¹ Un ɖɔ oxo lɛɛ kpokpo na mi din, na nuɖiɖi mitɔn ni nɔkpɔn jɛ anyi gɛ. ² E na wa ɖe mi tɔn sɔn ɖɛxotɛnmɛ lɛɛ. Ogan lɔ ko jɛ xixo gbe, bɔ mɛ ɖɛ kpekpe ke hu mi ɔ, mɛ lɔ na do sin ɖɔ Mawu we azɔn wɛ e mi le wa ɔn sin. ³ Ye na blo lexa, ɖo ye ma nyɔ Atɛe wi gɛ; ye ma ka nyɔ nyɛ lɔsu wi gɛ. ⁴ Hun, un le oxo ekɔ lɛɛ ɖɔ na mi, nɛ ogan etɔn wa xo ɔ, mi na flin ɖɔ un ko ɖɔ oxo exɔn lɛɛ na mi". ⁵ Amɔ, odin ɔ, un xwe mɛ ke ɖo un ɖoxlan lɔ de, bɔ mɛ ɖe ma ka le mi mɛ, bo kanse un ɖɔ bɔ wɛ a xwe. ⁶ Ke un ɖɔ lexa na mi ɔ, awu jɛn ku mi, co xonugbo wɛ un le ɖɔ na mi: Yiyi ce na ɖo ale na mi xugan; ɖo e nyi un ma wa yi gɛɛ, gbɔ donamɛtɔ ɔ ma sigan wa mide gɛ. E nyi un ka yi ɔ, un na sɛɛ ɖoxlan mi. ⁷ E na wa ɖe kunnu na hihɔn lɔ, nɛ mi mɛ bisese na do ɖinu na hihɔn lɔ, gbɔn kunnu ɖiɖe etɔn gblamɛ. ⁸ E nyi e ko wa ɔ, e na ɖe xlɛ gbɛtɔ lɛɛ ɖɔ, linlin ke ye ɖo do ohwɛhuhu wu, bo ɖo do ojlo Mawu tɔn kpo ohwɛɖiɖɔ kpo wu ɔ ma sɔgbe gɛ. ⁹ Linlin ke ye ɖo do ohwɛhuhu ma sɔgbe gɛ; ɖo ye ma ɖi nu na un gɛ. ¹⁰ Linlin ke ye ɖo do ojlo Mawu tɔn wu ɔ ma sɔgbe gɛ, ɖo un xwe Atɛe de, bɔ mi ma sɔ na mɔ un ɖe gɛ. ¹¹ Linlin ke ye ɖo do ohwɛɖiɖo Mawu tɔn wu ma sɔgbe gɛ, ɖo Mawu ke da hwɛ na axɔlu gbɛmɛ fi tɔn lɔ. ¹² E kpo onu susu, bɔ un ɖo na ɖɔ na mi; amɔ, mi ma sigan mɔ nukunnu jɛ ye mɛ gɛ. ¹³ Hwenu ke Oyɛ ke nɔ ɖe xonugbe Mawu tɔn xlɛ ɔ na wa ɔ, e na blo, bɔ mi na nyɔ xonugbo lɔ kpo sese wi; ɖo e ma nyi acɛ elɔsu tɔn mɛ wɛ e na ɖɔ xo do gɛ; amɔ, nu ke e se ɔ wɛ e na ɖɔ, bo na ɖɔ nu ke na wa jɛ lɛɛ na mi. ¹⁴ E na ze mi su, ɖo nuke un ɖɔ n'i ɔ wɛ e na ɖɔ na mi. ¹⁵ Nu ke nyi Otɔ ɔ tɔn ɔ kpo sese wɛ nyi ce. Exɔn wutu wɛ un ɖɔ na mi ɖɔ: "Nu ke un ɖɔ n'i ɔ wɛ e na ɖɔ na mi." ¹⁶ "Zaanɖe din ɔ, mi na ba un kpo, e ka nɔ zaanɖe ɔ, mi na mɔ un, ɖo un xwe Atɛe de." ¹⁷ Ke Jezu ɖɔ lee, ahwanvi etɔn lɛɛ ɖee jɛ oxo kanse ji, bo nɔ ɖɔ: "Etɛ ɖɔ na mi wɛ e ka le, bo ɖɔ: "Zaanɖe din ɔ, mi na ba un kpo; zaanɖe din ɔ, mi na mɔ un; bo ka lɛ ɖɔ: "Ɖo un xwe Atɛe de!" ¹⁸ Etɛ ka nyi: "Zanɖe dinɔ? Mi ma mɔ nukunnu jɛ oxo ke ɖɔ na mi wɛ e le ɔ mɛ nɛ!" ¹⁹ Jezu ka nywɛ ɖɔ ye jlo na kan onu se emi, bo ɖɔ na ye ɖɔ: "Ke un ɖɔ na mi ɖɔ zaanɖe din ɔ, mi na ba un kpo, e ka lɛ nɔ zaanɖe ɔ mi na mɔ un ɔ, e wu wɛ mi le kan nu se miɖe do?" ²⁰ Ma ɖɔ xonugbo na mi: mi na nɔ le avi vi ɔn, bo na nɔ le ale na ɔ, bɔ mɛ ke nyi gbɛmɛ fi tɔn lɛɛ ka na nɔ le jɛ awa. Mi na nɔ awubla mɛ, amɔ, awubla mitɔn na lilɛ zɔn awajijɛ na mi. ²¹ Nyɔnu ja ovi ji gbe ɔ, awu nɔ ku i, ɖo awuvɛ mimɔ etɔn we ogan wɛ xo; e ka ji ovi lɔ godo ɔ, e mɔ nɔ sɔ flin awuvɛ ke e mɔ lɛɛ gɛ, xomɛ nɔ hun i ɖo ovi ke wa gbɛ lɔ wu. ²² Lexa ke, mye lɔsu le awubla mɛ din; amɔ, un na lɛ wa mɔ mi, bɔ mi na mɔ awajijɛ, bɔ mɛ ɖe kpekpe ma sigan ɖe awajijɛ exɔn sɔn ayi mitɔn mɛ gɛ. ²³ Azan exɔn gbe ɔ, mi ma sɔ na kan onuti se un gɛ. Ma ɖɔ xonugbo na mi: "Nu ke mi na byɔ Otɔɔ, e na na kpo sese mi le nyikɔ ce mɛ. ²⁴ Amɔ, kaka wa jɛ din ɔ, mima ko byɔ onuti le nyikɔ ce mɛ gɛ; mi byɔ, ba na mɔ yi na awajijɛ mitɔn ɔ, nu lɛɛ kpo na vɔ le e wu." ²⁵ "Olo wɛ un ɖɔ, bo do ɖɔ oxo exɔn lɛɛ kpo sese na mi; amɔ, e na wa jɛ hweɖenu, bɔ un ma sɔ na do olo do ɖɔ oxo na mi gɛ. Hwe exɔn nu ɔ, un na ɖɔ Otɔɔ we xo na mi ɖo vaan mɛ. ²⁶ Azan exɔn gbe ɔ, mi na nɔ ylɔ nyikɔ ce do byɔ onu Otɔɔ. E ma nyi un na do kɛnklɛn na Otɔ do ota mitɔn mɛ wɛ un le ɖɔ gɛ. ²⁷ Ɖo elɔsu yi wan na mi, ɖo mi yi wan na un, bo ka ɖi nu ɖɔ Mawu wɛ sɛ un ɖoxlan. ²⁸ Un sɔn Otɔɔ de, bo wa gbɛmɛ fikɔ; odin ɔ, unle lɛ sɔn gbɛ lɔ mɛ, bo xwe Otɔɔ de." ²⁹ Ahwanvi etɔn lɛɛ ka ɖɔ n'i ɖɔ: "Odin ɔ, a nɔ ɖɔ oxo ɖo vaan mɛ, bo ma sɔ nɔ do olo gɛ. ³⁰ Mi mɔ din ɖɔ a nyɔ onu kpokpo wi; e ma sɔ byɔ ɖɔ mɛ ɖe ni lɛ kan nu se we gɛ. Exɔn wɛ zɔn bɔ mi ɖi nu ɖɔ a sɔn Mawu de xonugbo." ³¹ Jezu ka ɖɔ na ye ɖɔ: "Mi ɖi nu din lo a?" ³² Hwenu ko le su; hwe lɔ nu jɛn ka ke, bɔ e na gba mi do, bɔ mɛ ɖokpo ɖokpo na yi oxwe etɔn gbe, bo na jo nyɛ ɖokponɔ do; amɔ, un ma le nyɛ ɖokponɔ gɛ, ɖo Otɔɔ le kpo xa un. ³³ Un ɖɔ onu exɔn lɛɛ na mi, nɛ mi na ɖo vivo le nyɛ mɛ. Mi na mɔ awuvɛ le ogbɛ lɔ mɛ; amɔ, mi ɖo akɔnkpinkpan, ɖo un ko ɖu le ogbɛ lɔ ji."