¹ Exɔn godo Pɔlu lɛkɔ sɔn Atɛni bo wa yi Kɔlɛnti. ² Flɛn, e kpe Jwifu ɖokpo bɔ e nɔ ylɔ ɛ ɖɔ Akilasi bɔ e nyi tokpɔn Pɔɔn mɛ nu. E sɔn Italii bo wa kpo asyɛ Plisilu kpo. Ɖo tokpɔngan Klodu ɖɔ ɖɔ Jwifu lɛɛ kpo sese ni bo tɔn sɔn HLɔmu. Pɔlu yi Akilasi kpo Plisilu kpo de. ³ Azɔn ɖokpo lɔ pɛpɛ wɛ ye nyɔ wa: Ye nɔ gba goxɔ. E wɛ zɔn bɔ Pɔlu ci ye de, bɔ ye le wa azɔn do kpɔ. ⁴ Gbɔjɛzan lɛɛ kpokpo gbe, Pɔlu nɔ le ɖɔ xo le oɖɛxoxɔ lɔ mɛ na Jwifu lɛ kpo ma nyi Jwifu lɛ kpo. ⁵ Hwenu ke Silasi kpo timɔte kpo wa Masedwani, Pɔlu ze hwenu etɔn lɛ kpo sese do le ɖɔ Mawuxo. E le tinmɛ na Jwifu lɛɛ ɖɔ Jezu bɛ bo nyi Mɛsi lɔ, ⁶ Amɔ ye ma le gbesisɔ mɛ xa ɛ gɛ bɔ ye nɔ le zu i. Bɔ Pɔlu hunhun onu ke e do lɛɛ bo le ɖɔ na ye ɖɔ: «nu ke na wa jɔ do mi ji, mye lɔsu wɛ ba, nyɛ, e ma le kɔ na un gɛ! Bɛ sɔn egbe din, na nyi mɛ ke ma nyi Jwifu gɛ lɛ de.» ⁷ Pɔlu tɔn sɔn oɖɛxoxɔ lɔ mɛ. E yi mɛ ke e nɔ ylɔ ɖɔ Titiwusi-Jusitusi de. Mɛɖe wɛ e nyi bo nɔ sɛn Mawu bo le akpa na oɖɛxoxɔ lɔ. ⁸ Klisipusi, ke nyi ogan na oɖɛxoxɔ lɔ , jɛ nu ɖi na Aklunɔ ji kpodo hɛnnu etɔn kpo. Kɔlɛntinu lɛ susu ɖinu hwenu ke ye le ɖoto Pɔlu. Bɔ e lɛ nylɔ ye do tɔmɛ. ⁹ Zanmɛ ɖokpo Mawu ze eɖe xlɛ Pɔlu bo ɖɔ n'i ɖɔ: «Nɔkpɔn ɖi obu gɛ, dogan do oxo lɔ wu bo ɖɔ, nɔkpɔn bɔ nu gɛ! ¹⁰ Ɛɛ, un le okpɔ xa we, bɔ mɛti ma sixu ɖo alɔ awuwe bo na wa nuɖe xawe gɛ. Mɛ ke nyi ce le toxo kɔ mɛ lɛ susu.» ¹¹ Pɔlu nɔ Kɔlɛnti na oxwe ɖkpo adaɖe. E le kplɔn oxo mawutɔn wu mɛ lɛɛ. ¹² Hwenu ke Galiɔɔn nyi tokpɔngan Hlɔma tɔn le Akayi, Jwifu lɛ kpo sese wɛ nɔ sɔta wu Pɔlu. Ye nɔ hɛn do yi hwɛnukɔn lɛɛ ¹³ bɔ ye nɔ ɖɔ: «Dahwe kɔ le zɔn mɛ lɛ Mawu sisɛn ke sɔta osɛn lɔ!» ¹⁴ Pɔlu jlo na kɛ nu de go na ye , amɔ Galiɔɔn ɖɔ na ye ɖɔ: «E ma nyi nuwagbɔ alo mɛhunu ɖe we nu ɖe bo nyla gɛ, e ma nyi le, na ɖoto mi, mi mɛ ke nyi Jwifu lɛɛ. ¹⁵ Amɔ mye, mi le ɖɔ xo do xokun, nyikɔ kpodo osɛn mitɔn kpo go. Hun mye lɛ wɛ ekan! Un ma ba na nyi ohwɛɖɔtɔ na onu exɔn lɛɛ gɛɛ» ¹⁶ Bɔ Galiɔɔn nya ye le Hwɛɖɔxɔ lɔ mɛ. ¹⁷ Bɔ ye mɛ kpose sɔ mɔ do sositɛnu, ogan oɖɛxoxɔ lɔ tɔn. Ye xo e le hwɛɖɔxɔ lɔ we nukɔn, amɔn Galiɔɔn ma trɛ kpɔn flɛn gɛ. ¹⁸ Pɔlu lɛ nɔ Kɔlɛnti susu, exɔn godo e wa lɛ sɔn yisenɔ lɛ de. E do bato bo yi Sili, kpodo Plisilu kpo akilasi kpo. Hwɛ kpo co exɔn, e xlɛ ta le Sankle ɖo e dɔ. ¹⁹ E wa Efɛzi , bɔ flɛn wɛ Pɔlu wa jo Plisilu kpo Akilasi kpo do le. E yi oɖɛxoxɔ lɔ mɛ bo yi ɖɔ xo xa Jwifu lɛɛ. ²⁰ Mɛ ekɔ lɛ le byɔ ɛ ɖɔ: «Lɛ nɔkpɔ xa mi!» Amɔ Pɔlu ma ba gɛ, ²¹ e lɛ le yede bo ɖɔ na ye ɖɔ: «Na lɛkɔ wa mide hweɖevo nu na Mawu jlo.» Exɔn godo, e lɛkɔ le Efɛzi gbɔn bato mɛ. ²² Pɔlu wa Sezalee. E to yi Jeluzalɛmu bo yi do gbe na agun lɔ hwɛ kpo bo wa yi Antyɔci. ²³ E nɔ toxo exɔn mɛ na hwenu ɖe, bo wa sɔn. E gbɔn Galati kpo Flijii kpo bo do gan namɛ na ahwanvi Jezu tɔn lɛɛ. ²⁴ Jwifunu ɖokpo ke e ji le Alɛsandri wa Efɛzi. Nyikɔ etɔn nɔ nyi Apolosu. E nɔ ɖɔ xo ganji bo lɛ nyɔ Mawuxo lɔ wi ganji. ²⁵ Ye kplɔn ɛ le ke e nɔ xodo omɔ Aklunɔ tɔn. Kpodo akpakpa ɖaxo ɖe kpo, e le la bo lɛ le kplɔn Wɛn ɖagbe Jezu tɔn lɔ mɛ, amɔ mɛ nylɔdotɔmɛ Jaan tɔn kɛɖɛ wɛ e nywɛ. ²⁶ Hun, e le ɖɔ xo kpodo kanɖeji kpo le oɖɛxoxɔ Jwifu lɛ tɔn mɛ. Hwenu ke Plisilu kpo Akilasi kpo le se, ye yi do oxwe yetɔn gbe bo lɛ kplɔn ɛ ganji tɔn omɔ Aklunɔ tɔn lɔ. ²⁷ Apolosu jlo na yi Akayi. Yisenɔ lɛ do gan namɛ n'i ɖɔ ni bo yi. E wlan wema ɖoxlan ahwanvi ke le dɔn lɛɛ, bo do ɖɔ na ye ɖɔ ye ni bo yi jonɔ Apolosu tɔn ganji. Hwenu ke e wa, e nyi nu xɔ akwa na yisenɔ lɛ, ɖo Mawu le okpɔ xa ɛ. ²⁸ Le mɛ lɛ kpose nukɔn, e ɖɔ xo ganji kaka bɔ Jwifu lɛ ma mɔ nuti na ɖɔ do e go gɛ. E nɔ ze wema wiwe lɔ do na xlɛ ɖɔ Jezu bɛ bo nyi Mɛsi.