¹ Nyɛ gantɔ na Aklunɔ, nu ke un le byɔ mi kpo hɔnhlɔn kpo ke: Mi zan gbɛ le oylɔ ke mi yi sɔn e si mɛ. ² Mi nɔkpɔn nɔ jɛ tagba gɛ. Mi fa bo nɔ yi sulu. Mi nɔ hɛn sɔ mi ɖe le wan nyinyi mɛ. ³ Mi ba hwe binu na nyi lokpo do gbɔn Yɛ Ɖeɖovo lɔ mɛ. Yi wɛ ca mi bo do fifa mi mɛ. ⁴ Awutu lokpo, Yɛ Ɖeɖovo lokpo wɛ le. Mawu lɛ ylɔ mi na aɖɔgbigbo lokpo. ⁵ Aklunɔ lokpo, nu ɖiɖi lokpo kpodo mɛ nylɔ do tɔmɛ lokpo wɛ le. ⁶ Mawu lokpo gee wɛ le bo nyi Otɔ na mɛ bi, E le ji na mɛ bi, E nɔ wa nu gbɔn mɛ bi ji bɔ le mɛ bi mɛ. ⁷ Mawu na mi nu ɖagbe etɔn lɛ, amɔ Klisi jlɛ mɛ lokpo lokpo tɔn ni. ⁸ Le wema mimɛ lɔ mɛ, mi nɔ xa: «Hwenu ke Eyi ji bi, E kplan gantɔ lɛ. E na nu nina wu gbɛtɔ lɛ.» ⁹ «E yi ji.» Etɛ wɛ onu exɔn le ɖɔ? Hwɛ kpo E na yi ji, Klisi lɔ jɛ te hwɛ do nɔtɛn siso siso ke le ayizan ji ji lɛ mɛ. ¹⁰ Mɛ ke jɛ te lɔ, yi wɛ lɛ nyi mɛ ke yi ji vovolivo e lɔ bo do gɔ ogbɛ lɔ bi mɛ. ¹¹ «nu nina» ke Klisi na lɛ ke: Mɛ le le tɔn nyi Apotru, kabi xo yiɖɔtɔ, alo Wɛn Ɖagbe la tɔ. Mɛ ɖevo lɛ yi nu nina ke nɔ kun agun Mawu tɔn, alo nu kplɔn mɛ. ¹² Do gbɔn nu nina exɔn lɛ mɛ, Klisi jlo na blo mɛ ke nyi Mawu tɔn lɛ. Hwe exɔn nu, ye na kpe go bo na wa Mawu we azɔn kpo na kpla agun. ¹³ Le kɔndokpɔ mɛ, kpɛɖe kpɛɖe mi na ɖo nu ɖiɖi lokpo lɔ kpo nu nyinyɔwɛ lokpo lɔ do ovi Mawu tɔn ji. Vivɔnu etɔn mi na nyi yisenɔ mɛxo bo na ɖo ninɔmɛ ɖagbe Klisi tɔn. ¹⁴ Mi ma sɔ na nyi vi kpɛvu ba gɛ. Mi ma sɔ na nyi tɔjihun ovu ke jɔhɔn na nɔ ze do le ke jlo e ɖo ba gɛ. Jɔhɔn awonɔ lɛ ma si sɔ nɔ ze mi ɖi le ke e jlo e do ba gɛ. Gbɛtɔ lɛ ma si sɔ nɔ blɛ mi ɖu ɖi le ke e jlo ye ɖo kpodo awo ye tɔn lɛkpo ba gɛ. ¹⁵ Amɔ xojɔxo ɖiɖɔ le wan nyinyi mɛ, mi na hwɛn le nu bi mɛ do yi Otɔ lɔ de, ke nyi Klisi lɔ. ¹⁶ Do gbɔn eyɔ mɛ wɛ, nu ke le agbaza wu lɛ do le te bo nyi lokpo. Onu susu kple do nyi awutu, bɔ hwe kenu onu lokpo lokpo le wa azɔn etɔn, awutu nɔ hwɛn bo nɔ gba eɖe le wan nyinyi mɛ. ¹⁷ Yi wɛ zɔn bɔ un le ɖɔ nu ekɔ na mi bo le tɛ ɖɛ eji le Aklunɔ we nyi kɔ mɛ: Mi nɔkpɔn sɔ zan gbɛ ɖi mɛ ke ma nyɔ Mawu wi lɛ gɛ ha. Linlin yetɔn lɛ mɔ nɔ wa nu ɖagbe ti gɛ. ¹⁸ Nu nyinywɛ ye tɔn le zin vlumɛ, bɔ ye ma le zan gbe Mawu tɔn gɛ. Ye nyi vɔ donanunɔ ɖo ayixa yetɔn su wutu. ¹⁹ Ye ma nyɔ nu ɖagbe kpodo nyinyla kpo wi gɛ, bɔ ye nɔ le ɖi zɔnlin gbɔn le ke jlo ye. Walɔ nyinyla ɖekpekpe ke ye jlo na blo, ye nɔ blo co e mɔ nɔ ɖi nuti na ye gɛ. ²⁰ Mye le mɛ ye kplɔn mi ɖo na do nyɔ Klisi wi gɛ. ²¹ Klisi ke xo un le ɖɔ lɔ we xo jɛn ye ɖɔ na mi? Yi jɛn ye kplɔn mi, do gbɔn xojɔxo ke le Jezu mɛ lɔ? ²² Na e nyi ɛɛ, mi ɖo na jo ogbɛ xoxo ke mi nɔ zan lɔ do. Ɖa nyi ojlo awo tɔn susu le bo nɔ hɛn mi gble. Nu ke mi nyi ɖa nyi, mi ɖo na ɖe kɔn nyi gbe ɖi nu zizan xoxo ha. ²³ Mi ɖo na mɔ nu kunnu jɛ nu lɛ go ɖi nu yɔyɔ ha do gbɔn Yɛ Ɖeɖovo Mawu tɔn mɛ. ²⁴ Ɖi le ke mi nyi nu dido yɔyɔ ɖo, mi lɛ trɔzun gbɛtɔ yɔyɔ. Gbɛtɔ yɔyɔ nyi biblo ɖi le ke Mawu ɖɔ do ha: Xojɔxo nɔ trɔ ɛ zun hwɛ jijɔnɔ kpodo gbɛtɔ mimɛ. ²⁵ Mi nɔ kpɔn sɔ nɔ ɖo awo ba gɛ. Mɛ lokpo lokpo ɖo na nɔ ɖɔ xojɔxo na awegɔ etɔn, ɖo le kɔndokpɔ mɛ, awutu lokpo lɔ tɔn wɛ mi nyi. ²⁶ Na mi sin xomɛ, mi nɔ kpɔn hu hwɛ gɛ. Amɔ mi ɖo na jo xomɛsin do hwɛkpo ohwe na yi xɔ. ²⁷ Mi nɔ jo tɛnmɛ ti do na onu nyinyla le mimɛ gɛ. ²⁸ Ajotɔ ɖo na gbɛ ajo, e ɖo na do honhlɔn bo ɖo na wa nu kpodo alɔ etɔn le kpo le xojɔxo mɛ. Hwe exɔn nu, e hɛn e na gɔ alɔ na awegɔ etɔn ke le hudo etɔn mɛ. ²⁹ Oxo nyinyla ti ma ɖo na nɔ tɔn sɔn onu mitɔn mɛ gɛ. Mi nɔ ɖɔ xo ɖagbe ke na gɔ alɔ na awegɔ mitɔn lɛ le hudonu yetɔn lɛ mɛ, bo na nɔ lɛ wa ɖagbe na mɛ ke nɔ ɖoto mi lɛ. ³⁰ Mawu ze Yɛ Ɖeɖovo etɔn do mi mɛ, hun mi nɔ kpɔn yi do wa nu ɖejan gɛ. Yi wɛ na mi kanɖeji ɖɔ gbe lokpo, Mawu na hwlɛn mi kpete sɔn ohwɛ mitɔn lɛ si. ³¹ Mi nɔ kpɔn hɛn nu nyinyla ke mɛɖe wa xa mi do ayi mɛ gɛ . Mi nɔn kpɔn nɔ mɔ akpɔ gɛ, mi nɔ kpɔn nɔ sin xomɛ gɛ, mi ɖe tɔn sɔn mi mɛ ozun lɛ, aɖu kunkun lɛ, xomɛsin lɛ, nutrɔ lɛ, kpodo walɔ onu nyinyla tɔn lɛ kpo. ³² Mi nyɔ na miɖe. Ayixa mitɔn ni nɔ fa. Mi sɔ hwɛ kɛ miɖe, ɖi le ke Mawu sɔ hwɛ kɛ mi le Klisi mɛ ɖo.