¹ Le gaxoxo hun nɔ ji ɔ, nukplaviwo va Yesu gbɔ, yi mɔ : «Mɛ yi nyi mɛganxu le jipo fiɔɖuxu lɔ mɛ ɔ ?» ² Yesu yɔ ɖevixwɛ ɖeka va wowo dodomɛ, ³ yi nu nɔ wo mɔ : «Le nyɔnɔnui mɛ ɔ, ŋ nu nuɔ nɔ mi mɔ nɔ mi ɖe trɔ miwoɖekiwo yi ji yi va le shigbe ɖevixwewo nɛ ɔ, mi ɖa yi jipo fiɔɖuxu lɔ mɛ o.» ⁴ E yi na taɖo ɔ, amɛ ciyi nyi mɛganxu le jipo fiɔɖuxu lɔ mɛ yi nyi amɛ ciyi sɔ yiɖeki hwenɔ yi va nɔnɔ shigbe ɖevixwɛ cɛ hanwo nɛ. ⁵ Nɔ amɛɖe kpɔ do ŋ nu yi xɔ ɖevi cɛwo domɛtɔ ɖeka ɔ, enyɛŋtɔ yi e xɔ. ⁶ Mɛci yi agbe enu so ɖevi cɛwo gbɔ ɔ, ewa nuvwin. Anyɔ niwu mɔ wa sɔ ekpe do eka ekɔ ni, yi a sɔ dɔ do axu gɔnmɛ. ⁷ Babɛ nɔ xexe lɔ nɔ gaxoxo sɛnsɛnŋ ci wo yi gbɔgbɔ ! Ɖo ehian mɔ enyɔ cɛwo ɖo avamɛ, vɔ, babɛ nɔ amɛ ci ji a to ava. ⁸ Nɔ alɔ alo afɔ tɔwo anyi afɔklɛnnu nɔwo ɔ, swi asɔ dan ŋkpe do azɔgé nɔ ɔ ɖeki. A nyɔ nɔ eo mɔ a yi jipo fiɔɖuxu lɔ mɛ koɖo alɔ ɖeka alo afɔ ɖeka sɔwu mɔ alɔ amɛve alo afɔ amɛve ale eo shi yi wa sɔ eo dɔŋkpe do ezomavɔ mɛ. ⁹ E yi nɔ ao ŋkuvi nyi afɔklɛnnu nɔ eo ɔ, ɖii yi a sɔɛ dɔŋkpe do azɔgé. A nyɔ nɔ eo mɔ a yi jipo fiɔɖuxu lɔ mɛ koɖo ŋkuvi ɖeka sɔwu mɔ ci ŋkuvi amɛve a le eo shi yi wa sɔ eo dɔŋkpe do ezomavɔ mɛ. ¹⁰ Mikpɔ nyuiɖe nɔ mi ŋgbe wa enuɖe koɖo ɖevi cɛwo domɛtɔ ɖe o. Ŋ tɛ tɛ egbe do ji nɔ mi mɔ, dɔlawo kpɔ kpɔ Edanyɛ hweshahwenu le jipo. ¹¹ Ɖo Agbetɔvi lɔ va a va hwlɛn amɛ ciwo yi bu wo gan. ¹² Le mi kpɔ enyɔ cɛ do ɔ ? Nɔ mɛɖe wa lɛngbɔ ekave howi ɖɛ, yi ɖeka bu nii le mɛ. Ɖa tashi kpɛtɛwo do ekpo ɖeka ji, yi a yi ji ci yi bu lɔ kpɔ ba ? ¹³ Le nyɔnɔnui mɛ ɔ, na nu nɔ mi mɔ nɔ é sɛnŋ vayi kpɔ kuɖeka ci yi bu lɔ ɔ, a do jijɔ yi sɔwu ekave howo hoashiɖekɛ ciwo yi de bu lɔ o. ¹⁴ Nɛnɛke yi miwo Da ci yi le jipo de lɔnnɔ mɔ amɛ kuɖeka le bu le ɖevixwɛ cɛwo mɛ nɛ. ¹⁵ Yesu nu mɔ nɔ nɔvio wu ehwɛ do eo ɔ, va yi kpɔɛ eo ɖekɛ yi a dré ehwɛ lɔ mɛ nii. Nɔ e sii ɔ, a nyi e xɔɛ gan. ¹⁶ Vɔ nɔ ɖe sii ɔ, kplɔ amɛɖeka alo amɛ amɛve bɔdo eoɖekinu nɔ mi a xo enyɔ lɔ le kunuɖetɔ amɛve alo amɛtɔn ŋmɛ shigbe lehan yi wo ŋwlii do Mawunyɔ wemawo mɛ daɖɛ do nɛ. ¹⁷ Vɔ nɔ ɖe sii nɔ amɛ lɔwo ɔ, nui nɔ Mawu ha lɔ. Nɔ ɖe sii nɔ Mawu ha lɔ ɔ, mi a sɔɛ shigbe maxɔsetɔ alo tagajɔtɔ nɛ. ¹⁸ Le nyɔnɔnui mɛ ɔ, ŋ nunuɔ nɔ mi : «Ŋde kpokpui ci mi a bla le nyigban ɔ, a le blabla le jipo; eyi ŋ ciwo mi a cu le nyigban ɔ, a le cucu le jipo. ¹⁹ Yi ŋ yiɔ ji yi nunuɔ mɔ, nɔ amɛ amɛve xɔ egbe do ŋɖe ji le nyigban ji, yi bɔ yi biɔɛ ɔ, Edanyɛ ci yi le jipo a sɔɛ na wo. ²⁰ Ɖo fini ci yi amɛ amɛve alo amɛ amɛtɔn bɔdo le anyi nyikɔ mɛ ɔ, ŋ le wowo domɛ.» ^{21 22} Eyi Piyɛ gogo Yesu yi biɔɛ se mɔ : «Axwetɔ, ze nɛni yi nɔvinyɛ a wu ehwɛ do ŋ, yi na sɔ kii ɔ ? Zeadrɛ yɔ a ?» Yesu ɖonu nii mɔ : «Oo, ŋ de nu nɔ mi zeadrɛ o. Vɔ ɔ, ze eka howi howo texwe amadrɛ. ²³ E yi na taɖo yi wa sɛnŋ dré jipo fiɔduxu lɔ do enyɔ cɛ nu mɔ : efiɔ ɖeka ji gbeɖeka mɔ ye dɔwaviwo a va jo kɔnŋta nɔ eye. ²⁴ Ci yi e tɔ ji ɔ, wo kplɔ edɔwavi ɖeka va nii yi yɛ ɖu shikaho linlɔn ɖeka di. ²⁵ Ci yi dɔwavilɔ ɖe sɛnŋ cu efɛn lɔ nii ɔ, yi ga wo ɖe le yi ŋtɔ, ashiɛ, eviɛwo koɖo nuciwo pu ewa ɖɛ, yi a sawo a cu efɛn kinyɛ nɔ ŋ. ²⁶ Eyi edɔwavi lɔ je klo ji nii, yi nu mɔ "Anyi ga, mi xɔ gbɔngbɔn nɔ ma cu efɛn lɔ nɔ mi pleŋ." ²⁷ Ci ewa ŋshishi nɔ ega lɔ ɔ, e tashi yi sɔ eho lɔ sɔki. ²⁸ Ciyi dɔwavi cɛ ɖedo ɔ, eva yi kpɔ yi kpena dɔwavi bu ci yi ɖu eho kotokun kave howi di. Elé awu do ekɔ mɛ nii yi mɔ cu efɛn ki nyɛ nɔ ŋ. ²⁹ Eyi kpena je klo ji yi nun nii mɔ "Ŋde kuku, xɔ gbɔngbɔn nɔ ma cu efɛn lɔ nɔ o". ³⁰ Vɔ dowavi cɛ gbe, yi li do gakpamɛ kaka sɔ na hwe ci nu e cu eho lɔ nii. ³¹ Ci eyi kpenawo kpɔ enyɔ cɛ ɔ, eve wonu, yi wo shin xomɛ yi sɔ enyɔ lɔ yi to nɔ wowo ga. ^{32 33} Ega lɔ yɔ dowavi lɔ, yi nu nii mɔ : "E wɔ, dowavi vwin, ŋ sɔ eho blebu cɛ sɔ ke eo, ɖo eɖe kuku nɔŋ. Wɔ ɖa sɛnŋ ku ŋshishi nɔ a wu kpena shigbe le nyɛ ŋ kpɔ ŋshishi nɔ wo do o ?" ³⁴ Ega lɔ shin xomɛ, yi li do gakpamɛ kaka sɔ na hwecinu yi e cu eho lɔ. ³⁵ Ahan yi Eda nyɛ a wa koɖo mi, nɔ mi ɖe sɔ ehwɛ ke nɔ miwo nɔviwo koɖo eji nɛ.