¹ Le nyidin kucukucuɔ, avɔsatɔ ganganwo pleŋ koɖo yuɖatɔwo mɛganwo do go yi bɔ sɔ gbeta mɔ yewo a wu Yesu. ² Wo dɔ yi wo blɛɛ yi kpɔɛ yi jo nɔ ekanjikpɔtɔ, pilatí. ³ Ci yi yuda, amɛci yi sa Yesu se mɔ wo so ekuhwɛ nɔ Yesu ɔ, e wa ɖeka nii yi e nu mɔ nya ye nya sasa ɔ, ye d'a wa nɛnɛ o. Yi esɔ gajɔnho egban lɔwo sɔ yi jo nɔ avɔtɔwo gawo koɖo mɛganwo ⁴ Yi nu nɔ wo mɔ: «ŋ nya wu ehwɛ.ŋ sɔ xɔmɛvunɔ sɔ sa yí wo a wu ». Eyi wo ɖoŋ ci nii mɔ: Enyɔ hunnɔ kan emiwo go Awu nyɔ yi yɛ nyi ». ⁵ Wenɔ nu yi yuɖa sɔ eho lɔ kɔŋ gbe do Mawuxwe lɔ mɛ yi to yi vayi do eku ekɔ. ⁶ Avɔsatɔwo ga lɔwo lɔ eho lɔwo yi nu mɔ:«Emiwo se de ɖe emɔ mɔ wo a sɔ eho hunnɔ kɔdo Mawuxwe howo mɛ o. Ɖo ɔ, amɛhun kɔdoanyi ho yi e nyi. » ⁷ Ci yi wo nui yi xɔ egbe do ji ɔ, wo sɔ eho lɔ xwle agble nyigban le ezemɛtɔ ɖeka shi yi sɔ ɖo mɛdruwoɖyixu. ⁸ Eyi na taɖo yi kaka j'egbɛ ɛ ɔ, wo yɔ nɔ texu lɔ mɔ, ehun kɔdoanyi nyigban. ⁹ Nɛnɛ yi enyɔ ci yi axwetɔ nu to enyɔɖɛtɔ zelemi ji mɔ: «wo sɔ gajɔnho egban xwle agble nyigban le ezemɛtɔ ɖeka shi, ¹⁰ eho hunnɔ yi Israyɛliviwo kpɔ mɔ yewo a sɔ xwlii nɛ» va mɛ shigbe axwetɔ lɔ nui do daɖɛ nɛnɛ. ¹¹ O kplɔ Yesu yi ekanji kpɔtɔ pilati gbɔ yi e biɛ se mɔ: «Ewo yi nyi yuɖatɔwo fiɔ a? » Yesu ɖo nu nii mɔ «Ewo yi nuii» ¹² Vɔ, hwe ci nu yi avɔsatɔwo gawo koɖo mɛgan wo va dodo ɔ ehwɛ nii ɔ, kpɔ ɖe ɖo nu nɔ wo. ¹³ Eyi pilati biɛ se mɔ: «Ɖ'e sesɛ ehwɛ ciwo yi wo dodo ɔ nɔ o ba? » ¹⁴ Vɔ kpɔ de ɖo enyɔ lɔ nu nɔ ekanjikpɔtɔ pilati go. Enu bɔbɔ eyi tɔ va jiŋ pilati sugbɔ. ¹⁵ Exwekpekpe duu, le atadoamɛ xweji ɔ, ekanjikpɔtɔ jonɔ gakpamɛtɔ ɖeka dandan ci yi Jukɔn lɔ sɔ. ¹⁶ Le hwenɔ nu ɔ gakpamɛtɔ ɖeka ci yi wo yɔnɔ mɔ Barabasu amɛshimɛ yi jeshiɖɛ. ¹⁷ Ci yi wo bɔ ɖegbɔ ɔ, pilati biɔ wo se mɔ «Mɛ ɛ e mi ji nɔ nyi ɖe jɔ nɔ mi ɔ ? Barabasu alo Yesu ci yi nyi kliso a? ¹⁸ Pilati nya nyuiɖe mɔ ŋhwo faɖo yi wo sa Yesu. ¹⁹ Ga ci mɛ yi e le nyinɔ nɔ le kojo ɖoɖo ʒinkpin ji ɔ, ashi ɛ tesɔɛ yi nu nii mɔ «Ŋgbe wa ŋɖe kodo amɛ manyaɖe cɛ lo; ɖo ɔ, le ezan mɛ gbɛ ɖe, ŋkpefun sugbɔ le edrɔmɛ do eta nii. ²⁰ Avɔsatɔ gangan wo koɖo mɛganwo yi wɛwɛ kaka yi ahwakɔn lɔ xɔ gbe do wowo nyɔ ji yi biɔ pilati mɔ yi le jo Barabasi nɔ yowo yí a wu Yesu. ²¹ Yi Ekanjikpɔtɔ lɔ gbe biɔ wo se mɔ:«Mɛ e mi ji enyɛ ɖe jo le amɛ amɛve lɔwo mɛ nɔ yo woɔ?» yi wo ɖo nu nii mɔ: «Barabasi .» ²² Yi Pilati va biɔ wo se mɔ: «ci yi ele nɛnɛ ɖee, ŋɖe yi na wa koɖo Yesu ci yi wo yɔnɔ mɔ kliso yɛ ɔ? » wo kpu ɖu nu mɔ: «kiin do acisosa ji.» ²³ Pillati biɔ wose mɔ: « Ehwɛ hinɖe yi e wu ?» vɔ ɔ wo tɔ axwa dodo koɖo ŋsɛn mɔ «kiin do acisosa jí» ²⁴ Ci Pilati va kpɔ mɔ wo ɖe jijiɛ ase ye nyɔ ɔ, yi hunhun lɔ gbe kpɔ tɔ ɖyiɖyiɔ ɔ e sɔ eshi yi klɔ alɔ wo le ŋmɛ nɔ wo yi nu mɔ: «ŋ ɖe le mɛgan cɛ wuwu nyɔ mɛ koɖo mi lo, miwo nyɔ yi e yni». ²⁵ Eyi wo kpu xɔ egbe yiɛ ɖo nu nii mɔ «mi lɔn mɔ emiwo koɖo miwo viwo yi mɛgan lɔ ku anɔ ekɔ nɔ». ²⁶ Hwenɔ nu yi Pilati jo Balabasi yi dɔ yi wo do lanba nɔ Yesu keŋ yi sɔjawa nɔ wo a kiin do acisosa ji. ²⁷ Yi Pilati sɔjawo kplɔ Yesu yi ekanjikpɔtɔ xwe mɛ, yi ahwakɔn lɔ trɔ dii. ²⁸ Woɖe eyi wuwo le nu, yi sɔ awu bu jɔn vlaya ɖeka do nii. ²⁹ Yi sɔ ŋja lɔn efiɔkuku yisɔ klogbuci ɖeka do ɖushilɔmɛ nii. Wo je ekloji do akɔnnɛ nii yi tɔ egbe dodo nii mɔ, «Mi do egbe nɔ eo yuɖatɔwo fiɔ.» ³⁰ wo cucu ɔ etan do nu yi xɔ klogbuci lɔ le shi yi sɔ xoxo ɔ eta nii ³¹ Ci yi wo gbalii nyuiɖe ɖegbɔ ɔ, wo ɖe awu jɔn lɔ so ekɔ nii yi gbe sɔ yiŋtɔ wuwo gbesɔ do nii yi kplɔɛ ɖe do yi ayi kan do acisosa ji. ³² Ci yi sɔja lɔwo to le jugan lɔ mɛ yi yikɔ ɔ, wo do ego silɛnutɔ ci wo yɔnɔ mɔ simɔ. Wo ʒin ji mɔ yi le dro acisosa ci ji wo jikɔ a kan Yesu do lɔ. ³³ Wo vayi ɖo Gɔlugota ci gɔnmɛ yi nyi mɔ. «texwe ci yi ɖo nɔnɔ shigbe agbetɔ taxu han nɛnɛ » ³⁴ Wo sɔ vɛn ci yí wo ca koɖo enu veve ɖeka yi sɔ na Yesu mɔ yi le nu. Ci Yesu tɛ kpɔ ɔ, e gbe mɔ ye eta nui. ³⁵ Eyi wo kin do acisosa ji ci yi wo kin do acisosa ji ɖe gbɔ ɔ, wo va yi trɔ enu kpɔ sɔso e yi nu dodo wo nu, a kpɔmɔ hin ɖe yi amɛɖeka amɛɖeka axɔ mɛ, wo sɔ wo ma. ³⁶ Le eyí godu ɔ, wonɔ anyinɔnɔ do enɔ lɔ yi tɔ cɔcɔɛ. ³⁷ Wo ŋwlɛ ŋci dɔ yi wo so ekuhwɛ nii do kpakovi ɖeka ji do tamɛ nii mɔ:«amɛ ci yi Yesu yuɖatɔwo fiɔ.» ³⁸ Wo kan flafinɔ gangan amɛve ɖekawo do acisosa ji do axa nii. Ɖeka le ɖushi mɛ nii yi amɛve lɔ le emiɔmɛ nii. ³⁹ Amɛ ciwo yi toto ɔ enɔlɔ va yikɔ hunhun ɔ eta yisɔ zu zu ɔ Yesu. ⁴⁰ Yi nu nuɔ nii mɔ: «E ɔ ci yi nu mɔ ye a gban Mawu yi a gbe trɔ a cui le ŋkeke amɛtɔn mɛ ɖe nɔ eyni Mawu vi duu ɖe, hwlɛn eɔɖeki gan yi a ɖyi so acisosa lɔ ji. ⁴¹ Avɔsatɔ gangantɔwo, esedɔwatɔwo wo koɖo mɛganwo can gbagbali yi nu nu ɔ mɔ: ⁴² «E hwlɛn amɛwogan, vɔ kpɔ de sɛnŋ hwlɛn yiɖeki gan. Israyɛli fiɔ yɔ! ɖe dyi so acisosa lɔ nu nɔ a kpɔ yi a kandoji. ⁴³ E kando Mawu ji yi mɔ y'e nyi Mawu vi. Nɔ Mawu lɔin duu ɔ, ɖe hwliin gan. » ⁴⁴ Nɛnɛ lɔ ke yi flafinɔ gangan ciwo yi wo kando axa nii wo can zuzuiɛ nɛ. ⁴⁵ Sɔ so gawi ve kaka va kɔdo gatɔn mɛ ɔ, ʒinflu do le ejulɔ kpu mɛ ⁴⁶ Eyi le gashieɖekɛ han wo ɔ, Yesu do axwa cicici yi nu mɔ: «Eli, Eli, lama sabakitani ?» ci gɔnmɛ yi nyi mɔ: «Anyi Mawu, Anyi Mawu ŋɖe taɖo yi e gbeŋdɛ? » ⁴⁷ Ci yi amɛ ciwo yi le enɔlɔ wo domɛtɔ ɖeka wo se enyɔ ci yi e nu nu ɔ, wo nu mɔ, yi yɔ yɔ Eli. ⁴⁸ Eyi mɛɖeka shi eju le wo mɛ yi va yi sɔ kocan ʒin do vɛn maynɔ manyɔ mɛ yi sɔ trɔn klogbuci nu yi doi ɖaɖa gbɔ mɔ yi le nu. ⁴⁹ Vɔ ɔ, amɛkpɛtɛwo nu nɔ yɛ mɔ: «táshi nɔ mi a kpɔ mɔ Eli a va hwliin gan mɛ! » ⁵⁰ Vɔ ɔ, Yesu gbe do axwe cicici yi sɔ e yi gbɔngbɔn jo. ⁵¹ Hwenɔ nu yi avɔ ci yi wo sɔ so Mawunɔ lɔ mɛ drɛn do aɛve sɔso eji kaka va kɔdo gɔnmɛ yi nyigban hunhun yi ekpe gbajawo gban. ⁵² Yi yɔduwo hun yi xɔsetɔ ciwo yi ku sasa sugbɔ tɔ lankpu fɔn ⁵³ Yi to le yɔdunfo mɛ yi hwecinu yi Yesu fɔn so ekuwodi ɔ, wo yi Ʒeluzalɛmu jugan kɔkɔɛ lɔ mɛ sugbɔ kpɔ wo. ⁵⁴ Ci yi sɔjakavehowiga koɖo sɔja ciwo yi cɔcɔ Yesu kodi kpɔ lehan yi anyigban hunhun do koɖo emu ciwo kpu yi jɔ ɔ, vɔnvɔn ɖo wo yi wo nu mɔ. « Mawu Eviɛ yi e nyi sasa nyao » ⁵⁵ Nyɔnu sugbɔ le azɔge le enɔtɔxɔ lɔ yi kpɔkpɔ Yesu ɖaɖa. Wo kplɔ Yesu do so Galile kan mɛ yi kpenɔ do nu. ⁵⁶ Mali Magidalatɔ koɖo Malici yi nyi Ʒaki ko Ʒozɛfu wo nɔlɔ koɖo zebede eviɛwo nɔlɔ le wo mɛ hɛnnɛ. ⁵⁷ Ci yi ezan do ɔ, ŋsu hotɔnɔ ɖeka ci yi so alimate kɔxwimɛ yi wo yɔɛ ni mɔ Ʒozɛfu va kɔɖɛ. Yɛ can le Yesu nukplavi wo mɛ. ⁵⁸ E vayi kpɔ Pilati mɔ y'axɔ Yesu cɔ nɔ y'ava yi ɖyi. Pilati na egbe mɔ wo le sɔ jo nii. ⁵⁹ Eyi Ʒozɛfu sɔ gagaɣi pepepe ɖeka do ecɔ lɔ ⁶⁰ yi va yi ɖyi do yɔdu ci yi edɔ yi wo ku tro lolo nii do ekpegbaja ɖekamɛ yiebli ekpe gangan ɖeka cu enu nii yi so. ⁶¹ Mali Magidalatɔ koɖo Mali halɔtɔ wo nɔ anyinɔnɔ kpanŋkɔ yɔdulɔ. ⁶² Ci wo drɔ ezan nɔ gbɔngbɔn gbe eyi ŋkegbuɔ, avɔsatɔwo gawo koɖo falisitɔwo yi Pilati gbɔ ⁶³ yi nu nii mɔ: «mɛgan mi ɖo eŋui mɔ hwecinu yi evixotɔ hunnɔ le agbe ɔ, e nu mɔ: «nɔ ye ku eyi nyisɔmɛ ɔ, ye a fɔn so ekuwodi » ⁶⁴ E yi na taɖo ɔ, ɖe egbe nɔ woa cɔcɔ yɔdo lɔ kaka a xɔ nyisɔ lɔ, nɔ e yi nukplaviwo ŋgbe va yi fin e yi cɔ lɔ yi a va nu nɔ jukɔn lɔ mɔ yi fɔn so ekuwodi evixoxo hunnɔ yɛ a ve sɔwu ŋkɔtɔ. ⁶⁵ Pilati nu nɔ wo mɔ: «Emi wo yi sɔja ciwo yi a cɔ lɔ yɔdu lɔ shigbe le han mi ji do nɛnɛ » ⁶⁶ Eyi wo so yi va yi dre lehan yi wo a cɔ yɔdu lɔ do eyi wo sɔ enu tre ekpe ci yi wo sɔ cu yɔdu lɔ nu yi ɖo sɔjawo ɖo enɔtɔxu lɔ nɔ wo a cɔcɔɛ.