¹ Exɔn godo, Jezu lɛ ze eɖee xlɛ ahwanvi etɔn lɛɛ le Tibɛliadi we otɔ to. Le ke e ka ze eɖee xlɛ ye ɖo lɔ ke: ² Sinmɔɔ Piyɛɛ, Tɔmaa ke e nɔ ylɔ ɖɔ hoho lɔ, Natanayɛli ke sɔn Kana le Galilee we anyizan ji lɔ, Zebedee we ovi sunnu awe lɛɛ, kpo ahwanvi Jezu tɔn awe ɖevo lɛɛ kpo le kpɔ. ³ Sinmɔɔ Piyɛɛ ɖɔ na ye ɖɔ: "Un na yi tɔ ji, bo na yi da ɖɔ;" bɔ mɛ ɖyɛ lɛ ɖɔ n'i ɖɔ: "Mye lɔsu na xodo we yi." bɔ ye yi byɛ tɔjihun mɛ, bo sɛ yi tɔ tɔ ji; ye ma ka wle nuti le ozan exɔn mɛ gɛ. ⁴ Ke anyi le hɔn ɔ, Jezu wa nɔ te le tɔ lɔ to, ahwanvi etɔn lɛɛ ma ka nywɛ ɖɔ e wɛ gɛ. ⁵ Jezu ɖɔ na ye ɖɔ: "Ovi ce lɛɛ; mi ma mɔ nuɖe wle e?" Ye ka yigbe n'i ɖɔ: "Eeo! Mi ma wle nuti gɛ." ⁶ E ka ɖɔ na ye ɖɔ: "Mi bo da ɖɔ lɔ ɖo aɖisixwe na tɔjihun lɔ, exɔn mi na mɔ ohwe bo na wle." Ye ka da ɖɔ lɔ ɖo aɖisixwe xonugbo, bɔ oɖɔ lɔ wle ohwe susu geɖe geɖe, kaka bɔ ye ma kpe ewu bo na dɔn ɛ tɔn gɛ. ⁷ Exɔn, ahwanvi ke Jezu nyi wan na lɔ ɖɔ na Piyɛɛ ɖɔ: "Aklunɔ wɛ!" Ke Sinmɔɔ Piyɛɛ se ɖɔ Aklunɔ wɛ, e ze awu etɔn bo sin do alinmɛ, bo zrɔn jɛ otɔ lɔ mɛ, ɖo e ko ɖe awu ɖ'anyi. ⁸ Ahwanvi ɖyɛ lɛɛ ka zɔn tɔjihun lɔ mɛ bo wa, bo dɔn oɖɔ lɔ, bɔ ohwe gɔ ɛ. Fi ke ye le do aga lɔ ma sɔ dɛɛn gɛ; e na yi nujlɛkpo kanwe ko mɔ. ⁹ Ke ejɛ tee, ye mɔ zokan, bɔ e le hi hwe le eji; ye lɛ mɔ owɔxuxu le flɛn. ¹⁰ Jezu ɖɔ na ye ɖɔ: "Mi ze ohwe ke mi wle lɛɛ ɖe wa." ¹¹ Ke Jezu ɖɔ lexa a, Sinmɔɔ Piyɛɛ yi byɛ tɔjihun lɔ mɛ, bo dɔn oɖɔ lɔ tɔn, bɔ ohwe kiklo kantɔn gban-nukun-atɔn le oɖɔ lɔ mɛ, co oɖɔ lɔ ma vun gɛ. ¹² Jezu ɖɔ na ye ɖɔ: "Mi wa ɖu nu." Ahwanvi lɛɛ ɖokpo ma gla, bo kan mɛ ke e nyi lɔ se wii gɛ ɖo ye mɛ kpokpo ko nywɛ ɖɔ Aklunɔ wɛ. ¹³ Jezu ka sɛ yi yede, bo ze owɔxuxu lɔ na ye, bo lɛ ze ohwe lɔ na ye. ¹⁴ Sɔn hwekenu Jezu fɔn sɔn hu lɔ ɔ, hwlan'tɔngɔ wɛ e le ɖe eɖee sɔ xlɛ ahwanvi etɔn lɛɛ. ¹⁵ Ke ye ɖu nu un Jezu ɖɔ na Sinmɔɔ Piyɛɛ ɖɔ: "Sinmɔɔ ovi Jaan tɔn! A ma nyi wan na un xu le ke mɛ ekɔ lɛɛ nyi wan na un ɖo ha gɛ?" Bɔ Piyɛɛ yi gbe n'i ɖɔ: "Ɛɛ Aklunɔ; a nywɛ ɖɔ un nyi wan na we. " Bɔ Jezu ɖɔ n'i ɖɔ: "Na nuɖiɖi lɛngbɔvi ce lɛɛ!" ¹⁶ Jezu lɛɛ kanse wii hwlan awegɔ ɖɔ: "Sinmɔɔ ovi Jaan tɔn, a ma nyi wan na un ganji gɛ?" Bɔ Piyɛɛ lɛ yi gbe n'i ɖɔ: "Ɛɛ Aklunɔ, a nywɛ ɖɔ un nyi wan na we." Bɔ Jezu lɛɛ ɖɔ n'i ɖɔ: "Kpe nukun do lɛngbɔ ce lɛɛ wu." ¹⁷ Jesu lɛ kanse wii hwlan'tɔngɔ ɖɔ: "Sinmɔɔ ovi Jaan tɔn, a nyi wan na un?" Ke Piyɛɛ mɔ ɖɔ Jezu kanse emye hwlan'tɔngɔ ɖɔ e nyi wan na emye ja ɔ, awu ku i, bɔ e gbɔ bo yigbe n'i ɖɔ: "Aklunɔ, a nyɔ nu lɛɛ kpokpo wii; a nywɛ ɖɔ un nyi wan na we." Jezu ka ɖɔ n'i ɖɔ: "Na nuɖuɖu lɛngbɔ ce lɛɛ. ¹⁸ Un na ɖɔ xonugbo na we, hwekenu a winwyan mɛ, yɔ lɔsu wɛ nɔ sin gojiblanu towe, bo nɔ yi fi ke jlo we lɛɛ kpokpo; amɔ, hwekenu a na wa kpo nyɔxo o, a na dlɛn alɔ towe lɛɛ, bɔ mɛ ɖevo na sin gogiblanu na we, bo na dɔn we gbɔn fi ke a ma jlo gɛ lɛɛ." ¹⁹ Oku alɔkpa ke Piyɛɛ na ku, bo na do na susu Mawu e xlɛ ɛ wɛ Jezu le, bo le le ɖɔ n'i; exɔn godo, e ɖɔ n'i ɖɔ: "Xodo un." ²⁰ Piyɛɛ ka lɛ kɔ bo kpɔn godo, bo mɔ ahwanvi ke Jezu nyi wan na lɔ ja le godo yetɔn; ahwanvi exɔn wɛ sɛkpɔ Jezu hwekenu ye le ɖu nu lɔ, bo kanse wii ɖɔ: "Aklunɔ, mɛ wɛ ka na sa we ɖu?" ²¹ Ke Piyɛɛ mɔ ahwanvi exɔn lɔ, e kanse Jezu ɖɔ: "Aklunɔ, mɛ ekɔ ka ɖe? Etɛ ka na jɔ do eyɔ ji?" ²² Jezu ka yigbe n'i ɖɔ: "Enyi un jlo eyɔ ni nɔ anyi kaka bɔ na lɛkɔ wa a, etɛ wɛ kanwe le emɛ? Yɔ lɔɔ, xodo un." ²³ Oxo exɔn gba kpe mɛ ke ɖinu na Jezu lɛɛ mɛ, bɔ ye ɖɔ ahwanvi exɔn ma le ku gɛ; Jezu ka ɖɔ e ma le ku gɛ; amɔ, e ɖɔ n'i ɖɔ: "Enyi un jlo ɖɔ e ni nɔ anyi kaka na ma lɛkɔ waa, etɛ wɛ kan we le emɛ?" ²⁴ Ahanvi exɔn wɛ le ɖe kunnu na onu ekɔ lɛɛ kpo; e wɛ wlan nu ekɔ lɛɛ, bɔ mi nywɛ ɖɔ xonugbo wɛ e ɖɔ. ²⁵ Jezu lɛ blo onu susu geɖe geɖe ɖevo lɛɛ, bɔ enyi e gbɛ d'e go bo na wlan ɖe bɔ do ɖe wu, un ɖiɖɔ wema etɔn na su kaka bɔ ogbɛ lɔ kpokpo ma sigan hɛn gɛ.