¹ Kliso lɔ donɔ ŋsɛn lanmɛ nɔ mi. Lɔnlɔn ci yi e ɖo nɔ mi donɔ eji exo nɔ mi, yi yi Gbɔngbɔn nɔnɔ ekacaca ɖeka mɛ koɖo mi. E ɖonɔ lɔnlɔn nɔ mi, yi gbe na yi mi fanɔ xomɛ nɔ miwonɔnɔwo. Ɖe nɛnɛ yi e nyi nɛ ba? ² E yi na taɖo ɔ, mi na nɔ anyi jijɔ kpɔkpɔ a ɖɔ, yi a gban ago sɔ todo lehan yi mi a senɔ egbe nɔ miwonɔnɔwo nyuiɖe do nɛ. Lɔnlɔn ŋmɛɖeka le nɔ mi shi, mi a nɔ ɖeka le eji koɖo susu mɛ. ³ Mi gbe wanɔ enuɖe yi a sɔ doasɛ mɔ miwo yi nyi enu ci yi a jɔ o; nɛnɛke ɔ, mi ŋgbe wanɔ enuɖe koɖo amɛɖekitɛntɛn susuwo o. Vɔ, mi sɔnɔ miwoɖekiwo hwe, yi a kpɔnɔ amɛ kpɛtɛwo shigbe amɛ ciwo yi le ŋkɔ nɔmi nɛ. ⁴ Amɛɖe ŋgbe lenɔ ebu nɔ yiŋtɔ nuwo ɖekɛ o. Mi lenɔ ebu veviɖe nɔ 'mɛbuwo nuwo. ⁵ Mi nɔ agbe le miwonɔnɔwo mɛ shigbe lehan yi wo nɔnɔ agbe le Yesu Kliso mɛdo nɛ. ⁶ Ci yi Kliso lɔ ɖo Mawu nɔnɔmɛ can ɔ, ɖe ji mɔ ye a sɔ koɖo Mawu o. ⁷ Vɔ ɔ, e lɔn, yi gbe bubutɔxu hunnɔ ci yi e le yi va sɔ yiɖeki trɔ edɔwavi. Wo ji shigbe lehan yi wo jinɔ agbetɔ do nɛ, yi amɛshiamɛ xɔɛ do agbetɔ ji. ⁸ E sɔ yiɖeki hwe, yi se etonu nɔ Mawu kaka va ku acisosa ku. ⁹ E yi na taɖo yi Mawu na texwe kɔkɔ yi, yi gbe na nyikɔ ci yi wugan nyikɔwo pleŋ. ¹⁰ Nɛnɛ nɔ wo yɔ Yesu nyikɔ ahan ɔ, enuleagbewo pleŋ a je ekloji nii le jeŋkuimɛ, le nyigban ji koɖo nyigban gɔnmɛ. ¹¹ E yi amɛshiamɛ a hunmɛ a sɔ kanfu Mawu Eda mɔ: «Yesu Kliso yi nyi Axwetɔ!» ¹² Ci yi e le nɛnɛ ɔ, anyi xlɔ veviwo, mi senɔ etonu nɔ Mawu hwecinu yi ŋ le migbɔ vayi. Egbɛcɛ ci yi ŋ va le azɔge nɔ mi can ɔ, mi gbe kpɔtɔ seseɔ 'tonu doji sɔwu. Nɛnɛ ɔ, mi sɔ hwlɛnhwlɛn ci yi Mawu hwlɛn mi gan lɔ wa edɔ le shishiɖoɖo nɔ Mawu koɖɔ vɔnvɔn mɛ. ¹³ Ɖo Mawu le edɔ waa le mi mɛ, nɔ mi a ji mɔ yewo a wa enu ciwo yi sɔ koɖo yi ɖoɖowo, yi a gbe wa do wo ji hɛnnɛ. ¹⁴ Mi ŋgbe totoɔ enyɔ do enu ciwo pleŋ mi wawa nu o; yi ŋgbe dɔnnɔ enyɔ so wo nu hɛnnɛ o. ¹⁵ Gahunnɔmɛ ɔ, mi a le xomɛvu, yi amɛɖe ɖa kpɔ ehwɛ ɖe yi a do mi o. Mi a nyi Mawu eviɛ adoduiwo le jijimɛ amɛbletɔwo koɖo amɛvɔnwotɔ domɛ. ¹⁶ Nɛnɛke yi mi a nɔ, yi a le agbe nyɔ lɔ nuɔ nɔ amɛwo nɛ. Hwehunnɔnu nɔ Kliso va trɔva ɔ, eji a jɔ ŋ so mi nu. Ɖo edɔ ci yi ŋ wa koɖo aya ci ŋ ɖu ɖe nyi enugbali o. ¹⁷ Nɔ wo gbe wu ŋ can ɔ, anyi hun ci yi a kɔdo nyigban a nyi avɔsa ci wa sɔ bɔdo avɔsa ci mi wawa nɔ Mawu nu. Miwo vɔsa yi nyi edɔ ciwo yi xɔse na yi mi wawa. Nɔ e nyi ahan ɔ, eji a jɔŋ, yi na kpɔ jijɔ koɖo mi pleŋ. ¹⁸ Miwo can mi kpɔ jijɔ, yi a kpɔ jijɔ koɖo ŋ. ¹⁹ Ŋ kandoji mɔ Axwetɔ Yesu a lɔn yi na dɔ Timɔte ɖaɖa mi sabaɖeɛ. Ahan ɔ, enyɔ ciwo yi a se le mi gbɔ, yi a gbɔ ava nu nɔŋ a do ŋsɛn lanmɛ nɔŋ. ²⁰ Ŋ ɖe gbe amɛɖe dɛ ci yi miwo nu wawa edɔ le lanmɛ nɔ nyuiɖe shigbe e yɛ nɛ o. ²¹ Amɛkpɛtɛwo pleŋle wowo ɖekɛwotɔ jiɔ yi gbe Yesu Kliso tɔ dadɛ. ²² Miwo ŋtɔwo nya mɔ Timɔte yɛ ɔ, yɛ doasɛ mɔ ye nyi amɛnyui. E wa edɔ koɖo ŋ le eŋɛnyui lɔ dodo mɛ shigbe lehan yi evi wanɔ edɔ koɖo eda nɛ. ²³ Ŋ jijiɔ a va dɔɛ ɖaɖa mi gbɔ nɔ ŋ va se eta nɔ anyi nyɔwo ɖegbɔ. ²⁴ Ŋ kandoji mɔ Axwetɔ a ɖe emɔ yi nyɛŋtɔ a va mi gbɔ sabaɖeɛ. ²⁵ Ŋ kpɔ mɔ e ʒian mɔ na tashi Epafloditi ci nyi nɔvinyɛ kodo anyi kpedonutɔ nɔ a trɔgbɔva mi gbɔ. Yi nyi amɛdɔdɔ ci yi mi dɔ ɖaɖa ŋ, yi e va kpekpeɔ do ŋnu le eʒian mɛ. Enyɛ koɖo eyɛ wa edɔ yi gbe wa ahwa nɔ eŋɛnyui lɔ dodo. ²⁶ Vɔ eviɛɔ, miwo kpɔkpɔ droidroiɛ sugbɔ, yi miwo nu gbe wawa edɔ le lanmɛ nii veviɖe nɔ ci mi se mɔ yɛ le edɔ. ²⁷ E le edɔ nyao kaka hwɛɖeka yi kpɔtɔ yi a ku. Vɔ ɔ, Mawu ku ŋshishi nii. Ɖe nyi yiɖekɛ yi e ku ŋshishi lɔ nɔ o. E kui nɔ enyɛ can hɛnnɛ nɔ vevesese bu ŋgbe va je ecɛ ji nɔŋ o. ²⁸ E yi na taɖo yi ŋ ji veviɖe mɔ na tashi nɔ a gbɔ va mi gbɔ. Gahunnɔmɛ nɔ miwo kpɔɛ ɔ, eji a jɔ mi, yi enyɛ can ɔ, anyi yixa a ɖyijemɛ. ²⁹ Nɔ e gbɔ va mi gbɔ ɔ, mi xɔɛ koɖo jijɔ gangan ɖeka shigbe nɔvi le Axwetɔ mɛ nɛ. Amɛ shigbe e yɛ nɛ ɔ, mi donɔ bubu yi nu. ³⁰ Ɖo hwɛɖeka yi kpɔtɔ yi a ku do edɔwawa mɛ nɔ Kliso sa. E sɔ yi gbe ke eku, yi kpedo ŋnu. Kpekpedonu hunnɔ ɔ, miwo ɖa sɛnŋ wɛe o.