¹ Ci yi Yesu nu enyɔ hunnɔwo ɖegbɔɔ, e so le Galile kan lo mɛ yi yi Ʒude kan mɛ le ago ɖyitɔ ji nɔ Ʒuludɛn tosasa lɔ. ² Amowo lɔ Ahwa yi kpluɛ do yi e da edɔ no wowo mɛ ciwo yi le edɔ wo. ³ Eyi Falisitɔ ɖekawo gbosuɛ yi a dui kpɔ. Wo biɛ se mɔ: «Vɔ ɖee ese na emɔ ŋsu mɔ yi ɖe nya ashiɛ do enyɔ kpoŋ de ji a ? » ⁴ Eyi Yesu donu nɔ wo mɔ: « Mi ɖe hlɛn enyɔ ci yi le Mawu nyɔ wemawo mɛ kpɔ ba? "sɔso gonmɛjejemɛ ɔ, xexeɖotɔ lɔ wa ŋsu koɖo nyɔnu". ⁵ Eyi na taɖo yi ŋsu a so gbe adalɔ koɖo enɔlɔ ɖɛ yi a vayi wa ɖeka koɖo ashiɛ yi wowo amɛve lɔwo atrɔ kuɖeka. ⁶ E nɔ ɔ, wo ɖe gbe nyi amɛ amɛve, vɔɔ, kuɖeka yi wo va trɔ. Enu ci yi Mawu ca ɔ, agbetɔ ŋgbe mii mɛ go.» ⁷ Eyi Falisitɔwo bie se mɔ : « ŋɖe yi dɔ taɖo yi Mɔyizi na egbe mɔ nɔ wo dro ɔ, wo a ŋwle nyɔnugbegbewema doashi nɔ amɛshi mɔ wo gbii yi a nyi?» ⁸ Yesu ɖonu nɔ wo mɔ: « Eto yi tri nɔ mi tado yi Mɔyizi na egbe hunnɔ mɔ miwo ɖe gbe miwo shiwo. Vɔ ɔ, ɖe nyi nɛne so gɔnmɛjeje go. ⁹ Vɔ ŋ nunuɔ nɔ mi mɔ: nɔ amɛɖe gbe ashie yi ɖe nyi aƒɔ yi e do egbe ɔ, nɔ ŋsu lɔ vayi ɖe nyɔnu bu ɔ ɔ, e xɔ amɛ bu shi» ¹⁰ Eyi Yesu nukplaviwo nu nii mɔ: « No ɖeɖe nyɔ nɛ ɔ, nɔ wo mi nyɔnuɖeɖe han ɔ, a nyɔ sɔwu mɔ wo ɖe.» ¹¹ Yesu ɖonu nɔ wo mɔ: « amowo pleŋ ɖ'a sɛnŋ xɔ egbe do enukpamɛnyɔ hunnɔ ji go. Vɔ ɔ, amɛ ciwo yi Mawu na acɛ hunnɔ ɖekɛ yi a sɛnŋ xɔ egbe do ji. ¹² Ŋsu ɖewo li yi wowo ɖ'a sɛnŋ ɖe nyɔnu; yi e nyi ji woé ji wowo nɛnɛ. Ebuwo li yi e nyi amowo yi ta wowo taɖo yi wowo ɖ'a sɛnŋ ɖe nyɔnu go. Ebywo can gbe li yi xa do jeŋkuimɛ ƒiɔɖuxu lɔ nyɔnu yi gbe nyɔnuɖeɖe. nɔ amɛɖe a sɛnŋ se ɖe sii!» ¹³ Ci yi Yesu nu enyɔ hunnɔ ɖegbɔ ɔ, amowo kplɔ ɖeviɖekawo va Yesu gbɔ mɔ nɔ yin a sɔ alɔ dado wo ji keŋ a cu eshi nɔ wo. Vɔɔ, e yi nukplaviwo gbe nɔ amɛ lɔwo. ¹⁴ Eyi Yesu nu nɔ wo mɔ: « Mi tashi ɖevi lɔwo nɔ wo a vaŋ gbɔ. Mi ŋgbe xe emɔ nɔ wo go. Ɖo ɔ, jeŋlcuimɛ shigbe ɖeviwo nɛnɛ .» ¹⁵ Ci yi Yesu nu nɛnɛ ɔ, e sɔ alɔ dado wo ji so le enɔtɔxu. ¹⁶ Ŋsu ɖeka teva Yesu gbɔ yi biɛ se mɔ : « cicagan, enunyui hɛnɖe yi na wa nɔ Mawu a na agbemavɔ ŋ ?» ¹⁷ Eyi Yesu ɖonu mɔ: « ŋɖe yi na taɖo yi e biɔbiɔ enyɔ ŋ se sɔso enu ci nyi enunyui nu? Mawu ɖeke yi nyi amɛnyui. Nɔ e ji mɔ Mawu a na agbemavɔ eye ɔ, na wa do Mawu sewo ji. Ŋsu lo biɔ Yesu se mɔ : « Ese hinɖewo yi nyi Mawu se lɔwo?» ¹⁸ Yesu ɖonu nii mɔ; « E nya mɔ Mawu do ese mɔ ŋgbe wu amɛ, ŋgbe dɔn mɛbu shi gbɔ, ŋgbe ƒin eƒin, ŋgbe xo evi donu nɔ amɛ! ¹⁹ Bu edawo koɖo enɔwo, lɔn nɔvio shigbe wɔŋtɔ nɛnɛ.» ²⁰ Ɖajɛvi lɔ biɔ nɔ Yesu mɔ : « ŋ wa do ese hunnɔwo ji vɔ. Ŋɖe gbe kpɔtɔ yi na wa? » ²¹ Yesu nu nii mɔ : « Nɔ e ji mɔ ye a nyi amɛ ci nu wo ɖ'a kpɔ eɖyi ɖe le ɔ, yi a yi sa awu dɔkunuwo yi a sɔ eho a ma nɔ wamɛnɔwo. Hwenɔnu ɔ, dɔkunuwo a le jeŋkuimɛ nɔwo. Nɔ e wɛɛ nɛnɛ ɖegbɔ ɔ, na so kplɔ ŋdo.» ²² Vɔ ci yin ɖajɛvi lɔ se enyɔ hunnɔ ɔ, e so yi ɖedole ŋshishimɛ. Ɖ o e wa dɔkunuwo ɖɛ sugbɔ. ²³ Hwenɔnuɔ, yesu va nu nɔ e yi nukplaviwo mɔ: « le nnyɔnɔnyui mɛ ɔ, ŋ nunu ɔ nɔ mi mɔ yi a sɛnŋ nɔ hotɔnɔ mɔ yi a yi jeŋkuimɛ ƒiɔɖuxu lɔ mɛ. ²⁴ Ŋgbe nunuɔ nɔ mi hɛnnɛ mɔ nɔ esɔkpotɔnɔ a todo tɔnni tu mɛɔ, a bɔbɔ nii sɔwumɔ nɔ chotɔnɔ a yi Mawu ƒiɔɖuxu lɔ mɛ.» ²⁵ Ci yi enukplaviwo se enyɔ hunnɔwo ɔ, e jiŋ nɔ wo sugbɔ yi wo biɔbiɔ se le wowoɖekiwo mɛ mɔ: « Ci yi e le nɛnɛ ɖee, mɛ e yi a sɛnŋ yi a kpɔ hwlɛngan? » ²⁶ Eyi Yesu kpɔ wo juun yi nu nɔ wo mɔ: « A glo agbetɔ wo, vɔ kpɔ ɖ'a glo Mawu go.» ²⁷ Piyɛ nu nɔ Yesu mɔ: « Miwo ke tashi enuwo pleŋ yi do nɔ miwo? ²⁸ E yi Yesu nu mɔ: « Le nyɔnɔnui mɛ ɔ, ŋ nunuɔ nɔ mi mɔ hwenu yi Agbetɔvi lɔ va nɔ anyinɔnɔ do e yi ƒiɔɖuxu klɛnklɛn lɔ ji, le xexe yoyu lo mɛ ɔ, miwo can a nɔ anyinɔnɔ do efiɔzekpin wive ji yi a ɖo kojo koɖo Israyɛli Kɔta wive lowo. ²⁹ Eyi amɛ ci yi a sogbe axwewo, ƒoƒowo, nɔviwo, enɔ , eda eviwo koɖo nyigbanwo ɖɛ do eta kinnyɛ mɛ ɔ, Mawu a na enu lɔ wo hanwo texwe eka howi(60) yiwo a gbe na agbemavɔ wo. ³⁰ Vɔ ɔ, amɛ sugbɔtɔ le amɛ ciwo yi nyi ŋkɔtɔwo egbɛ cɛ mɛ yi a trɔ godutɔwo. Nɛnɛke ɔ, amɛ ciwo yi nyi godutɔwo le egbɛ mɛ yɛ ɔ, sugbɔtɔ le wo mɛ yi a va trɔ ŋkɔtɔwo.»