¹ Mi nyi ovi ke Mawu nyi wan na, na do ɖɔ, mi wa nu ɖi ye ha. ² Mi zan gbɛ gbɔn wan nyinyi mɛ ɖi Klisi ha: E nyi wan na mi bo do ze ogbɛ etɔn jo do mi tamɛ ɖi nu nina kpodo avɔsisan ɖagbe kpo na Mawu. ³ Mawu tɔn wɛ mi nyi, do le hun, nuɖe lɛ le bɔ ye ma tɛ si mɔ le mi ɖe lɔsu do lɛ se gɛ. Na do ɖɔ, walɔ ke ma sɔgbe gɛ lɛ kpokpo, ce jɛn na bi. ⁴ Xokun ɖaxo, ogblo ɖiɖɔ lɛ, nu ɖejan lɛ ma ɖo na nɔ tɔn sɔn onu mitɔn mɛ gɛ. Amɔ na mi le ɖɔ xo, ni nɔ nyi kpɛ dido na Mawu we xo. ⁵ Mi ɖo na nyɔ nu ekɔ wi: Nu ɖejan ɖi aga lɛtɔ lɛ, mɛ kuɖi kuɖi lɛ, tɛvivɛ lɛ, na do ɖɔ hun sinsɛn lɛ ma na byɛ oxɔsuɖuta Klisi kpo Mawu tɔn kpo mɛ gɛ. ⁶ Mɛɖe ni nɔkpɔn gblɛ mi ɖu kpodo nu wleɖɔ ɖejan lɛ kpo gɛ. Nu exɔn lɛ wɛ nɔ zɔn bɔ xomɛsi Mawu tɔn nɔ kɔn do tonu ma setɔ lɛ ji. ⁷ Mi nɔ kpɔn nɔ blo ɖi ye ha gɛ. ⁸ zinvlun wɛ mi le ɖa nyi, amɔ odin mi ko wa hihɔn Aklunɔ tɔn mɛ. Mi ɖi zɔnlin ɖi ovi Mawu tɔn lɛ ha. ⁹ Sisɛn ke hihɔn Aklunɔ tɔn nɔ na lɛ ke: Onu ɖagbe wiwa, nu jijlɔ kpodo xojɔxo ɖiɖɔ. ¹⁰ Mi nɔ ba nu ke nu ke nɔ nyɔ na Mawu. ¹¹ Mi nɔkpɔn nyi wan na sisɛn zinvlun mɛ tɔn lɛ gɛ, mi gbɛ ye bo ɖe ye jɛ agbawungba. ¹² Nu ke mɛ exɔn lɛ nɔ blo le nugɔ, wunya nɔ wa mi na ɖiɖɔ. ¹³ Bɔ, na e ɖe ye gba, onu wiwa yetɔn lɛ nɔ jɛ agbawungba. ¹⁴ Nuke jɛ agbawungba lɛ kpo wɛ nɔ zun hihɔn. Yi wɛ zɔn bɔ e nɔ ɖɔ: «Fɔn yɔ mɛ ke le dɔ amlɔn. Fɔn sɔn mɛ ke ku lɛ mɛ, na Klisi na na we nu kunnu mɔ jɛ numɛ hihɔn lɔ tɔn.» ¹⁵ Mi cɔ zɔnlin mitɔn kpodo nu wiwa mitɔn lɛ kpo. Mi nɔ lin tamɛ hwɛ co bo nɔ wa nu, mi zan gbɛ ɖi nu nywɛ tɔ kpikpe lɛ ha, ¹⁶ ke nɔ hwenu ke Mawu jodo na ye lɛ yizan. Azan ke mi na zan gbɛ na lɛ nyla. ¹⁷ Mi nɔkpɔn wa nu ɖi yɛyinɔ gɛ, mi nyɔ ojlo Mawu tɔn wi ganji ¹⁸ Mi nɔkpɔn jo miɖe do na ahan sisyɛn ke nɔ gble ogbɛ mɛtɔn gɛ, amɔ mi gɔ kpodo Yɛ Ɖeɖovo lɔ kpo. ¹⁹ Mi nɔ ji han ke nɔ sɔn Yɛ Ɖeɖovo lɔ de lɛ. Mi ji han bo kpa Aklunɔ kpodo ayixa mitɔn bisese kpo. ²⁰ Mi nɔ do kpɛ na Mawu Otɔ lɔ hwe binu na nubile Aklunɔ Jezu Klisi we nyinyɔ mɛ. ²¹ Ɖo sisi ke mi ɖo na Klisi wutu, mi nɔ ɖo sisi na miɖe. ²² Nyɔnu ni si aswɔ ɖi le ke Aklunɔ ba ɖo. ²³ Na do ɖɔ, asu wɛ nyi gan na asi ɖi le ke Klisi nyi gan na agun etɔn ɖo. Klisi wɛ nyi hwɛnlɛngantɔ na agun ke nyi awutu etɔn. ²⁴ Ɖi le ke agun nɔ se tonu na Klisi ɖo, nyɔnu lɛ ɖo na se tonu na yesu lɛ ɖo le. ²⁵ Asu, nyi wan na asiwe ɖi le ke Klisi nyi wan na agun etɔn ɖo. Eze gbɛ etɔn jo na agun, ²⁶ na e na do nyi nu mimɛ. E ze do lɛ zun nu mimɛ do gbɔn osi kpo oxo lɔ kpo mɛ. ²⁷ E ba ɖɔ agun lɔ ni gɔ kpodo gigo kpo kpo le nukɔn etɔn, ma ɖo nu kuɖi kuɖi, ma na glin, ma ɖo ablɔ ɖe. E jlo ɖɔ ni nyi agun mimɛ ke ye ma si mɔ xo ti bo na ɖɔ de go gɛ. ²⁸ Lexa pɛpɛpɛ, asu ɖo na nyi wan na asyɛ ɖi le ke e nyi wan na awutu etɔn ɖo. Wan nyi na mɛsi wɛ nyi wan nyi na mɛ lɔsu. ²⁹ Mɛti ma gbɛ wan na awutu etɔn lɔsu gbeɖe. E nyɔ wa e nɔ na nuɖuɖu wi, ye nɔ wle bo ni, ɖi le ke Klisi nɔ blo na agun etɔn ɖo ha. ³⁰ Mi ma le awutu Klisi tɔn lɛ mɛ? Mi nɔ xa le wema mimɛ lɔ mɛ ɖɔ: ³¹ «Yi wɛ zɔn bɔ sunnu na tɔn sɔn otɔ kpo onɔ kpo de bo na sin eɖe do asyɛ wu bɔ ye mɛ awelɛ na trɔzun mɛ lokpo gee.» ³² Nubudo xɔnklo, bɔ nyɛ, un le ɖɔ na mi ɖɔ Klisi kpo agun etɔn kpo wɛ. ³³ Amɔ e lɛ nyi mye lɔsu: Mɛ lokpo lokpo ɖo na nyi wan na asyɛ ɖi eɖe ha, bɔ nyɔnu ɖo na nɔ si aswɔ.