¹ Pɔlu Silasi kpo gbɔn Anfipolisi kpodo Apoloni kpó bo wa Tɛsaloniki. Flɛn, oɖɛxoxɔ Jwifu lɛɛ tɔn ɖokpo le. ² Pɔlu yi kpe Jwifu lɛɛ ɖi le ke e ko le walɔ etɔn mɛ ɖo na gbɔjɛzan gbe atɔn, bo ɖɔ xo xa ye. Do gbɔn wema mimɛ lɔ mɛ, ³ E le tin numɛ na ye bo lɛ le xlɛ onu ekɔ wu ye: «Mɛsi lɔ ɖo na ji ya bo na fɔn sɔn ku. Bɔ Mɛsi lɔ, yi wɛ nyi Jezu ke un le ɖɔ oxo etɔn na mi lɔ.» ⁴ Oxo lɔ xo ayixa na Jwifu lɛ susu bɔ ye xodo Pɔlu kpo Silasi kpo. Glɛsinu susu ke nɔ sɛn Mawu lɛ xodo ye gba kpodo nyɔnu ɖe lɛ kpo ke tɔn sɔn mɛjɔmɛ lɛ we kunkan mɛ. ⁵ E vɛ na Jwifu ɖe lɛɛ bɔ ye hwanwu do onu exɔn wutu. Bɔ ye mɔ gbevu ɖe lɛ bo kplan ye le mɔji. Ye kple mɛ lɛ bo jɛ onu ɖejan ɖe lɛɛ blo le toxo lɔ mɛ ji. Ye yi Jazɔɔn we xwe gbe bo do yi din Pɔlu kpo Silasi kpo. Na do ɖɔ, ye le din na wle ye bo na hɛn ye wa togun lɔ nukɔn. ⁶ Amɔ ye ma mɔ ye gɛɛ, bɔ ye gbɔ bo hɛn Jazɔɔn kpo do yisenɔ ɖe lɛɛ kpo do wa ohwɛɖɔtɔ lɛɛ nukɔn le toxo lɔ mɛ. ⁷ Jazɔɔn yi ye do xwe etɔn gbe. Ye me kpo sese le sɔta osɛn tokpɔngan lɔ tɔn, ye ɖɔ axɔlu ɖokpo gee bɛ bo le, yi wɛ nyi Jezu.» ⁸ Oxo exɔn kpaca togun lɔ ta un kpo do ohwɛɖɔtɔ lḷɛ kpo. ⁹ Hun, Jazɔɔn kpo yisenɔ ɖyɛ lɛ kpo ɖo na su akwa ɖaxo ɖe bɔ ohwɛɖɔtɔ lɛɛ na do jo ye do. ¹⁰ Hwenu ke ozan ku, yisenɔ lɛɛ ze Pɔlu kpo Silasi kpo sɔ sɔn yi Belée. Ye mɛ awe lɛɛ wa toxo lɔ mɛ bo yi oɖɛxoxɔ Jwifu lɛ tɔn mɛ. ¹¹ Jwifu ke le Belée lɛɛ nyɔ jonɔ yi hu gan Jwifu ke le Tɛsaloniki lɛɛ. Ye yi oxo Mawu tɔn kpodo akpakpa ɖe kpo. Gbe ɖokpo le, ye nɔ gbeje oxo Mawutɔn mɛ kpɔn do kpɔn ɖɔ e sɔ gbe xa oxo ke Pɔlu nɔ ɖɔ lɛɛ ja. ¹² Mɛ susu le ye mɛ bo trɔzun nuɖitɔ na Mawu. Le Glesinu lɛ mɛ, a na mɔ nyɔnu mɛjɔmɛ lɛɛ kpodo sunnu ɖe lɛɛ kpo gba. ¹³ Amɔ Jwifu ke le Tɛsaloniki lɛ se ɖɔ Pɔlu bo le ɖɔ oxo Mawu tɔn le Belee. Hun ye lɛ wa flɛn bo na do do zingidi te do gbe nu. ¹⁴ Azɔn ɖokpo yisenɔ lɛɛ ze Pɔlu do sɔ mɔ ɖo fi ke oxu le, amɔ Silasi kpo do Timɔte kpo ci Belée. ¹⁵ Mɛ ke dɔn Pɔlu lɛɛ kplan ɛ kaka do yi Atɛni. Bɔ ye lɛkɔ bo wa yi ɖɔ na Pɔlu kpo Silasi kpo ɖɔ: «Pɔlu ɖɔ mi ya wu ble un bo wa mɔ un din tlololo.» ¹⁶ Pɔlu nɔte kpɔn Timɔte kpo Silasi kpo le Atɛni. E mɔ ɖɔ oto exɔn me, ye nɔ sɛn yɛhwe ke alɔ blo lɛɛ susu. E wutu wɛ ebla wu n'i. ¹⁷ Le oɖɛxoxɔ lɔ mɛ, e le ɖɔ oxo xa Jwifu lɛɛ, kpodo omɛ ɖevo ke nɔ sɛn Mawu lɛɛ. Bɔ le otokpletɛn toxo lɔ mɛ tɔn, e nɔ le ɖɔ xo xa wayi wayi tɔ lɛɛ. ¹⁸ Glɛsinu ke e nɔ ylɔ ɖɔ Epikiliɛn kpodo Sitoyisiɛn ɖe lɛ le ɖɔ xo xa ɛ. Mɛɖe lɛ nɔ ɖɔ: «Onuwleɖɔtɔ ɖe wɛ! Onu tɛ e jlo na wle ɖɔ? » Omɛɖevo lɛ nɔ ɖɔ: «E ɖo nukunme ɖi mɛ ke nɔ ɖɔ Mawu jonɔ lɛ we oxo ha.» Na do ɖɔ, Pɔlo le la Wɛn ɖagbe Jezu tɔn wɛ. E lɛ le ɖɔ ɖɔ omɛ ke ku lɛ bo na fɔn. ¹⁹ Ye dɔn Pɔlu bɔ e xo do ye. Ye dɔn ɛ do yi onukplɔnmɛtɔ toxo lɔ mɛ tɔn lɛ de bo le ɖɔ n'i ɖɔ: «Mi hɛn mi na nyɔ nukplɔnmɛ yɔyɔ ke a le ɖɔ kɔ lɛ wi?» ²⁰ A le ɖɔ oxo na mi ma nɔ te do onu jonɔ lɛ ji, bɔ mi ba na mɔ do na nu ke ele ɖɔ.» ²¹ Ɖo na do ɖɔ Atɛninu lɛɛ kpo do jonɔ ke le Atɛni lɛ kpo nɔ ze hwenu yetɔn do le ɖɔ alo do ɖoto linlin yɔyɔ lɛɛ. ²² Bɔ Pɔlu nɔ te le nukplɔnmɛtɔ lɛ nukɔn le toxo lɔ mɛ bo ɖɔ: « Atɛninu lɛɛ, un mɔ ɖɔ mi nyi mɛɖe bo nyi wan na ohusisɛn, le nu lɛ bisese mɛ. ²³ Hwenu ke un gbɔn omɔ mitɔn lɛ ji, un mɔ alɔ blo bɔ mi nɔ sɛn lɛ. Un mɔ yɛhwexɔ ɖokpo bɔ e wlan onu ke ɖo e go: «"Na mawu ke ma ɖo nyikɔ." Nyɛ wa bo na ɖɔ nu ke mi ma nywɛ bo le sɛn lɔ na mi. ²⁴ Mawu ke blo ogbɛ lɔ kpo onu ke le emɛ lɛ bisese kpo, yi wɛ nyi Aklunɔ oji kpo odo kpo tɔn. E mɔ nɔ nɔ yɛhwexɔ ke gbɛtɔ blo kpo alɔ kpo lɛ mɛ gɛ. ²⁵ E ma ɖo hudo ɖɔ mye wɛ na na ogbɛ wi gɛ, nuti ma hwe do e gɛ. Na do ɖɔ, yi wɛ na ogbɛ wu mɛ lɛ kpo sese, gbigbɔ kpo do onu ke kpo lɛ kpo sese kpo. ²⁶ Do gbɔn gbɛtɔ ɖokpomɛ, e blo akɔta le kpo sese bɔ ye na do nɔ anyizan lɔ kpo sese ji. E ɖo dogbo na oto lɛɛ ɖokpo ɖokpo, e ɖo hwenu lɛɛ ɖokpo ɖokpo. ²⁷ Mawu blo onu exɔn lɛɛ na gbɛtɔ lɛɛ na do bɛ ɛ mɔ. E na bo trɛ vyawu na ye na biba ɛ can, ye sixu mɔ ɛ. Xojɔxo mɛ, e ma dɛn do ɖokpo ɖokpo mitɔn lɛɛ gɛ. ²⁸ Gbɔn eyɔ mɛ wɛ mi le ogbɛ le, bo nɔ sɛ tɛn le bo lɛ le ogbɛ le. Onu wlantɔ mitɔn ɖe lɛ ko ɖɔ: "Ɛɛ, mi nyi ovi etɔn lɛ." ²⁹ «Ɖo le mi nyi ovi Mawu tɔn. Hun, mi ma si nɔ jlɛ Mawu do onu ye yi sika do blo lɛ gɛ, alo akwagan kpo do okpɛn ke gbɛtɔ blo lɛ kpo gɛɛ. Gbɛtɔ lɛ blo onu lɛɛ ɖo ye ma nyɔ Mawu wi gɛ. ³⁰ Amɔ Mawu ma ze hwenu xɔn lɛ do ylɔ nuɖe gɛ. Odin, e ylɔ gbɛtɔ lɛ kposese ke gbɔn oto lɛ bisese mɛ ɖɔ ye ni bo ɖyɔ gbezan yetɔn lɛ. ³¹ Na do ɖɔ Mawu ze gbe ɖokpo na do da ohwɛ na gbɛtɔ lɛ kpokpo gbɔn hwɛ jijɔ etɔn mɛ. E ze gbɛtɔ ɖokpo na onu exɔn, bɔ e fɔn ɛ sɔn oku. Do le, Mawu ɖexlɛ gbɛtɔ lɛ kpo sese ɖɔ dahwe exɔn wɛ nyi ohwɛdanamɛtɔ ke e ze lɔ.» ³² Hwenu ke Glesinu lɛ se ɖɔ Mawu bo nɔ fɔn mɛ sɔn ku, mɛɖe lɛ nɔ ca Pɔlu ko, mɛdyɛ lɛ nɔ ɖɔ: «Mi na lɛ wa ɖo to we na oxo exɔn lɛɛ hwe ɖevo nu!» ³³ Bɔ Pɔlu lɛ le yede. ³⁴ Co, mɛɖe lɛɛ xo do e bo wa ɖinu na Mawu. Le ome exɔn lɛɛ mɛ, a na mɔ Denisi ke nyi nukplɔnmɛtɔ ɖokpo le Atɛni; nyɔnu ɖokpo nyi Damarisi kpodo omɛ ɖevo lɛɛ kpo.