¹ Yesu la etɔjihun ɖeka mɛ yi a yido akpaɖeṭɔlɔji nɔ eju gan lɔ. ² Kpɔɖaa, wosɔ kplibɔtɔnɔ ɖeka vɛni, yi emlɔanyi do ebaɖekaji. Ciyi ekpɔ woo xɔse ɔ, Yesu nu nɔ ŋsu kplibɔtɔnɔ lɔ mɔ, osɔ awu nuvwinwo sɔkewu. ³ Siklibutɔwo nunuɔ le woo nɔnɔ mɛmɔ : "ŋsu cɛ wa afɛn". ⁴ Yesu kpɔ susu wootɔwo yi nu mɔ "Ŋuɖeyi dɔ yi miɖo etamɛ susu vɔnwo do emiwo jiwo mɛ ɔ ? ⁵ Ŋɖe yi fa wu nɔ wa mɔ "osɔ awu nuvɔn kewu" koɖo "shite nɔ na zɔn zɔnlin" ? ⁶ Keŋ nɔ mia nya mɔ, amɛ agbetɔ vilɔ ɖo acɛ le nyigban lɔji yi a sɔ nuvɔn ke amɛ." Enu nɔ kplibɔtɔnɔ lɔ mɔ "Shite nɔ na sɔ awu ba ayi awu xwemɛ." ⁷ Eyi godu mɛ ɔ, ŋsu lɔ shite yi yí eyi xwemɛ. ⁸ Ciyi jukɔn lɔ kpɔ ecɛ ɔ, eji jɔ wo, yi wo kanfu Mawu ciyi na acɛ cɛ amɛ agbetɔ. ⁹ Ci yi Yesu so le enɔ yi yikɔ ɔ, e kpɔ ŋsu ɖeka le anyinɔnɔ le tagajɔxu. Wo yɔ nɔ ŋsu lɔ mɔ Matiye. Yesu nu nii mɔ : "Kplɔ ŋ do." Eyi eshite yi kplɔɛ do. ¹⁰ Yesu nɔ anyinɔnɔ do axwelɔmɛ yi le enu ɖuwɔ koɖo tagajɔtɔwo koɖo mɛciwo yi ɖo agbenɔnɔ vwinwo sɔ kpe nɔ eyi nukplaviwo. ¹¹ Ciyi Falizitɔwo kpɔ ecɛ ɔ, o nu nɔ eyi nukplaviwo mɔ : "ŋɖe yi taɖo yi miwo Xwetɔ ɖuɖu ɔ enu koɖo tagajɔtɔwo koɖo mɛciwo yi ɖo agbenɔnɔ vwinwo ?" ¹² Ciyi Yesu se enyɔ cɛɔ, emɔ : "Amɛ ciwo yi le lanmɛsɛnmɛ ɔ, woo ɖebe ɖo wudo nɔ doto o, vɔ mɛ ciwo yi lé edowo yi ɖo doto wudo. ¹³ Mi yi a yi kpla enu sɔso Mawu nyɔ ci mɔ : "Ŋshishikukunɔamɛ yi ŋ jijiɔ le mi gbɔ. Ɖe nyi avɔsa yɔ o." Ɖo ɔ, ŋ ɖe va nɔ amɛ ciwo yi bubuɔ mɔ yoo nyi amɛjɔjɔɛ yɔ gbe o ; vɔ ɔ, enuvɔnwatɔwo yɔ." ¹⁴ Eyi nukplavi Ʒan tɔwo va gbɔ yi biɛse mɔ : "Ŋuɖetaɖo yi miwo koɖo Falizitɔwo cinɔ eŋudɔn vɔ yi nukplavi tɔwo ɖe cinɔ eŋudɔn ɔ ?" ¹⁵ Yesu ɖo nu mɔ : "amɛciwo yi wo yɔ nɔ esrɔn ɖeɖe asɛn le ŋushishi mɛ hwecinu yi esrɔnɖetɔ lɔ kpɔtɔ lewo gbɔ a ? Vɔ ŋkekewo ava yi esrɔnɖetɔ lɔ aso lewo gbɔ yi woa ci eŋudɔn. ¹⁶ Meɖe ɖe sɔnɔ avɔ yoyu tánɔ́ nɔ́ avɔ xoxwi o. Nɔ wo wɛ ahan ɔ, yoyutɔ lɔ gbe nanɔ yi xoxwitɔ lɔ drɛnnɔ sɔwu lehan yi e le do sasa. ¹⁷ Nɛnɛke, oɖe sɔnɔ vɛn yoyu kɔnɔ do gbaza godu xoxwi mɛ o. Nɔ wo wɛ ahan ɔ, vɛn lɔ a kɔ, yi gbaza godu lɔ a gban. Vɔ ɔ, vɛn yoyu ɔ, gbaza godu yoyu mɛ wo kɔɛni do, yi vɛn koɖo godu lɔ ale nywiɖe." ¹⁸ Hwecinu yi Yesu le nuxu xoɔ do enyɔ lɔ nu ɔ, ahwa fiɔ ɖeka va gbɔ yi doŋdo nii, yi nu ni mɔ "Evinyɛ nyɔnuvi ku sabaɖeɛ. Vayi yi asɔ alɔ dado ji nɔ a fɔn." ¹⁹ Yesu shite yi kplɔɛ do koɖo yi nukplaviwo. ²⁰ Ci wo yo kɔ ɔ, nyɔnu ɖeka ci nu yi ehun kɔkɔ le so exwe wive ke to godu nɔ Yesu yi tɔ alɔ yi wuvlaya toga. ²¹ Ɖo enunu le yi ɖeki mɛ mɔ : "Nɔ ŋ sɛn eŋ yi tɔ alɔ Yesu wu kpɔŋ vɔ, na gan." ²² Ci yi Yesu trɔkpɔ godu yi kpɔɛ ɔ, e nu nii mɔ : "Evinyɛ, do eji. Ao xɔse hwlɛn eo gan." Eyi edo lɔ mi nɔ nyɔnu lɔ zeɖeka. ²³ Ci yi Yesu va ɖo ahwa fiɔ lɔ xwemɛ ɔ, ekpɔ ehun xotɔwo yi ole ʒigidiji. ²⁴ Yi e nu nɔ wo mɔ : "Mi so le elɛ ɖo ɖeviɛ lɔ ɖe ku o, alɔn yi e dɔndɔn." Vɔ wo tɔ kwikwi. ²⁵ Ciyi jukɔn lɔ to ɖegbɔ ɔ, eɖo exɔ lɔ mɛ, yi le alɔ nɔ ɖevilɔ yi eshite. ²⁶ Wo dra enyɔ lɔ to jukɔn lɔ pleŋ mɛ. ²⁷ Ciyi Yesu sole enɔ ɔ, ŋukuvi tɔntɔnnɔ ameve kplɔɛ do. Wo le axwa doɔ yi nunuɔmɔ : "Davidivi, kuŋshishi nɔ mi. ²⁸ Ciyi Yesu va axwe lɔ mɛ ɔ, ŋukuvi tɔntɔnnɔ lɔ wo vagbɔ. Yesu biɔse mɔ : "Mi kan doji mɔ na wa ecɛ dru a ?" Wo ɖo nu ni mɔ: "Ɛɛ, Axwetɔ". ²⁹ Eyi Yesu talɔ ŋkuvi woo tɔwo yi mɔ : "Le vamɛ nɔ mi shigbe le xɔɛji se nɛ." ³⁰ Yi ŋkuvi woo tɔwɔ hun. Yesu do ese nɔ wo veviɖe mɔ : "Meɖe ŋgbe se enyɔ cɛ o." ³¹ Vɔ ɔ, woo koɖo ve sɔ enyɔ lɔ gban do jukɔn lɔ mɛ. ³² Ciyi mɛ cɛwo koɖo eve ɖedo ɔ, o sɔ nuxumaxotɔnɔ ɖeka ci mɛ yi gbɔngbɔn vɔn ɖɔ. ³³ Ciyi wo nya gbɔngbɔn vɔnlɔ lemɛɔ, etɔ nuxu xoxo. Enu cɛ kpaca jukɔn lɔ, yi jukɔn lɔ mɔ : "Ye o ɖe kpɔ e cɛ le Israyɛli kpɔ o." ³⁴ Vɔ, Falizitɔ wo nunuɔ mɔ : "Todo gbɔngbɔn vɔnwo ga ji yi ele gbɔngbɔn vɔnwo nya le." ³⁵ Yesu to do ejugan koɖo kɔxwiwo mɛ yi le enukplaa amɛwo le Masɛnxuwo, yi le eŋɛnyui lɔ do ɔ nɔ amɛwo so Mwu fiɔɖuxu nu, yi gbe le edɔ koɖo ekplɛxoxo vovovowo yɔ nɔ amɛwo. ³⁶ Ciyi ekpɔ jukɔn lɔ ɔ, eku ŋushishi nɔ wo, ɖo wo caka yi gbɔjɔ. Wo le shigbe lingbɔ ciwo yi ɖe ɖo kplɔla nɛ. ³⁷ Enu nɔ nukplavi yi tɔwo mɔ : "nuku lɔ gangan, vɔ dowavi lɔwo hwe. ³⁸ Miɖe kuku nɔ Axwetɔlɔ nɔ a ɖo dɔwavi wo ɖaɖa ebolɔmɛ."