¹ Ovi, mi ɖo sisi na mɛ ke ji mi lɛ, ɖi le ke Mawu jlo ɖo, azɔn mitɔn wɛ. ² «Nɔ si tatowe kpodo nɛtowe kpo», osɛn nukɔntɔn ke Mawu do bɔ akpagbe etɔn lɛ xodo. ³ Akpagbe etɔn ke: «Nubi na nyɔ na we bɔ a na lɛ dɔ ji le ayizan ji.» ⁴ Bo mimɛ ke ji mi lɛ, mi nɔkpɔn nɔ do xomɛsin na ovi mitɔn lɛ gɛ. Amɔ na okplɔn yetɔn, mi nɔ xo ye, bo nɔ na nu kplɔnmɛ ke sɔn Mawu de ye. ⁵ kanumɔnɔ, mi se tonu na ogan mitɔn lɛ le ayizan jikpodo sisi ɖaxo ɖe kpo, ayixa ɖaxo ɖe kpo ɖi le ke mi nɔ se tonu na Klisi ɖo. ⁶ Mi nɔkpɔn nɔ ɖosisi na ye hwenu ke ye le akpa na mi kɛɖɛ gɛ, bo na do ba na nyɔ le gbɛtɔ le nukunmɛ gɛ. ⁷ Mi ɖo sisi na ogan mitɔn lɛ kpodo ayixa ɖagbe kpo, ɖi Mawu ha, ni nɔkpɔn nyi ɖi gbɛtɔ lɛ ha gɛ. ⁸ Mi nywɛ: Ɖagbe ke mɛɖe wa, e na ɖu ale etɔn le Aklunɔ de. A na bo tɛ nyi kanumɔnɔ, alo mɛke nyi eɖe, a na ɖu ale etɔn. ⁹ Bɔ mye ogan lɛ, mi blo nu lokpo lɔ pɛpɛpɛ do yi kanumɔnɔ mitɔn le de. Mi nɔkpɔn nyla hun do ye gɛ. Mi nywɛ ɖɔ mɛ ke nyi ogan ye tɔn yi wɛ nyi mye lɛ lɔsu tɔn gba bo le sɛxwe. ¹⁰ Mi do gan namɛ na miɖe kpodo hɔnhlɔn ɖaxo Aklunɔ tɔn kpo. ¹¹ Mi ze ahwan funnu Mawu tɔn lɛ kpose hɛn, bo na do nɔ te le mɔ ɖiɖo yɛ nu nyinyla watɔ lɛ tɔn nukɔn. ¹² Ɖo ahwan funfun mitɔn ma nyi xa agbaza kpo hun kpo gɛ. Ahwan funfun mitɔn wɛ nyi xa ogan axɔluɖuta zinvlunmɛ tɔn lɛ ke le ji lɛ. ¹³ Yi wutu wɛ mi ze ahwan funnu Mawu tɔn lɛ kpokpo ze hɛn. Ɖo le, le azan nyinyla lɛ hwenu, mi na lido, bɔ le ahwan lɔ funfun ganji godo mɛ, mi na nɔ te gaga. ¹⁴ Le teninɔ mitɔn mɛ, mi ze xojɔxo ɖi gojiblanu, bo ze nu jijlɔ ɖi gbakɔn. ¹⁵ Mi ze akpakpa ke nɔ la Wɛn Ɖagbe, ke nɔ na mɛ fifa do zun afɔkpa. ¹⁶ Hwe lɛ kponu le fi bi, mi ze ahwan funnu nu ɖiɖi tɔn. Kpodo exɔn kpo, mi hɛn mi na ci zo ke nyi yɛ nu nyinyla tɔn. ¹⁷ Mi yi ahwan gbakɔn hwɛnlɛngan tɔn, kpodo ohi Yɛ Ɖeɖovo lɔ tɔn, na do ɖɔ oxo Mawu tɔn. ¹⁸ Mi xo ɖɛ ma nɔ te. Oɖɛ mitɔn lɛ kpokpo kpo nu bibyɔ mitɔn lɛ kpo , mi nɔ blo do gbɔn ojlo Yɛ Ɖeɖovo lɔ tɔn mɛ! Mi nɔ le toji ganji bo nɔ xo ɖɛ hwebinu le gbeji ninɔ mɛ na yisenɔ lɛ. ¹⁹ Mi xo ɖɛ na nyɛ lɔsu, na Mawu ni nɔ do ze oxo etɔn do nucemɛ. Hwe exɔn nu, na nɔ la kpodo akɔkpikpan kpo nubudo Wɛn Ɖagbe tɔn lɛ. ²⁰ Wɛn Ɖagbe la tɔ wɛ un nyi, bɔ na eyɔ, ye si un kpodo caba kpo. Mi xo ɖɛ na un na ma nɔ do la kpo akɔkpikpan kpo, ɖi le ke un ɖo na blo ɖo. ²¹ Un jlo na mye lɔsu, mi na nyɔ nuke le jɔ do ji e kpodo nu ke un le blo kpo. Ticiki, anɛvi bo lɛ nyi hwanyi ce, ke nɔ sɛn Aklunɔ tawun lɔ, na ɖɔ nulɛ kpokpo na mi. ²² Un ɖo e do xlan mide na do ɖɔ na mi le ke mi fɔn do, bo na do do gan namɛ na mi. ^{23 24} Mawu Otɔ mitɔn kpodo Aklunɔ Jezu Klisi mitɔn ni na nɔvi sunu, nyɔnu yisenɔ fifa etɔn, wan nyinyi kpodo nu ɖiɖi! Mawu ni dona mɛ nyi wan na Aklunɔ Jezu Klisi mitɔn kpodo wan nyinyi ke mɔ nɔ ku gbeɖe gɛ kpo!