɛ tɛ do omɛ ekɔ wɛ mi ka le?" ³⁰ Ye yi gbe n'i ɖɔ: "E ma ko nyi onu nyinyla watɔ gɛɛ, mi na le kplan ɛ wa na we gɛ." ³¹ Exɔn, Pilatu ɖɔ na ye ɖɔ: "Mye lɔsu mi bo kplan ɛ, bo ɖɔ hwɛ xa ɛ ɖi le ke osɛn mitɔn jlo ɖo ha." Jwifugan lɛɛ ka yi gbe n'i ɖɔ: "Mi ma ɖo acɛ ke hu mɛ gɛ. ³² Onu ci le, na oxo ke Jezu lɔsu ɖɔ d'anyi do oku alɔkpa ke e na ku lɔ wu na do jɛ. ³³ Pilatu ka lɛkɔ yi hɔn lɔ mɛ, bo ylɔ Jezu, bo kanse wi ɖɔ: "Yɔ wɛ nyi Jwifu lɛ we axɔlu u?" ³⁴ Jezu ka yi gbe n'i ɖɔ: "Oxo exɔn ke a le kanse nyɛ, yɔ lɔsu we xomɛ wɛ etɔn sɔn, alo mɛ ɖevo wɛ ɖɔ xo ce na we," ³⁵ Pilatu ka yi gbe n'i ɖɔ: "Nyɛ ɔ, Jwifu wɛ un nyi? Oto towe me nu lɛɛ kpo vɔsa-namawutɔgan lɛɛ kpo wɛ kplan we wa na un. Etɛ a ka wa?" ³⁶ Jezu ka yi gbe n'i ɖɔ: Axɔluɖuɖu ce ma nyi gbɛ mɛ fi tɔn gɛ; e nyi gbɛ mɛ fi tɔn wɛ e ko nyi, ahwanvi ce lɛɛ na ko fun ahwan, na e ma na do jo un na Jwifugan lɛɛ gɛ; axɔluɖuɖuce ma ka nyi gbɛ mɛ fi tɔn gɛ." ³⁷ Pilatu lɛ kanse wi ɖɔ: "Hun axɔlu wɛ a nyi alo?" Bɔ Jezu yi gbe n'i ɖɔ: "Yɔ wɛ ɖɔ un nyi axɔlu. Ye ji un, bɔ un wa gbɛ lɔ mɛ, bo na ɖe kunnu na xonugbo lɔ. Mɛ ke nɔ xodo xonugbo lɔ kpo wɛ nɔ ɖoto xo ce." ³⁸ Pilatu kanse wi ɖɔ: "Etɛ ka nyi xonugbo lɔ?" Ke Pilatu kan xo exɔn se Jezu ɔ, e lɛ tɔn, bo yi ɖɔ na Jwifu ke gbɛ wan na Jezu lɛɛ bo ɖɔ:"Un ma mɔ nuke wu un na hɛn bo na do da hwɛ na omɛ ekɔ ɖe gɛ. ³⁹ Amɔ, walɔ mitɔn wɛ e ko nyi, bɔ un nɔ jo ogantɔ ɖokpo na mi dindin wa yixwe lɔ hwenu. Mi jlo na ma jo Jwifu lɛɛ xɔlu lɔ na mi?" ⁴⁰ Ye mɛ kpo ka ɖ'axwa, bo ɖɔ: "gbeɖe, eyɔ mɛ a na jo na mi gɛ, Balabasi wɛ a na jo na mi!" Ajotɔ danuwatɔ ɖokpo wɛ ka nyi Balabasi lɔ.