¹ Gacɛmɛ ɔ, Pilati va na egbe mɔ wo le kplɔ Yesu sɔyi a yi yɛɛ koɖo sɔvobayɛ. ² Eyi sɔja lɔwo sɔ ŋja lɔn efiɔkuku yi sɔ cɔn nii. Wo gbe do awuvlaya ejin ɖeka nii hɛnnɛ. ³ Wo tegogoi yi nu nii mɔ:« Mi do egbe nɔ ewo, Yuɖatɔwo fiɔ! » keŋ yi xoxoɔ tomɛ nii. ⁴ Pilati gbe to va xexenu ke yi nu nɔ ahwakɔn lɔwo mɔ: « Na kplɔɛ toi do xexenu elɛ nɔ mi nɔ mi a mɔŋjemɛ mɔ ŋ de kpɔ enu ci taɖo yi na do ehwɛ nɔ ŋsu cɛ do go.» ⁵ Eyi Yesu to va xexenu. Ŋja fiɔkuku lɔ le eta nii yi e le awuvlaya ejin lɔ mɛ. Pilati nu nɔ wo mɔ:« Ŋsu lɔ ke!» ⁶ Vɔ ci yi avɔsatɔ gangantɔ lɔwo koɖo dɔkpɛga lɔwo kpɔɛ ɔ, wo tɔ axwa dodo mɔ: « Kiin do acisosa ji! kiin do acisosa ji!» Eyi Pilati nu nɔ wo mɔ: « Mi kpɔɛ miwoŋtɔwo a yi kiin do acisosa ji. Ɖo enyɛ yɛ ɔ, ŋ de kpɔ enu ci taɖo yi na do ehwɛ nɔ ŋsu cɛ do ga.» ⁷ Yeɖatɔwo lɔwo nu nii mɔ:« Mi ɖo ese ɖeka yi le eseci lɔ nu ɔ, e ɖo a ku. Do c, e sɔɔ yiɖeki do Mawu Eviɛ ji.» ⁸ Ci yi Pilati gbe se enyɔ hunnɔwo ɔ, vɔnvɔn gbe ɖoi do ji. ⁹ Eyi e trɔɖo yi gbogbu lɔ mɛ keŋ yi biɔɛ se mɔ: « Fini yi e so ɔ?» Vɔ ɔ, kpɔ Yesu de nu enyɔ ɖe do nu nii go. ¹⁰ Gahunnɔmɛ ɔ, Pilati va nu nii mɔ:« D'e jijiɔ a ɖo enyɔ lɔ nu nɔ ŋ ba? D'e nya go mɔ ŋ ɖo acɛ yi a jo ewɔ yi gbe ɖo acɛ a dɔ yi wo a kan ewo do acisosa ji hɛnnɛ ba?» ¹¹ Yesu doŋci nii mɔ: « D'e ɖo acɛ ɖekpokpui do ŋ ji sɔ ji sɔ wu ci yi Mawu na ewɔ go. E yi nz taɖo ɔ, amɛ ci yi sɔ ŋ doashi nɔ ewɔ wa enuvɔn gangan sɔwu ewɔ.» ¹² Eyi sɔsɔ hwenɔnu ɔ, Pilati tɔ afi ci yi a to yi a jo Yesu jiji. Vɔ ɔ, Yuɖatɔwo tɔ axwa dodo mɔ:« Nɔ e jo ŋsu cɛ ɔ a nyi ke d'e nyi Hlɔmu fiɔgangan xlɔ go! Ɖo amɛɖekpokpui ci yi sɔ yiɖeki ɖo efiɔ ɔ, Hlɔmu fiɔgangan lɔ ketɔ yi e nyi!» ¹³ Hwenu yi Pilati se enyɔ hunnɔwo ɔ, e dɔ yi wo kplɔ Yesu toi do xexenu. Pilati nɔ anyinɔnɔ do Ʒinkpin ji le kojoɖoxu afi ci yi wo tɛ ekpe nyuiwo do yi wo yɔnɔ le Eblegbe mɛ mɔ« Gabata.» ¹⁴ Atadodoamɛxwe zandrɔgbe yi wo wawa enu lɔ. Nyidɔn mɛ do gawive hanwo ɔ, Pilati nu nɔ Yuɖatɔwo mɔ:« Miwo fiɔ ke nɔ mi!» ¹⁵ Vɔ ɔ, wo tɔ axwa dodo yi nunuɔ mɔ:« Wui! wui! kiin do acisosa ji! » Pilati biɔ wo se mɔ: « Ma kan miwo fiɔ do acisosa ji a? » Avɔsatɔ gangantɔ lɔwo ɖoŋci nii mɔ:« Mi ɖo efiɔ ɖe sɔzeto Hlɔmu fiɔgangan nu go.» ¹⁶ Eyi Pilati sɔ Yesu doashi nɔ wo nɔ woa yi kiin do acisosa ji Eyi wo kplɔ Yesu yi nyao. ¹⁷ Yesu ŋtɔ dro acisosa ci ji yi wo a kiin do yi to sɔsɔ jugan lɔ mɛ yi yi afi ci yi wo yɔnɔ mɔ:« agbetɔ taxu tɔxu» wo yɔnɔ enɔtɔxu lɔ le Eblegbe mɛ mɔ« Gɔlugota.» ¹⁸ Enɔtɔxu yi sɔja lɔwo kan Yesu do acisosa lɔ ji le nɛ yi gbe kan amɛ amɛve buwo hɛnnɛ do axa nii. Wo kan ɖeka do ɖushimɛ yi kan exlɔtɔ do emiɔmɛ yi Yesu le dodomɛ mɛ nɔ wo. ¹⁹ Pilati gbe na egbe hɛnnɛ yi wo ŋwlɛ enu do kpakovi ɖeka ji yi sɔ kan do tamɛ nɔ acisosa lɔ. Enu ci yi wo ŋwlɛ lɔ yi nyi kpɔ mɔ: « Yesu Nazalɛtitɔ lɔ, Yuɖatɔ fiɔ.» ²⁰ Yuɖatɔ sugbɔ hlɛn enu lɔ ci yi wo ŋwlɛ. Ɖo ɔ, afi ci yi wo kan Yesu do acisosa ji le lɔ sɔ jugan lɔ gbɔ yi enuŋwlɛ lɔ gbe le Egblegbe koɖo Latɛngbe koɖo Glɛkigbe mɛ. ²¹ Eyi Yuɖatɔwo vɔsatɔwo gawo nu nɔ Pilati mɔ:« D'e ɖo a ŋwlɛ do kpakovi lɔ ji mɔ Yuɖatɔwo fiɔ go. Vɔ ɔ, e ɖo a ŋwlɛ mɔ:« Ŋsu cɛ nu mɔ: ŋ nyi Yuɖatɔwo fiɔ.» ²² Pilati ɖoŋci nɔ wo mɔ:« Enu ci yi ŋ ŋwlɛn ɔ, ŋwlɛ ŋ ŋwlii !» ²³ Hwenu yi sɔja lɔwo kan Yesu do acisosa ji ɖegbɔ ɔ, wo sɔ yi wuwo yi ma wo do akpa amɛnɛ yi sɔja lɔwo xɔ ɖeka ɖeka. Wo gbe sɔ yi wuvlaya hɛnnɛ. Wo de tɔn awuvlaya hɛnnɛ. Wo de tɔn awuvlaya lɔ todo afiɖe go. Lɔn wo lɔin sɔto eji kaka kɔdo gɔnmɛ. ²⁴ Sɔja lɔwo nu nɔ wowonɔnɔwo mɔ:« Mi d'a drɛn awuvlaya lɔ go. Ma trɔ enu kpɔ a kpɔ mɔ mɛ yi ta yi dui le mi mɛ ɔ.» Enu hunnɔ jɔjɔ ahan nɔ enyɔ ci yi wo ŋwlɛ ɖɛ do Mawu nyɔ wemawo mɛ akpɔ emɔ a va mɛ. Wo ŋwlɛ daɖɛ mɔ: « Wo ma anyi wuwo le wowonɔnɔwo mɛ yi trɔ enu kpɔ sɔsɔ anyi wuvlaya nu.» Enyɔ ci yi sɔja lɔwo wa do nɛnɛ. ²⁵ Yesu nɔlɔ koɖɔ Yesu nɔɖiɛ ci yi nyi Mali klopasi ashiɛ koɖo Mali ci yi so Magidala le ete le acisosa ci ji yi wo kan Yesu do lɔ gbɔ. ²⁶ Yesu kpɔ enɔlɔ yi nukplavi ci yi e lɔnnɔ le axa ji nii. Eyi e nu nɔ enɔlɔ mɔ: « Ajinɔ, eviwo ke.» ²⁷ Le i godu ɔ, e nu nɔ nukplavi lɔ mɔ:« Enɔwo ke.» Eyi sɔsɔ hwenɔnu ɔ, nukplavi lɔ kplɔ Yesu nɔlɔ lɔ yi e yi yi xwe mɛ yi exɔɛ do yiɖeki gbɔ. ²⁸ Le i godu ci yi Yesu nya mɔ ecɛyɛ ɔ, wo ɖe egbɔ nɔ enushanu ɔ, e nu mɔ: « shikɔ cici ŋ.» E nu nɛnɛ keŋ nɔ enyɔ ci yi wo ŋwlɛ ɖɛ do Mawu nyɔ wemawo mɛ e va mɛ. ²⁹ Egu ɖeka le enɔtɔxu yi vɛn shigbe ɖɔɛ. Sɔja lɔwo sɔ kocan ɖeka ʒin do mɛ yi sɔ trɔn aci ci yi wa yɔnɔ mɔ izɔpu nu yi doi ɖaɖa enu gbɔ nɔ Yesu. ³⁰ Yesu nu vɛn shila lɔ. Le i godu ɔ, e nu mɔ: « wo wa enuwo pleŋ ɖegbɔ .» Eyi ci yi e nu nɛnɛ vɔ, e do eta egu yi sɔ gbɔngbɔn lɔ jo. ³¹ Gbecigbe yi Yesu kukuɔ do lɔ trɔ nyi gbɔngbɔngbe lɔ zandrɔgbe. Yuɖatɔwo gawo de ji mɔ ecɔ lɔwo a nɔ aci lɔwo ji le gbɔngbɔngbe go. Ɖo c, azan gangan ɖeka yi gbɔngbɔngbe ci yi gbɔgbɔ a nyi. Eyi wo va biɔ sɔsɔ Pilati gbɔ mɔ yi le dɔ nɔ wo a gban afɔwo nɔ amɛ ciwo yi wo kan do acisosa ji yi a dɔ nɔ wo a ɖe wo cowo sii. ³² Eyi sɔja lɔwo va gban afɔwo nɔ amɛ ciwo yi bɔ kan do acisosa ji koɖo Yesu. Wo gban wo nɔ amɛɖeka doŋkɔ yi va gban nɔ amɛvetɔ lɔ. ³³ Ci yi wo va ɖo Yesu gbɔ ɔ, wo kpɔ mɔ yi ku vɔ. E yi na taɖo yi wo de gban afɔwo nɔ eyɛ go. ³⁴ Vɔ ɔ, sɔja lɔwo domɛtɔ ɖeka sɔ yi hwan trɔn axamɛ nii yi ehun koɖo eshi kɔ zeɖeka. ³⁵ Amɛ ci yi nunuɔ enyɔ lɔwo kpɔ enu lɔwo tɔxu. Kunu ci ɖeɖeɔ yi e le sɔsɔ enu lɔwo nu nyi nyɔnɔnui. Amɛ lɔ yɛ nya mɔ ye totoɔ nyɔnọnui. E xoxoɔ nuxu sɔsɔ enyɔ lɔwo nu nɔ miwo can mi a xɔ enyɔ lɔwo ji se. ³⁶ Enu lɔwo jɔ nɛnɛ nɔ enyɔ ci yi wo ŋwlɛ ɖɛ do Mawu nyɔ wemavo mɛ a va mɛ. Wo ŋwlɛ ɖaɖɛ mɔ:« Wo d'a gban yi xu ɖekpokpui go.» ³⁷ Wo gbe ŋwlɛ do afi bu nɔ Mawu nyɔ wema lɔwo mɔ:« Wo a sɔ ŋkuviwo dado amɛ ci yi wo tɔ ehwan lɔ ji.» ³⁸ Le i godu ɔ, ʒozefu ci yi so Alimate jugan mɛ vayi biɔ sɔso Pilati gbɔ mɔ yi le na egbe eye nɔ ye a yi sɔ Yesu cɔ lɔ yi a sɔɛ ɖyii. Ʒozɛfu lɔ trɔ nyi Yesu nukplaviwo domɛtɔ ɖeka le bebemɛ. Do ɔ, e vɔnvɔn nɔ Yuɖatɔwo gawo. Pilati na egbe lɔ yi yi e vayi sɔ Yesu cu lɔ. ³⁹ Nikodɛmu, ŋsu ɖeka ci yi va Yesu gbɔ todo ezanmɛ vayi can va enɔtɔnu lɔ. E hɛn ami ci yi wo sɔ milu koɖo alowɛsi wa yi sɔ shinɔ nɔ ecɔ gbɔxwe yi a ɖyii kiloŋ egban hanwo vɛɛ. ⁴⁰ Wo amɛve lɔwo kɔ Yesu cɔ lɔ yi sɔ gagayi ɖeka sɔ doi yi sɔ amihwɛnte lɔ wu doi shigbe lehan yi Yuɖtɔwo wɛɛni do nɔ wo jijiɔ a dyi wowo cɔwo nɛnɛ. ⁴¹ Kpamɛbo ɖeka le afi ci yi wo kan Yesu do acisosa ji le. Yɔdu yoyu ɖeka le kpamɛbo lɔ mɛ yi wo ɖe ɖyi amɛɖe do mɛ kpɔ vayi go. ⁴² Yudatɔwo Gbɔngbɔngbe zandrɔgbe yi wo wawa enu lɔ. Eyi ci yi yɔdu lɔ gbe sɔ enɔtɔnu gbɔ vɔ, wo sɔ Yesu yi ɖyi do mɛ.