¹ Hwehunnɔwonu le gbɔngbɔngbe ɔ, Yesu to bomɛ ɖeka ciwo ji yi wo kan eliku do yi vayikɔ. Shive cici ɔ yi nukplaviwo, yi wo tɔ jinuku lɔ sɔsɔ ɖu. ² Ci yi Falisitɔwo kpɔ wo ɔ, wo nu nɔ Yesu mɔ : "Kpɔ enu ci yi awu nukplaviwo wawa ɖa ; Wo wawa enu ci yi miwo sé de ɖe emɔ nɔ mɔ wo a wa gbɔngbɔngbe o !" ³ Eyi Yesu biɔ wo se mɔ : "Mi de hlɛn enu ci yi Davidi wa kpɔ ba ? Gbeɖeka, ci yi shive ci ci ɔ yiŋtɔ koɖo amɛ ciwo yi kplɔɛni do ɔ, ⁴ é ɖó Mawuxwe lɔ mɛ, yi koɖo yi mɛ lɔwo ɖu kpɔnnɔ ciwo yi wo sɔ sa avɔ nɔ Mawu. Vɔ kpɔ ese ɖe deɖe emɔ nɔ wo mɔ wo lé ɖu nɛnɛ nu o. Avɔsatɔwo ɖekɛ yi miwo se lɔ ɖe emɔ hunnɔ nɔ. ⁵ Alo mi de hlɛn le ese ci yi Mawu sɔ tode Moyizi ji mɔ avɔsatɔ ciwo yi le edɔ mɛ le Mawuxwe mɛ gbɔngbɔngbe a da le gbɔngbɔngbe sewo ji gankegan yi wo da do ehwɛ ɖe wo o ba ? ⁶ Ŋnu nu ɔ nɔ mi mɔ enu le fini ci yi mi le cɛ yi wugan Mawuxwe lɔ. ⁷ Wo ŋwlii ɖɛ mɔ : "ŋshishikuku nɔ amɛ ji ɔ yi ŋ lé. Ŋde ji ji ɔ avɔsa o". Nɔ mi se enyɔ cɛwo gɔnmɛ nyuiɖe ɔ, mi da dodo ɔ ehwɛ nɔ xomɛvunɔwo o. ⁸ Ɖo ɔ, agbetɔvi lɔ nyi etɔ nɔ gbɔngbɔngbe lɔ. ⁹ Ci yi Yesu so le enɔ ɔ, é yi le wowo Mawusɛnxu ɖeka mɛ. ¹⁰ Amɛ ɖeka ci yi alɔ ɖeka kú nɔ, le enɔ. Falisitɔwo ji jiɔ ado ehwɛ nɔ Yesu. E yi na taɖo yi wo biɔɛ se mɔ : "Mìwo sé ɖe mɔ wole da edɔ nɔ amɛ gbɔngbɔngbe a ?" ¹¹ Eyi Yesu ɖoŋci nɔ wo mɔ : "Mɛ yi le miwo domɛ yi nɔ lɛngbɔ kuɖeka ci yi le shi je edu mɛ gbɔngbɔngbe ɖa sɔɛ ti ɔ ? ¹² Agbetɔ xɔ afi sɔwu lɛngbɔ. Ci yi ele nɛnɛ ɔ, miwo sé ɖe emɔ mɔ wo le wa enu nyui nɔ amɛ gbɔngbɔngbe." ¹³ Eyi Yesu nu nɔ ŋsu lɔ mɔ: «Vlu alɔ tɔo.» Ŋsu lɔ vlu alɔ lɔ, yi edɔ lɔ mi nii, yi alɔ lɔ gbɔva shigbe lehan yi amɛvetɔ lɔ le nɛ. ¹⁴ Eyi Falisitɔwo toyi ekpa keŋ, a ɖe susu so lehan yi wa wɛɛ do, yi a wu Yesu nu. ¹⁵ Ci yi Yesu se mɔ wo bla enu do e ye nu ɔ, e so le fini ci yi e le lɔ. Amowo gbe lɔ ahwa kplɔɛ do, yi e da edɔ nɔ dɔnɔlɔwo pleŋ. ¹⁶ Vɔ ɔ, e do ese nɔ wo veviɖe mɔ, 'mɛɖe ŋgbe vayi nu amɛ ci yi ye nyi gɔnmɛ nɔ mɛɖe o. ¹⁷ Eyi eŋɛ ciwo yi Mawu do todo e yi ŋɛdotɔ Ezayi ji a jɔ. ¹⁸ «Anyi dɔwavi ci yi ŋ can lɔ ke. Amɛ ci yi ŋ ɖe lɔnnɔ enu do ji. Eji jɔnɔ ŋ, do nu. Na na yi anyi Gbɔngbɔn a nɔ ji, yi a dra lehan ci yi na so kojo jɔjɔɛ nɔ amowo do nɔ akɔtawo. ¹⁹ Ɖa hwlɛn enyɔ koɖo 'mɛɖe, yi ɖa do axwa o. Ɖa xo nuxu kaka yi 'mɛɖe a se e yi gbemɛ le emɔganwo ji o. ²⁰ Ɖa ŋɛ klogbuci ci yi kukuɔ o. Yi ɖa ci kaɖigban ci yi ɖe jejeɔ nyuiɖe o. Nɛnɛ han yi a wɛwɛɛ kaka a sɔna hwecinu yi a na yi esejiwawa do a ɖu 'ji. ²¹ Yi akɔtawo pleŋ a sɔ wowo mɔkpɔkpɔ dado e yi nyikɔ ji nɛ.» ²² Wo kplɔ ŋsu ɖeka vɛ nɔ Yesu. Ŋsu lɔ ɖekpɔnɔ enu, kpɔ ɖe xonɔ nuxu. Ɖo ɔ, gbɔngbɔnvɔin le jimɛ nii. Yesu su da edɔ nii; yi etɔ nuxu xoxo, yi gbe tɔ enu kpɔkpɔ. ²³ E jiŋ nɔ ahwakɔn lɔ, yi wo nu mɔ: «Davidi 'viɛ lɔ nɛ a?» ²⁴ Ci yi Falisitɔwo se enyɔ hunnɔ ɔ, wo nu mɔ: «Bɛlizebuli, gbɔngbɔnvɔinwo ga, yi na ŋsɛn yi, yi e sɔ nyanya gbɔngbɔn vɔinwo!» ²⁵ Vɔ ɔ, Yesu jeshi susu ci yi wo ɖeɖeɛ. Eyi e nu nɔ wo mɔ: «Nɔ efiɔɖuxu ɖe mɛtɔwo ɖe sɔ egbe ɖo eju ɔ, efiɔɖuxu lɔ, ɖa sɛn ŋli eke o. Nɔ jugan ɖe, alo axwe ɖe mɛtɔwo wawa evu koɖo wowo nɔnɔwo ɔ, jugan lɔ, alo axwe lɔ, a gban. ²⁶ E yi na taɖo nɔ legba nyanya legba, alo wawa ahwa koɖo yiɖeki ɖee, lehan yi e yi fiɔɖuxu a li ke do ɔ? ²⁷ Nɔ e nyi mɔ, Bɛlizebuli, gbɔngbɔnvɔinga ŋsɛn, yi e sɔ nyanya gbɔngbɔn vɔinwo ɖee, mɛ e ŋsɛn, yi miwo mɛwo sɔ nyanya wo? Miwo mɛwo ŋtɔwo, yi ɖe doasɛ mɔ miwo nyɔ ɖe jɔ. ²⁸ Vɔ enyɛ yɛ ɔ, Mawu Gbɔngbɔn yi na ŋsɛn ŋ, yi ŋ sɔ nyanya gbɔngbɔn vɔinwo. Ci yi enyi nɛnɛ ɔ, jeŋkuimɛ fiɔɖuxu lɔ le mi gbɔ vɔ. ²⁹ Amɛɖekpokpui ɖe li, yi a yi ŋsu agbo xwemɛ, yi a va yi lɔ e yi dɔkunuwo, nɔ ɖe doŋkɔ, yi le ŋsu agbo lɔ, yi blɛ o? Vɔ nɔ e blɛ ɖe gbɔ ɔ, a sɛnŋ fin e yi dɔkunuwo pleŋ dru fɛɛ. ³⁰ Nɔ amɛɖe ɖe li koɖo ŋ ɔ, anyi mɔ efɔn egu do ŋ nu. Nɔ amɛɖe ɖe kplɔkplɔ amowo va ŋ gbɔ ɔ, anyi e nyanya amowo do egbe nɔ ŋ. ³¹ E yi na taɖo, yi ŋ nunuɔ nɔ mi mɔ, nɔ 'mɛde wa evɔin alo nɔ 'mɛɖe zu Mawu ɔ, wa sɔ kii. Vɔ ɔ, nɔ 'mɛɖe zu Gbɔngbɔn Kɔkɔɛ ɔ, wo ɖa sɔ kii kpɔ gbeɖe o. ³² Nɔ 'mɛɖe nu enyɔ ɖe, yi sɔ fɔn egu do Agbetɔvi lɔ nu ɔ, wa sɔ kii. Vɔ, nɔ 'mɛde nu enyɔɖe yi sɔ fɔn egu do Gbɔngbɔn Kɔkɔɛ nu, wo ɖa sɔ kii, le xexe cɛ, koɖo ci yi gbɔgbɔ mɛ o.» ³³ «Aci nyui ɔ, eku nyui yi e sɛn nɔ, yi aci dɔndɔn a gbe sɛn eku dɔndɔn. Nyɔnɔnui mɛ tɔ ɔ, acikusɛnsɛn yi wo kpɔnɔ, yi sɔ ³⁴ dɔnɔ jeshi aci lɔ. Zakpata kannuwo! Le e wɛɛ do yi miwo ciwo yi nyi amɛvɔinwo a sɛnŋ nu enyɔ nyui? Ɖo enyɔ cin yi ɖɔ ejimɛ nɔ amɛ ɔ, eyi wo nu nɔ. ³⁵ Enunyui yi nɔnɔ eji me nɔ amɛnyui, yi e ɖenɔ tii; yi amɛvɔin ɔ, enuvɔin yi nɔnɔ 'jimɛ nii yi é ɖenɔ tii. ³⁶ Ma nu nɔ mi mɔ enyɔ gbali ciwo yi wo nu, nu yi wo a ɖo kojo do le kojoɖogbe. ³⁷ Ɖo enyɔ ci wo yi enu yi wo a kpɔ yi a sɔ ɖo kojo koɖo wo. Enu ciwo yi amɛ nu yi a doasɛ mɔ e yi wu ehwɛ alo yi ɖe wu ehwɛ go.» ³⁸ Esedɔwatɔ ɖekawo koɖo Falisitɔ ɖekawo nunɔ Yesu mɔ: «Mɛgan mi ji mɔ wɔ ɖe wa jeshidu ɖeka nɔ mi a kpɔ.» ³⁹ Yesu ɖonu nɔ wo mɔ: «Egbɛvi amɛviɔnwo, egbejimanɔtɔwo jijiɔ jeshidu a kpɔ. Vɔ kpɔ wo ɖ'a gbe wa jeshidu buɖe nɔ wo sɔ zeto Mawu ŋɛdotɔ Ʒonasitɔ nu go. ⁴⁰ Ɖo lehan yi Ʒonasi nɔ kpvi gangan dɔmɛ kaka wa ŋkeke amɛtɔn , ezan amɛtɔn do ɔ, Nɛnɛ lɔ ke yi Agbetɔvi lɔ a va nɔ nyigban cumɛ sɔnanɔ ŋkeke amɛtɔn ezan amɛtɔn do nɛ. ⁴¹ Ci yi Ʒonasi do eŋɛnyui lɔ koɖo axwa ɔ, ninivu jugan mɛtɔwo sii yi trɔ wowoɖekiwo yi ji. Vɔ yi amɛ trɔ le elɛ yi kpɛn sɔwu Ʒonasi. E yi na taɖo le kojoɖogbe ɔ, Ninivu juganmɛtɔwo a va ci ete do ŋkɔ nɔ egbɛviwo yi a do ehwɛ nɔ wo . ⁴² Le kojoɖogbewo efiɔ nyɔnu fɔdetɔ aci ete do ŋkɔ nɔ egbɛviwo yi a do ehwɛ nɔ wo. Ɖo nyɔnu lɔ so ekan jijiwo mɛ le nyigban lɔ ji yi a va se ŋɖɛnyanya nyɔwo le Salomɔ gbɔ. Vɔ yi amɛ trɔ le elɛ yi kpɛn sɔwu Salomɔ!» ⁴³ «Nɔ gbɔngbɔnviɔn to le amɛɖe mɛ ɔ, e va yi dannɔ todo zoxu sakli sakliwo mɛ yi a jijiɔ fi ci yi a gbɔn le kpɔ. Nɔ ɖe kpɔkpɔ eɖe ɔ, ⁴⁴ e nu nɔ le yiɖeki mɛ mɔ ye a gbe trɔ yi ye 'xwe xoxwi mɛ. Nɔ e trɔ gbɔ ɔ, e va kpɔnɔ exɔ lɔ yi a le tootu yi a le mɛmɛɖe yi enuwo a gbe le ɖoɖo le mɛ. ⁴⁵ Eyi gbɔngbɔnvɔin lɔ vayi kplɔnɔ gbɔngbɔnvɔin amadrɛ bu ciwo yi nyana eku sɔwui bɔdo yiɖeki nu gbɛ yi wo a va so axwe do mɛ. Ganɔmɛ ɔ, amɛ ci yi mɛ yi e to le sasa lɔ nɔnɔmɛ a gbe va dɔn do ji sɔwu le e le do sasa. Enyɔ hunnɔ a va jɔ do agbetɔ lɔwo ji nɛ.» ^{46 47} Yesu gbe kpɔtɔ yi xoxoɔ nuxu nɔ ahwakɔn lɔwo gbɔxwe yi enɔlɔ koɖo nɔviɛ ŋsuwo va le gbadonu yi jijiɛ a kpɔɛ . Eyi amɛɖeka nu nɔ Yesu mɔ: «kpɔ ɖa! enɔo koɖo nɔvio ⁴⁸ Yesu ɖonu nɔ wo mɔ : « Mɛe yi nyi enɔnyɛ koɖo nɔvinyewo? » ⁴⁹ Ci yi yɛ vayi ɖegbɔɔ, e doase e yi nukplaviwo yi nu mɔ: « Enɔnyɛ koɖo nɔvinyewo ke! ⁵⁰ Ɖo amɛ ci yi wa edanyɛci yi le jeŋkui mɛ dtoɔ, e yi nyi nɔyinyɛ ŋsu nɔvinyɛ nyɔnu koɖo enɔnyɛ.»