¹ Nyɛ Pɔlu un nyi gantɔ Klisi tɔn na mi mɛ ke ma nyi Juwifu gɛ lɛ. ² Mi se azɔn ke Mawu zɔn le ɖagbe nyinyɔ eton mɛ, bo na do hɛn wa cicɛ mɛ na mi, na ojlo etɔn na do nyi bi blo. ³ E hun nukun na un do xlɛ tito etɔn ke hwla, un ɖɔ xo etɔn kpɛɖe na mi. ⁴ Na mi xa wema ce, mi na mɔ nu kunnu jɛ hwlan me mu ke un yɔ nu budo ke Mawu blo do gbɔn Klisi mɛ ɖo. ⁵ Mawu ma ze nu budo xɔn xlɛ mɛxo lɛ gɛ. Amɔ e gbe din E ze xlɛ do gbɔn Yɛ Ɖeɖovo etɔn mɛ wu apotru kpodo oxo yiɖɔ tɔ etɔn lɛ kpo. ^{6 7} Nu budo lɔ ke: Cica mitɔn kpo Klisi kpo do gbɔn Wɛn Ɖagbe lɔ mɛ, mɛ ke ma nyi Juwifu lɛ ɖo nu mi ma ke nyi ɖagbe Mawu tɔn lɛ pɛpɛpɛ ha Juwifu lɛ. Ye nyi awutu lokpo lɔ, akpagbe lɔ nyi ye mɛ bisese tɔn. Mawu le nyinyɔ etɔn mɛ na un bɔ un nyi mɛ sɛntɔ na Wɛn Ɖagbe lɔ, do gbɔn zizan hɔnhlɔn etɔn tɔn mɛ. ⁸ Nyɛ wɛ nyi vikpɛvu na yisenɔ lɛ kpose. Co un yi nu nina kɔ: La na mɛ ke ma nyi Juwifu lɛ gɛ, siso siso dɔkun Klisi tɔn. ⁹ Un lɛ vɔ yi nu nina ke nɔ ɖe xlɛ mɛ lɛ tawun le ke Mawu nɔ hɛn nu budo etɔn wa cicɛ mɛ ɖo. E yɔ ke nyi nu lɛ kposese da tɔ, E ze nu budo xɔn ze hwla do e ɖe me sɔn hwe ɖenu. ¹⁰ Amo odin, do gbɔn agun ji, mɛ ɖe kpe kpe ke ɖo acɛ kpo honhlon le sɛxwe hɛn din na mɔ nu kunnu jɛ nu nyɔn ɛn kpi kpe Mawu tɔn go. Mawu ze nu nyɔn ɛn kpi kpe xɔn xlɛ gbɔn walɔ susu mɛ, ¹¹ do gbɔn tito ke E ko ze da nyi xoxo mɛ. Tito xɔn, E hɛn wa cicɛ mɛ do gbɔn Aklunɔ Jezu Klisi mitɔn mɛ. ¹² Mi nyi lokpo le Klisi mɛ, bɔ mi ɖi nu ni. Mi hɛn dɩn mi na sɛ kpɔ Mawu kpo ji ɖiɖe kpo. ¹³ Yi wɛ zɔn un le byɔ mi ɖɔ: mi nɔ kpɔn na awu ni ku mi do vivɛ sise ke un le hɛn do mi wu gɛ. E le na mi gigo nu jɔnu tɔn lɔ. ¹⁴ Yi wutu wɛ un nɔ jɛ klo le Aklunɔ Mawu Otɔ lɔ nu kɔn, ¹⁵ ke hwɛndo le kposese nɔ yi nyi kɔ etɔn le sɛxwe kpodo ayizan ji kpo. ¹⁶ Ɛɛ, un le byɔ ɛ ɖɔ ni na mi hɔnhlɔn do gbɔn Yɛ Ɖeɖovo etɔn mɛ, ɖo gigo etɔn dagba. Hwe e xɔn nu mi na huzu yisenɔ ke li do. ¹⁷ Do gbɔn nu ɖiɖi mitɔn mɛ, Klisi ni gɔ ayixa mitɔn lɛ mɛ! Mi do alɔ mitɔn lɛ do le wan nyinyi mɛ, bo gba mi ɖe sisi ɛn le wan nyinyi xɔn mɛ. ¹⁸ Hwe exɔn nu mye kpo yisenɔ lɛ kpo na mɔ nukunnu le agbadido , kiklo kpodo gbigblomɛ wan nyinyi klisi tɔn. ¹⁹ Mi na nyɔ wan nyinyi exɔn ke xugan nu ke e na nyɔ ɛn le kpose wi. Mi na ogbɛ Mawu tɔn kpo kpo , bɔ e na gɔ mi mɛ. ²⁰ Mawu nɔ wa zɔn le mi mɛ kpodo hɔnhlɔn etɔn kpo. Bɔ na mi byɔ nu ɖe wi, E hɛn e na lɛ blo xu le ke mi ba ɖo! Ɛɛ, hɔnhlɔn etɔn xugan wu nu ke mi lin lɛ kpokpo. ²¹ Etɔn wɛ nyi gigo, le agun mɛ, do gbɔn Jezu Klisi mɛ, hwe lɛ kpokpo nu kaka do yi. Ami.