¹ Le yi godu ɔ, Mawu Gbɔngbɔn lɔ kplɔ Yesu sɔyi zogbeji nɔ legba a tii kpɔɔ. ² Ciyi Yesu blanu ŋkeke eka koɖo ezan eka, yi shive cici ɔ, amɛdogbɔtɔ lɔ vagbɔ yi nu nii mɔ: ³ «Nɔ enyi Mawu Eviɛ lɔ nyao ɔ, ɖe egbe nɔ ekpe cɛwo nɔ wo a trɔ kpɔnnɔ.» ⁴ Yesu ɖonu nii mɔ: «Wo ŋwlɛ mɔ "Ɖe nyi enuɖuɖu dekɛ yi a na yi agbetɔ a nɔ agbe o. Vɔ ɔ, enyɔ ɖekpokpoi ci yi tonɔ so Mawu nu mɛ can nanɔ agbe amɛ."» ⁵ Eyi legba kplɔɛ yi Ʒeluzalɛmu, jugan kɔkɔɛ lɔ mɛ, yi na yi ela Cɔcixɔ lɔ tamɛ, ⁶ yi nu nii mɔ : «Nɔ e nyi Mawu Eviɛ lɔ nyao ɖe, te je nyigban. Ɖo wo ŋwlɛ do fiɖeka le Mawu nyɔ wemawo mɛ daɖɛ mɔ: "Mawu a ɖe egbe nɔ yi dɔlawo yi wo a xɔwu do wowo lɔwo mɛ nɔ ŋgbe va sɔ afɔ gban do ekpe ɖe nu o."» ⁷ Vɔ Yesu nu nii mɔ: «Wo gbe ŋwlɛ do Mawu nyɔ wemawo mɛ dadɛ mɔ: "Ŋgbe ma Axwetɔ, ao Mawu kpɔ o."» ⁸ Legba gbe kplɔɛ yi ekpo yiji yiji ɖeka ji, yi doasɛ xexemɛ fiɔɖuxuwo pleŋ koɖo wowo klɛnklɛnwo nii, ⁹ yi nu nii mɔ: «Na sɔ enu cɛwo pleŋ nao, nɔ e je ekloji yi doŋdo nɔŋ.» ¹⁰ Eyi Yesu ɖonu nii mɔ: «Teyi ɖaa, legaba! Ɖo wo ŋwlɛ do fiɖeka le Mawu nyɔ wemawo mɛ dadɛ mɔ: "Axwetɔ, awu Mawu ɖekɛ yi a doŋdo nɔ. Eyɛ ɖekɛ yi a sɛn."» ¹¹ Eyi legba tashii, yi dola ɖekawo va Yesu gbɔ, yi va le ebu nii. ¹² Ci Yesu se mɔ wo le Ʒan Mawushilenɔamɛtɔ do gakpamɛ ɔ, eso yi kpe Galeliya kan mɛ. ¹³ Eso le Nazalɛti kɔxwimɛ yi kpe Kafanawɔmu ci le Galeliya tɔ tu le Zabulɔn koɖo Nɛfutali kanwo mɛ. ¹⁴ Enyɔ cɛwo jɔ, keŋ nɔ enyɔ ci yi Mawu ŋɛdotɔ Ezayi nu ɖɛ a vamɛ. Ezayi nu ɖɛ mɔ: ¹⁵ «Zabulɔn koɖo Nɛfutali kanwo, nyigban ciwo yi le etɔ lɔ tu tiin le tagbe ɖaa nɔ Ʒuludɛn; Galeliya, ekan ɖeka ci mɛ yi amɛmanyi Yuɖatɔwo le. ¹⁶ Jukɔn lɔ ci yi le ʒinfku mɛ kpɔ klɛnklɛn gangan ɖeka, yi 'mɛ ciwo yi le ekan lɔ mɛ le eku ʒinflu mɛ, kpɔ klɛnklɛn!» ¹⁷ Sɔso hwenɔnu yi Yesu do axwa, yi tɔ Mawu nyɔ nunu nɔ amowo mɔ: «Mi trɔ miwoɖekiwo a ji. Ɖo ɔ, jiŋkuimɛ fiɔɖuxu lɔ gogo vɔ!» ¹⁸ Ci yi wo zɔn Galile tan tu, yi vayikɔ ɔ, e kpɔ Simɔ ci yi wo yɔnɔ mɔ Piyɛ koɖo nɔviɛ Anŋdre yi wo dada edɔ. Ɖo ɔ, edɔdatɔwo yi wo nyi. ¹⁹ Yesu nu nɔ wo mɔ: «Mi kplɔ ŋ do, nɔ ma na nɔ mi a tɔ agbetɔwo kplɔkplɔ gbɛ shigbe lehan yi mi lenɔ kpaviwo gbɛ do nɛ.» ²⁰ Eyi zeɖeka vɔ, wo tashi wowo dɔwo ɖɛ, yi so kplɔɛ do. ²¹ Yesu zɔnyi ŋkɔ viɖeka, yi kpɔ nɔvinɔ buwo, Ʒaki koɖo Ʒan ciwo yi nyi Zebede eviɛwo. Wo le etɔjihungangan mɛ koɖo wowo da, yi dradra edɔwo do. Yesu yɔ wo. ²² Zeɖeka vɔ, wo so gbe wowo da koɖo etɔjihungangan lɔ ɖɛ, yi kplɔ Yesu do. ²³ Yesu ɖyi esa todo Galile kan lɔ pleŋ mɛ, yi kplankplan enu le Mawu sɛnxuwo, yi dodoɔ axwa, yi sɔ dodoɔ eŋɛnyui lɔ nɔ amowo so jiŋkuimɛ fiɔɖuɖu lɔ nu, yi gbe dada edɔ koɖo lanmɛmaleamɛshi hamɛhamɛwo pleŋ nɔ amowo le jukɔn lɔ mɛ. ²⁴ Eyi, yi nyikɔ gban do Sili ju lɔ pleŋ mɛ, yi wo kplɔ amɛ ciwo pleŋ yi le edɔ kodo amɛ ciwo pleŋ yi sese ɔ gbazavi hamɛhamɛ wo vɛ nii: gbɔngbɔnvɔin le eji mɛ nɔ 'mɛɖekawo, yi 'mɛɖekawo wuwuɔ jigbudɔ, yi ata alo aba ku nɔ 'mɛɖewo le wo mɛ. Yesu da edɔ nɔ wo. ²⁵ Amɛɖekawo lɔ ahwa so Galile koɖo jugan amɛwo lɔwo kan mɛ, yi kplɔ Yesu do. Amɛɖewo gbe lɔ ahwa so Ʒeluzalɛmu jugan koɖo Ʒuɖe koɖo ago hunnɔɖa ji nɔ Ʒuluɖɛn, yi kplɔɛ do.