¹ Nyɛ Pɔlu, un nyi Apotru Jezu klisi tɔn do gbɔn ojlo Mawu tɔn mɛ.Un le wlan nu na mɛ ke nyi Mawu tɔn lɛ le Efɛzi bo di nu na Aklunɔ Jezu lɛ. ² Na Mawu Otɔ mitɔn kpodo Aklunɔ Jezu Klisi kpo ni do na mi bo na mi fifa! ³ Na Mawu ke nyi Aklunɔ Jezu Klisi mitɔn we tɔ ni nyi susu! Yi wɛ do na mi kpodo dona gbigbɔ mɛtɔn lɛ bisese kpo le sɛxwe le Klisi mɛ. ⁴ Mawu cyan mi le Klisi mɛ sɔn bibɛnu ogbɛ lɔ tɔn, na mi na do nyi mɛ mimɛ bɔ Mawu ma si do mɔ nu ti do mi go gɛ. ⁵ Bɔ sɔn hwe ɖe nu, Mawu jlo ɖɔ mi ni nyi ovi ɛ do gbɔn Klisi mɛ. E jlo do gbɔn yi yɔ etɔn mɛ. ⁶ Mi kpa gigo na Mawu na agba dido nu ɖagbe ke E wa na mi lɛ tɔn! E na vɔnu do gbɔn ovi ke E nyi wan na lɔ mɛ. ⁷ Le Klisi mɛ, do gbɔn ohun etɔn mɛ, mi mɔ kan tun tun yi sɔn onu nyinyla si, bɔ ohwɛ mitɔn mɔ sɔkɛ yi, ɖo ɖagbe wan nyinyi etɔn klo. ⁸ Ɛɛ, Mawu gɔ mi kpodo ɖagbe etɔn kpo. E na nu nyinyɔ ɛn mi mi bo lɛ na mi nu nyinyɔ ɛn kpi kpe . ⁹ E xlɛ mi nu budo etɔn lɛ, na do ɖɔ, le nyinyɔ etɔn mɛ, E jlo na blo le Klisi mɛ sɔn hwe lɛ kpokponu. ¹⁰ Tito xɔn, Mawu jlo na blo le hwe kenu E ze: Na kple nu ke le oji lɛ kpo kpo kpodo ke le ayizan ji lɛ kpo le ogan lokpo mɛ, yi wɛ nyi Klisi. ¹¹ Le Klisi mɛ, Mawu ze ke nyi mitɔn na mi. Na hwɛnlɛngan bo cyan mi da nyi na tito etɔn. E blo nu exɔn lɛ kposese ɖo E ze gbeta bo lɛ jlo. ¹² Na mi mɛ ke nyi nukɔn tɔn bo ze ji ɖide mitɔn do Klisi mɛ lɛ, mi ni kpa gigo na Mawu! ¹³ Le Klisi, mi e lɔsu, hwenu ke mi na se oxo xojɔxo tɔn lɔ, Wɛn Ɖagbe hwɛnlɛngan mitɔn tɔn, bɔ mi ɖi nu na bɔ e sin mi kpodo Yɛ Ɖeɖovo lɔ kpo ke e do akpa etɔn. ¹⁴ Yɛ Ɖeɖovo lɔ wɛ nyi nu ɖagbe ke mi na yi sɔn Mawu de lɔ. Mi na mɔ kpo kpo yi hwenu ke mi na jɛ mi ɖe si kpete sɔn nu nyinyla lɔ si. Mi ni kpa gigo na Mawu. ¹⁵ Nu ke un se ke: Mi ɖi nu na Aklunɔ Jezu, bo na nyi wan na etɔn nɔ lɛ kpose. yi wɛ zɔn bɔ sɔn hwenu ke un yɔ ɛn do le, ¹⁶ un nɔ ylɔ nyi kɔ mitɔn le oɖɛ ce lɛ mɛ, bɔ un nɔ le do kpɛ na Mawu hwe bi nu do mi wu. ¹⁷ Un nɔ xo ɖɛ bo nɔ byɔ Mawu Aklunɔ Jezu Klisi mitɔn, Otɔ gigo nɔ lɔ ɖɔ ni bo na mi Yɛ nu nyinyɔ ɛn kpi kpe tɔn kpodo nu mi mɔ kpo le nu nyinyɔ ɛn etɔn mɛ. ¹⁸ Un le byɔ ɛ ɖɔ ni hun nukun ayixa mitɔn tɔn. Hwe exɔn nu, mi na yɔ aɖɔ gbigbo ke E na mi bo do ylɔ mi. Mi na nyɔ aɖɔkun ɖagbe nu ni na ɖagbe ke E nɔ na mɛ ke nyi etɔn lɛ. ¹⁹ Mi na nyɔ hihlɔn vo ke Mawu na mi, mi mɛ ke ɖi nu ni lɛ. Hihlɔn etɔn kpo gigo etɔn, ²⁰ Mawu ɖe ye xlɛ le Klisi mɛ hwenu ke E fɔn ɛn sɔn ku, bo ze ze flɔn aɖisi mɛ etɔn le Sɛxwe. ²¹ Klisi, ye ze do ta na, hɔnhlɔn lɛ kpose, kpodo hɔnhlɔn ke ɖo acɛ lɛ kposese kpo. E le ji na nu ke le lɛ kpo, e ma nyi egbe kɛ ɖɛ mɛ gɛ, amɔ kaka do jɛ osɔ ke ja. ²² Ɛɛ, Mawu ze nu lɛ kpo kpo do Klisi we afɔ gɔ. Eze Klisi do ji na nu lɛ kposese, bo ze do ze ota na agun etɔn. ²³ Agun wɛ nyi agbaza Klisi tɔn. Le e yɔ mɛ, Klisi le gbɛ, e yɔ ke mɛ Mawu gɔ kpete.