¹ A ɖo na nywɛ dandan: Le azan godo tɔn lɔ lɛ mɛ, hwenu vivɛsise tɔn na le. ² Mɛ lɛ na nɔ yi go, bo na nyi wan ta un na akwa. Ye na nɔ ze yeɖe su, ye na nyi goyitɔ, ye na nɔ zun Mawu. Ye na gbɛ tonu se na mɛ ke ji ye lɛ, ye ma si nɔ dokpɛ nu wana ye tɔn na mɛ gɛ. Ye ma si nɔ lɛ ɖo sisi na onu Mawu lɛ ba gɛ. ³ Ye na sywɛ, ye ma si nɔ ɖo lɛblanu na mɛ gɛ, ye na nɔ ɖɔ xo ke ma sɔgbe gɛ do mɛ ɖyɛ lɛ wu. Ye na nɔ zangbɛ ɖejan, ye na ylan hun, ye na gbɛ wan na ɖabge. ⁴ Ye na nɔ blɛ mɛ ɖu, ye na ylan hun. Go yiyi na gba nukun na ye. Ye na nyi wan na ojlo gbɛmɛ fikɔ tɔn lɛ xu Mawu. ⁵ Ye na blɛ mɛ ɖu ɖɔ mye lɛ bo le gbeji na Mawu, amɔ le xojɔxo mɛ, ye na gbɛ hɔnhlɔn nuɖiɖi tɔn. Dogodo gbɛtɔ exɔn lɛ. ⁶ Mɛɖe lɛ le yemɛ bo na nɔ nyi mɛ lɛ xwe ganmɛ ganmɛ. Bɔ ye na nɔ yi do mɔɖiɖo yetɔn lɛ mɛ nyɔnu ke ma sywɛ gɛ, bo gɔ kpo hwɛ kpo bɔ nuɖiɖi yetɔn ma lido gɛ lɛ. Nyɔnu exɔn lɛ kpo na ojlo ɖe kpekpe lɛ ke ma nyi Mawu tɔn gɛ lɛ. ⁷ Ye le yi nu kplɔmɛ, amɔ ye ma si nyɔ xojɔxo lɔ wi gbeɖe. ⁸ Ɖ'anyi, Janɛsi kpo Janblɛsi kpo sɔta Moyizi. Lexa pɛ wɛ mɛ exɔn lɛ le sɔta xojɔxo lɔ ɖo. Mɛɖe lɛ wɛ ye nyi bɔ nu nyinywɛ yetɔn lɛ tɔkɔte bɔ nuɖiɖi yetɔn ma le na nuti gɛ. ⁹ Amɔ ye ma xwe fi gaga gɛ . Na do ɖɔ, mɛ bi na mɔ nu wagbɔ yetɔn ɖi ɖ'anyi tɔn ke Janɛsi kpo Janblɛsi kpo blo ha. ¹⁰ Amɔ yɔ axodo un le nu lɛ bi mɛ: A ɖoto nu kplɔn mɛ ce lɛ, a nɔ kpɔn do le ke un le blo ɖo, a nyɔ tito ce lɛ wi, nuɖiɖi ce, sulu ce, wanyinyi ce kpodo gbeji ninɔ ce kpo wi. ¹¹ A nyɔ adangbomɛ kpodo vivɛsise ke un mɔ lɛ kpo wi le Antioche, Iconium kpo Listre. Ɛɛ, un ji ya ta un. Co Mawu hwlɛn le kposese mɛ. ¹² Na do ɖɔ, mɛ ke jlo na nɔ gbeji do sin eɖe do Jezu Klisi wu, ye na do vivɛsisi ni jɛnwɛ. ¹³ Amɔ gbɛtɔ nyinyla kpodo calatan lɛ kpo ye na ɖo nukɔ yiyi tɛgbɛ le danu yetɔn mɛ. Ye na nɔ blɛ mɛ dyɛ lɛ ɖu, bɔ ye na nɔ blɛ ye lɔsu e ɖu gba. ¹⁴ Yɔ, hɛn sywɛ sywɛ nuke ye kplɔn we go, kpodo nuke ayi gbena ɖɔ nujɔnu bɛ. A nyɔ nukplɔn mɛtɔ ke kplɔn we lɛ wi. ¹⁵ Ɛɛ, a nyɔ wema mimɛ lɛ wi sɔn ovumɛ towe gbɔn, ye kpego bo na na we nu nyinywɛ kpikpe. Nu nyinywɛ kpikpe xɔn nɔ kpan mɛ bɔ ye nɔ mɔ hwɛnlɛngan na ye ɖinu na Jezu Klusi. ¹⁶ Wema lɛ kpo wɛ ye wlan do gbɔn alɔgɔ Mawu tɔn mɛ. Ye nyi nu taji na do kplɔn mɛ xojɔxo lɔ, do jɔ omɔ na mɛ, do ɖe mɛ sɔn nu ma nywɛ lɛ mɛ, do blo gbɛ jijlɔ na mɛ. ¹⁷ Do gbɔn wema mimɛ lɔ mɛ, gbɛtɔ Mawu tɔn mɔ nu sisɔ yi ganji, bɔ ye kplɔn ɛn bɔ e na do wa nuke nyɔ.