¹ Ci yi Yesu nu eŋyɔ hunnɔwo nɔ wo ɖegbɔ nɛnɛ ɔ, e ɖe ekɔ kpɔ eji yi nu mɔ: « Eda, ega lɔ xo. Do asɛ Evio klɛnklɛn gangan lɔ nɔ Evio can a doasɛ aotɔ. ² E na acɛ ji do agbetɔwo kpeŋ ji nɔ a na agbemavɔ amɛ ciwo yi e sɔ doashi nii. ³ Agbemavɔ lɔ gɔnmɛ yi nyi kpɔ mɔ wo a Jeshi ao, Mawu adodui kuɖeka lɔ yi a gbe jeshi Yesu kliso amɛ ci yi e dɔ ɖaɖa lɔ. ⁴ Ŋ doasɛ lɔ ji. Ŋ ɖe egbɔ edɔ ci yi e ɖo nɔ ŋ lɔ vɔ. ⁵ Ecɛyɛ ɖe, Eda, trɔ a vɔ klɛnklɛn gangan ci yi le ŋ shi sasa le eo gbɔ gbɔxwe yi xexe lɔ va jɔ nɔŋ. ⁶ Ŋ doasɛ amɛ ci yi e nyi nɔ amɛ ciwo yi e sɔ doashi nɔ ŋ le xexe lɔ mɛ. Ao mɛwo yi wo nyi, e sɔ wo doashi nɔ ŋ yi wo wa do ao nyɔ ji. ⁷ Eviɛɖe, wo va nya mɔ enu ciwo pleŋ yi e na ŋ ɔ, eo gbɔ yi wo so. ⁸ Ɖo ɔ, ŋ nu enyɔ ciwo yi e nu nɔ ŋ nɔ wo yi wo xɔ wo wo va do jeshi mɔ eo gbɔ yi ŋ so yi va nyao xɔɛ ji se mɔ eo yi dɔ ŋ ɖaɖa. ⁹ Ŋ ɖeɖeɔ kuku nɔ eo do eta nɔ wo ŋ de ɖedeɔ kuku do eta nɔ amɛ ciwo yi nyi xexe lɔ mɛtɔwo go. Vɔ ɔ, ŋ ɖeɖeɔ kuku do eta nɔ amɛ ciwo yi e sɔ do alɔmɛ nɔ ŋ. Ɖo ɔ, ao mɛwo yi wo nyi. ¹⁰ Anyi nuwo pleŋ tɔo. Nɛnɛke ao nuwo pleŋ nyi kinyɛ nɛnɛ sɔ todo wo mɛ ɔ, anyi klɛnklɛn gangan lɔ zezeɔ. ¹¹ Ŋ de gbe le xexe lɔ mɛ go vɔ ɔ, wowo le mɛ. Eviɛ ɔ, ŋ gbɔgbɔ eo gbɔ. Edanyɛ kɔkɔɛ, sɔ ao nyikɔ ci yi e na lɔ hɛn wo nɔ wo a sɛn eŋ wa ɖeka shigbe lehan yi enyɛ koɖo eo wa ɖeka do nɛnɛ. ¹² Hwenu yi ŋ le koɖo wo ɔ, ŋ dɔ ao cɛ yi e na ŋ lɔ hɛnhɛn wo. Ŋ cɔn alɔ wo ji yi ɖekɛ de bu le wo mɛ sɔzeto amɛ ci yi ɖo a yi trɔntrɔnmɛ nɔ enyɔ ci yi wo ŋwlɛ ɖɛ do Mawu nyɔ wemawo mɛ a jɔ nu go. ¹³ Ecɛyɛ ɔ, gbɔgbɔ eo gbɔ. Vɔ ɔn ŋ nunuɔ enyɔ cɛwo hwenu yi ŋ gbe kpɔtɔ le xexe lɔ mɛ nɔ jijɔ ci yi nanɔ amɛwo, a nɔ wo mɛ blebu. ¹⁴ Ŋ nu ao nyɔ nɔ wo yi xexe lɔ mɛtɔwo gbe eŋua nɔ wo. Ɖo ɔ, wo de nyi lɔ mɛtɔwo go shigbe lehan yi ŋ de nyi xexe lɔ mɛtɔ go do nɛnɛ. ¹⁵ Ŋ de biɔbiɔ so eo gbɔ mɔ eo le ɖe wo toi le xexe lɔ mɛ go. Vɔ ɔ, hwɛn eta nɔ wo le Legba shi mɛ. ¹⁶ Wo de nyi xexe lɔ mɛtɔwo go shigbe lehan yi ŋ de nyi xexe lɔ mɛtɔ go do nɛnɛ. ¹⁷ Na nɔ wo a nyi tɔo blebu sɔ todo nyɔnɔnui lɔ mɛ. Ao nyɔ yi nyi nyɔnɔnui lɔ. ¹⁸ Ŋ dɔ wo ɖaɖa xexe lɔ mɛ shigbe lehan yi e dɔ ŋ ɖaɖa xexe lɔ mɛ do nɛnɛ. ¹⁹ Ŋ sɔ enyɛɖeki jojoɔ nɔ eo blebu do wowo ta nɔ wowo can a nyi tɔo sɔ todo nyɔnɔnui lɔ mɛ. ²⁰ Ŋ de ɖeɖeɔ kuku nɔ eo do wo ɖekɛ ta go. Vɔ ɔ, ŋ ɖeɖeɔ kuku nɔ eo hɛnnɛ do eta nɔ amɛ ciwo yi a va nu ao nyɔ nɔ yi wo a xɔɛ ji se. ²¹ Ŋ ɖeɖeɔ kuku nɔ eo nɔ na na nɔ wo a wa ɖeka. Ada, wo le wa ɖeka kodo mi shigbe lehan yi e le ŋ mɛ yi enyɛ can ŋ le eo mɛ do nɛnɛ. Hwenɔnu ɔ, xexe lɔ mɛtɔwo e xɔɛ ji se mɔ eo yi dɔ ŋ ɖaɖa. ²² Ŋ sɔ klɛnklɛn gangan ci yi e na ŋ sɔ na wo nɔ wo a wa ɖeka shigbe lehan yi enyɛ koɖo eo le ɖeka do nɛnɛ. ²³ Ŋ le agbe le wo mɛ yi eo le agbe le enyɛ mɛ nɔ wo a wa ɖeka vɛ blebu. Gahunnɔmɛ ɔ, xexe lɔ mɛtɔwo a nya mɔ eo yi dɔ ŋ ɖaɖa yi e lɔn wo shigbe lehan yi e lɔn ŋ do nɛnɛ. ²⁴ Ada, e sɔ amɛ lɔwo na ŋ. Ŋ ji mɔ afi ci yi ŋ le ɔ, wowo can a nɔ enɔtɔxu lɔ hɛnnɛ. Nɛnɛ ɔ, wo a kpɔ anyi klɛnklɛn gangan lɔ. Klɛnklɛn gangan ci yi e na ŋ. Ɖo ɔ, e lɔn ŋ xoxoxo gbɔxwe yi va wa xexe lɔ. ²⁵ Ada jɔjɔɛ, xexe lɔ mɛtɔwo de jeshi eo ɖɛ go. Vɔ enyɛ yɛ ɔ, ŋ jeshi eo yi amɛ cɛwo nya mɔ eo yi dɔ ŋ ɖaɖa. ²⁶ Ŋ doasɛ emɛ ci yi e nyi nɔ wo do yi. Nɛnɛ ɔ, enyɛŋtɔ can ma le wo mɛ.»