¹ Vɔlɔ Yɛ Ɖeɖovo Mawu tɔn nɔ ɖɔ, le hwenu godo godo tɔn lɛ mɛ, mɛɖee lɛ na jo nuɖiɖi na Klisi lɔ do, bo tɛ do mɛ biblɛ gbigbɔ lɛ go kpo yɛ mawe we nu kplɔn mɛ lɛ wu. ² Gbɔ yɛmɛ nu wiwa wɛ nu kplɔn mɛ tɔn awonɔ xɔn lɛ ke yi akpa ɖo ayixa yetɔn mɛ, ³ na do sɛn ɖɔ ye ni kpɔn da si gɛ, kpo ye ni gbɛ nuɖuɖu ke Mawu blo na mɛ ke le gbeji lɛ ye ye ni ɖu kpo kpɛ dido kpo ye mɛ ke nyɔ xonugbo lɔ wu i. ⁴ Ɖo nu ke Mawu blo lɛ kpo wɛ nyɔ, bɔ ye na ɖo na ze ti nyi gbe gɛ, ye ni ɖu kpo kpɛ dido Mawu kpohun. ⁵ Do gbɔn xo kpo ɖɛ mɛ Mawu nɔ klan nu lɛ zun wiwe. ⁶ Na tin nuxɔn lɛ mɛ na nɔvi lɛ, a na nyi Mawu zɔn watɔ ɖagbe le Jezu Klisi mɛ, ke ɖu xo lɛ bo gɔ kpo nuɖiɖi kpo nukplɔn mɛ ke ayi lɛ. ⁷ Gbɛ davɛ nyinyla kpo bada lɛ. ⁸ Kplɔn Mawu sinsɛn; ɖo agba ze we kplɔn nyɔ na nu kpɛɖe, vɔlɔ Mawu sinsɛn nyɔ nu lɛkpo, ɖo nyɔ na agbagbe ayizanji fikɔ tɔn kpo gbɛ ke na wa lɔ. ⁹ Xo kɔ nyi xo nugbo nyi xo nugbo ke ɖo na yi kpo kanɖeji. ¹⁰ Mi le wa azɔn ɖo lexa, bɔ mi gbɛ kpo le fun awan ɖo mi ze kanɖeji mitɔn ɖo Mawu gbɛɖe lɔ ji, ke nyi gbɛtɔ lɛ we hwlɛngantɔ, vivɛ mɛ ke ɖinu lɛ nyi nuɖitɔ lɛ. ¹¹ Ɖɔ nuxɔn lɛ, bo kplɔn ye. ¹² Mɛɖe ni kpɔn gbɛ jɔnnujija towe wan gɛ; nyi kpɔn dewu na agunvi lɛ, ɖo xoɖiɖɔ mɛ, ɖo ninɔmɛ, ɖo wan nyinyi mɛ, ɖo nuɖiɖi mɛ, ɖo mimɛ jininɔ mɛ. ¹³ Kaka na hwenu ke na wa do lɔ, nɔ nuxixa ji, nɔ do gan lanmɛ na mɛ lɛ, nɔ nu kplɔn mɛ ji. ¹⁴ Ma jo nu nina ke le yɔ mɛ do gɛ, ke na we gbɔn xoyiboɖɔ mɛ kpo alɔ ke agun mɛxo lɛ ze do tamɛ na we lɔ. ¹⁵ Wle bo na nuxɔn lɛ, ze ɖe we jo na ye blebu, bo na nukɔn yi to we na ɖe xlɛ ɖo mɛ lɛ we nukun mɛ. ¹⁶ Nɔ un zɛn ɖo ɖe we wu kpo nu kplɔn to we wu; van kan ɖo nu xɔn lɛ mɛ, ɖo, nɛ ablo lexa,a na hwlɛn ɖe we gan, bɔ mɛ ke le se xo towe lɛ lɔsu na mɔ hwlɛngan.