¹ Ke zingidi lɔ fo, Pɔlu kple ahwanvi Jezu tɔn lɛ bo do gan namɛ na ye. Exɔn godo, e do eyi zanɖe na ye bo ze Masedwani we mɔ. ² E gbɔn toxo xɔn mɛ bɔ le flɛn e ɖɔ xo susu do dogan namɛ na yisenɔ lɛ tawun bo wa yi Glɛsi. ³ Pɔlu nɔ na sunzan atɔn. Hwenu ke e na do bato bo na yi Sili, e se ɖɔ Jwifu lɛ bo jlo na wa nu nyinyla ɖe. Bɔ e ze gbeta bo lɛ kɔ yi Masedwani. ⁴ Mɛ ke plɛn lɛ ke: Sopater, ovi Pyrus tɔn, Bereenu wɛ e nyi; Aristark kpo do Seckundus tɛsalinikinu lɔ kpo; Gayius, Derbenu lɔ kpo do Timɔtee; Ticik kpo do Trɔfim Azi nu lɔ kpo. ⁵ Gbɛta xɔn yi jɛ nukɔn na mye, ye nɔ te kpɔn mi le Troas. ⁶ Bɔ mye mi do bato le agbangli ɖo tɛn Filipu tɔn le Paskwa godo. Azan atɔn etɔn godo, mi yi mɔ kplekple lɔ le Troas bɔ mi nɔ kpɔ na osɛ ɖokpo. ⁷ Samɛdi hwedo, mi nɔ kpɔ mɛ bo ma wɔ xuxu. Pɔlu yi xo le yisenɔ sunnu kpodo nyɔnu lɛ kpo we nukɔn. ⁸ Ɖo e ɖo na sɔn le anyihɔn etɔn gbe, e le ɖɔ xo ka na zan vlɔ dawe. Singbo ji wɛ mi ka kple le le xɔ lokpo mɛ, bɔ le flɛn ye ta zɔngbɛn susu. ⁹ Ɖekajɛ ɖokpo, nyikɔ etɔn nɔ nyi Etikusi flɔn anyi le flɛsɛnu. Pɔlu le ɖɔ xoxo susu. Etikusi byɔ amlɔ siso siso ɖe mɛ. Ke na amlɔ yi, e flɛ sɔn singbo lɔ ji le zedeji atɔn gɔ lɔ mɛ bɔ hwenu ke ye na ze, e ko ku. ¹⁰ Pɔlu jɛte bo ze do alɔ mɛ bo le ɖɔ: «Mi nɔ kpɔn hu ado gɛ, e le gbɛ.» ¹¹ Bɔ Pɔlu lɛ yi oji, e man wɔxuxu xa ye bɔ ye ɖu. E le ɖɔ xo xa ye ka bɔ hwe tɔn bɔ e sɔn. ¹² Exɔn godo, ye hɛn vi sunnu lɔ wa gbɛgbɛ etɔn bɔ awu ya ye. ¹³ Mi nyi mɛ nukɔn tɔn ke do tɔjihun bo yi Asos, bɔ le flɛn, mi dɔn Pɔlu bɔ e xodo mi ɖo e ba na gbɔn mɔji do yi. ¹⁴ Pɔlu mɔ mi le Asos, mi ze e do bato lɔ mɛ, bɔ mi zɔn ze yi Mitilɛnu. ¹⁵ le flɛn, mi zɔn bo lɛ lɛkɔ yi kpo bato kpo bɔ anyihɔngbe etɔn mi jɛte do Kio nukɔn. Anyihɔngbe etɔn mi yi Samos bo wa yi mi Milet le azan etɔn atɔngbe. ¹⁶ Pɔlu jlo na gbɔn Efɛzi otemanɔ, e ma jlo na ɖu ganmɛ le azi gɛ. E le ya wu ɖo e ba na le Jeluzalɛmu le Yɛ ɖeɖovo zangbe na e si kpewu. ¹⁷ Le Milet, Pɔlu sɛ mɛ do Efɛzi na ye na do plan mɛxoxo agun tɔn lɛ wa. ¹⁸ Hwenu ke ye wa Pɔlu de, e le ɖɔna ye ɖɔ: «Mi mɔ le ke un zan gbɛ kpo do mye kpo ɖo sɔn azan nukɔntɔn ke un do wa azi. ¹⁹ Un sɛn Aklunɔ kpodo mɛɖe ze hwe kpo, avi kpo yajiji kpo ɖo Jwifu lɛ ba na wa danu xa un. ²⁰ Nu ke na nyi ɖagbe na mi lɛ kpose, un ɖɔ na mi. Le mɛlɛ kpose nukɔn, le xwe mitɔn le gbe, un ɖɔ xo Aklunɔ tɔn na mi, bo lɛ kplɔn mi. ²¹ Un ylɔ yisenɔ kpo do mayisenɔ lɛ kpose ɖɔ ye ni bo sɛn Mawu bo ɖinu na aklunɔ Jezu. ²² Odin un le sɔn yi Jeluzalɛmu. Oyɛ ɖeɖovo lɔ wɛ ɖɔ nyɛ ni bo yi le dandan mɛ. Un ma nyɔ nu ke na jɔ do jye le dɔn gɛ. ²³ Amɔ le toxo lɛ lokpo lokpo mɛ, Oyɛ ɖeɖovo lɔ nɔ ɖɔ na un ɖɔ nyɛ bo na ji ya bo na yi gankpamɛ. ²⁴ Na nyɛ, ogbɛ ce ma nyi nuti gɛ. Nu ke un ba, wɛ nyi na yi kaka vivɔnu na azɔn ce. Un jlo na blo nu ke Aklunɔ Jezu zɔn un lɛ kposese. Na do ɖɔ, na ɖe kunnu na Wɛn ɖagbe wan nyinyi Mawu tɔn. ^{25 26} Un gbɔn mimɛ kpose mɛ do la axɔluɖuta Mawu tɔn na mi, bɔ odin, un mɔ do na ɖɔ mi ma sɔ na mɔ nukunmɛ ce gɛ. Yi wɛ zɔn bɔ un le ɖɔ na mi egbe din kpo hɔnhlɔn ɖe kpo: Un blo nu ke wu un kpe na mimɛ bi. Na e wa ya nɛ mi ma ze nukplɔnmɛ ce do ylɔ nu gɛ, e ma sɔ kan un gɛ. ²⁷ Na do ɖɔ, un ɖɔ nu ke Mawu jlo lɛ bisese na mi, un ma hwla nuti do mi gɛ. ²⁸ Mi cɔ miɖe, bo cɔ ovi Mawu tɔn ke le alɔ mitɔn mɛ lɛ. Mi kpe nukun do agun Mawu tɔn wu. E na ohun etɔn do hwlɛn agun lɔ wɛ. ²⁹ Na un sɔn, un mɔ dona ɖɔ gbɛtɔ baɖabaɖa lɛ na byɔ mimɛ bo na wa nu nyinyla xa togun lɔ. ³⁰ Bɔ le mye lɔsu mɛ, mɛɖe lɛ na jɛ awo ɖo ji bo na dɔn mɛɖe lɛ do godo. ³¹ Mi nɔ nukle! Bɔ mi nɔ flin ɖɔ: Sɔn oxwe atɔn ke, un nɔ kplɔn nu mi kpo avi kpo le zan kpo do okle kpo. ³² Odin un ze mi do alɔ Mawu tɔn mɛ kpo do wan nyinyixo etɔn mɛ kpo. Oxo lɔ ɖo hɔnhlɔn ke na blo kɔndokpɔmɛ mitɔn ɖo. Do gbɔn oxo lɔmɛ lɔsu Mawu na na mi nu ɖagbe ke e ze d'anyi na etɔnnɔ lɛ. ³³ Un ma jlo akwa, sikanu alo nuzizan mɛɖe tɔn gɛ. ³⁴ Mye lɔsu mi mɔ dona: Un wa azɔn kpo alɔ ce kpo na do hwlɛn gbɛce kpo do mɛ ke xodo un lɛ tɔn kpo. ³⁵ Un nɔ xlɛ mi hwe lɛ kponu: Mi wa azɔn do le bona do gɔ alɔ na wamamɔnɔ lɛ. Bɔ mi nɔ flin nu ke Aklunɔ Jezu lɔsu ɖɔ: «Yɔna le nunina mɛ xugan nuyiyi.» ³⁶ Ke Pɔlu fo oxo ɖiɖɔ, e jɛ klo bo xo ɖɛ xa ye mɛ bisese. ³⁷ Bɔ yemɛ bi jɛ aviviji, bo xo fɛn ɛ. ³⁸ Ye byɔ awublamɛ ɖo e ɖɔ: «Mi ma sɔ na mɔ nukunmɛ ce ɖevo ba gɛ.» bɔ ye wa pklɛn kaka bo i ɖo e ɖo bato mɛ.