¹ Ci Yesu xo nuxu ɖegbɔ ɔ, enu nɔ eyi nukplaviwo mɔ : ² «Mi nya mɔ nyi sɔ yi kpɔtɔ yi wa ɖu Paki, eyi wa sa Agbetɔvi lɔ, yi wa lii, yi a kiin do acisosa ji nɛ.» ³ Eyi avɔsatɔwo gawo koɖo jukɔn lɔ mɛganwo vayi bɔdo avɔsatɔ gangantɔ, Kayifu xwe mɛ, ⁴ yi sɔ gbeta mɔ yo a be a le Yesu keŋ yi a wui. ⁵ Ɖo wo nu mɔ : «Mi de ɖo a lii le exwe ji teŋ o. Nɔ ɖe nyi nɛnɛ ɔ, jukɔn lɔ a va tɔ hannyahannya wawa.» ⁶ Yesu yi Simɔ ci yi je ekpo sasa xwe le Betani. ⁷ Ci yi wo le ekplɔn nu yi le enu nu ɔ, nyɔnu ɖeka hɛn amihwɛnte ehovevitɔ egu ɖoɖo ɖeka do alɔmɛ. E tegogo Yesu yi sɔ amihwɛnte lɔ kɔdo eta nii. ⁸ Ci yi Yesu nukplaviwo kpɔ enu ci yi nyɔnu lɔ wa ɔ, ɖe jɔ eji nɔwo ɖeɖe o. Eyi wo biɔ se mɔ : «Ŋde yi taɖo yi nyɔnu cɛ doahɛn amihwɛnte ehovevitɔ cɛ ahan ɔ ? ⁹ Nɔ wo hɛn sa ɖee, wo ɖa saamihwɛnte lɔ eho nɔnui yi a sɔ eho lɔ manɔ wamɛnɔwo ba !» ¹⁰ Yesu nya enyɔ ci nuɔ wo le, yi biɔ wo se mɔ : «Ŋde yi jɔ yi mi le efun ɖeɔ nɔ nyɔnu lɔ ɔ ? Enunyui yi e wa nɔ ŋ. ¹¹ Ɖo enye, ŋ ɖa le mi gbɔ tɛgbɛɛ o. Vɔ abɔnɔwo le mi gbɔ gashiagamɛ ¹² Ci nyɔnu cɛ kɔ ami lɔ do ŋ ji ɔ,e we nɔ a nyi ɖidi. ¹³ Le nyɔnɔnui mɛ ɔ, ŋ nu nuɔ nɔ mi mɔ, afishiafi ci wa nu eŋɛnyui lɔ le koɖo axwa le xexe lɔ mɛ ɔ, wa lɔ exo so enu ci yi nyɔnu lɔ wa nu, yi a ɖoɖoɔ eŋuii.» ¹⁴ Ecɛyɛ ɔ, Yuda Ishikaliwɔti ci yi nyi Yesu nukplavi wive lɔwo domɛtɔ ɖeka vayi kpɔ avɔsatɔwo gawo ¹⁵ yi biɔ wo se mɔ : «Nɔ ŋ sa Yesu nɔ mi ɖe, ŋɖe mia na ŋ ɔ ?» Eyi wo hlɛn gajɔnho egban yi sɔ jo nii. ¹⁶ Gahunnɔmɛ ɔ, Yuɖa tɔ fini yi a to a sa Yesu nɔ wo jiji. ¹⁷ Le ŋkeke ŋkɔtɔ ji nɔ kpɔnnɔ cikemado xwe lɔ ɔ, Yesu nukplaviwo va gbɔ yi biɔɛ se mɔ : «Fini yi e ji mɔ mi a ɖa enu le nɔwo le Paki xwe lɔ ji ɔ ?» ¹⁸ Eyi Yesu nu nɔ wo mɔ : «Mi yi jugan lɔ mɛ le ŋsu ɖeka gbɔ ; yi a nu nii mɔ : "Mɛgan mɔ wo le nu nɔwo mɔ : «Anyi gamɛ sun. Ao xwé mɛ yi enyɛ koɖo anyi nukplaviwo a ɖu Paki lɔ le.»"» ¹⁹ Nukplavi lɔwo yi, yi va yi wa do enyɔ ci yi Yesu nu nɔwo ji ; eyi wo ɖa enu nɔ Paki xwé ɖuɖu lɔ. ²⁰ Fiɛfimɛ ɔ, Yesu koɖo yi nukplavi wive lɔwo nɔ anyinɔnɔ do ekplɔn nu yi a ɖu enu. ²¹ Ci yi wo le enu ɖu ɔ, Yesu nu mɔ : «Le nyɔnɔnui mɛ ɔ, ŋ nunuɔ nɔ mimɔ miwo domɛtɔ ɖeka jijiɛ a sa ŋ.» ²² Eyi nukplavilɔwo xa le wowoɖekiwo mɛ yi tɔ Yesu biɔbiɔse ɖeka ɖeka mɔ : «Axwetɔ, enyɛ yɔ a ?» ²³ Yesu ɖonu nɔ wo mɔ : «Amɛ ci nyɛ koɖo yi lɔ ɖoɖoɔ agban mɛ yi jijiɛ a sa ŋ. ²⁴ Agbetɔvi lɔ a ku shigbe lehan yi wo ŋwlii do Mawunyɔ wema wo mɛ daɖɛ nɛ. Vɔ ɔ, babɛɛ nɔ amɛ ci yi a sɛɛ. Nɔ wo de ji sasa haan ɔ, a nyɔ nii sɔwu.» ²⁵ Eyi Yuɖa, amɛ ci yi jijiɔ a sɛɛ biɔ se mɔ : «Axwetɔ, enyɛ yɔ a?» Yesu ɖonu nii mɔ : «Eo ŋ tɔ yi nuii.» ²⁶ Ci yi wo le enu lɔ ɖuɔɔ, Yesu sɔ kpɔnnɔ ɖeka yi do akpe do ji yi mii mɛ yi sɔ na yi nukplaviwo yi nu mɔ: «Mi xɔ a ɖu. Ecɛ yi nyi anyi lankpu.» ²⁷ Le yi godu ɔ, Yesu sɔ vɛn kɔpu ɖoɖo ɖeka yi do akpe nɔ Mawu do ji yi sɔ na yi nukplaviwo yi nu mɔ: «Mi pleŋ, mi sɔ nu. ²⁸ Ɖo ɔ, e cɛ yi nyi anyi hun, ehun kinyɛ ci yi nyi ezoɖuɖu yoyu ciyi kɔ nɔ amɛ sugbɔ, nɔ nuvɔnwo sɔsɔke.» ²⁹ Ŋ nunuɔ nɔ mi mɔ, ŋ ɖa gbe va nu vɛn bu ɖe kpɔ gbɔxwe yi a va nu vɛn yoyu koɖo mi le Edanyɛ fiɔɖuxu lɔ mɛ o.» ³⁰ Ci wo ji eha ɖegbɔ ɔ, wo yi do Olivuwo to ji. ³¹ Eyi Yesu nu nɔ wo mɔ: «Mi keŋkeŋ mi a gbe enu so ŋgbɔ le fiɛshi cɛ, do wo ŋwlii daɖɛ mɔ: "Na xo alɛn kplɔtɔ lɔ, yi alɛn ciwo yi le ekpu lɔ mɛ lɔ wo a kaka." ³² Vɔ nɔ ŋ va fɔn ci te le amɛ kukuwo mɛ godu ɔ, na je ŋkɔ nɔ mi le Galeliya.» ³⁴ Yi Piyɛ nu nii mɔ: «Nɔ amɛo pleŋ va gbe enu sowugbɔ can ɔ, nyɛ ɖa gbe enu sowugbɔ kpɔ o.» ³³ Eyi Yesu nu nii mɔ: «Le nyɔnɔnwi mɛ ɔ, le ezan cɛ mɛ ɖe, agbe enu so ŋgbɔ zetɔn gbɔxwe yi kloklo a ɖe atɔ.» ³⁵ Eyi Piyɛ nu nii mɔ: «Nɔ na ku koɖo wo can ɔ, ŋ ɖa gbe enu sowugbɔ gbeɖe o.» Eyi nukplavi kpɛtɛwo can nu enyɔ kuɖeka lɔ. ³⁶ Eyi Yesu koɖo yi nukplaviwo yido texwe ci yi woyɔ nɔ mɔ Gecemani. Enu nɔ wo mɔ: «Mi nɔ anyinɔnɔdo elɛ nɔ ma yi dogbeɖa le enɔ ɖaa a gbɔ.» ³⁷ Eyi ekplɔ Piyɛ koɖo Zebede eviɛ ŋsuvi amɛve lɔwo hɛn. Yesu ci ŋshishi koɖo aluwɛmɛ. ³⁸ Yesu nu nɔ wo mɔ: «Anyi se ɖɔ koɖo vevi sese kaka a sɔ yi do eku mɛ. Mi nɔ elɛ yi a nɔ zanŋte koɖo ŋ.» ³⁹ Ete yi hwɛɖeka, yi sɔ ŋmɛ cɔn ekɔ mɛ yi do egbeɖaɖa mɔ: «Edanyɛ, te kɔpu cɛ so ŋgbɔ ; vɔ ɖe nyi jiji kinyɛ yi a va mɛ o, vɔ, jiji tɔo.» ⁴⁰ E trɔ vayi nukplaviwo gbɔ, yi kpɔwo yi wo don alɔn. Eyi e nu nɔ Piyɛ mɔ: «Owoo ! Mi ɖa sɛnŋ nɔ zanŋte koɖo ŋ nɔ gaxoxo ɖeka o? ⁴¹ Mi nɔ zanŋte, yi a do egbeɖaɖa keŋ nɔ mi ŋ gbe vayi je tetekpɔ mɛ o. Gbɔngbɔn lɔ yɛ le gbesɔsɔ nyuiɖe, vɔ gbaza lɔ yɛ kpo.» ⁴² E gbe trɔ yi zeve tɔlɔ yi do egbeɖaɖa mɔ: «Edanyɛ, nɔ kɔpu cɛ ɖa sɛnŋ to ŋnu yi ŋda nwi ɔ, vɔ, avu dro le nyi wawa.» ⁴³ Egbe va kpɔ nukplavi lɔ wo, yi wo don alɔn; ɖo wowo ŋkuviwo ɖɔ koɖo enucikɔ. ⁴⁴ Eso le wogbɔ ke, yi te le wonu. Yi egbe do egbeɖaɖa zetɔn tɔlɔ yi gbe nu enyɔ kuɖeka ḷɔ ke. ⁴⁵ Yi Yesu trɔyi nukplavi lɔwo gbɔ, yi nu nɔ wo mɔ: «Alɔn yi mi dɔndɔn yi gbɔngbɔn a? Egalɔ xo yi wo asɔ Agbetɔvi lɔ a do alɔmɛ nɔ nuvɔnwatɔwo. ⁴⁶ Mi ci te nɔ mi a y. Mi kpɔ ɖa, mɛ ci yi jijiɔ asaŋ lɔ le gbe sɔsɔ.» ⁴⁷ Ga ci mɛ wo le nuxu xoɔ, Yuɖa ci yi nyi wowo amɛwive lɔ domɛtɔ ɖeka va. Amɛ sugbɔ ci wo so le avɔsalaagan xwemɛ koɖo amɛ shinshinwo va koɖi. Wo va koɖo ewiwo koɖo ekpowo. ⁴⁸ Amɛ ci yi jiji asa Yesu na jeshi donu ɖeka yi nu mɔ: «Amɛ ci yi naki eshi nɔ ɔ, eyi yɔ, mi li.» ⁴⁹ Kaka tlo lolo ɔ, ezɔn yi Yesu gbɔ yi nu mɔ: «Ŋdo egbe nɔ o Axwetɔ!» yi ekieshini. ⁵⁰ Yesu nu ni mɔ: «Exlɔ, wa ŋci gbe e to.» Eyi mɛ lɔwo je Yesu ji yi li. ⁵¹ Mɛ ciwo yi le koɖo Yesu domɛtɔ ɖeka ɖe ewi ti, yi xo avɔsala dowavi, yi so eto nii. ⁵² Yesu nu ni mɔ: «Sɔ ewi tɔo dado yi tɔxu, ɖo amɛ ciyi wu amɛ koɖo ewi ɔ, woa gbe wu yɛ can koɖo ewui. ⁵³ Ebuɔ do mɔ ŋɖa nu nɔ Eda nyɛ dru yi asɔ dɔla ahwakɔn wive ɖaɖa ŋ dru yɔ a? ⁵⁴ Vɔ nɔ ŋ wɛ ahan ɖe, enyɔ ciwo yi wo ŋwlɛ do Mawu nyɔ wemawo mɛ da jɔ o. Ɖo ɔ, wo ŋwlii do wo mɛ mɔ, ahan yi enu lɔwo a jɔ do nɛ.» ⁵⁵ Le yi godu ɔ, Yesu va biɔ ahwakɔn lɔ se mɔ: «Sɔ mi sɔ ekpo koɖo ewuiwo, yi va ŋ le gbe shigbe flafi nɔ gangan ɖe yi ŋ nyi nɛ a? Gashiagamɛ ɔ, ŋ nɔnɔ Mawu xwemɛ a kplakpla enu amɛwo; vɔ kpɔ miɖe le ŋ o. ⁵⁶ E cɛwo jɔjɔ nɔ enyɔ nuɖɛ ciwo yi Mawu ŋɛdotɔwo do yi wo ŋwlɛ do Mawunyɔ wemawo mɛ a kpɔmɔ yi avamɛ.» Eyi yi nukplaviwo gbiɖɛ yi shi le gbɔ. ⁵⁷ Mɛ ciwo yi le Yesu kplɔɛ yi Kayifu, avɔsatɔ gangantɔ gbɔ fini ci yi esedowatɔwo koɖo mɛganwo va bɔdo. ⁵⁸ Piyɛ nɔ azɔge nɔ Yesu kaka va yi kɔdo avɔsatɔ gangantɔ gbadenu. E nɔ anyinɔnɔ do gbadenu koɖo avɔsatɔ gangantɔ dɔkpɛgawo yi a kpɔ lehan yi enyɔ lɔ ava ci do. ⁵⁹ Avɔsatɔ gangantɔwo koɖo wowo bɔdonutɔwo pleŋ jijiɛ kunuɖeɖe ci ji wa zɔn yi a sɔ so eku hwɛ nɔ Yesu. Nɔ ebiɔ mɔ enyɔ yi wa kpa do ŋni can. ⁶⁰ Ci amɛ sugbɔ va kpakpa enyɔ do ŋnɔ Yesu can ɔ, kpɔ woɖe kpɔ eɖe le womɛ yi sɔ o. " ⁶¹ Le vɔvɔnu ɔ, ŋsu amɛve ɖekawo va va, yi nu mɔ: «Ŋsu cɛ nu mɔ "Na gban Mawuxwe lɔ, yi a trɔ a cui le ŋkeke amɛtɔn mɛ."» ⁶² Eyi avɔsatɔ gangantɔ ci te, yi biɔ Yesu se mɔ: «Na ɖo ehwɛ ci mɛ lɔwo dodoɔ nɔo nu ba?» Enyɔ hɛnɖe yi mɛ cɛ nunuɔ do eo nu ɔ ? ⁶³ Vɔ ɔ, Yesu bɔnu kplii. Eyi avɔsatɔ gangantɔ lɔ gbe nu ni mɔ : «Le Mawu agbeagbe lɔ nyikɔ mɛ ɔ, eo yi nyi Kliso Mawu, Eviɛ lɔ a?» ⁶⁴ Yesu ɖonu ni mɔ: «Eoŋtɔ yi nui. Vɔ ɔ, ŋ nunuɔ nɔ mi mɔ, sɔso egbɛ ji ɔ, mi a va kpɔ Agbetɔvi lɔ yi a nɔ anyinɔnɔ do ɖushimɛ nɔ ŋsɛnwopleŋtɔ, yi a va le jipo zowo mɛ.» ⁶⁵ Hwenɔnu yi avɔsatɔ gangantɔ lɔ drɛn awu le ekɔ yi mɔ: «E zu Mawu! Mi gbe ɖo wudo nɔ kunuɖeɖetɔ a? Mi se lehan yi e zu Mawu do ɖa. ⁶⁶ Le miwo kpɔɛ do ɔ?» Eyi wo ɖonu mɔ: "Eku yi je nii.» ⁶⁷ Y wo tɔ etan cucu do ŋmɛ nii, yi sɔ alɔ sɔtɔ huihui. ⁶⁸ Yi wo nunuɔ nii mɔ: «Nu enyɔnuɖɛwo nɔ mi, Kliso. Mɛ yi xo eo ɔ?» ^{69 70} Piyɛ le anyinɔnɔ le gbadenu le axwe lɔ mɛ gbɔxwe yi edɔwavi nyɔnu ɖeka tevagbɔ, yi nu nii mɔ: «Eo can zɔnnɔ koɖo Yesu, Galeliya kanmɛtɔ lɔ.» Vɔ ɔ, Piyɛ mɔ enyɔ lɔ le amɛshiamɛ ŋmɛ yi nu mɔ: «Ŋ de nya enyɔ ci yi enunuɔ o.» ⁷¹ Le yi godu ɔ, Piyɛ kpe agbomɔnu. Edɔwavi nyɔnu ɖeka gbe kpɔɛ, yi nɔ amɛ ciwo yi le enɔ mɔ: «Ŋsu cɛ zɔn nɔ koɖo Yesu Nazalɛtitɔ lɔ.» ⁷² Eyi Piyɛ gbe mɔ enyɔ lɔ ke, yi mɔ: «Ŋ ta Mawu mɔ ŋ de jeshi ŋsu hunnɔ ɖɛ o.» ⁷³ Eyi sabaaɖe ɔ, amɛ ciwo yi le enɔtɔxu lɔ wo, teva Piyɛ gbɔ yi nu nii mɔ: «Yesu nukplaviwo domɛto ɖeka yi enyi nyao. Lehanyi e dodoɔ egbe lɔ do, doasɛ fini ci yi e so.» ⁷⁴ Eyi Piyɛ do axwa yi mɔ: «Mawu le don eto nɔŋ, nɔ e nyi evi yi ŋ xoxoɔ. Ŋ ta Mawu nɔ mi mɔ, ŋ de jeshi ŋsu hunnɔ ɖɛ o.» Eyi zeɖeka tɔntɔn yi kloklo ɖe atɔ. ⁷⁵ Eyi Piyɛ ɖo eŋui enyɔ ci yi Yesu nu nii sasa ji mɔ: «Gbɔxwe kloklo aɖe atɔ zetɔn ɔ, agbe ŋ zetɔn.» Yi e to je gbadenu, yi tɔ avi fanfan koɖo ŋsɛn.