¹ Yɔ ovi ce, ba bo na lɛ hɔnhlɔn nɔ deji dogbɔn fɛnu wanyinyi Jezu Klisi tɔn mɛ. ² Nukplɔn ce ke ase le kunuɖetɔ susu nukɔn, ze do alɔmɛ na gbɛtɔ kandeji lɛ. Ye na kpego bo na lɛ la na mɛɖevo lɛ gba. ³ Yi akpaxwe wuvɛ towe tɔn ɖi ahwanfuntɔ ɖagbe Jezu Klisi tɔn. ⁴ Ahwanfuntɔ ke le sɛn ogan etɔn bo ba na nyɔ na ogan etɔn mɔ nɔ ze eɖe ze jona onu kpaa ɖevo lɛ gɛ. ⁵ Bɔlu xotɔ ɖe na yi agba hwlɛnnu hwenu ke e xo bɔlu do osɛn ji. ⁶ Sisɛn nu yiya lɔ tɔn nyi nukɔn tɔn gletɔ ke wa zɔn ganji lɔ tɔn. ⁷ Lin nu ke un le ɖɔ na we kpɔn, bɔ Aklunɔ na blo bɔ amɔ nukunnu jɛ nu lɛ bisese mɛ. ⁸ Flin Jezu Klisi: E fɔn sɔn ku, ye ji le Davidi we hɛnnu mɛ, daagbo etɔn, do gbɔn Wɛn Ɖagbe ke un le la lɔ mɛ. ⁹ Ɖo Wɛn Ɖagbe kɔ wutu, un le ji ya bɔ ye nɔ lɛ bla un kpodo caba kpo ɖi ajotɔ ha. Amɔ oxo Mawu tɔn ye ma blɛ gɛ. ¹⁰ Yi wutu wɛ un yi gbe na nu lɛ bi na mɛ ke Mawu cnya lɛ. Ye lɔsu e na mɔ hwɛnlɛngan do gbɔn Jezu Klisi mɛ, bɔ do le ye na yi gigo ke le kaka do yi. ¹¹ Oxo kanɖeji lokpo ke: Na mi ku le Klisi mɛ, kpodo Klisi kpo mi na mɔ gbɛ. ¹² Na mi nɔ enu kpodo Klisi kpo, mi na wa ɖu axɔlu. Na mi gbɛ, E yɔ lɔsu na gbɛ mi. ¹³ Na mi ma nɔ gbeji gɛ, Eyɔ nyi gbejinɔtɔ. Na do ɖɔ, nuke e ɖɔ, e mɔ nɔ blo ɖevo etɔn gɛ. ¹⁴ Flin onu exɔn wu mɛlɛ kposese: Le Mawu nukɔn, byɔ ye kpodo hɔnhlɔn kpo ɖɔ ye ni nɔ kpɔn xo vun do xogo le wutu gɛ. Exɔn ma le nuti ji zɛna e na hɛn sisetɔ lɛ we gbɛ gble gɛ. ¹⁵ Dogan do ze ɖewe xlɛ Mawu ɖi gbɛtɔ ke lido, azɔnwatɔ ke azɔn wiwa etɔn nɔ vivini, bɔ nɔ lɛ la ganji xojɔxo Mawu tɔn. ¹⁶ Nɔkpɔn nɔ donu oxo ɖejan ke nɔ sɔta nuɖiɖi lɛ mɛ gɛ. Ɛɛ, mɛ ke nɔ blo le lɛ nɔ le dɛn do Mawu ɖejɛ ɖeji. ¹⁷ Nu ɖiɖɔ yetɔn lɛ nɔ ciɖi abi ke wanvu le mɛ bɔ e fɔn bo nɔ le klo deji ha. Le mɛxɔn le mɛ, a na mɔ Ximene kpodo Filɛti kpo. ¹⁸ Ye gbɛ xojɔxo lɔ, ye nɔ ɖɔ Mawu bo ko fɔn mi sɔn ku, bɔ do le, ye le tɔkɔte na nuɖiɖi mɛɖe lɛ tɔn. ¹⁹ Co dodonu sisyɛn ke Mawu ze do anyi kpo le te. Mi kpɔn oxo ke ye wlan dego lɛ: «Mawu nyɔ mɛ ke nyi etɔn lɛ.» Bɔ ɖevo: «Mɛ ke ɖɔ: Nyɛ nyi Aklunɔ tɔn, na nɔ zɔ na onu nyinyla.» ²⁰ Le oxwe jijɔhun mɛ, a ma na mɔ gannu ke ye yi sika kpo akwagan kpo kɛɖɛ do blo gɛ, a na lɛ mɔ gannu ke ye yi atin kpo ayizan kpo do blo. Ɖe lɛ le na oxwe hwenu, bɔ ɖe lɛ nyi nu zizan hwe lɛ kposese nu tɔn. ²¹ Me ke gbɛ nu kplɔn mɛ awonɔ xɔn lɛ, e ciɖi gannu ke ye nɔ zan le oxwe hwenu lɛ ha. Ye nɔ ze ɖ'anyi na Aklunɔ. E nyi nu zizan na ogan etɔn, bɔ ye nɔ zan na nuke nyi nu ɖagbe lɛ kposese. ²² Hɔn na ojlo nyinyla ɖekajɛ tɔn lɛ. Ba nu jijlɔ, nuɖiɖi, wanyinyi, fifa xa mɛ ke nɔ xoɖɛ kpodo ayixa mitɔn kpo lɛ. ²³ Amɔ nɔ gbɛ nu didɔn ɖejan ke ma le nuti ji gɛ lɛ. A nywɛ ovun wɛ e nɔ wa. ²⁴ Bɔ mɛsɛntɔ Aklunɔ tɔn ma ɖo na xo vun gɛ. E ɖo na nɔ wanyinyi mɛ xa mɛ lɛ kpo, bo na kpego do kplɔn nu mɛ lɛ, do lɛ nɔ nu ɖɔ do mɛ wu lɛ nukɔn. ²⁵ E ɖo na nɔ ɖɔ xo kpodo gbe fifa kpo xa mɛ ke nɔ sɔ ta wi lɛ. Na do ɖɔ, Mawu si na ye jlɔjɛ bɔ ye si ɖyɔ linlin ye tɔn lɛ bo na do nyɔ xojɔxo lɔ wi. ²⁶ Ye na tɔn sɔn mɔ ɖiɖo yɛ nyinyla lɔ tɔn mɛ, ke hɛn ye do gankpamɛ. Ye ma sɔ na wa ojlo etɔn ba gɛ, bɔ do le, yue na nɔ lin nu ganji din.