¹ Pɔlu wa Dɛɛbe, bo wa wa Lisitli. Flɛn, ahwanvi ɖokpo le bɔ e nɔ ylɔ ɛ ɖɔ Timɔtee, Jwifu wɛ nyi onɔ bo wa yise, amɔ otɔɔ ma nyi Jwifu gɛ. ² Yisenɔ ke le LIsitli kpodo Ikoniyɔmu nɔ ɖɔ xo Timɔtee tɔn ɖagbe. ³ Pɔlu jlo bo na dɔn ɛ. Hun ye gbo ada n'i ɖo Jwifu oto exɔn lɛ tɔn mɛ wutu. Ɖo ye mɛ kpo sese nywɛ ɖɔ otɔɔ bo ma nyi Jwifu gɛɛ. ⁴ Pɔlu kpo Silasi kpo le gbɔn toxo lɛɛ ɖe bɔ do ɖe wu mɛ. Ye le ɖɔ gbɛta ke mɛɖoxlan lɛɛ ze kpodo mɛxo Jeluzalɛmu tɔn lɛɛ kpo na yisenɔ lɛɛ; bo le byɔ ye ɖɔ ye ni bo se tonu na. ⁵ Agun lɛɛ wa syɛn le nuɖiɖi mɛ, bɔ yisenɔ lɛɛ fɔn bo le jɛ e ji. ⁶ Oyɛ ɖeɖovo lɔ ma na mɔ Pɔlu bɔ e na do ɖɔ oxo Mawu tɔn le Azi gɛɛ. Hun ye gbɔn Fligi kpodo Galati kpo, ⁷ bɔ ye wa Misi bo do gan na do yi Bitinii. Amɔ Oyɛ ɖeɖovo Jezu tɔn ma na ogbe etɔn wu ye bɔ ye na do yi gɛ. ⁸ Yi wɛ zɔn bɔ ye gbɔn Misi bo yi Tloasi. ⁹ Le ozan ɖokpo mɛ, Pɔlu mɔ Masedwaninu ɖokpo bɔ e le ote. E le kan oxo se Pɔlu kpo hɔnhlɔn kpo ɖɔ: «Gbɔn Masedwani bo wa gɔ alɔ na mi!» ¹⁰ Tlololo le exɔn godo mi ba na yi Masedwani. Mi ɖo kandeji ɖɔ Mawu wɛ ylɔ mi bɔ mi na do yi ɖɔ oxo Mawu tɔn le dɔn. ¹¹ Mi do bato le Tlowasi bɔ mi sɔ mɔ telele bo yi Samɔtlási . Anyihɔngbe etɔn, mi sɔ mɔ bo yi Nɛyapolisi. ¹² Bɔ le flɛn, mi sɔ mɔ bo yi Filipu, toxo taji ɖe wɛ bo le Masedwani, bɔ Hlɔmanu lɛɛ wɛ kpa cɛ na ye. Mi nɔ flɛn na hwenu ɖe. ¹³ Le gbɔjɛzangbe, mi tɔn sɔn toxo lɔ mɛ bo yi otɔ ɖe to, ɖo mi le lin ɖɔ: «Le flɛn, oɖɛxoxɔ Jwifu lɛ tɔn ɖe na le dandan.» Mi flɔn anyi bo le ɖɔ xo kpodo nyɔnu ke kple le flɛn lɛɛ kpo. ¹⁴ Ynɔnu exɔn lɛ mɛ, omɛ ɖokpo nɔ nyi Lidi, ye ji eyɔ le Tiyati. Avɔ ɖagbe satɔ ɖe wɛ e nyi bo nɔ lɛ sɛn Mawu. Nyɔnu xɔn le ɖoto mi, bɔ Aklunɔ lɛ hun ayixa etɔn na e na do ɖoto ceɖeceɖe axo Mwutɔn ke Pɔlu le ɖɔ. ¹⁵ E nylɔ ɛ do tɔmɛ, eyɔ kpodo hɛnnu etɔn kpo bɔ e ylɔ mi bo ɖɔ: «Na mi jlo ɖɔ ma nyi Mawutɔn le xojɔxo mɛ, mi wa nɔ oxwe ce gbe.!» Bɔ e ɖɔ mi ni bo yi gbe. ¹⁶ Gbeɖokpo mi yi oɖɛxotɛn. Azɔnwatɔ ɖokpo wa kpe mi, e ka oyɛ nyinyla ɖokpo le eyɔ bɔ e nɔ ɖɔ onu ke na wa jɔ lɛ na mi. Onu ke na wa jɔ do mɛ lɛɛ ji, enɔ ɖɔ na ye. E na bɔ ogan etɔn lɛɛ ɖo akwa susu. ¹⁷ Nyɔnu exɔn xodo mi, pɔlu kpo do mye kpo, bo nɔ do axwa bo nɔ ɖɔ: «Ome ekɔ lɛɛ, mɛsɛntɔ Mawu ke hugan nu lɛɛ kpo sese wɛ! Ye na xlɛ omɔ lɔ wu mi bɔ mi na do mɔ hwɛnlɛngan.» ¹⁸ Mɛsɛntɔ xɔn le blo nu exɔn na azan susu. Vivɔnu etɔn, Pɔlu sin xomɛ, bo lilɛ kɔ bo ɖɔ na oyɛ nyinyla lɔ ɖɔ: «Le Jezu-Klisi we nyikɔ mɛ, tɔn sɔn nyɔnu kɔ mɛ!» Bɔ oyɛ nyinyla lɔ tɔn azɔnɖokpo. ¹⁹ Mɛsɛntɔ nyɔnu xɔn we ogan lɛɛ mɔ ɖɔ e bo ma si sɔ nyi azɔnwana emye lɛɛ tɔ bɔ mye lɛɛ na do mɔ akwa ba gɛ. Hun, ye wle Pɔlu kpo Silasi kpo bɔ ye ze ye ze yi tomɛxo lɛ de le otokpletɛn. ²⁰ Ye ze ye yi ohwɛɖɔtɔ Hlɔmanu le de bo ɖɔ ɖɔ: «Dahwe ekɔ lɛɛ le hɛn wluwlu byɛ oto motɔn mɛ. Jwifu wɛ nyi ye, ²¹ bɔ ye le kplɔn osɛn yɔyɔ wu mɛ lɛ. Amɔ, mye Hlomanu lɛɛ, mi ma le xo do ye kaka do yi ye gba gɛ.» ²² Xomɛsin togun lɔ do Pɔlu kpo do Silasi kpo wu. Ohwɛɖɔtɔ lɛ ɖɔ ye ni ɖe nu ke ye do lɛ bo xo ye ganji kpodo lanba kpo. ²³ Hwenu ke ye xo ye ganji lo, ye ze ye yi gankpamɛ bɔ ye ɖɔ na gankpacɔtɔ lɔ ɖɔ ni bo kpe nukun ye wu ganji. ²⁴ Hwenu ke gankpacɔtɔ lɔ se le, e ze ye yi ɖo sisoemɛ le gankpa lɔ mɛ bo ze afɔ yetɔn lɛ zin do atin gblamɛ. ²⁵ Do le sɔn yi gan weyawe zanmɛ tɔn mɛ, Pɔlu kpo Silasi kpo jɛ oɖɛ xo ji bo le kpa Mawu. Gantɔ ɖyɛ lɛɛ lɔsu le ɖoto ye. ²⁶ Azɔnɖokpo, ayizan hunhun ɖaxo ɖe. Adokpa lɛɛ jɛ hunhun ji, bɔ tlololo azɔn lɛɛ hun bɔ caba ke e do bla gantɔ lɛɛ kpokpo sese gbo. ²⁷ Gankpacɔtɔ lɔ fɔn, bo mɔ ɖɔ ohɔn lɛɛ kpo sese bo le hunhun, bɔ e ze otun etɔn bo jlo na hu eɖe. Ɖo e mɔ ɖɔ gantɔ lɛɛ kpokpo bo sɔn. ²⁸ Amɔ Pɔlu daxwa kpo hɔnhlɔn etɔn lɛ kpo sese kpobo ɖɔ n'i ɖɔ: «Nɔkpɔn hu ɖewe gɛ! MIi kpo le fii mi mɛ bisese.!» ²⁹ Gankpacɔtɔ lɔ ɖɔ ye ni bo ta zo lɔ. E byɛ gankpa lɔ mɛ awu yiya, e le sisɔ bo jɛ klo le Pɔlu kpo Silasi kpo we nukɔn. ³⁰ Bɔ e ɖe yetɔn bo le kan ye se ɖɔ: «Nutɛ wɛ na blo bo na mɔ hwɛnlɛngan?» ³¹ Ye yi gbe n'i ɖɔ: Ɖinu na Aklunɔ Jezu, a na mɔ hwɛnlɛngan yɔ kpo do hɛnnu towe kpo. ³² Ye ɖɔ oxo Aklunɔ tɔn n'i, eyɔ kpo do mɛ ke le gankpamɛ lɛɛ bisese kpo. ³³ Azɔnɖokpo le zandomɛ, gankpacɔtɔ lɔ dɔn ye bo klɔ abi yetɔn lɛɛ na ye. Azɔnɖokpo ye ylɔn ɛ do tɔmɛ, eyɔ kpodo hɛnnu etɔn lɛɛ bisese kpo. ³⁴ E dɔn Pɔlu kpod do Silasi kpo yi xwe etɔn gbe bo na ye nuɖuɖu. Kpodo hɛnnu lɔ kposese kpo, e gɔ kpodo awajijɛ kpo, ɖo eɖinu na Mawu. ³⁵ Hwenu ke anyi wa hɔn, Ohwɛdanamɛtɔ Hlɔmanu lɛɛ wa ɖo mɛcɔtɔ lɛɛ ɖoxlan gankpacɔtɔ lɔ de do le ɖɔ n'i ɖɔ: «Ɖe ye tɔn!» ³⁶ Gankpacɔtɔ lɔ wa ɖɔ na Pɔlu ɖɔ: «Ohwɛɖɔtɔ lɛɛ ɖɔ na un ɖɔ ynɛ ni bo ɖe mi tɔn! Mi hɛn mi na tɔn bo na yi do fifamɛ!» ³⁷ Pɔlu le ɖɔ na mɛcɔtɔ lɛ ɖɔ: «Ye ma ɖɔ ohwɛ mitɔn gɛ bo ze oganba do xo mi le mɛ lɛɛ kpo sese nukɔn! Co Hlɔmanu wɛ mi nyi! Bɔ ye lɛ wa ze mi do gankpamɛ, bɔ odin ye jlo na jo mi do gbɔn nugɔ wɛ? Gbeɖe, ye lɛ lɔsu wɛ na wa bo na wa ɖe mitɔn!» ³⁸ Mɛcɔtɔ lɛɛ yi ɖɔ oxo exɔn lɛɛ bisese na ohwɛɖɔtɔ lɛɛ. Ohwɛɖɔtɔ lɛɛ ɖibu na Pɔlu kpo Silasi kpo ɖo ye se ɖɔ Hlɔmanu bɛ bo nyi ye lɔsu e gba. ³⁹ Ye wa bo wa byɔ hwɛsɔkɛ, bɔ ye ɖe ye tɔn sɔn gankpamɛ bo ɖɔ na ye ɖɔ ye ni bo tɔn sɔn toxo lɔ mɛ. ⁴⁰ Pɔlu kpo Silasi kpo tɔn sɔn gankpa lɔ mɛ bo yi Lidi de. Ye yi kpe nɔvi yisenɔ sunnu kpo nyɔnu kpo lɛɛ bo do gan na mɛ na ye. Exɔn godo ye sɔn ɔ.