¹ Ci yi Yesu wa kuifan nɛnɛ ɖegbɔ ɔ, e to kodo yi nukplanviwo yi yi ago halɔtɔ lɔ ji nɔ tɔhwin ci yi wo yɔnɔ mɔ sedrɔn lɔ, afi ci yi kpamɛbo ɖka le. Eyi yi koɖo yi nukplavi lɔwo ɖo kpamɛbo lɔ mɛ ² Yuɖa amɛ ci yi a sa Yesu can jeshi enɔtɔxu lɔ . Ɖo Yesu koɖo yi nukplaviwo bɔnɔ do enɔtɔxu gaɖekpokpui mɛ. ³ Eyi Yuɖa kplɔ dɔjawo koɖo Mawuxwe dɔkpɛga ciwo yi avɔsatɔ gawo koɖo Falisitɔwo dɔ ɖaɖa yi wo ɖo kplamɛbo lɔ mɛ. Wo hɛn efuzowo, kadigbanwo koɖo ahwawanuwo do alɔmɛ. ⁴ Ci yi Yesu nya enu ciwo pleŋ yi gbɔgbɔ a jɔ do ji ɔ, e zɔnva ŋkɔ nɔ wo yi biɔ wo se mɔ: « Mɛ yi mi jijiɔ ɔ ? » ⁵ Wo doŋci nii mɔ« Yesu Nazalɛtitɔ lɔ jijɔ yi mi le.» Eyi Yesu nu nɔ wo mɔ: « Enyɛ yɔ » Yuda, ci yi sɔ sasa nɔ wo le enɔtɔxu koɖo wo. ⁶ Hwenu yi Yesu nu nɔ wo mɔ eye yɔ ɔ, sɔja lɔwo teyi godu yi juin je nyigban. ⁷ Yesu gbe trɔ yi biɔ xo se ke mɔ:« Mi jijiɔ yi mi le ɔ? » Wo ɖoŋci nii mɔ:« Yesu Nazalɛtitɔ lɔ jijiɔ yi mi le.» ⁸ Eyi Yesu ɖoŋci nɔ wo mɔ: « Ŋ nui nɔ mi vayi vɔ mɔ enyɛ yɔ. Nɔ e nyi kpɔ mɔ enyɛ jijiɔ yi mi le ɔ, mi tashi amɛ kpɛtɛwo nɔ wo a yi.» ⁹ E nu nɛnɛ nɔ enyɔ ci e nu vayi a sɛŋ eŋ jɔ. E nu mɔ: « Ŋ de bu amɛɖekpokpui le amɛ ciwo yi e sɔ ŋ mɛ go.» ¹⁰ Dekpui ɖeka le siwo Piyɛ shi hwenɔnu. E ɖii toi yi sɔ kpa ɖushimɛ to nɔ avɔsatɔ gangantɔ dɔwavi. Wo yɔnɔ edɔwavi lɔ mɔ Malikisu. ¹¹ Vɔ ɔ, Yesu nu nɔ Piyɛ mɔ: « sɔ ao dekpui do akpo mɛ. E bubuɔ mɔ ŋ d'a nu efunkpekpe kɔpu ɖɔɖɔ ci yi Ada mɔ enyɛ le nu yɔ go a? » ¹² Eyi sɔjawo hwakɔn lɔ koɖo wowo ŋkɔnɔtɔ sɔkpenɔ Yuɖatɔwo gawo dɔkpɛga lɔwo le Yesu yi blɛɛ. ¹³ Wo kpɔɛ yi hani gbɔ doŋkɔ. Hani nyi kayifu ashiɛtɔ. Kayifu yɛ nyi avɔsatɔ gangantɔ xwenɔwe. ¹⁴ Kayifu lɔ yi ɖo aɖaŋ nɔ Yudatɔwo gawo vayi mɔ nɔ amɛ kuɖeka ku do jukɔn lɔ pleŋ ta ɔ, yewo ji sɔwu ci yi jukɔn lɔ pleŋ a vɔ. ¹⁵ Siwo Piyɛ koɖo nukplanvi bu kplɔ Yesu do. Avɔsatɔ gangantɔ lɔ jeshi nukplavi eɖetɔ lɔ ɖɛ. E yi na tado yi yɛ sɛn eŋ ɖo avɔsatɔ gangantɔ lɔ gbogbu mɛ kodo Yesu. ¹⁶ Vɔ ɔ, Piyɛ ci xexenu le axwe lɔ gbonu. Eyi nukplavi eɖetɔ lɔ, ci yi avɔsatɔ gangantɔ lɔ jeshi ɖɛ, to va agbo lɔ nu yi xo nuxu koɖo nyɔnu ci yi agbonugla lɔ yi kplɔ Piyɛ ɖo gbogbu lɔ mɛ. ¹⁷ Nyɔ nɔ, edɔwavi ci yi nyi agbanugla lɔ biɔPiyɛ se mɔ:« Eo can, d'e le ŋsu lɔ nukpaviwo mɛ ba? » Piyɛ ɖoŋci nii mɔ« Oo, ŋ le wo mɛ go.» ¹⁸ Vuvɔ wawa. Eyi edɔwavi lɔwo koɖo dɔkpɛga lɔwo bɔ ezo yi bɔdo gbɔ keŋ yi xuixuiɔ. Piyɛ can le wo mɛ yi xuxuɔ ezo lɔ koɖo wo. ¹⁹ Avɔsatɔ gangan va biɔ enyɔ Yesu se sɔsɔ yi nukpaviwo koɖo enu ci yi e kplakpla amɛwo nu. ²⁰ Yesu ɖoŋci nii mɔ: « Ŋ kplanɔ enu amɛshamɛ agbaŋgba. Ŋ kplanɔ enu amɛwo tɛgbɛɛ le Mawusɛnxuwo koɖo le Mawuxwe mɛ afi ci yi Yudatɔwo pleŋ bɔnɔ do. Ŋ de nu enyɔ ɖe le bebemɛ go. ²¹ Nyi yi jɔ yi e va biɔbiɔ enyɔ ŋ se ɔ? Biɔ amɛ ciwo yi senɔ anyi nyɔwo se. Wowo jeshi enu ci nu yi ŋ xo nuxu sɔsɔ nɔ wo nyuiɖe» ²² Kaka Yesu a nu nɛnɛ vɔ, dɔkpɛga ɖeka ci yi le enɔtɔxu lɔ xo etɔmɛ nii yi nu nii mɔ: « Ahan yi a ɖo enyɔ lɔ nu nɔ avɔsatɔ lɔ nɛnɛ a? » ²³ Yesu ɖoŋci nɔ dɔkpɛga lɔ mɔ: « Nɔ nuxu ɔ, na dre enyɔ ci ŋ nu yi wa afɛn nɔ ŋ. Vɔ nɔ e nyi kpɔ mɔ wa adaŋ xo nuxu ɖee, ŋɖe taɖo yi e xo ŋ do ɔ? » ²⁴ Gahunnɔmɛ ɔ, Yesu gbe kpɔtɔ le blabla nɛnɛ yi Hani doi ɖaɖa avɔsatɔ gangan, kayifu. ²⁵ Hwenɔnu ɔ, simɔ Piyɛ ci enɔtɔnu yi xuxuɔ ezo. Eyi wo biɔɛ se mɔ: « Eo can, d'e le ŋsu lɔ nukplaviwo me ba? » Vɔ Piyɛ mɔ enyɛ lɔ yi nu nɔ wo mɔ: « Oo, ŋ le wo mɛ go» ²⁶ Avɔsatɔ gangantɔ lɔ dɔwavi ɖeka ci yi ba ŋsu ci yi Piyɛ kpa eto nɔ vayi biɔ Piyɛ se mɔ: « ²⁷ Vɔ ɔ, Piyɛ gbe mɔ enyɔ lɔ ke yi kaka a nu ahan vɔ, koklo ɖeka ɖe atɔ. ²⁸ Le i godu ɔ, wo kplɔ Yesu sɔso kayifu nɔxu lɔ mɛ sɔyi ekanjikpɔtɔ gbɔ nyidin kucukucu. Vɔ ɔ, Yuɖatɔwo de ɖo ekanjikpɔtɔ nɔxu lɔ mɛ go. Ɖo wo a va xo edji yi wo d'a sɛn eŋ a va ɖu Atadodoamɛxwe lɔ nuɖuɖu go. ²⁹ E yi na taɖo yi Pilati to va kpɔ wo le xexenu yi biɔ wo se mɔ: « Ŋɖe hwɛ yi mi dodoɔ nɔ ŋsu cɛ?» ³⁰ Wo ɖoŋci nii mɔ: « Nɔ ŋsu lɔ de nyi enubaɖawatɔ go ɔ, mi d'a kplɔɛ vɛɛ nɔ ewɔ go.» ³¹ Eyi Pilati nu nɔ wo mɔ:« Miwoŋtɔwo mi kpɔɛ yi a yi ɖo kojo kodoi do lehan yi miwo se nui do nɛnɛ ji.» Yuɖatɔwo ɖoŋci nɔ Pilati mɔ:« Mi de ɖo acɛ ci yi mi a sɔ wu amɛ go.» ³² Wo na ɖoŋci lɔ yi ahan nɔ nɛnɛ ɔ, enyɔ ci yi Yesu nu sasa yi sɔ dre eku ci yi a ku mɛ a kpɔ emɔ a va mɛ. ³³ Eyi Pilati trɔyi gbogbu lɔ mɛ keŋ yi dɔ wo kplɔ Yesu vɛ nii yi e biɔɛ se mɔ:« Ewɔ yi nyi Yudatɔwo fiɔ a ?» ³⁴ A sɔ ɖoŋci nii ɔ, Yesu biɔɛ se mɔ: « Ewɔŋtɔ yi bu tamɛ kpɔ yi tɔ enyɔ hunnɔ biɔbiɔ ŋ se a alo amɛ buwo yi nu anyi nyɔ nɔ awɔ a? » ³⁵ A sɔ ɖoŋci nɔ Yesu ɔ, Pilati biɔɛ se mɔ: « Yudatɔ yi ŋ nyi a? Awu jukɔn mɛtɔwo koɖo avɔsatɔwo gawo yi va sanma ewɔ nɔ ŋ. Ŋɖe yi e wa ɔ? » ³⁶ Yesu ɖoŋci nii mɔ: « Anyi fiɔɖuxu de so xexe cɛ mɛ go. Nɔ e nyi kpɔ mɔ xexe cɛ mɛ yi e so sa ɔ, anyi dɔwaviwo a wa ahwa do enu nɔ ŋ yi a xe emɔ yi wo d'a sɔ ŋ doashi nɔ Yuɖatɔwo gawo go. Vɔ ɔ, any fiɔɖuxu de so nyigban cɛ ji elɛtɔxu go.» ³⁷ Eyi Pilati va biɔɛ se mɔ:« A nyi efiɔ yi e nyi ŋ?» Yesu ɖoŋci nii mɔ: « Ewɔ yi nuiɔ: efiɔ ŋ nyi. Wo ji ŋ yi ŋ va xexe cɛ mɛ a va ɖe kunu sɔsɔ nyɔnɔnui lɔ nu. Amɛ ciwo pleŋ yi nyi nyɔnɔnui lɔ mɛwo ɖonɔ eto anyi nyɔwo. ³⁸ Pilati biɔɛ se mɔ:« Ŋɖe yi nyi nyɔnɔnui lɔ lɔ?» Ci yi Pilati biɔ enyɔ hunnɔwo Yesu se ɖegbɔ ɔ, e to le gbogbu lɔ mɛ yi va xexenu. E gbe va kpɔ Yuɖatɔwo ke yi nu nɔ wo mɔ:« Ŋ de kpɔ afɛn ɖe le ŋsu cɛ nu, ci yi a na yi na do ehwɛ nii go. ³⁹ Vɔ ɔ, le miwo kɔnuwo mɛ ɔ, ŋ jonɔ gakpamɛtɔ ɖeka, nɔ mi ɖuɖuɔ Atadodaomɛxwe. Ci yi e le nɛnɛ ɖee, mi ji mɔ ma jo Yuɖatɔwo fiɔ nɔ mi a ?» ⁴⁰ Wo do axwa ji ɖoŋci nii mɔ:« Oo, amɛ hunnɔ yi a jo go! Balabasi yi a jo nɔ mi!» gankegan ɔ, e nyi flafinɔ gangan yi Balabasi lɔ trɔ nyi.