¹ Ɖa nyi mi ku ɖo nu wa gbɔ kpodo hwɛ mitɔn lɛ wutu. ² Mi le zan gbɛ do ohwɛ mɛ do le xodo hɔnhlɔn anyihɔn lɔ tɔn lɛ. Mi le se tonu na ogan hɔnhlɔn nyinyla lɛ tɔn ke ɖu axɔlu le oji kpodo odo kpo cɛncɛn lɛ. Ogan xɔn, yi wɛ nyi oyɛ nyinyla ke le wa zɔn din le me ke ma le se tonu na Mawu gɛ lɛ mɛ. ³ Ɖa nyi, mi e lɔsu lɛ, mi le mɛ exɔn lɛ mɛ hwenu ke mi le zan gbɛ do gbɔn ojlo agbaza tɔn mɛ. Mi nɔ se tonu na ojlo agbaza tɔn kpodo linlin kuɖi kuɖi mi tɔn lɛ kpo. Ɖo le ke mi le wutu, mi jɛ xa xomɔsin Mawu tɔn ɖi mɛ di ɛ lɛ ha. ⁴ Amɔ Mawu gɔ kpodo lɛ blanu kpo, bo lɛ nyi wan na mi kpodo wan nyinyi ɖaxo ɖe kpo. ⁵ Yi wutu wɛ, mi e lɛ ke ko ku do nu nyinyla mitɔn lɛ wutu, E na gbɛ mi kpodo Klisi kpo. Ɛɛ, mi mɔ hwɛnlɛngan do gbɔn ɖagbe nyinyɔ Mawu tɔn mɛ. ⁶ Kpodo Jezu Klisi kpo, E fɔn mi le ku, bɔ kpodo Jezu Klisi kpo, E ze mi ze flɔn a nyi le Sɛxwe. ⁷ Do le nyinyɔ etɔn xlɛ mi le Klisi Jezu mɛ, Mawu jlo na xlɛ mi dɔkun ɖagbe etɔn tɔn lɛ hwe lɛ kpo kpo nu. ⁸ Na do ɖɔ, mi mɔ hwɛnlɛngan do gbɔn nyinyɔ Mawu tɔn mɛ, ɖo mi ɖi nu ni wutu. E ma nyi mi e lɔsu wɛ jlo gɛ, Mawu wɛ na mi hwɛnlɛngan. ⁹ Hwɛnlɛngan xpon ma sɔn walɔ mitɔn lɛ wu gɛ, na do ɖɔ mɛ ti ma si ze e ɖe gɛ. ¹⁰ Ɛɛ, Mawu wɛ blo na mi. E blo mi le Jezu Klisi mɛ na mi na do zan gbɛ vivi le walɔ ganji mɛ. Bɔ walɔ xɔn lɛ, Mawu sɔ nu na na mi na do blo de ji. ¹¹ Juwifu lɛ hɛn wuntun ada gbigbo tɔn do agbaza ye tɔn go bɔ e nɔ ylɔ ye ɖɔ: «Ada gbigbo nɔ lɛ.» Mi mɛ ke e ma ji Juwifu gɛ lɛ, wuntun xɔn ma le mi wu gɛ, bɔ e nɔ ylo mi dɔ: «Atɔtɔ nɔ» E nyɔ, mi flin nu ke mi nyi da nyi: ¹² Mi le Jezu ma ɖo, mi ma ɖo acɛ ti le Irzayɛli gɛ. Akpa ke Mawu do kpodo alɛ nunu xa togun etɔn ma nyi mitɔn gɛ. Mi le nukun ma ɖo, Mawu ma ɖo le gbɛ lɔ mɛ. ¹³ Amɔ odin, le Klisi Jezu mɛ, mi mɛ ke le zɔ na Mawu lɛ, mi sɛ kpɔ ɛ do gbɔn ohun Klisi tɔn mɛ. ¹⁴ Ɛɛ, yi wɛ nyi fifa mitɔn. Juwifu kpodo ma nyi Juwifu kpo, E blo togun lokpo gee. Do ze gbɛ etɔn jo le akluzu ji, Klisi hɔ ado wan gbigbɛ tɔn ke man ye mɛ lɔ. ¹⁵ Yɛyi ke le osɛn Moyizi tɔn go kpodo nu zɔn mɛ etɔn lɛ kpo go, E ɖe bi sɛ. Juwifu kpo ma nyi Juwifu kpo, Klisi blo togun yɔyɔ ɖevo lokpo geeke ca kpoe kpo, bo do ba fifa do ye mɛ. ¹⁶ Do ku le akluzu ji, E ca Juwifu kpo ma nyi Juwifu lɛ kpo do agbaza lokpo mɛ, bo ɖɔ xo gbo na ye kpo Mawu kpo. Do gbɔn akluzu lɔ mɛ, E hɛn wangbɛ lɔ gble. ¹⁷ E wa bo wa la Wɛn Ɖagbe fifa tɔn na mi mɛ ke dɛn de lɛ, kpodo mɛ ke sɛ kpɔ ɛ lɛ kpo. ¹⁸ Do gbɔn Klisi mɛ, Juwifu kpo ma nyi Juwifu, mi hɛn mi na sɛ kpo Otɔ lɔ, do gbɔn Yɛ Ɖeɖovo lɔ lɔ kponɔ mɛ. ¹⁹ Yi wɛ zon mi ma sɔ nyi jonɔ ba gɛ, wayi wayi tɔ ba gɛ. Mi nyi mɛ le togun Mawu tɔn mɛ, mi ɖo acɛ, bɔ mi lɛ le hwɛndo Mawu tɔn mɛ. ²⁰ Mi huzu oxwe ke apotru kpodo xoyiɖɔtɔ lɛ kpo nyi dodonu na. Jezu Klisi lɔsu wɛ nyi dodonu lɔ. ²¹ Le kɔn dokpɔ Klisi tɔn mɛ okpɛn ke gba xɔ lɔ lɛ nɔ si yɛn le. Bɔ oxwe xɔn nɔ wa klo bo nɔ wa zun ɖɛxoxɔ mimɛ le Aklunɔ mɛ. ²² Le kɔn dokpɔ Klisi tɔn mɛ wɛ, mi le oxwe ke ye gba lɔ mɛ. Bɔ kpodo mɛ di ɛ lɛ kpo mi huzu fi lokpo ke Mawu le do gbon Yɛ Ɖeɖovo etɔn mɛ.