¹ Ci yi Yesu koɖo e yi nukplaviwo gbogbo sɔ Ʒeluzalɛmu yi doɖo ɔ Bɛtifaʒe lɔxuimɛ le olivuci kpo gbɔ ɖaa ɔ, Yesu dɔ edɔ e yi nukplavi amɛve ekawo mɔ. ² Mi yi kɔxwi ci yi le ŋkɔ nɔ mi hunnɔ mɛ: Mia kpɔ esɔkete ashitɔ ɖeka le eka mɛ yi eviɛ le axa nii. Mi cui yi a kplɔɛ vɛ nɔ ŋ. ³ Nɔ amɛɖe biɔ enyɔ ɖe mi se ɔ, mi a ɖonu nɔ amɛ lɔ mɔ: "Axwetɔ yi ɖo wudo e yi tɔ" Nɔ mino nɛnɛ vɔ wo a tashi nɔ mi zeɖeka.» ⁴ E yi ɔ, enyɔ ci Mawu nu dadɛ todo eŋɛdotɔ lɔ ji a jɔ. ⁵ « Mi nu nɔ siyɔn juɖan lɔ mɔ: kpɔ ɖa, eƒiɔ tɔwo gbɔgbɔ wu gbɔ, amɛxomɛvutɔ ɖeka yi e nyi, e zɔn esɔkete ashitɔ ɖeka ji esɔketa eviɛ ci yi hɛnnɔ agban ɖe ta ji yi gbɔgbɔ.» ⁶ Yesu nukplavi amɛve lɔ yi kɔxwi lɔ me yi vayiwa do enyɔ ci yi Yesunu nɔ wo lo ji. ⁷ Wo kplɔ esɔkete ashitɔ lɔ koɖo asɔkete vlu do woji yi Yesu nɔ anyinɔnɔ do ji. ⁸ Amɛ sugbɔ sɔ wowo vuvɔwuwo do do amɔ ji nii yi amɛ buwo sosoɔ aci lɔvi ji makpa le yi doɖo ɔ do emɔ lɔ ji. ⁹ Amɛ ciwo yi le ŋkɔ koɖo amɛ ciwo yi le godunɔ Yesu dodo ɔ axwa mɔ: « kanfukanfu nɔ Davidi eviɛ! Tɔhonɔ ɖe ci eshi nɔ amɛ ci yi gbɔgbɔ le e yi nyikomɛ. Kanfukanfu nɔ mavɔmavɔtɔ le jeŋkuimɛ boo!» ¹⁰ Ci yi Yesu vayi ɖo Ʒeluzalɛmu ɔ, ezin xo le jugan lɔ pleŋ mɛ. Amowo biɔbiɔ se so Yesu nu mɔ: « Mɛe yi nyi ŋsu hunnɔ?» ¹¹ Ahwa ci yi kplɔ Yesu do lo ɖoɖoɔ nu mɔ: Mawu ŋɛdotɔ Yesu, ci yi so Nazalɛti le Galile kan mɛ yɔ.» ¹² Yesu yi Mawuxwe lɔ mɛ yi nya enusatɔ ciwo yi le enɔtɔxu lɔ tii. E trɔ ekpɔnwo cɔn mlɔ anyi nɔ ehoɖoltowo yi gbe ƒli zekpinwo cɔn nɔ hwanlinsatɔwo hɛnnɛ. ¹³ E nu nɔ wo mɔ: « wo ŋwlii ɖɛ mɔ: " wo a yɔ anyi xwemɛ mɔ kuifantɔxu". vo o, miwo va so ƒlafinɔ ganganwo nɔxu!. ¹⁴ Ŋkuvitɔtɔnnɔ leoɖo ekplɛxotɔ ɖekawo gbosɔ Yesu le Mawuxwe lɔ mɛ yi ee da edɔ nɔ wo. ¹⁵ Ci avɔsatɔwo gawo koɖo esedɔwatɔwo kpɔ jeshidu ciwo yi e wawa koɖo ɖevi ciwo yi dodoɔ axwa le Mawuxwe lo mɛ mɔ: « kanfukanfu nɔ Davidi eviɛ! » e ve wo nvo. ¹⁶ Eyi wo biɔ Yesu se mɔ : Ese enyɔ ci nuɔ yi wo le a?» Yesu ɖonu nɔ wo mɔ: «ɛɛ, ŋ siisiɛ. Mi ɖe hlɛn enu ci yi wo ŋwlɛ do Mawu nyɔ wemawo mɛ mɔ: " E wɛɛ mɔ ɖevixwɛwo koɖo vefinwo kankanfu wu" ba?» ¹⁷ Le e yi goduɔ, Yesu so gbe wo ɖɛ yi vayi dɔn Betani kɔxwimɛ. ¹⁸ Eyi nyidin ci yi Yesu trɔgbɔgbɔ va Ʒeluzale,u jugan lɔ mɛ ɔ, shive ciciɛ. ¹⁹ E yi e kpɔ ƒigici ɖeka le emɔtu yi teyi gbɔ, vɔ, kpɔ ɖe kpɔ sɛnsɛn ɖe le ji go. Amawo ɖekɛ yi ekpɔ le ji. enu nɔ aci lɔ mɔ:« Ɖagbe sɛn kpɔ go! e yi zeɖeka vɔ aci lɔ xu sɔso eji kaka kɔdo ekewo ji. ²⁰ Ci yi nukplaviwo kpɔ enu ci yi jɔ ɔ, e jiŋ nɔ wo yi wo biɔ Yesu se mɔ: « le yi figici lɔ kpu xu do zeɖeka nɛnɛ?» ²¹ Yesu ɖonu nɔ wo mɔ: « Le nyonɔnui mɛ ɔ, ŋ nunuɔ nɔ mi mɔ nɔ mi xɔ Mawu ji se yi mi ɖe do ɖyika yi ɔ mi a sɛnŋ wa enu ci yi ŋ wa nɔ ƒigici lɔ. Hɛnnɛ can ɔ, mi a sɛnŋ nu nɔ eto ce mɔ: " Huna yi jo axu mɛ" yi a gbe va mɛ. ²² Enu ciwo kpu yi mia wa kuifan koɖo xɔse yi a biɔ Mawu ɔ, mi a xɔ wo.» ²³ Yesu yi Mawuxwe lɔ mɛ yi to enu kplakpla amowo yi avɔsatɔwo gawo kodo mɛgan ciwo yi le jukɔn lɔ mɛ tesɔe yi biɔɛ se mɔ: « Acɛ hinɖe yi e sɔ wawa enu cɛwo? Mɛye yi na acɛ lɔ wu?» ²⁴ Eyi Yesu nu nɔ wo mɔ: « Enyɛ can ma biɔ enyɔ ɖeka mi se. Nɔ mi ɖonu nɔ bɔ, ma nu fici yi ŋkpɔ acɛ le yi wawa enu cɛwo nɔ mi. ²⁵ Agbetɔwo nɛ, Mawu nɛ, mɛ ye yi dɔ ʒan Mawushile nɔamɛtɔ ɖaɖa?» Vɔ ɔ, wotɔ drɔɛdrɔɛ kpɔ le wowonɔnɔwo mɛ mɔ: « Nɔ mi nu yɛ mɔ Mawu yi dɔ ʒan ɖaɖa yɛ ɔ, a va biɔ mi se mɔ ŋɖetaɖo yi miwo ɖe xɔ ʒan nyɔwo ji se mɛɛ. ²⁶ Vɔ nɔ mi ɖonu nii mɔ agbetɔwo yɔɔ, miɖo a vɔn nɔ ahwakɔn lo. Ɖo ɔ, Amɛshamɛsɔ ʒan so ɖo Mawu ŋɛdotɔ ji» ²⁷ Ci yi e le nɛnɛ ɔ, wo ɖonu nɔ Yesu mɔ: « Mi jeshi amɛ ci yi dɔ ʒan ɖaɖa go.» Eyi Yesu nu mɔ: « Enyɛ enu hunnɔwo nɔ mi do.» ²⁸ Yesu nu mɔ: « Mi ɖo oto yi a se enyo cɛ yi a nu do nu. Ŋsu ɖeka wa evi ŋsovi amɛve ɖɛ. Gbeɖeka ɔ, e nu nɔ ɖevi xoxuto: "evinyɛ, egbɛɔ, vayi wa edɔ le vɛncikan mɛ.» ²⁹ Ɖevi lɔ ɖonu nii mɔ: é oo, na yi go". Vɔ sabaaɖe ɔ, susu bu va nɔ ɖeviɛ yi e yi vɛncikanmɛ lɔ mɛ. ³⁰ Ŋsu lo gbe dɔ lo ke ɖevi amɛvetɔ lɔ, yi yɛ ɖonu nii mɔ: " E nyɔ mɛgano Na yi." Ganŋkegan kpɔ ɖe yi go. ³¹ Le ɖevi amɛve lɔwo mɛ ɖee, hinɖe yiwa do edalɔ dro ji?» Eyi wo ɖonu nii mo: « Ɖevi ŋkɔtɔ yi n'a do edalɔ dro ji.» Hwenɔnu yi Yesu va nu nɔ wo. Le mɔ : « le nyɔnɔ nui mɛ ɔ, ŋ nunu ɔ nɔ mi mɔ tagajɔtɔwo kpɖo asuwatɔwo a ɖo Mawu fioɖuxu lo mɛ doŋkɔ nɔ mi. ³² Ɖo ɔ, ʒan Mawushilenɔamɛtɔ va mi gbɔ yi va kpla enu mi sɔso Mawu drowawa nu. Kpɔ mi ɖe xɔɛ ji se. Vɔ ɔ, taga jɔtɔwo koɖo asuwatɔwo xɔ e yi nyɔ lo ji se. Mi kpɔ enu hunno tɔxu ganŋ kegan kpo susu ɖe kpɔɛ nɔ mi yi mi a xɔɛ ji se go.» ³³ « Mi ɖo eto yi a se labalu bu. Agbleto ɖeka li yi ɖo vɛncikan ɖeka yi cu ekpa trɔdyi. E ku venƒiɔnnu du gangan ɖeka do ekpe ɖeka do ebo lɔ mɛ . Ci yi e wa enu lowo nɛnɛ ɖegbɔ ɔ, e sɔ vencikan lɔ sɔ hhaya no vɛngblededematɔwo ti so. ³⁴ Ci yi jinukucancan gamɛ va ɖo ɔ, ebotɔ lɔ dɔ e yi dɔwavi ɖekawo ɖaɖa vengblematɔ lɔwo gbɔ nɔ wo a vayi xɔ jinuku ci yi wo nii gbɛ. ³⁵ Vɔ ɔ, vɛngbledemato lɔwo le edɔwavi lɔwo yi xo ɖeka le wo mɛ yi wu evetɔ lɔ yi dɔdɔ ekpe amɛtɔntɔ lɔ kaka yɛ ku. ³⁶ Ganɔmɛ ɔ, ebotɔ lɔ gbe dɔ edɔwavi buwo ɖaɖa e yi vɛngbledematɔ lɔ wo gbɔ. Edɔwavi lɔ wowo su egbɔ sɔwu ŋkɔtɔwo. Vɔ ɔ, vɛngblematɔ lɔwo gbe wa enu ci yi han yi wo wa koɖo amɛ ŋkɔtɔwo koɖo wo hɛnnɛ. ³⁷ le hunno godoɔ ebotɔ va dɔ yiŋtɔ vi ɖaɖa wo gbɔ yi bubuɔ do mɔ nɔ wo kpɔ yeviwo ɔ, Vɛngbledematɔ lɔ wo a do bubu yi nu sa. ³⁸ Vɔ ɔ, ci yi vɛngblematɔ lɔwo kpɔɛ ɔ, wo nu nɔ wowonɔnɔwo mɔ: " amɛ ci yi a va ɖu cinɔ nɔ agble lo esɔgodumɛ ke. Mi na nɔ mia wui nɔ agble lɔ a trɔ miwotɔ". ³⁹ Eyi wo lii yi sɔ danŋkpe to do vɛncikan lo kpa tamɛ yi wui» ⁴⁰ Eyi Yesu va biɔ se mɔ: « Nɔ vɛncikan to lɔ va va ɖee, ŋɖe yi a wa koɖo vɛngbledomatɔ lɔ lowo?» ⁴¹ Wo ɖonu nii mɔ: « Nɔ e va ɔ, a wu vɛngbledematɔ waŋshi hunnɔ wo yi a sɔ e yi vencikan lɔ sɔ jonɔ amɛ buwo ciwo yi a sɔnɔ jinuku ci yi wo ma nii vɛnɔ ni do gamɛji.» ⁴² Le e yi godu ɔ, Yesu biɔ wo se mɔ: « Mi ɖe hlɛn enu ci yi wo ŋwlɛ do Mawu nyɔ wemavo mɛ kpɔ ba? " Ekpe ci yi exɔcutɔwo gbe ɔ, e yi atrɔ ehovevi kpe le exɔ lo cucu mɛ. Tɔhonɔ lɔ yi wɛɛ nɛnɛ. Enujiŋ e nyi nɔ miwo agbetɔwo! » ⁴³ Yesu va nu doji nɔ wo mɔ: « E yi nataɖo yi nunuɔ nɔ mi mɔ Mawu a ɖe mi tii lr e yi ƒiɔɖuxu lɔ mɛ yi a sɔ jo nɔ akɔta ci yi a sɛn eku. ⁴⁴ Amɛɖekpokpui ci yi a je ekpe ce ji a kaka yi amɛ ci yi ji ekpe cɛ a je a cuku.» ⁴⁵ Avɔsatɔwo gawo koɖo Falisitɔwo se labalu ciwo yi Yesu dod ɔ yi mɔŋje mɛ mɔ yowo nu yi wo xoxo ɔ nuxu so. ⁴⁶ Eyi wo tɔ ƒinge yi wo a to yi a lii jiji. Vɔ o, wo vɔnvɔn nɔ ahwakɔn lɔwo. Ɖo ɔ, ahwakɔn lɔwa so Yesu shigbɔ Mawu ŋɛdotɔ nɛnɛ.