¹ Ke Jezu ɖɔ oxo exɔn lɛ, e kpɔn ji, bo ɖɔ "Otɔ, hwe lɔ nu ke su lo; ze Ovi towe sɔ su, nɛ Ovi towe lɔsu na ze we sɔ su. ² Ɖo a na ɛ acɛ ɖo gbɛtɔ lɛe kpokpo ji, bɔ e na na gbɛ mavɔ mavɔ mɛ ke a sɔ do alɔ mɛ n'i lɛɛ kpo sese. ³ Gbɛ mavɔ mavɔ lɔ wɛ nyi ɖɔ ye na nyɔ we, bo nywɛ ɖɔ yɔ wɛ nyi Mawu xonugbo tɔn ɖokpo ke le, bo lɛ nyɔ Jezu Klisi ke a ze ɖoxlan gbɛ lɔ mɛ lɔ. ⁴ Un wa azɔn ke a zɔn un ɔ, un blo yi fo, bo do ze we sɔ su le anyizan ji. ⁵ Otɔ! Odin, bo na un susu ce ke un ko ɖo le di we, hwɛkpo bɔ a ɖo gbɛ lɔ. ⁶ "Un ze we xlɛ mɛ ke a ze do alɔ mɛ na un le gbɛ lɔ mɛ lɛɛ. ⁷ Towe wɛ ye ko nyi, bɔ aka ze ye do alɔ mɛ na un, bɔ ye se tonu na we. ⁸ Odin, ye nywɛ ɖɔ nu ke a na un lɛɛ kpokpo wɛ sɔn diwe, ɖo oxo ke a ze do alɔ mɛ na un lɛɛ, un ɖɔ kpokpo na ye, bɔ ye yi kpokpo; ye ɖi nu ɖɔ diwe wɛ un sɔn xonugbo. ⁹ "Ota yetɔn mɛ fan kwe do wɛ un le. E ma nyi mɛ ke nyi ogbɛ lɔ tɔn lɛɛ tamɛ wɛ un le fan kwe ɖo gɛ; amɔ, mɛ ekɔ lɛɛ ke a ze do alɔ mɛ na un lɛɛ tamɛ fan kwe na we do wɛ un le, ɖo towe wɛ ye nyi. ¹⁰ Onu ke nyi ce ɔ kpokpo wɛ nyi towe; onu ke ka nyi towe ɔ kpokpo wɛ nyi ce, bɔ e nɔ kpa susu na un ɖo ye mɛ. ¹¹ Un ma sɔ le gbe lɔ mɛ gɛ, ye lɛɛ ka kpo le gbɛ lɔ mɛ, bɔ nyɛ ja diwe . Otɔ ɖeɖovo! Kpɔn mɛ ke a ze do alɔ mɛ na un lɛɛ ji le nyikɔ towe mɛ, na ye na nyi ɖokpo, le ke yɔ kpo nyɛ kpo nyi ɖokpo ɖo ha. ¹² Hwekenu un le kpɔ xa ye, un hɛn ye ɖo acɛ ke a na unlɔ mɛ; un kpɔn ye ji, bɔ mɛ ɖokpo bu le ye mɛ zɛ mɛ ke ɖo na bu lɔ wu gɛ, na oxo ke Mawuxowema lɔ ɖɔ na do jɛ. ¹³ Un ko ja diwe; amɔ odin ke kpo le gbɛ lɔ mɛ, un ɖɔ oxo exɔn lɛɛ na ye, na xomɛhunhun ce ma ɖo ablɔɔ na ɔ yɛ mɛ. ¹⁴ Unze oxo towe do alɔ mɛ na ye , bɔ me ke nyi ogbɛ lɔ tɔn lɛɛ gbɛ wan na ye, ɖo ye ma nyi ogbɛ lɔ tɔn gɛ, le ke nyɛ lɔsu ma nyi ogbɛ lɔ tɔn gɛ ha. ¹⁵ Un ma byɔ we ɖɔ a ni ɖe ye sɛ le ogbɛ lɔ mɛ gɛ; amɔ, hwlɛn ye le awovi si. ¹⁶ Ye ma nyi ogbɛ lɔ tɔn gɛ, ɖi leke nyɛ lɔsu ma nyi ogbɛ lɔ tɔn gɛ ha. ¹⁷ Blo na ye ni nyi towe gbɔn oxo towe ke nyi xonugbo lɔ mɛ. ¹⁸ Un ze ye ɖoxlan ogbɛ lɔ mɛ, ɖii le ke a ze un ɖoxlan ogbɛ lɔ mɛ ɖoha. ¹⁹ Un ze nyɛ lɔsu blebu sɔ jo na we ɖo ye wuwu, na ye lɔsu na sigan nyi towe xonugbo. ²⁰ E ma nyi ye kɛɖɛ tamɛ wɛ un le fan kwe do gɛ; amɔ, mɛ ke na se xo ce lɛɛ le onu yetɔn, bo na ɖi nu na un lɛɛ kpokpo we tamɛ wɛ un le fan kwe na we do; na ye mɛ kpokpo ni nyi ɖokpo, ɖi leke nyɛ kpo yɔ kpo nyi ɖokpo ɖo ha. ²¹ Otɔ, a le nyɛ mɛ, bɔ nyɛ lɔsu le yɔ mɛ; ye ni nɔ bute le mi mɛ, na gbɛtɔ lɛɛ na do nywɛ ɖɔ yɔ wɛ ze un ɖoxlan xonugbo. ²² Susu ke a na un ɔ, un na ye lɔsu, na ye naa nyi ɖokpo, ɖi leke yɔ kpo nyɛ kpo nyi ɖokpo ɖo ha. ²³ Nyɛ le yɔ mɛ, bɔ yɔ le nyɛ mɛ, na ye na nɔ bute xonugbo, na gbɛtɔ lɛɛ na do nywɛ ɖɔ a ze un ɖoxlan, bo yi bo yi wan na ye, ɖi leke a yi wan na nyɛ ɖo ha. ²⁴ Otɔ! Un jlo ɖɔ fi ke un le ɔ, mɛ ke a na un lɛɛ lɔsu na nɔ flɛn xa un, na ye ni mɔ susu ke a na un, ɖo a ko yi wan na un hwɛkpo bo wa ɖo gbɛlɔ. ²⁵ Otɔ hwɛjijɔnɔ! Ogbɛ lɔ ma nyɔ we wi nɛ! Nyɛ ka nyɔ we, bɔ mɛ ekɔ lɛɛ nywɛ ɖɔ yɔ wɛ ze un ɖoxlan. ²⁶ Un ze we xlɛ ye, bo ka na lɛ ze we xlɛ xu le, na owan nyinyi ke a ɖo na un lɔ na nɔ ye mɛ, na nyɛ lɔsu na nɔ ye mɛ.