¹ Yi Falisitɔ ɖewo koɖo Sikribuwo sole Ʒeluzalɛmu yi va Yesu gbɔ yi biɔɛ se mɔ : ² «Ŋde taɖo yi ao nukplaviwo le enu ɖuɔ koɖo alɔ xodyixodyiwo, yi dada le tɔgbiwo kɔnuwo ji ɔ ?» ³ Eyi Yesu ɖonu nɔ wo mɔ : «Ŋde taɖo yi miwo wawa do togbiwo kɔnuwo ji, yi dada le Mawu gbeɖeɖewo ji ɔ ? ⁴ Ɖo Mawu nu mɔ : "Bu edao koɖo enɔo." Mawu gbe nu mɔ : "Nɔ amɛɖe nu enyɔ dɔndɔn ɖe so edalɔ koɖo enɔlɔ nu ɔ, mɛ lɔ a ku." ⁵ Vɔ ɔ, miwo kplakpla enu amɛwo mɔ amɛɖe hɛn ɔ, yi a nu nu nɔ edalɔ alo enɔlɔ a mɔ : "Ŋ ci ŋ ɖo a sɔ kpe do mi nu sa ɔ, ŋ jia gbi ɖɛ yi a sɔ savɔ nɔ Mawu." ⁶ Mɛ cɛ ɖe gbe ɖo ŋde yi awa nɔ edalɔ alo enɔlɔ dandanmɛ o. Nɛnɛ ɔ, mi xado miwo tɔgbiwo kɔnuwo nu yi cucuɔ Mawu sewo.» ⁷ «Ayemɛnuwatɔwo ! Enyɔ jɔ yi Mawu nu toto yi ŋɛdotɔ Ezayi ji soso mi nu gaci mɛ yi enu da ɖɛ mɔ : ⁸ "Jukɔn cɛ dodoɔ bubu ŋ nu le aɖe mɛ ɖekɛ, yi xomɛ nyi ebu nii. ⁹ Gbali yi mɛ cɛwo sɛnsɛnɔŋ. Ɖo enu ciwo yi wo kplakpla amɛwo nyi agbetɔ sewo ɖeɖe."» ¹⁰ Yesu va yɔ jukɔn lɔ yi nu nii mɔ : «Mi se yi a moŋjemɛ. ¹¹ Dé nyi enu ci yi ɖonɔ aglanmɛ yi sɔ amɛ xonɔ edyi o. Vɔ ɔ, nuxu ciyi tonɔ le aglanmɛ nɔ amɛ yi sɔnɔ amɛ xonɔ edyi.» ¹² Nukplavi Yesu tɔwo va yi gbɔ yi nu ni mɔ : «E nya mɔ awu nuxuwo caka Falizitɔwo a ?» ¹³ Yesu ɖonu nɔ wo mɔ : «Aci ɖekpokpwi ciyi edanyɛ ɖe doɔ, a hwin koɖo eke. ¹⁴ Mi ŋugbe ɖo etowo. ŋukuvi tɔntɔnnɔ onyi ; ŋɔ ŋukuvi tɔntɔnnɔ kplɔ yikpena ɔ, okoɖo 've aje edumɛ.» ¹⁵ Piyɛ ɖoŋci nɔ Yesu mɔ, ɖe élo cɛ gɔmɛ nɔmi. ¹⁶ Yesu gbetrɔ yi xɔ nuxu mɔ : «emiwo can ɖe mɔŋjemɛ o ? ¹⁷ Miɖe kpɔmɔ enu ciyi yi numɛ ɖe, a todo dɔviwomɛ ; yi avayi dadu mɛ ba ?» ¹⁸ Vɔ nyɔ ciwo tonɔ so numɛ ɔ, wo sonɔ ejimɛ. Enu ciwo yi xonɔ eɖi agbetɔ nɛ. ¹⁹ Ɖo soso jimɛ yi susu vɔnwo vanɔ le : amɛwuwuwo, asuwawawo, etrɛnmamawo, efififiwo, kunuɖeɖe agɔwo koɖo amɛzuzu. ²⁰ Wowo yi nyi ŋci yi xonɔ ɖi agbetɔ ; vɔ enu ɖu alɔ maklɔ ɖe xonɔ eɖi amɛ o. ²¹ Eyi Yesu sole enɔ yi vayi do Tyr koɖo Sidɔn. ²² Nyɔnu ɖeka so kanaan yi le eju lɔ mɛ, va Yesu gbɔ yi tɔ axwa dodo mɔ : «Axwetɔ, Davidivi, ku ŋshishi nɔŋ; gbɔngbɔn vɔn ɖeka dodoɔ aya nɔ anyivi nyɔnuvi.» ²³ Vɔ kpɔ Yesu ɖe ɖoŋci ni o. Eyi nukplaviwo ɖe kuku ni mɔ : «Nyi, ɖo edodoɔ axwa kplɔ mi do.» ²⁴ Yesu ɖonu mɔ : «Ŋva nɔ lingbɔvi ciwo yi bu le Izreyɛli jumɛ.» ²⁵ Nyɔnu lɔ je kloji do akɔn mɛ ni yi mɔ : «Axwetɔ, kpedo ŋnu.» ²⁶ Yesu nu donu ni mɔ : «Ɖe nyɔ mɔ, wa sɔ ɖeviwo ŋɖuɖu sɔ jɔnɔ avuwo o.» ²⁷ Nyɔnu lɔ nu mɔ : «Ɛ, Axwetɔ, avuwo ɖu nɔ ciwo yi hlɛn do ekplɔn gɔnmɛ nɔ wowo xwetɔ.» ²⁸ Yesu ɖonu mɔ : «Nyɔnu, awu xɔse gangan. Ɖe vamɛ nɔwu shigbe le e ji do nɛ.» Eyi eviɛ nyɔnuvi lɔ kpɔ edɔ yɔyɔle gaxoxo lɔ ji. ²⁹ Yesu sole enɔ lɔ, yi yi do Galeliya tɔ tu, yi la ekpò ɖeka ji, yi nɔ anyinɔnɔ. ³⁰ Jukɔn lɔ va gbɔ koɖo ekplɛxotɔwo, ŋkuvitɔntɔnnɔwo, nuxumaxotɔnɔwo koɖo kplibɔtɔnɔwo koɖo dɔnɔ sugbɔ. Wo hɛnwo va Yesu gbɔ yi eyɔ edɔ nɔwo. ³¹ Ci yi amɛwo kpɔ yi aɖekukutɔnɔwo tɔ nuxu xoxo, ekplɛxotɔwo tɔ zɔnlin zɔnzɔn nyuiɖe, afomalinɔwo tɔ zɔnlin zɔnzɔn yi ŋkuvitɔntɔnnɔwo tɔ enu kpɔkpɔ ɔ, e ji eŋ nɔ wo, yi wo tɔ Israyɛli Mawu kanfukanfu. ³² Yesu yɔ yi nukplaviwo, yi nu nɔ wo mɔ : «Mɛcɛwo nu ku lanmɛ nɔ ŋ ɖo wo kpɔtɔ le ŋgbɔ vɔ woɖe ɖu ŋde o. Kpɔ ŋ de ji mɔ na nya wo shive shive, keŋ nɔ enu ŋgbe va yi talɔwo le mɔji o.» ³³ Nukplaviwo mɔ : «Fi mia sɛŋ kpɔ ŋɖuɖu le elɛ a na jukɔn gangan cɛ ?» ³⁴ Yesu nu nɔ wo mɔ : «Kpɔnnɔ nɛni yi le mi shi ɔ ?» Wo ɖonu nii mɔ : «Kpɔnnɔ amadrɛ koɖo kpavi hwɛhwɛ ɖekawo yi le mi shi.» ³⁵ Eyi Yesu nu nɔ amɛ lɔwo mɔ wo le nɔ anyinɔnɔn do nyigban. ³⁶ Yi e sɔ kpɔnnɔ amadrɛ lɔwo koɖo kpavi lɔwo yi do akpe nɔ Mawu, yi ŋɛ wo mɛ yi sɔwo na yi nukplaviwo yi wo ma wo nɔ amɛ lɔwo. ³⁷ Amɛshiamɛ ɖunu yi xodu ɖɔ wo kaka e kpɔtɔ. Ciyi nukplaviwo lɔɛ ɔ, e sun kishi amadrɛ. ³⁸ Amɛ kotokun amɛnɛ yi ɖu enu lɔ, nyɔnu koɖo ɖeviwo manɔmɛ. ³⁹ Le yi godu ɔ, Yesu ɖe emɔ nɔ ahwakɔn lɔ mɔ wo le yi axwe, yi ɖo etɔjihungangan mɛ yi yi Magadan kan mɛ.