¹ Klisi tun kan na mi na mi na do jɛ mi ɖe si. Mi do gan, mi nɔ kpɔn jo mi ɖe do sinsin na owlɔ kannumɔnɔ tɔn gɛ. ² Nyɛ Pɔlu, un le ɖɔ na mi: Na mi gbo ada , klisi ma sɔ nyi nu de na mi gɛ. ³ Hwlan lokpo do gɔ, un le ɖɔ na mɛ ke gbo ada lɛ : Mi ɖo na se tonu na osɛn lɔ kpokpo. ⁴ Mi mɛ ke le ba na nyi hwɛ jijɔnɔ do gbɔn osɛn lɔ mɛ; mi e mi klan xa Klisi, mi bu nu ke Mawu na mi lɛ. ⁵ Na mi mɛ ke ɖi nu lɛ, mi ɖo nu kun ɖɔ Mawu na ze mi zun hwɛ jijɔnɔ, bɔ Yɛ ɖeɖovo lɔ wɛ na bɔ mi le te kpɔn onu le tɔn le hun maku mɛ. ⁶ Na mɛ ɖe nyi lokpo xa Jezu Klisi, ada gbi gbo kpo ada ma gbo ma ɖo yɛyi ti gɛ! Nu ta ji lɔ wɛ nyi nu ɖiɖi kpodo e na xlɛ nu ɖiɖi mɛ tɔn kpo le wan nyinyi mɛ. ⁷ Mi sɔn ganji. Mɛ wɛ su omɔ do mi bo gbɛ na mi ɖɔ mi nɔ kpɔn ɖi zɔnli gbɔn xojɔxo lɔ ji gɛ? ⁸ Ta sɔ mɛ xɔn ma sɔn Mawu ke ylɔ mi de gɛ. ⁹ Wɔ fɔn nu kpɛ ɖe wɛ nɔ ze wɔ lɔ kpokpo ci te. ¹⁰ Co Mawu na un jiɖiɖe do mi go: Mi ma le ɖo linlin vo ɖe ze na ce gɛ. Amɔ mɛ ke le wa nu ɖe jan le mi de lɛ kpokpo na mɔ hwɛ dida yi. Mɛ ti ma na hwe le mɛ gɛ. ¹¹ Bɔ nyɛ, na nɔvi sunu kpo do yɔnu, un lɛ le la na mi ɖɔ mi na gbo ada wɛ? Na e nyi ɛɛ, bɔ etɛ wutu wɛ e le do vivɛ sise na un? Na do ɖɔ, na un le la onu exɔn, akluzu Klisi tɔn ma sɔ nyi afɔ klɛnnu na mɛ ti gɛ. ¹² Un jlo ɖɔ mɛ ke le dɔn mi do nu nyiyla mɛ ni nɔ zɔ na mi titewungbe. ¹³ Ɖo Mawu ylɔ mi na mi na do vo wɛ. Bɔ mi nɔ kpɔn kpɔn do exɔn wutu bo wa jlo agbaza tɔn gɛ. Mi nyi nu zizan na mi ɖe do gbɔn wan nyinyi mɛ. ¹⁴ Ɖo osɛn Moyizi tɔn lɔ kpokpo flɔn onu lokpo ji: «Nyi wan na awegɔ towe ɖi yɔ lɔsu ha.» ¹⁵ Amɔ na mi nɔ xu aɖu mi ɖe bo nɔ hɛn mi ɖe vun, mi cɔ mi ɖe bo nɔ ace ji na mi nɔ kpɔn do hɛn mi ɖe gble gɛ! ¹⁶ Mi ɖi zɔnli gbon ojlo Yɛ ɖeɖovo lɔ tɔn mɛ, hwe exɔn nu mi ma na wa ojlo agbaza tɔn gɛ. ¹⁷ Ɖo ojlo agbaza tɔn lɛ wɛ nɔ sɔ ta Yɛ Ɖeɖovo lɔ, bɔ ojlo Yɛ Ɖeɖovo lɔ tɔn lɛ nɔ sɔ ta ojlo agbaza tɔn lɛ. Ɖo ye mɛ awe lɛ mɔ nɔ jɛ kpɔ gɛ.Nu ke e nɔ na wɛ nyi ɖɔ ye mɔ nɔ kpego bo nɔ wa nu ke mɛ lɔsu jlo na blo gɛ. ¹⁸ Na Yɛ Ɖeɖovo lɔ le kun mi, mi ma sɔ le sɛn gɔ ba gɛ. ¹⁹ Odin, mi le mɔ nu ke ojlo agbaza tɔn le blo lɛ. ²⁰ Hun sisɛn, azetɔ nu wiwa, wan gbɛ na awegɔ mɛ tɔn, nutrɔ lɛ, awuhwan, adaka, fu fifɔn, mɛ mɛ kiklan zinvlun gbɛta lɛ, ²¹ ojlo lɛ, ahan nu mun, nu ɖu zɛ jlɛ wu, kpodo nu vlɛ nu lɛ kpo. Un le tɔ gbe mi ɖi le ke un ko nɔ tɔ gbɛ mi ɖo, mɛ ke nɔ blo nu exɔn lɛ ɖe ma xwe sɛxwe gɛ. ²² Amɔ sisɛn Yɛ Ɖeɖovo lɔ tɔn lɛ wɛ nyi: wan nyinyi, awajijɛ, fifa, sulu, nu ɖagbe, yɔ sisɔ, ojiɖide do mɛ ɖi ɛ lɛ wu, ²³ hun kuku yiyi, mɛɖe hihɛn, osɛn lɔ ma sɔ ta onu exɔn lɛ gɛ. ²⁴ Mɛ ke nyi Jezu Klisi tɔn lɛ ko kɛ ojlo agbaza tɔn lɛ do akluzu ji. ²⁵ Na mi le zan gbɛ do gbɔn Yɛ Ɖeɖovo lɔ mɛ, mi ni ɖi zɔnli gbɔn ojlo etɔn mɛ gba. ²⁶ Mi ni nɔ kpɔn nyi go yi tɔ gɛ! Nutrɔ ni nɔ kpɔn nɔ mi mɛ gɛ! Awuhwan ni nɔ kpɔn nɔ mi mɛ gɛ!