¹ Kuɛshilagbe nyidin kucukucu hwenu yi eŋu de ke vɛ hɔɖe go ɔ, Mali ci yi so Magidala jugan mɛ vayi yɔdu lɔ tu. E kpɔ mɔ wo ɖe kpe ci yi wo sɔ cu enu nɔ yɔdu lɔ soi. ² Eyi eshi eju vayi Simɔ Piyɛ koɖo nukplavihalɔtɔ lɔ ci yi Yesu donɔ lɔnlɔn nɔ gbɔ yi nu nɔ wo mɔ:« wo sɔ Axwetɔ lɔ soi le yi yɔdu lɔ mɛ yi mi de nya afi ci yi wo sɔ dado go.» ³ Nɛnɛ ɔ, Piyɛ koɖo nukplavi eɖetɔ lɔ ta yi jeŋkɔ yɔdu lɔ gbɔ. ⁴ Wo koɖo ve lɔ do afɔ eju mɛ. Vɔ ɔ, nukplavi eɖetɔ lɔ lɔ eju sɔwu Piyɛ yi vayi ɖo yɔdu lɔ gbɔ doŋkɔ. ⁵ E bubɔ yi kpɔ yɔdu lɔ mɛ ɖaɖa yi kpɔ gaga eɣi lɔwo le enɔntɔxu. Vɔ ɔ, d'e ɖo yɔdu lɔ mɛ go. ⁶ Simɔ Piyɛ ci yi ci godu can va kɔɖɛ; e ɖo yɔdu lɔ mɛ yi kpɔ gaga eɣi lɔwo le enɔtɔxu. ⁷ Sɔkpenɔ leweyɔ ci yi wo sɔ bla ŋmɛ nɔ Yesu hɛnnɛ. Leweyɔ lɔ de le eju koɖo gaga eɣi lɔwo go. Vɔ ɔ, wo ŋwla eyɛ do akpo yi sɔ dado afibu. ⁸ Hwenu yi nukplavi eɖetɔ lɔ ci va ɖo yɔdu lɔ gbɔ doŋkɔ va ɖo mɛ hɛnnɛ. E kpɔ enu lɔwo yi xɔse mɔ Yesu fɔn nyao. ⁹ Kaka va sɔdonɔ gacɛwomɛ ɔ, nukplavi lɔwo de mɔŋje enyɔ ciwo yi wo doŋkɔ yi nu do Mawu nyɔ wema mɔ yesu ɖo a fɔn sɔso ekuwodi mɛ go. ¹⁰ Eyi nukplavi amɛve lɔwo trɔvayi axwe. ¹¹ Mali le ete le yɔdu lɔ gbɔ le exenu yi fanfan avin. Hwenu yi e fanfan avin lɔ ɔ, e bubɔ yi a kpɔ yɔdu lɔ mɛ ɖaɖa. ¹² E kpɔ cikplɔtɔ amɛve yi wo le enu eɣiwo mɛ. Wo nɔ anyinɔnɔ do afi ci yi wo sɔ Yesu cɔ lɔ dado sasa. Amɛɖeka le tagbe age yi exlɔtɔ le afɔde age. ¹³ Cikplɔtɔ lɔwo biɔ Mali se mɔ:« Nyɔnu, ŋɖe yi taɖo yi e fanfan avin ? » E ɖoŋnu nɔ wo mɔ: « Wo sɔ any xwetɔ soi yi ŋ de nya afi ci yi wo sɔ dado go. » ¹⁴ Kaka a nu nɛnɛ ɖegbɔ yi trɔ ekɔ, e kpɔ yesu le enɔtɔxu. Vɔ ɔ, d'e nya mɔ e yi le enɔtɔxu go. ¹⁵ Yesu biɔɛ se mɔ: « Ŋɖe yi taɖo yi e fanfan avin ? Mɛ yi e jijiɛ ɔ? » Nyɔnu lɔ bubuɔ mɔ kpamɛbo lɔ jikpɔtɔ yɔ. Eyi na taɖo yi e nu nii mɔ:« Mɛgan, nɔ e nyi kpɔ mɔ ewu yi sɔɛ soi ɔ, na nu afi ci yi e sɔɛ dado nɔ ŋ nɔ ma yi a yi kɔɛ. » ¹⁶ Yesu nu nii mɔ: «Mali» Eyi e trɔ kpanŋkɔ yi yi nu nii do Eblegbe mɛ mɔ:« Hlabuni !», ci gɔnmɛ yi nyi kpɔ nɔ« cicagan !» ¹⁷ Yesu nu nii mɔ: « ŋgbe le ŋ ɖɛ go. Do ɔ, ɖe yi eji le Edanyɛ gbɔ hɔɖe go. Vɔ ɔ, yi nu nɔ nɔvinyɛwo mɔ jijiɔ Edanyɛ ci nu nɔ nɔvinyɛwo mɔ ŋ jijiɔ Edanyɛ ci yi gbe nyi muwo da anyi Mawu ci yi gbe nyi Mawu hɛnnɛ gbɔ.» ¹⁸ Eyi Mali ci yi so Magidala jugan mɛ lɔ vayi nukplavi lɔwo gbɔ yi nu nɔ wo mɔ ye kpɔ Axwetɔ lɔ ji gbe do eŋɛ ci yi e do nii lɔ nɔ wo. ¹⁹ Kuɛshilagbe hunnɔ lɔ ke fishi ɔ, nukplavi lɔwo bɔdo exɔ ɖeka mɛ. Wo gla ehɔn lɔwo koɖo cavi. Ɖo ɔ, wo vɔnvɔn nɔ Yuɖatɔwo gawo. Hwenɔnu ɔ, Yesu va wo gbɔ. E le ete le dodomɛ nɔ wo yi nu nɔ wo mɔ: «Fafa mi a kpɔ ! » ²⁰ Ci yi e nu nɛnɛ nɔ wo ɔ, e doasɛ ji lɔwo koɖo yi xamɛ nɔ wo. Ci nukplavi lɔwo kpɔ Axwetɔ lɔ ɔ, eji jɔ wo sugbɔ. ²¹ Yesu gbe nu nɔ wo ke mɔ: « Fafa mi a kpɔ. Shigbe lehan yi Edanyɛ dɔ ŋ ɖaɖa do nɛnɛ ɔ, enyɛ can ŋ dɔdɔ mi ɖaɖa.» ²² Le yi godu ɔ, e ɖe fufu do wo yi nu nɔ wo mɔ:« Mi xɔ Gbɔngbɔn kɔkɔɛ ! Amɛ ciwo yi mi a sɔ enuvɔnwo ke ɔ, Mawu a sɔ enuvɔn lɔwo ke wo. ²³ Amɛ ciwo yi mi a gbe mɔ yewo d'a sɔ enuvɔnwo ke go ɔ, Mawu can d'a sɔ wo ke wo hɛnnɛ go. ²⁴ keŋ ɔ, nukplavi wive lɔwo domɛtɔ ɖeka ci yi wo yɔnɔ mɔ Toma(ci yi wo gbe yɔnɔ mɔ Togbo) de le yi kpenawo mɛ hwɛnu yi Yesu va go. ²⁵ Eyi nukpavi kpɛtɛwo va nu nii mɔ:« Mi kpɔ Axwetɔ lɔ !» Vɔ ɔ, Toma ɖoŋnu nɔ wo mɔ:« Nɔ ŋ de kpɔ hunji kpa lɔwo le yi lɔwo mɛ go yi nɔ ŋ de sɔ alɔvi do hunji kpa lɔwo mɛ go yi sɔ alɔ do akpa ciwo le axaɖmɛ ni go ɔ, ŋ d'a xɔɛ ji se go.» ²⁶ Kuɛshila ɖeka godu ɔ, nukplavi lɔwo gbe bɔdo axwe lɔ mɛ ke. Toma can le wo mɛ. Wo gla ehɔn lɔwo koɖo cavi vɔ ɔ, Yesu va wo gbɔ. E nɔ ete do dodomɛ nɔ wo yi nu nɔ wo mɔ:« Fafa yi mi a kpɔ.» ²⁷ Keŋ yi nu nɔ Toma mɔ: « Do awu lɔvi ɖaɖa elɛ yi a kpɔ anyi lɔwo ɖa. Do awu lɔ ɖaɖa a sɔ do anyi xaɖamɛ. Mi enu xoxo kpɔ kɛŋ a xɔɛ ji se!» ²⁸ Toma ɖoŋnu nii mɔ: « Anyi xwetɔ, anyi Mawu !» ²⁹ Yesu biɔɛ se mɔ: « D'e ci yi e kpɔ ŋ taɖo yi e xɔɛ ji se ba ? Enu yi nyɔ nɔ amɛ siwo yi d'a kpɔ gankegan yi a xɔɛ yi se!» ³⁰ Yesu gbe wa Jeshidu nu sugbɔ buwo le yi nukplaviwo ŋmɛ. Keŋ ɔ, wo de ŋwlɛ wowo do wema cɛ go. ³¹ Vɔ ɔ, wo ŋwlɛ enu ciwo yi le wema cɛ mɛ nɔ mi a xɔɛ ji se mɔ Yesu yi nyi Klisolɔ, Mawu Eviɛ lɔ Nɛnɛ nɔ mi xɔɛ ji se ɔ, Mzwu a na agbe mi todo ji.