¹ Nɔvinyɛ veviwo, enu ci yi na taɖo yi miwo kpɔkpɔ drodroɔŋ veviɖe ɖe, miwo yi na yi ŋ kpɔkpɔ jijɔ, yi gbe na yi wo dodoɔ bubu ŋnu. Anyi xlɔ veviwo, e yi na taɖo ɔ, mi nɔ ekacaca ɖeka mɛ koɖo Yesu Kliso goŋgoŋ. ² Evodi, ŋ ɖe kuku nɔ eo. Sɛntichi, ŋ ɖe kuku nɔ eɔ can. Mi sɔ egbe do eju. Ɖo Axwetɔ tɔ yi mi nyi. ³ Eɔ, ame ci yi wanɔ edɔ koɖɔ ŋ adoduitɔ, ŋ biɔbiɔ soo eo gbɔ mɔ wɔ ɖe kpedo nyɔnu amɛve cɛwo nu. Ɖo wo wa edɔ koɖo ŋ le eŋɛnyui lɔ dodo mɛ. Enye koɖo Klema koɖo nyɔnu lɔwo kodo kpedonutɔ buwo wa edɔ do eju. Mawu ŋwlɛ wo pleŋ nyikɔ do agbe wema lɔ mɛ. ⁴ Gashiagamɛ ɔ, eji le jɔnɔ mi le Axwetɔ lɔ mɛ. Ŋ tɛtɛɛ egbe do ji nɔ mi mɔ eji le jɔnɔ mi. ⁵ Mi nyɔ xomɛ nɔ amɛshiamɛ. Awxetɔ lɔ a trɔva majinjinɖe ɛ. ⁶ Mi ŋgbe so jika nɔ enuɖe o. Le nɔnɔmɛ ɖekpokpoi mɛ ɔ, mi wa kuifan, yi a biɔ enu enu ci yi wudo mi Mawu, yi a gbe do akpe nii. ⁷ Eyi Mawu a na mi fafa ci yi wu egan enu ciwo pleŋ yi agbetɔ a sɛnŋ mɔŋje gɔnmɛnɔ. Fafalɔ a na yi miwo jiwo koɖo miwo susuwo mɛ a vo le Yesu Kliso mɛ. ⁸ Nɔvinyɛwo, enyɔ kpɛtɛkpetɛ ci yi na nu nɔ mi ke: mi na nɔ enu ci yi amɛwo lɔnnɔ ɖekɛwo a nɔ etamɛ nɔ mi. Enu lɔwo yi nyi enu adodui ciwo nu yi wo donɔ bubu; enujɔjɔɛwo kodo enu mɛmɛwo; enu ciwo yi nyɔ nyuiɖe koɖo enu ciwo yi na nɔ kɔkɔ amɛ. ⁹ Mi nya enu ciwo yi ŋ kplan mi. Mi gbe se enyɔ ciwo yi ŋ nu nɔ mi, yi gbe kpɔ enu ciwo yi ŋ wa le mi gbɔ. Mi sɔwo do edɔwawamɛ. Mawu ci yi na nɔ fafa amɛ a nɔ koɖo mi. ¹⁰ Eji jɔ ŋ sugbɔ le agbe ci yi ŋle le Axwetɔ mɛ mɛ. Ɖo mi gbe tɔ asɛdodo mɔ anyi nu le susu mɛ nɔ yewo. Ŋ nya mɔ ŋ le susu mɛ nɔ mi. Vɔ mi ɖe kpɔ emɔ ci yi mi a to yi a ɖyi doasɛ nɔ ŋ sa o. ¹¹ Ɖe nyi mɔ wudo mɛ ŋle tado yi ŋnunuɔ a han o. Ɖo ŋ kplan 'nyɛɖeki lehan yi enu ci yi le amɛ shi sunnɔ nɔ amɛ do. ¹² Ŋ nya lehan yi wo zannɔ wamɛnɔ gbe koɖo dɔkunɔ gbe do. Le afishiafi, le nɔnɔmɛ ɖekpokpoi mɛ ɔ, ŋ kpla lehan yi xodu ɖɔnɔ amɛ, shive cinɔ amɛ, enu nɔnɔ amɛshi koɖo lehan yi enu hwenɔ do amɛ do. ¹³ Ŋ sɛnŋ wanɔ enu hunnɔwo pleŋ nɔ ŋsɛn ci yi Yesu Kliso nanɔ ŋ taɖɔ. ¹⁴ Gaŋkegan, ci mi kpedo ŋnu le vevesese cɛ mɛ ɔ, e nyɔ. ¹⁵ Nɔvinye Filiputɔwo, miwo ŋtɔwo nya nyuiɖe mɔ, ci yi ŋtɔ edɔ ji le gɔnmɛjeje nɔ eŋɛnyui lɔ dodo ɔ, ŋ va so le Maseduwanu nutui mɛ. Gahunnɔ mɛ ɔ, Mawu ha ɖe, ɖeva ɖe nɔviwawa fɔ yi na enuɖe ŋ ɖaɖa sɔ zeto miwo nu o. ¹⁶ Ci yi ŋle Tɛsaloniki jugan mɛ, nɔ enuɖe wudo ŋ ɔ, mi sɔɛni ɖaɖa ŋ zenɛniɖe. ¹⁷ Ɖe nyi ji ŋ jijiɔ mɔ wo le na enu ŋ o. Vɔ ɔ, ele ci mi a kpɔ le enunana lɔ mɛ jiɔ ŋ le. ¹⁸ Ŋ xɔ enu ciwo yi mi sɔ ɖaɖa ŋ. Epafloditi hɛn miwo nunanawo vɛ nɔŋ. Eviɛ ɔ, ŋ wa enuwo ɖɛ sugbɔ. Enuɖe ɖe li yi gbe wudo ŋ o. Miwo nunana lɔwo nyi avɔsanu ci yi hwɛnhwɛn ete lilili yi Mawu xɔ koɖo eŋjeje. ¹⁹ Enu ciwo pleŋ yi wudo miwo ɔ, anyi Mawu a sɔ wo le yi dɔkunu sugbɔ sugbɔwo mɛ, yi a sɔ wo jo nɔ mi toto Yesu Kliso ji. ²⁰ Kanfukanfu le nyi Mawu miwo Da tɔ so eviɛ kaka a sɔyi mavɔmavɔ. Axoaɖyi! ²¹ Le Yesu Kliso nyikɔ mɛ ɔ, ŋ dodoɔ egbe ɖaɖa xɔsetɔwo pleŋ. Xɔsetɔ ciwo yi le ŋ gbɔ le elɛ can do egbe ɖaɖa mi. ²² Xɔsetɔwo pleŋ, veviɖe, ciwo yi le Seza, efiɔgangan Hlɔmutɔ xwemɛ can do egbe ɖaɖa mi. ²³ Axwetɔ Yesu Kliso xomɛvu le nɔ koɖo miwo gbɔngbɔn.