¹ Galatinu yɛmɛnu wa tɔ, mɛ gbo aze mi? Co nu mimɔ lɔsu lɔsu Jezu Klisi ke ye kɛ do akluzuji tɔn wɛ ye ze xlɛ mi. ² Un jlo kpo wun ɖo mi ni na sin xo kanse kɔ: Mi yi Yɛ ɖeɖovo lɔ ɖo mise tonu na osɛn lɔ wutu mɛ, kabi mi ɖi nu na Wɛn Ɖagbe lɔ wutu? ³ Amɔ mi bu ayixa mitɔn! Le bibɛnu, mi kan do Yɛ ɖeɖovo lɔ ji, bɔ odin, mi na kan ɖo hɔnhlɔn mitɔn kɛɖɛ ji w? ⁴ Nu ke mi yi lɛ kpokpo, na vɔ wɛ? Na do ɖɔ, na vɔ wɛ, kpɔn gbeɖe! ⁵ Mawu na mi Yɛ ɖeɖovo lɔ, bo lɛ le blo nu kpacamɛnu lɛ le mi de! E le blo na mi na do se tonu na osɛn lɔ, kabi mi do se tonu na Wɛn Ɖagbe lɔ? ⁶ Ablaxamu ɖi nu na Mawu, bɔ exɔn wutu Mawu ze Ablaxamu do mɔ hwɛ jijɔnɔ. ⁷ Mi ɖo na yɔ nu lokpo wi: Hwɛndo lɔsu lɔsu Ablaxamu tɔn wɛ nyi nu ɖi tɔ lɛ. ⁸ Wema mimɛ lɔ ko ɖɔ nu e kɔ: Mawu ɖo na ze ma nyi Juwifunu lɛ do lɛ zun hwɛ jijɔnɔ ɖo nu ɖiɖi ye tɔn wutu. Yi wɛ zɔn bɔ wema mimɛ lɔ ko ɖɔ ɖa nyi na Ablaxamu Wɛn Ɖagbe kɔ: «Mawu na do na gbɛtɔ lɛ kposese do gbɔn yɔ mɛ.» ⁹ Nu ɖi tɔ lɛ, Mawu na do na ye kpodo Ablaxamu kpo, ke ɖi nu. ¹⁰ Xojɔxo wɛ, ta ylakannɔ wɛ nyi mɛ ke nɔ kan do nu ɖi na osɛn lɔ ji lɛ. Wema mimɛ lɔ ɖɔ: Mɛ ke mɔ se tonu ɖe kpekpe na nu ke ye wlan do osɛn wema lɔ mɛ bi gɛ, mɛ exɔn nudonɔ wɛ e nyi. ¹¹ Mɛ ti do gbɔn osɛn lɔ mɛ mɔ nɔ nyi hwɛ jijɔnɔ le Mawu nu kɔn gɛ, le wɛ e le! Mi lɛ xa: «Mɛ ke ɖi nu na Mawu nyi hwɛ jijɔnɔ, bɔ do le e na ɖo gbɛ.» ¹² Amɔ osɛn lɔ ma jɛ do nu ɖiɖi tɔn gɛ. Na do ɖɔ, «Osɛn lɔ na na ogbɛ mɛ ke se tonu na osɛn lɔ kpokpo lɛ.» ¹³ Amɔ akwa ɖaxo wɛ Klisi su bo do tun kan na mi sɔn ta ylakan osɛn lɔ tɔn si. Yi we yi oba ta ylakan mitɔn lɛ tɔn. Na ɖo ɖɔ wema wime lɛ ɖɔ: «Nudo wɛ e nyi na mɛ ɖe kpe kpe ke ye kɛ do atin go.» ¹⁴ Oxo lɔ wɛ nyi ɖɔ dona ke le Ablaxamu ji na kpego do wa kosi lɛ ji le Jezu Klisi mɛ, bɔ mi na do kpego bo na mɔ akpa Yɛ ɖeɖovo lɔ tɔndo gbɔn nu ɖiɖi mɛ. ¹⁵ Nɔvi yisenɔ sunu kpodo yɔnu, mi ni ze kpɔn dewu do hwɛn domɛnu mitɔn lɛ go. Na mɛ ɖe wlan wema da nyi do gbɔn nu wiwa etɔn mɛ, mɛ ti ma si gbɛ wema etɔn, bo ka na do gɔ nu ɖe na gɛ. ¹⁶ Odin e na akpa wu Ablaxamu kpodo mɛ ke na tɔn sɔn e mɛ lɔ kpo. E ma wlan ɖɔ: «kpodo mɛ ke e na wa ji sɔn e yɔ mɛ lɛ kpo gɛ», ɖi ɖɔ gbɛtɔ susu wɛ gɛ. Wun wun, gbɛtɔ lokpo gee xo wɛ e le ɖɔ. le wema mimɛ lɔ mɛ mi nɔ xa: «kpodo mɛ ke e na ji sɔn yɔ mɛ.» Omɛ exɔn wɛ nyi Klisi. ¹⁷ Nu ke na un le ɖɔ i ke: Mawu le wlan nu do gbɔn zizan etɔn mɛ. Osɛn Moyizi tɔn wa le oxwe afɔwe gban godo. Amɔ e ma ɖe nu ti sɔn nu wiwlan lɔ go gɛ , e ma nyi le gɛ, akpa Mawu tɔn na ba hɔnhlɔn etɔn bisese kpo. ¹⁸ Na ogu ɖuɖu lɔ do sɔn osɛn lɔ mɛ wɛ, e ma sɔ sɔn akpa lɔ mɛ gɛ. Co akpa lɔ mɛ wɛ Mawu ɖe wan nyinyi etɔn xlɛ Ablaxamu le. ¹⁹ Bɔ etɛ wutu osɛn lɔ? Nu jɛ nu ji ɖe wɛ. E gɔ alɔ na mɛ bɔ e do yɔ nu wa gbɔ lɛ wi kaka do jɛ wiwa mɛ ke na tɔn sɔn Ablaxamu lɔ tɔn mɛ. Ablaxamu wutu wɛ Mawu do akpagbe etɔn. Wɛnzangu lɛ wɛ zɔn bɔ e yɔ osɛn lo wi, bɔ do gbɔn mɛ ɖe mɛ wɛ. ²⁰ Amɔ mi ma ɖo hudo mɛ ke ji e na gbɔn zɛ na mɛ lokpo gee gɛ, bɔ Mwu nyi lokpo nɔ gee. ²¹ Etɛ e le ɖɔ do le? Ɖo osɛn lo gbɔn vo na akpa Mawǔ tɔn le wɛ? Gbeɖe! Na osɛn ɖe na dio kpego bo na na ogbɛ wɛ, bɔ gbɛtɔ lɛ yi osɛn xɔn, ɛɛ lɔ hɛn e ne lɛ ye zun hwɛ jijɔnɔ. ²² Amɔ wema mimɛ ɖɔ ɖɔ ogbɛ lɔ kposese wɛ le hɔnhlɔn ohwɛ tɔn gɔ. I mɛ zɔn bɔ: Mawu tɔn ɖo na nyi cicɛ le nu ɖi tɔ lɛ kpo mɛ, ɖo nu ɖiɖi ye tɔn wu na Jezu Klisi. ²³ Hwɛ kpo na hwenu ke mi na do ɖi nu na Klisi lɔ na wa, osɛn hɛn mi ɖi gantɔ ha. A ɖo na nɔ te kpɔn hwenu ke Mawu na bɔ mi na yɔ nu ɖiɖi xɔn wi. ²⁴ Osɛn lɔ nyi me cɔtɔ mitɔn kaka do jɛ wiwa Klisi tɔn na mi na do zun hwɛ jijɔnɔ do gbɔn nu ɖiɖi mɛ. ²⁵ Odin hwenu ke mi na ɖi nu na Klisi lɔ wa. Mi ma sɔ le alɔ osɛn tɔn mɛ ba gɛ. ²⁶ Xojoxo, do ɖi nu na Jezu Klisi, mi me bi nyi ovi Mawu tɔn. ²⁷ Mi me bi wɛ e nylɔ do tɔmɛ le Klisi mɛ bɔ mi ciɖi i ha. ²⁸ Vo gbigbɔn ɖe ma sɔ le Juwifu kpo ma nyi Juwifu lɛ kpo mɛ gɛ, kannumɔnɔ kpo mɛ ke mɔ kan tun tun lɛ kpo gɛ mɛ, sunu lɛ kpodo yɔnu lɛ kpo gɛ mɛ. Mi mɛ bisese wɛ nyi nu lokpo lɔ le Klisi mɛ. ²⁹ Bɔ na mi nyi Klisi tɔn, mi nyi hwɛndo Ablaxamu tɔn lɔsu, mi nyi gu ɖu tɔ ɖi le ke Mawu ɖɔ ɖo.