¹ Eviɛɖe, nɔvinyɛwo, eji le jɔ mi le Axwetɔ mɛ. Na gbe ŋwlɛ wema ɖaɖa mi, yi a gbe enyɔ cɛwo ke nɔ mi do mɛ. Ɖe ciɔ ekɔ nɔŋ o. A kpedo mi nu sugbɔ. ² Mikpɔ nyuiɖe le evɔnwatɔ, avu hunnɔwo nu. Mi kpɔ nyuiɖe le amɛ ciwo yi cucuɔ mi do evososo nyɔ mɛ nu. ³ Miwo xɔsetɔwo yi nyi amɛ ciwo yi wo so evo nɔ adoduitɔ. Ɖo miwo le Mawu sɛn ɔ le yi Gbɔngbɔn mɛ. Mi yiyiɔ ego mɔ mi nyi Yesu Kliso tɔ. Miwo ɖe kannɔ do agbetɔwo kɔnuwo ji o. ⁴ Enyɛ yi e le nɔ mɔ na kan do akɔnu hunnɔwo ji gbɔxwe. Nɔ amɛɖe kpɔ mɔ eye can ye a wɛɛ dru ɔ, enyɛ, ŋ le ŋkɔ nɔ amɛ lɔ boo. ⁵ Enyɔ ci yi ŋ nunuɔ nɛnɛke. Ŋkeke amɛnyitɔ lɔ ji yi wo so evo nɔŋ. Israyɛlivi jiji yi ŋ nyi, yi so Benʒamɛ kɔta mɛ. Tɔgbinyɛwo pleŋ nyi Yuɖatɔ. Ŋ wanɔ do ese ci yi Mawu do nɔ mi toto Mɔyizi ji shigbe lehan yi Falisitɔwo wanɔ do ese ji do nɛ. ⁶ Miwo Yuɖatɔwo kɔnuwo wawa nɔnɔ veviɖe nɔŋ kaka ŋ va tɔ yomɛcici nɔ Mawu ha lɔ. Kuso esejiwawado, jɔjɔɛnyinyi nu ɔ, amɛɖe ɖa kpɔ ehwɛ ɖe a do noŋ o. ⁷ Ŋ bubuɔ mɔ hunnɔwo a do ŋji sa, vɔ eviɛɔ, ŋ va sɔ wo mɔ enuguamɛwo keŋ a sɛnŋ a kedo Kliso nu. ⁸ Nyɔnɔnuitɔ ɔ, ŋ sɔ enu hunnɔwo pleŋ mɔ enu guamɛ. Ɖo, nɔ ŋ jeshi anyi Xwetɔ Yesu Kliso ɖɛ ɔ, e nyɔ nɔŋ sɔwu hunnɔwo pleŋ. Ŋ xadonu yi tashi enuwo pleŋ, yi sɔwo mɔ enu guamɛwo, yi a sɛnŋ kpɔ Kliso. ⁹ Yi a nyi blebu . Ŋ ɖe gbe kpɔnɔ jɔjɔɛnyinyi ci yi le esejiwawado mɛ nu yi nunɔ mɔ ŋ nyi amɛjɔjɔɛ le Mawu ŋmɛ o. Enu ci yi sɔ ŋ trɔ amɛjɔjɔɛ le Mawu ŋmɛ yi nyi mɔ, ŋ kando Kliso ji. Jɔjɔɛnyinyi hunnɔwo so Mawu gbɔ, yi nɔ anyinɔnɔ do Kliso xɔxɔse ji. ¹⁰ Enu ci yi jiɔ ŋ le pleŋ yi nyi mɔ na jeshi Kliso, yi a gbe nya ŋsɛn ci yi fɔin so ekuwodi. Ŋ gbe jijiɔ hɛnnɛ mɔ na ɖu aya yi a ku eku ŋmɛɖeka koɖyi, ¹¹ yi a le emɔkpɔkpɔ mɛ mɔ Mawu a va fɔn enyɛ so ekuwodi. ¹² Ŋ ɖe nunuɔ mɔ ŋ xotɔ enu ci yi ŋ nyanya lɔ o. Kpɔ ŋ de nu mɔ ŋ sɔ egbe o. Vɔ ŋ le cukaɖa ji mɔ nɔ a je alɔmɛ nɔŋ. Ɖo ŋ je alɔmɛ nɔ Yesu Kliso vɔ. ¹³ Nɔvinyɛwo, ŋ ɖe bu mɔ anyi lɔwo sunji vɔ o. Vɔ ɔ, ŋ ŋlɔbe enu ciwo yi le godu nɔŋ keŋ yi nyanya enu ciwo yi le ŋkɔ. Enu ci ɖekɛ yi ŋ wawa nɛ. ¹⁴ Nɛnɛ ɔ, ŋ le eju ji kplɔ efɛn ci yi Mawu jijiɔ a va cu nɔ mi do. Mawu yɔyɔ mi so jeŋkuimɛ mɔ miwo le xɔɛ toto Yesu Kliso ji. ¹⁵ Miwo ciwo pleŋ yi shin vɛ le xɔse mɛ ɔ, susu hunnɔ yi ɖo a le tamɛ nɔ mi nɛ. Vɔ ɔ, susu bu ɖe gbe le tamɛ nɔ miwo domɛtɔ ɖe ɔ, Mawu a ɖe enu ci yi je doasɛ nɔ mi gbajɛɛ. ¹⁶ Nɔ e gbe nyi eɖe can ɔ, mi na nɔ mi a yi emɔzɔnzɔn lɔ ji shigbe lehan yi mi wɛɛwɛ do sa va sɔ na nɔ egbɛ nɛ. ¹⁷ Nɔvinyewo, mi to anyi fɔ ji, yi a wa enu shigbe enyɛ nɛ. Mi le ŋkuvi do amɛ ciwo yi totoɔ anyi fɔ ji nu, yi a wa enu shigbe wowo hanwo nɛ. ¹⁸ Ŋ nuinuiɛ nɔ mi sasa. Ŋ gbe kpɔtɔ yi nuinuiɛ nɔ mi egbɛ koɖo ɖashi le ŋmɛ mɔ amɛ sugbɔtɔ nɔnɔ agbe shigbe eku ci yi Kliso ku do acisosa ji ɖe ɖyi enuɖe do enu nɔ wowo o nɛ. ¹⁹ Le vɔvɔnu ɔ, wa yi trɔntrɔnmɛ. Xodu yi wo sɛnsɛn ɔ. Enu ci yi a wa ŋkpɛn nɔ amɛ, mɛ yi, wowo xɔnɔ kɔkɔ le xexe cɛ mɛ nuwo ɖekɛ yi le etamɛ nɔ wowo. ²⁰ Miwo yɛ ɔ, miwo ju yi nyi jeŋkuimɛ. Miwo nɔnɔ ete kpɔ Hwlɛngantɔ, miwo Xwetɔ Yesu Kliso mɔ yi a so enɔ tɔxu yi a va. ²¹ Ŋsɛn le shi. Ŋsɛn lɔ na yi yi e xo eta nɔ enuwo pleŋ. Nɔ e va trɔva ɔ, a sɔ ŋsɛn lɔ trɔ ashi so miwo lankpu klekliwo nu, yi lankpu lɔwo a va klɛnklɛn shigbe yitɔ hanwo nɛ.