¹ Enyɛ Pɔlu koɖo Timɔte, Yesu Kliso dɔwaviwo ŋwlɛŋwlɛ wema cɛ ɖaɖa amɛ ciwo yi nyi xɔsetɔwo toto Yesu Kliso ji le Filipi jugan mɛ. Mi ŋwliŋwliɔ ɖaɖa wowo kodo Mawu 'ha lɔ kplɔtɔwo koɖo ehamɛmɛganwo hɛnnɛ. ² Mawu miwo Da koɖo miwo Xwetɔ Yesu Kliso le wa xomɛvunu nɔ mi yi a gbe na fafa mi. ³ Ŋ donɔ akpe nɔ anyi Mawu tɛgbɛɛ nɔ miwo nu va tamɛ nɔ ŋ. ⁴ Gashiagamɛ nɔ ŋ wawa kuifan do eta nɔ mi pleŋ ɔ, ŋ wanɔ kuifan lɔ koɖo jijɔ. ⁵ Ɖo ɔ, mi do alɔŋ le eŋɛnyui lɔ dodo me hwecinu mi tɔ eŋɛnyui lɔ sese kaka va sɔ na egbɛ. ⁶ Ŋ kandoji mɔ Mawu ci yi tɔ edɔnyui wawa le mi mɛ ayi edɔ lɔ ji kaka yi a vɔɛ le gbecigbe yi Yesu Kliso a trɔva. ⁷ E nyɔ mɔ na ɖo susu hunnɔ hanwo do miwo pleŋ nu. Ɖo ɔ, miwo nu le etamɛ nɔŋ. Nyao ɔ, le anyi gakpamɛnɔnɔ, hwecinu yi ŋ le eta hwlɛn ɔ nɔ eŋɛnyui lɔ, yi gbe le egbe tɛɛ doji ɔ, xomɛvu ci han yi Mawu wa nɔŋ ke yi e wa nɔ miwo can. ⁸ Mawu a sɛnŋ ɖe kunnu nɔŋ mɔ ŋ lɔn mi pleŋ veviɖe koɖo xomɛfafa ci yi so Yesu Kliso gbɔ. ⁹ Enu ci yi ŋ biɔnɔ Mawu le anyi kuifanwo mɛ yi nyi mɔ miwo lɔnlɔn le sugbɔ doji kaka enunyanya a sun mɛ yi enumɛmɔje can a sɔ egbe le mɛ. ¹⁰ Nɛnɛ ɔ, mi a senŋ a donɔ jeshi enu ci yi nyi nyɔnɔnuitotɔwo yi wo ɖa kpɔ enyɔ ɖe a nu so mi nu gbecigbe yi Kliso lɔ a trɔva o. ¹¹ Yesu Kliso a na yi mi a sɛn jɔjɔɛnyinyi kusɛnsɛnwo kaka nɔ amɛɖe kpɔ ɔ, yɛ a do bubu Mawu nu, yi a gbe kanfui. ¹² Nɔvinyewo, ŋ ji mɔ miwo le nya mɔ nɔ wa nui teŋ ɔ, enu ci yi jɔ do ŋ ji na mɔ eŋɛnyui lɔ gbankpedo eto. ¹³ Enu hunnɔ yi na taɖo yi le ekanjikpɔtɔ xwelɔ pleŋ mɛ koɖo le afishiafi ɔ, amɛwo nya mɔ edɔ ci yi ŋ wawa nɔ Kliso lɔ yi dɔ yi ŋ le gakpamɛ. ¹⁴ E yi ci xɔsetɔ sugbɔtɔ kpɔkpɔ ŋ le gakpamɛ ɔ, e na kankandoji do Axwetɔ nu. Edɔngbegbe gbe ɖo lanmɛ nɔ wo do ji yi wo le Mawu nyɔ lɔ nuɔ nɔ amɛwo le jikamaso mɛ. ¹⁵ Le nyɔnɔnui mɛ ɔ, xɔsetɔ ɖekawo le axwa doɔ yi le Kliso nyɔ nuɔ nɔ amɛwo do enuciŋmɛnɔamɛ tɔ ji koɖo enyɔjileamɛnu tɔ ji. Vɔ amɛɖewo wɛɛwɛ koɖo susu nyuiwo. ¹⁶ Nɛnɛ mɛ wowo wɛɛwɛ koɖo lɔnlɔn ɖo wo nya mɔ eŋɛnyui lɔ yi ŋ va yi a va hwlɛn eta nɔ. ¹⁷ Vɔ ɔ, mɛɖelɔwo le Kliso nyɔ lɔnuɔ do lehan yi edro wowo le lanmɛ do ji. Susu ciwo yi wo ɖo yi sɔ le enu lɔ waa ahan, ɖe mɛ o. Wo bubuɔ mɔ yewo a do vevesese nɔ enyɛ do ji le gakpamɛ. ¹⁸ Wo nunuɔ enyɔ lɔ koɖo xomɛ fin; wo gbe manui koɖo xomɛ fin, enyɔ hunnɔwo ɖe nyi enyɔ ɖe o. Ɖekpokpoiɖe ɔ, amɛwo sɔ sɔ Kliso lɔ nyɔ yɛ. Enu ci yi do jijɔ nɔŋ le mɛ nɛ. Na gbe kpɔtɔ yi a kpɔkpɔ jijɔ so nu. ¹⁹ Ɖo ɔ, ŋ nya mɔ miwo kuifan koɖo kpekpedonu ci yi a so Yesu Kliso Gbɔngbɔn gbɔ nɔŋ a na yi na gan le enyɔ cɛ mɛ. ^{20 21} Enu ci yi ŋ nɔnɔ ete kpɔ xaxaxa, enu ci yi ŋ kpɔkpɔ emɔ nɔ ɔ, e yi nyi mɔ; 'nyɛ ŋgbe va ɖu ŋkpɛn o. Ŋ ɖo kankandoji blebu mɔ, kaaka cɛ alo hweɖekpokpoi nu ɔ, Kliso lɔ a nyi kanfukanfu le anyi gbe alo toto eku ci yi na ku mɛ. Ɖo le enyɛ yɛ gbɔ ɔ, agbe ɔ, Kliso lɔ yɔ, yi eku nyi ele nɔŋ. ²² Gankegan nɔ e nyi mɔ ci yi ŋ le agbe yi le edɔ waa le gbaza mɛ ɔ, anyi dɔwawa lɔ a ɖo ele ɖee, ŋ nya ci yi na sɔ le agbe koɖo eku domɛ ba. ²³ A sɔ le enu ameve hunnɔwomɛ nyi enyɔ yi le ŋji. E drodroɔŋ sugbɔ mɔ ma yi keŋ a vayi nɔ koɖo Kliso lɔ. Hunnɔ yɛ nyɔ sowu boo. ²⁴ Vɔ do miwo ta ɔ, e ʒian sugbɔ mɔ ma nɔ mi gbɔ le gbaza mɛ ahan. ²⁵ Kankandoji le ŋ shi, ŋ nya nyuiɖe mɔ na ci agbe yi a nɔ mi pleŋ gbɔ, yi a gbe nɔ mi gbɔ ke, nɔ miwo shinshindoji koɖo miwo jijɔkpɔkpɔ le xɔse mɛ. ²⁶ Gahunnɔmɛ nɔ ŋ va trɔ gbɔva mi gbɔ ɔ, enu ci yi Yesu Kliso wa le anyi gbe mɛ a na yi, yi nu a gbe do jijɔ nɔ mi do ji. ²⁷ Kpoŋɖe, mio nɔ agbe shigbe lehan yi Kliso ŋɛnyui lɔ nu mɔ wo le nɔ agbe do nɛ. Gahunnɔmɛ nɔ mi can ɔ, ma se mɔ susu le ɖeka nɔ mi, yi mi gbe jeje agbla do eju nɔ xɔse ci yi eŋɛnyui lɔ nanɔ amɛ. ²⁸ Mi ŋgbe tashi miwoɖekiwo dɛ nɔ miwo ketɔwo a do vɔnvɔn nɔ mi o. Nɔ mi ɖe vɔnvɔn nɔ ketɔ lɔwo o ɔ, yi a nyi jeshidu ci yi a doasɛ mɔ wo yikɔ trɔntrɔnmɛ. Nɔ miwo yɛ ɔ, a trɔ anyi jeshidu nɔ miwo, soso Mawu gbɔ mɔ miwo, xɔsetɔwo kpɔ hwlɛngan. ²⁹ Ɖo Mawu wa xomɛvunu nɔ mi todo Kliso lɔ ji, nɔ mi a xɔɛji se, yi a gbe ɖu aya do eta nii hɛnnɛ. ³⁰ Miwo can mi gbe le ahwa lɔ ci yi mi kpɔ yi ŋ wawa. Ecɛyɛ can ɔ, mi gbe se yi wo nunuɔ lehan yi ŋ gbe le ahwa lɔ ji do.