¹ Hwenu yi Yesu ɖyi so ekpo lɔ ji ɔ, amowo lɔ ahwa, yi kplɔɛ do. ² Eyi ekponɔ ɖeka teva gbɔ, yi doŋdonii, yi nu nii mɔ: «Axwetɔ, nɔ e lɔn ɔ, a sɛnŋ na yi gbazamɛ a kɔ nɔ ŋ.» ³ Eyi Yesu do alɔ ɖaɖa gbɔ, yi tɔ alɔ yi, yi nu nii mɔ: «Ŋ lɔn, edɔ tɔo ɖe mi nɔ wu.» Eyi zeɖeka vɔ, ekpo dɔ lɔ mi nɔ 'mɛ lɔ, yi gbazamɛ kɔ nii seee. ⁴ Eyi Yesu nu nii mɔ: «Ɖo eto a se nyuiɖe. Ŋ gbe vayi nu enu ci yi ŋ wa nɔ wu nɔ 'mɛɖe go. Ganŋkegan ɔ, yi avɔsatɔ lɔ gbɔ keŋ, a sɔ wɔɖeki doasɛ nii, yi a gbe wa enunana shigbe lehan yi Mɔyizi nui do daɖɛ nɛ. E yi a nyi kunuɖeɖe nɔ amowo mɔ, edɔ lɔ mi nɔ wu.» ⁵ Gacimɛ yi Yesu ɖoɖoɔ Kafanawɔmu kɔxwimɛ ɔ, sɔjakavehowiga ɖeka tesɔɛ, yi biɔ kpedonu, yi mɔ: ⁶ «Axwetɔ, anyi dɔwavi xokplɛ, yi le anyimlɔnmlɔn le axwemɛ, yi le vevi seɛ sugbɔ.» ⁷ Eyi Yesu nu nii mɔ: «Na yi a wu xwemɛ, yi a da edɔ nii.» ⁸ Vɔ ɔ, sɔjakavehowiga lɔ nu nii mɔ: «Axwetɔ, ŋ ɖe je yi a va anyi xwemɛ o. Vɔ ɔ, nu enyɔ ɖeka kpaŋ, nɔ edɔ lɔ ami nii. ⁹ Ɖo enyɛŋtɔ ɔ, mɛgan buwo cɛkpakpa gɔnmɛ yi ŋ le, yi sɔja ɖewo le gɔnmɛ nɔ ŋ hɛnnɛ. Nɔ ŋ nu nɔ eɖe mɔ "yi" ɔ, e yi nɔ; nɔ ŋ nu nɔ ebu mɔ: "va" ɔ, e vanɔ; eyi nɔ ŋ nu nɔ anyi dɔwavi ɖe mɔ "wa enu cɛ han" ɔ, e wɛɛni.» ¹⁰ Ci yi Yesu se enyɔ cɛwo ɔ, e kpacɛɛ, yi e nu nɔ amɛ ciwo yi kplɔɛdo mɔ: «Le nyɔnɔnui mɛ ɔ, ŋ nunuɔ nɔ mi mɔ, ŋ ɖe kpɔ amɛ yi e ɖo xɔse cɛ han ɖe le Israyɛli go. ¹¹ Ŋ nunuɔ nɔ mi mɔ, amɛ sugbɔ a so ewezexu koɖo eweyixɔxu lage yi a va ɖu enu le jiŋkuimɛ fiɔɖuxu lɔ mɛ koɖo Ablahamu, Izaki koɖo Ʒakɔbu. ¹² Vɔ yi, wa nya amɛ ciwo yi ɖo a yi jiŋkuimɛ fiɔɖuxu lɔ mɛ sa ɖaɖa ʒinflu mɛ le gbadonu, fini yi 'mɛ lɔwo a fanfan avi le, yi a ɖuɖuɔ aɖukli.» ¹³ Yesu va nu nɔ sɔjakavehowiga lɔ mɔ: «Trɔyi axwemɛ. Enu ci yi e biɔ koɖo xɔse ɔ, Mawu sɔɛ na wu.» Eyi gahunnɔmɛ cucucu vɔ, edɔ lɔ mi nɔ edɔwavi lɔ. ¹⁴ Yesu, yi Simɔ xwemɛ, yi vuvɔfu wawa Simɔ ashiɛnɔ, yi e mlɔ anyi. ¹⁵ Eyi Yesu le alɔ nii, yi vuvɔfu lɔ mi nii, yi e shite, yi xɔ wowo mɛdru. ¹⁶ Fiɛshimɛ ɔ, wo kplɔ amɛ sugbɔ ciwo yi gbɔngbɔnviɔnwo dodoɔ aya nɔ va Yesu gbɔ. Eyi e ɖe egbe do wo ji, yi wo shi. E gbe da edɔ nɔ dɔnɔwo pleŋ hɛnnɛ. ¹⁷ Nɛnɛ yi enyɔ ci yi Mawu nu todo e yi eŋɛdotɔ Ezayi ji mɔ: «Exɔ miwo dɔlelewo koɖo miwo funkpekpewo sɔyi» va jɔ do nɛ. ¹⁸ Ci yi Yesu kpɔ ahwa ci yi trɔdii lɔ ɔ, e ɖe egbe nɔ yi nukplanviwo mɔ yowo a yi ago ɖitɔ lɔ ji. ¹⁹ Eyi esedɔwatɔ ɖeka te va gbɔ, yi nu nii mɔ: «Cicagan, fiɖekpokpui ci yi a yi ɔ, na kplɔnɔ wo do.» ²⁰ Yesu ɖonu nii mɔ: «Wataklɛwo ku eduwo ɖɛ, yi xeviwo ɖo atɔwo ɖɛ yi nɔnɔ mɛ. Vɔ Agbetɔvi lɔ yɛ ɖe wa fiɖe ɖɛ yi sɔnɔ eta danɔ do o.» ²¹ Eyi e yi nukplanviwo domɛtɔ ɖeka nu nii mɔ: «Axwetɔ, ɖe emɔ nɔ ŋ, nɔ ma yi ɖyi edanyɛ cɔ gbɔxwe.» ²² Yesu ɖonu nii mɔ: «Kplɔ ŋ do, yi a tashi amɛkukuwo nɔ wa ɖyi wowo 'mɛkukuwo.» ²³ Yesu ɖo tɔ etɔjihungangan lɔ mɛ, yi e yi nukplanviwo kplɔɛ do. ²⁴ Eyi zeɖeka vɔ, jihɔn gangan ɖeka tɔ xoxo le etan lɔ ji, yi etan lɔ tɔ adan wawa, yi etanshi lɔ blabla a, yi gbangban do etɔjihungangan lɔ mɛ vɔ ɔ, Yesu dɔndɔn alɔn. ²⁵ Nukplanviwo tesɔɛ, yi fɔin, yi nu nii mɔ: «Axwetɔ, hwlɛn mi gan; mi a vɔ!» ²⁷ Eyi Yesu biɔ wo se mɔ: «Ŋde yi mi vɔnvɔn ɔ nɔ nɛnɛ ɔ? Xɔse hwe do mi ke!» Ci yi e nu nɛnɛ nɔ wo ɖegbɔ ɔ, e shite, yi ɖe egbe do jihɔn gangan lɔ koɖo etanshi lɔ, yi wo ɖo ɖa toŋ. ²⁶ Enu lɔ jiŋ nɔ wo sugbɔ, yi wo biɔbiɔ wowoɖekiwo se mɔ: «Mɛ han yi nyi amɛ cɛ, yi jihɔn ganganwo koɖo etanshiwo seseɔ, egbe nii? ²⁸ Ci yi Yesu va ɖo Galile tan lɔ godu le Ʒelaza kan mɛ, le Gadalatɔwo ju mɛ ɔ, ŋsu amɛve ɖeka ciwo yi gbɔngbɔnvɔn ɖeɖeɛ efun nɔ to so amɛɖyixu tɔxu lɔ, yi va do ego yi. Wo nɔnɔ adan ji kaka kpɔ 'mɛɖe ɖe gbenɔ edɔn, yi tonɔ wo gbɔ, yi vayinɔ o. ²⁹ Ŋsu lɔwo tɔ axwa dodo yɔɛ mɔ: «Ŋde yi e jijiɛ a wa kodo mi! Mawu Eviɛ? Eva elɛ, yi a va do gotuvi nɔ mi gbɔxwe nɔ ega lɔ a va xo yɔ a?» ³⁰ Le axa nɔ wo ahan ɔ, eha sugbɔ ɖekawo ɖuɖuɔ enu le enɔ lɔ. ³¹ Gbɔngbɔnvɔin lɔwo ɖeɖeɛ kuku nɔ Yesu mɔ: «Nɔ e ji mɔ ya nya mi ɔ, nya mi ɖaɖa eha lɔwo mɛ.» ³² Eyi Yesu nu nɔ wo mɔ: «Mi yi.» Eyi wo to, yi vayi ɖo eha lɔwo mɛ. Zeɖeka vɔ eha lɔwo shiju so ekpo lɔ balime hwlihwlihwli, yi je etan lɔ mɛ, yi ku. ³³ Amɛ ciwo yi kplɔ eha lɔwo vayi amaɖugbe shi, yi vayi kaka enyɔ lɔ nɔ amowo le jugan lɔ mɛ. Wo to enyɔ ci yi jɔ do ŋsu amɛve lɔwo ji can. ³⁴ Eyi jugan lɔ mɛtɔwo pleŋ to, yi vayi do ego Yesu, yi ɖe kuku nii mɔ, yi ɖe so le yowo nyigban ji.