¹ Mi kpɔ́n lě ke otɔ́ lɔ́ yí wǎn ná mǐ ɖǒ lɔ́. É́ yí wá̌n ná mǐ káká bo ɖɔ̀ e nǐ ylɔ́ mǐ ɖɔ Mǎwu ví; ovyɛ̌ wɛ mǐ ka nyí xójɔxó.Ke ogbɛ lɔ̌ má nyɔ́ Mǎwǔ wí gɛ́ wútú wɛ é má nyɔ́ mǐ wí gɛ́. ² Omɛvǐvɛ́ná ce lɛ́ɛ, odin, Mǎwǔ ví wɛ mǐ nyí; amɔ̌, e ma ko ɖe onǔ ke mi nǎ wá nyí lɔ́nxlɛ̌ céɖécéɖé gɛ́. Amɔ̌ onǔ ke mǐ nywɛ̌ kpoun wɛ nyí ɖɔ̀ hwe ke nu Klísi nǎ lɛ́kɔ wá a, mǐ ná cí ɖí é lɔsú há; ɖó mǐ ná mɔ̀ ɛ lě ke é lé ɖó. ³ Mɛɖě kpékpé ké ɖó nukún ɖiɖó éxɔn le klísi mɛ, hǔn e lɔsú wɛ é le bló ɖó ɖó mǐmɛ́ jí lě ke Jezú klísi lɔsú nyí mǐmɛ ɖo há. ⁴ Mɛ ke nɔ hu hwɛ lɛ́ɛ ɖě kpékpée, Mǎwǔsɛ́n wɛ yě lé gba; ɖó ohwɛhuhu, Mǎwǔsɛ́n gbigba wɛ. ⁵ Mi ka nywɛ̌ ɖɔ̀ klísi wǎ, bo ná ɖé ohwɛ lɛ́ɛ sɛ; ohwɛ tí má ká le ayi étɔ́n mɛ́ gɛ́. ⁶ Éxɔn, mɛɖě kpékpé le Jezǔ klísi mɛ, omɛ lɔ̌ mɔ́ nɔ́ sɔ́ hu hwɛ gɛ̌; mɛ ke nɔ lě hu hwɛ lɛ́ɛ má mɔ́ ɛ gɛ́, yě ka ma nywɛ̌ wǐ gɛ́. ⁷ Ovǐ ce lɛ́́ɛ, mi nɔkpɔ́́n lɔ́n ná mɛɖě niblɛ̌ mi gɛ; mɛ ke nɔ wa onǔ jíjlɔ́, ohwɛjijɔnɔ wɛ é nyí, ɖi lě ke Klísi nyǐ ohwɛjijɔnɔ ɖohá. ⁸ Mɛ ke nɔ lě hu hwɛ, awǒvi tɔn wɛ é nyí, ɖó awǒvi ko lě hu hwɛ sɔ́n odo, bɔ Mǎwǔ ví lɔ́ káwá, bo ná sú́́ awǒvi wé onǔwíwá lɛ́́ɛ wé okún dó. ⁹ Mɛɖě kpékpé nyi Mǎwǔ vi i, omɛ lɔ̌ mɔ́ nɔ́ sɔ́ nɔ́ hu hwɛ gɛ, ɖó ogbɛ Mawǔ tɔ́n la omɛ éxɔn mɛ. Ɖó ke Mǎwǔ nyí otɔ́ n'ǐ, é má sigǎn lɛ́ kpó lé hu hwɛ gɛ̌. ¹⁰ Mɛ ke nyí Mǎwǔ ví lɛ́ɛ kpó mɛ ke nyí awǒvi wé ví lɛ́ɛ kpó o, onǔ ké zɔn bɔ e nɔ dǒ nyɔ́ ɖě le ɖě mɛ́ céɖécéɖé lɔ́ wɛ́ nyí ɖɔ̀: mɛ ke mɔ nɔ wa onǔ jíjɔ́ gé lɛ́ɛ ɖě kpékpé má nyí Mǎwǔ ví gɛ́; mɛ ke ma yí wǎn ná nɔvyɛ̌ gɛ́ lɛ́ɛ tí má nyí Mǎwǔ vi gɛ́. ¹¹ Le xónúgbó mɛ, oxó ké mi se sɔ́n hwe ke nu mi ɖi nǔ ná Klísi lɔ̌ wɛ nyi ɖɔ̀ mǐ ɖó ná yi wǎn ná mǐɖé. ¹² Mǐ má ɖó ná cí kannyɛ́ɛ ɖɔhun gɛ̌, ɖó omɛ nyinyla lɔ́ tɔ́n wɛ éyɔ́ kó nyí, bo hu nɔvyɛ̌. Étɛ́útú é ka hu nɔvyɛ̌? Onu ké wútú é hu i lɔ̌ wɛ́ nyí ɖ̀̀ onǔ ke éyɔ Kanyɛ́ɛ nɔ wa lɛ́ɛ mɔ́nɔ́ sɔ́gbe gɛ̌.Ke nɔvyɛ̌ ká nɔ́ wá lɛ́ɛ nɔ́ sɔ́́gbe. ¹³ Éxɔn wútu, anɛevǐ lɛ́ɛ, enyí mɛ ke nyǐ ogbɛ ékɔ́ tɔ́n lɛɛ gbɛ́ wǎn ná mi, hǔn ní nɔkpɔ́n kpácá mi gɛ̌. ¹⁴ Mǐ nywɛ̌ ɖɔ̀ mǐ lɛ́ sɔn okútómɛ wá ogbɛtomɛ; mǐ nywɛ̌ ɖó lě, ɖó mǐ yí wǎn ná myé nɔ́vi lɛ́ɛ. Mɛ ke ma ka yí wǎn ná mɛ gɛ̌ lɔ́ kpó le okútomɛ. ¹⁵ Mɛɖě kpékpé ké gbɛ́wǎn ná nɔvyɛ̌, hǔn omɛhutɔ́ wɛ e nyí; mi ka nywɛ̌ ɖɔ̀ omɛhutɔ́ ɖé kpékpé ma ɖo ogbɛ mavɔ mavɔ gɛ̌. ¹⁶ Lě ke mǐ ́nyɔ́ onǔ ké wǎn yíyí nyí lɔ́ ɖó lɔ́ ke: Klísi zě ogbɛ étɔn jó dó ota mitɔn mɛ; hǔn myé lɔsú ɖó ná zé,ogbɛ mǐtɔn jó dó myé nɔ́ví lɛ́ɛ wé tamɛ. ¹⁷ Ényí mɛɖě jɛ dɔkun,bo mɔ ɖɔ nǔdé hudǒ nɔvyɛ, bo ka lě syɛ́n nukún dó e, na ɖě wɛ wǎn yíyí Mǎwǔ tɔn ká ná nɔ omɛ éxɔn wé ayi mɛ ɖǒ ? ¹⁸ Ovǐ ce lɛ́ɛ, mi nɔkpɔ́n ná mǐ ná nɔ́ yí wǎn ná mɛ le onu kpó oxó víví kpó kpoun mɛ gɛ́; amɔ̌, wǎn yíyí titeungbe ke nɔ e éɖé wlɛ́ gbɔn onǔwǐ́wá lɛ́ɛ mɛ lɔ wɛ mǐ ɖó ná,ɖó. ¹⁹ Lě ke mǐ ɖó ná nywɛ̌ ɖɔ̀ mǐ nyí xónugbó lɔ́ tɔ́n ɖó lɔ xɛn; lě ke ayi mǐtɔn ná ɖó gǎnjɛ̌wu le Mǎwǔ núkɔn ɖó lɔ́ xɛn. ²⁰ Ényí ayi mǐtɔn na bo le ohwɛ dǎ ná mǐ ɔn, mǐ ní nywɛ̌ dɔ̀ Mǎwu hú gǎn ayi mǐtɔn, bo ka nyɔ́ onǔ lɛ́ɛ kpó wǐ. ²¹ Omɛ vǐvɛ́ná cé lɛ́e, ényí ayi mǐtɔ́n má sɔ́ lé dá ohwɛ ná mǐ gɛ́, hǔn mǐ ɖó gǎnjɛ̌wu kpikpé le Mǎwǔ núkɔn. ²² Onǔɖé kpékpé ke mi byɔ́, mǐ ná mɔ bo yí le é si, ɖó mǐ nɔ nyi osɛ́n étɔn lɛ́ɛ, bo nɔ wa onú̌ ke nɔ́ nyɔ́ nukún étɔn mɛ lɛ́ɛ. ²³ Onǔ ke Mǎwǔ lé zɔ́n mǐ wɛ́ nyí ɖɔ̀ mǐ ní ɖi nǔ ná ovyɛ̌ Jezu Klísi l wé nyǐkɔ, bo ka yí wǎn ná mǐɖé ɖi lě ke Klísi zɔn mǐ dó há. ²⁴ Omɛ ke nɔ nyi Mǎwǔsɛ́n lɛ́ɛ, mɛ lɔ̌ le Mǎwǔ mɛ; bɔ Mǎwǔ le éyɔ́́ mɛ. Mǐ nywɛ̌ ɖɔ̀ Mǎwǔ le mǐ̌ mɛ gbɔn oyɛ ɖeɖóvo ke é ná mǐ lɔ j'í.