¹ Vɔ ɔ, yesu yɛ yi Olivu ciwo kpo ji. ² Le i ŋkegbu fɔnfɔn mɛ, e trɔvayi Mawuxwe lɔ mɛ yi amɛwo pleŋ va bɔda gbɔ. Eyi e nɔ anyinɔnɔ yi tɔ enu kplakpla wo. ³ Gahunnɔmɛ ɔ, esedɔwatɔwo koɖo Falisitɔwo kplɔ nyɔnu ɖeka ci yi wo sodo yi e le asu wao vɛ nii yi sɔ ɖo ete do aguntomɛ. ⁴ Wo nu nɔ Yesu mɔ : ciegnan, wo vayi so nyɔnu cɛ do yi e le asu wao. ⁵ Le ese wema ci yi mawu sɔ toto Mɔyizi ji nɔ mi mɛ ɔ, Mɔyizi na egbe mi mɔ miwo le xo ekpe nyɔnu hunnɔ hanciwo nɔ wo aku. Eo yɛ ɖe, le eo kpɔɛ do ɔ? ⁶ Wo nunuɔ ahan yi sɔ jijiɛ enyɔ le enu nɔ yesu keŋ a kpɔ emɔ a do ehwɛ nii. Vɔ ɔ, yesu bubɔ yi sɔ alɔvi tɔ enu ŋwlɛwlɛ anyiban. ⁷ Ci yi wo kpɔtɔ biɔbiɔ enyɔ yesu se ɔ, yesu fɔn eta yi eji yi nu nɔ wo mɔ : Amɛ ci yi le miwo domɛ yi de wa enuvɔn kpɔ go le doŋkɔ a dɔ ekpe nyɔnu lɔ. ⁸ Eyi e gbe bubɔ yi gbe trɔ yi tɔ enu ŋwlɛwlɛ do anyigban. ⁹ Ci yi amɛ lɔwo se enyɔ hunnɔwo ahan ɔ, wo tɔ soso ɖeka ɖeka, soso mɛgan xoxuwoji kakava je ɖeviwo ji yi va kpɔtɔ yesu ɖekɛ koɖo nyɔnu lɔ ci yi gbe kpɔtɔ le ŋkɔ nii. ¹⁰ Gahunnɔmɛ yi yesu va fɔn ekɔ yi biɔ nyɔnu lɔ se mɔ: fi yi amɛ lɔwo le ɔ? Amɛɖe de do ehwɛ nɔ eo ba? ¹¹ Nyɔnu lɔ ɖoŋci nɔ yesu mɔ : axwetɔ oo, amɛɖe do ehwɛ nɔ ŋ go. Eyi yesu nu nii mɔ : Enyɛ can ŋ de do ehwɛ nɔ eo go. Soyi vɔ soso egbɛ ji ɔ, ŋgbe wa enuvɔn ke o. ¹² Yesu gbe tɔ nuxu xoxo nɔ amɛ lɔwo mɔ : Enyɛ yi nyi klɛnklɛn nɔ xexe lɔ. Amɛ ci yi kplɔ ŋ do akpɔ klɛnklɛn yi d'a zɔn zinfrɔ mɛ kpɔ gbeɖe go. ¹³ Eyi Falisitɔwo nu nii mɔ : Eo ŋtɔ le kunu ɖeɖeɔ nɔ eoɖeki a? Enyɔ ci nu yi e ɖeɖeɔ kunu lɔ nyi nyɔnɔnui ba! ¹⁴ Yesu doŋci nɔ wo mɔ : Nɔ enyɛŋtɔ gbe va ɖeɖeɔ kunu nɔ enyɛɖeki can ɔ, enyɔ ci nu yi ŋ ɖeɖeɔ kunu soso lɔ nyi nyɔnɔnui. Do ɔ, ŋ nya afi ci yi ŋ so koɖo afi ci yi ŋyiyiɛ. Vɔ lmiwo ɔ, miwo de nya afi ci yi ŋ so go yi kpɔ mi de nya afi ci yi ŋ yiyiɛ go. ¹⁵ Mi ɖnɔ kojo koɖo amɛ shigbe lehan yi agbetɔwo ɖonɔ kojo do nɛ. Vɔ enyɛ yɛ ɔ, ŋ de ɖonɔ kojo amɛɖekpokpoi go. ¹⁶ Gankegan nɔ ŋ va mɔ na ɖo kojo ɔ, ŋ ɖoɖoɔ kojo amɛ jɔjɔɛɖe. Do ɔ, d'enyi enyɛ ɖekɛ yi le go. Eda ci yi dɔ ŋ ɖaɖa le kojo ŋ. ¹⁷ Le miwo se wema mɛ ɔ, wo wlɛ ɖɛ mɔ nɔ amɛ amɛve ɖe kunu ŋmɛɖekɛ soso enyɔ ɖe nu ɔ, a nyi enyɔ lɔ nyi nyɔnɔnui. ¹⁸ Enyɛŋtɔ ŋ ɖeɖeɔ kunu soso enyɛɖeki nu yi Eda ci yi dɔ ŋ ɖaɖa can gbe ɖeɖeɔ kunu nɔ hɛnnɛ. ¹⁹ Eyi wo va biɔɛ se mɔ: fi i Edao lɔ ke ɔ? Yesu doŋci nɔ wo mɔ : mi de jeshi ŋ ɖɛ go yi mi de Edanyɛ can ɖɛ go. Nɔ mi jeshi ŋ ɖɛ sasa ɔ, mi a jeshi Edanyi ɖɛ hɛnnɛ yɛ sasa. ²⁰ Yesu xo nuxu hunnɔwo gacimɛ e kplakpla enu amɛwo le Mawuxwe lɔ mɛ le fini ci yi agba ciwo mɛ yi wo jɔnɔ enu do nɔnɔ. Amɛɖekpokpoi lɔ de je nu go. Do yi ga de kpɔ xɔ nɔɖo go. ²¹ Yesu gbe nu nɔwo ke mɔ : ŋ sosoɔ. Mi a va ji ŋ kpɔ. Vɔ ɔ, mi a va ku do miwo nuvɔn mɛ. Mi d'a sɛn eŋ a yi afi ci ŋ yiyiɛ go. ²² Eyi Yudatɔwo tɔ nunu le wowonɔnɔwo mɛ mɔ: vɔ ɖee, e jijiɛ a wu yiɖeki yɔ a? Do e nunuɔ mɔ: Mi d'a sɛn eŋ a yi afi ci yi ŋ yiyiɛ go. ²³ Yesu nu nɔ wo mɔ : tɔwo yi mi nyi. Vɔ enyɛ yɛ ɔ, jeŋkuisimɛtɔ yi ŋ nyi. Miwo ɖe, xexe cɛ mɛtɔwo yi mi nyi. Vɔ enyɛ yɛ ɔ ŋ de nyi xexe cɛ mɛtɔ go. ²⁴ Eyi na ku do miwo nuvɔnwo mɛ. Do nɔ mide xɔɛ ji se mɔ ŋ nyi amɛ ci yi ŋ nyi go ɔ, mi a ku do miwo nuvɔnwo mɛ. ²⁵ Wo biɔɛ se mɔ: Mie nyi ɔ? Yesu ɖoŋci nɔ wo mɔ : Amɛ ci yi ŋ nu mi soso gɔnmɛ jeje mɔ ŋ nyi lɔ yɔ. ²⁶ ŋ ɖo enyɔ sugbɔ a nu soso mi nu yi gbe ɖo kojo sugbɔ a ɖo hɛnnɛ. Vɔ ɔ, amɛ ci yi dɔ ŋ ɖaɖa nyi nyɔnɔnuitotɔ. Nɛnɛ ɔ, enyɔ ci yi ŋ se le enu nii ɖekɛyi ŋ nunuɔ nu xexe lɔ. ²⁷ Amɛ lɔwo de nɔŋje mɛ mɔ Edalɔ nu yi e xoxoɔ nuxu soso nɔ wo go. ²⁸ Eyi Yesu va nu nɔ wo mɔ: hwecinu yi mi a kɔ agbetɔvi lɔ do eji ɔ, hwenɔnu yi mi a va nya mɔ ŋ nyi amɛ ci yi ŋ nyi nɛ. Mi a va nya mɔ ŋ de wanɔ enuɖekpokpoi enyɛɖeki shinu go. Vɔ ɔ, enu ci yi Edanyɛ kpla ŋ ɖekɛ nu yi ŋ xonɔ nuxu soso. ²⁹ Amɛ ci yi dɔ ŋ ɖaɖa le koɖo ŋ. D'e gbe ŋ do akogo go. Do enu ci yi jɔnɔ eji nii yi ŋ wanɔ tɛgbɛɛ. ³⁰ Ci yi yesu le enyɔ lɔwo nunuɔ ahan ɔ, amɛ sugbɔ xɔɛ ji se. ³¹ Eyi yesu va nu nɔ Yudatɔ ciwo yi xɔɛ ji se mɔ : nɔ mi seseɔ anyi yɔnwo yi wawa dowo ji ɔ, a nyi mi nyi anyi nukplaviwo nyao. ³² Nɛnɛ ɔ, mi a jeshi nyɔnɔnui lɔ ɖɛ yi nyɔnɔnui lɔ a na yi mi a vo. ³³ Wo ɖoŋci nii mɔ : Ablahamu jijimɛviwo yi mi nyi de nyi hwashiwo nɔ amɛɖe kpɔ go. Le yi a wɛɛ a va nunuɔ nɔ mi mɔ: Mi a va vo do ɔ. ³⁴ Yesu ɖoŋci nɔ mɔ : le nyɔnɔnui mɛ ɔ, ŋ nunuɔ nɔ mi mɔ amɛɖekpokpoi ci yi wawa enuvɔn nyi hwashi nɔ enuvɔn. ³⁵ Amɛ ci yi nyi hwashi le xomu ɖe nɔnɔ xomu lɔ mɛ kaka a sɔji go. Vɔ amɛ ci yi nyi evi xomu lɔ mɛ yɛ ɔ, yɛ nɔnɔ xomu lɔ mɛ tɛgbɛɛ. ³⁶ Ci yi e le ahan ɔ, nɔ evi lɔ yi mi to soso hwashinyinyi mɛ ɔ, a nyi mi je vovo mɛ nyao. ³⁷ ŋ nya mɔ Ablahamu jijimɛviwo mi nyi. Vɔ ɔ, mi jijiɛ a wu ŋ. Do anyi nyɔwo de kpɔkpɔ texwe ɖe le miwo jiwo mɛ go. ³⁸ Enyɛ yɛ ɔ ŋ xoxoɔ nuxu soso enu ci yi Edanyɛ nɔ ŋ nu. Vɔ miwo ɔ, mi wawa do enyɔ ci yi miwo da nunɔ mi ji. ³⁹ Wo doŋci nɔ yesu mɔ : Ablahamu yi nyi miwo da. Vɔ yesu nu nɔ wo mɔ: nɔ mi nyi Ablahamu viwo nyao sasa ɔ, mi a wanɔ enu shigbe Ablahamu nɛ. ⁴⁰ Vɔ ecɛyɛ ɔ, mi jijiɛ a wu ŋ do nyɔnɔnui ci yi ŋ se soso Mawu gbɔ yi va nunuɔ nɔ mi taɖo. Ablahamu de wa ahan go. ⁴¹ Miwo ɖe, mi wawa enu shigbe lehan yi miwo da wanɔ do nɛ. Wo doŋci nii mɔ: Mi de nyi ahunmɛ viwo go. Eda kuɖeka yi le mi shi. Eyi nyi Mawu. ⁴² Yesu nu nɔ wo mɔ : Nɔ enyi kɔ mɔ Mawu yi nyi miwo da nyao sasa ɔ, mi a lɔn ŋ. Do Mawu lɔ gbɔ yi ŋ so yi va. ŋde va do enyɛŋtɔ ɖeki shinu go. Vɔ ɔ, eyi dɔ ŋ ɖaɖa. ⁴³ Nyi yi na taɖo yi mi de mɔmɔ eŋ je enyɔ ci yi ŋ nunuɔ nɔ mi mɛ ɔ? E le ahan nɔ mi. Do mi de sun anyi nyɔwo ji yi a xɔ go. ⁴⁴ Miwo ɖe, legba yi yi nyi miwo da yi mi jijiɛ mɔ yewo a wa do enu ci yi miwo da dro ji. Eyɛ lɔ, amɛwutɔ enyi soso gɔnmɛjeje. D'e nɔnɔ nyɔnɔnui lɔ kpaxwe go. Do nyɔnɔnui toto ɖekɛ de le lanmɛ nii go. Nɔ e le evi hoo ɔ, jɔjɔmɛ mɛ nu yi enyi nii. Do e nyi ebihotɔ yi gbe nyi eda nɔ evihoho. ⁴⁵ Mi yi le mino domɛ yi a sɛn eŋ doasɛ mɔ enyɛ ŋ wa enuvɔn kpɔ ɔ ? ⁴⁶ Nɔ ŋ le nyɔnui nunuɔ ɖee nyi yi a na taɖo yi mi de xɔ ŋ ji se go ɔ ?. ⁴⁷ Amɛ ci yi nyi Mawu tɔ ɔ e ɖonɔ eto Mawu nyɔwo. Vɔ ɔ miwo de nyi Mawu tɔ go. Eyi na taɖo yi mi de donɔ eto yi go » ⁴⁸ Yuɖatɔ lɔwo ɖoŋci nɔ Yesu mɔ : «D'ekpɔ mɔ ci minu nɔ co mɔ Samalitɔ yi e nyi yi gbɔgbɔvɔn ɖeka le eo mɛ o enyɔ jɔ nɔ mi ba ?» ⁴⁹ Yesu doŋci nɔ wo mɔ : «Gbɔngbɔn ɖe le n mɛ go. Vɔ ɔ, Edanyɛ nu yi ŋ dodoɔ bubu yi miwo gbe mɔ yewo d'abu ŋ go. » ⁵⁰ ŋ de jije kanfukanky nɔ enyɛɖeki go. Ameɖeka li yi nanɔ kanfu ŋ yi gbe ɖonɔ kojo. ⁵¹ Le nyɔnɔnui mɛ ɔ, n nunuɔ nɔ mi mɔ amɛ ci yi nawa do anyi nyɔwo ji d'a ku kpɔ gbeɖe go.» ⁵² Yuɖatɔ lɔwo nu nii mɔ : «Mi va nya ye mɔ gbɔgbɔnvɔn ɖeka le eo mɛ nyao. Ablahanu ku. Mawu ŋɛdotɔwo can ku yi eo va nunuɔ mɔ : Nɔ amɛɖe wava do anyi nyɔwo ji ɔ d'a ku kpɔ gbeɖe go a ? ⁵³ E shin sɔwu miwo tɔgbi Ablahamu yɔ a ? Eye ku yi Mawu ŋedotɔwo can ku. Mi yi e bubuɔ mɔ ye nyi ɔ » ⁵⁴ Yesu doŋci mɔ : «Nɔ enyɛŋtɔ ŋ kanfukanfu enyɛɖeki ɔ, anyi bubu ci yi ŋ dodo ɔ enyɛɖeki nu lɔ de ɖo eta go. Edanye yi kannɔfu ŋ. Miwo nunɔ soso nunɔ : Miwo Mawu yi e nyi. ⁵⁵ Gankegan kpɔ mi de jeshi ɖe go. Enyɛ ɔ, enyɛ ŋ jeshi ɖɛ. Nɔ ŋ nuyɛ mɔ de jeshi ɖɛ go ɔ, a nyi ke ŋ nyi evihotɔ shigbe miwo nɛ. Vɔ ɔ ŋ jeshi ɖɛ yi wawa do yi nyɔwo ji. ⁵⁶ Ablahanu ci yi nui miwo tɔgbi kpɔ jijɔ sugbɔ sɔ le emɔ kpɔɔ nɔ ŋkeke ci yi na va do lɔ. E kpɔ ŋkeke lɔ yi eji jɔɛ.» ⁵⁷ Eyi Yudatɔ lɔwo biɔɛ se mɔ : «D'ekpɔ ɖo exwe eka howo hɔɖo go, gankegan yi kpɔ Ablahanu kpɔ a ?» ⁵⁸ Yesu nu nɔ wo mɔ : «Le nyɔnɔnui mɛ ɔ, ŋ nunuɔ nɔ mi mɔ gbɔxwe yi wo a va ji Ablahamu ɔ, ŋ li » ⁵⁹ Eyi wo fɔ ekpewo yi asɔ tɔ Yesu dɔdɔ. Vɔ ɔ, Yesu be yi to soso Mawuxwe lɔ mɛ.