¹ Yesu nu nɔ yi nukpaviwo mɔ : «Enye yi nyi vɛnci adodui lɔ yi edamyɛ yi nyi vɛncikanjikpɔtɔ lɔ. ² Alɔvi ɖekpokpoi ci yi le ŋ nu yin de sɛnsɛn eku go ɔ, e soinu soi Vɔ alɔvi ci yi sɛnsɛn eku ɔ e drɛɛni do mɔ nɔ a gbe sɛn do ji. » ³ Miwo ɔ, enyɔ ciwo yi ŋ nunuɔ nɔ mi klɔ edyiwo le mi nu ɛ vɔ yi mi mɛ. ⁴ Mi kpɔtɔ a wa ɖeka koɖo ŋ sigbe lehan yi ŋ wa ɖeka koɖo mi do nɛ. Acitɔvi ɖe d'an sɛn ɛŋ eku yiɖekɛ nɔ de ca do oci lɔ nu go. Nɛnɛke yi e le do nɛ mɔ mi da sɛn en sɛn eku nɔ mi de ca do ŋ nu go. ⁵ Enye yi nyi vɛnci lɔ. Miwo nyi alɔvi lɔwo. Amɛ ci ye ŋ mɛ shigbe lehan yi ŋ le eyɛ mɛ do nɛ a sɛn eku sugbɔ. Enyɛ manɔ me ɔ mi d'asɛn eŋ a wa enuɖe go. ⁶ Ameci yi de le ŋ mɛ go ɔ, wo a soi dɔnkpe shigbe lehan yi wo sonɔ aciblɔviwo dɔŋkpe do yi wo a xu yi wo a lɔ kɔ ɖaɖa ezo mɛ yi wo a bi do. ⁷ Nɔ e nyi kpɔ mɔ mile ŋ mɛ yi anyi nyɔwo ciciɛ mi mɛ , mi blɔ enu ci dro mi. Na sɔ na mi. ⁸ Nɔ mi sɛn eku sugbɔ a ɖe Edanyɛ klɛnklɛn gangan lɔ doasɛ. Nɛnɛ ɔ amewo a nya mɔ miwo nyi anyi nukplaviwo nyao. ⁹ ŋ lɔn mi shigbe lehan yi Ɛdanyɛ lɔn ŋ do nɛ. Mi nɔ anyinɔnɔ do lɔnlɔn lɔ mɛ. ¹⁰ Nɔ mi wa do anyi sewo ji ɔ, mi a nɔ anyinɔnɔ do lɔnlɔn lɔ mɛ shigbe lehan yi ŋ wa do Edanyɛ sewo ji yi leɛyi lɔnlɔn mɛ do nɛnɛ. ¹¹ ŋ nu ahan nɔ mi nɔ eji a jɔ mi shigbe enye nɛnɛ yi nɔ jijɔ ci yi mi kpɔkpɔ lɔ a nyi blebu. ¹² Anyi se nɔ mi yi byi kpɔ mɔ : mi lɔn miwonɔnɔwo shigbe lehan yi ŋ lɔn mi do nɛnɛ. ¹³ Lɔnlɔn fɔ gangan bu ɖe de gbe li yi amɛɖe a sɛn eŋ a ɖe ɖaɖa yi xlɔwo gbɔ sɔwu mɔ ci yi a sɔ yiɖekijoyi wo a wui do yi xlɔwo ta go. ¹⁴ Nɔ mi wawa do anyi gbeɖeɖewo ji ɔ mi a nyi anyixlɔwo. ¹⁵ ŋ de gbe yɔyɔ mi mɔ edɔwaviwo go. Ɖo ɔ, edɔwavi ɖe nyanɔ enu ciwo yi eyi xwetɔ wanɔ go. ŋ yɔyɔ mi mɔ anyi xlɔwo. Ɖo enu ciwo plen yi ŋ kpla le edanyɛ gbɔ ɔ, ŋ doasɛ wo nɔ mi. ¹⁶ D'e nyi mɔ miwo yi can ŋ go Enyɛ yi can mi yi dɔ mi ɖaɖa nɔ mi a sɛn eku nɔ miwo kusɛnsɛnwo ali ɖe. Nɛnɛ ɔ, Eda a sɔ enu ciwo pleŋ yi mi a blɔɛ te anyi nyikɔ mɛ na mi. ¹⁷ Egbe ci yi ŋ ɖeɖe ɔ nɔ mi yi nnyi kpɔ mɔ mi a lɔn miwonɔnɔwo » ¹⁸ Yesu nu nɔ yi nukplaviwo lɔ : «Nɔ xexe lɔ mɛtɔwo gbe eŋua nɔ mi ɔ, mi nya mɔ wo gbe eŋua nɔ enyɛ ɖoŋkɔ nɔ mi.» ¹⁹ Nɔ e nyi kpɔ mɔ xexe lɔ mɛtɔwo yi mi nyi sasa ɔ, xexe lɔ mɛtɔwo a lɔn mi .Do wowotɔ yi mi do akpo nɔ xexe lɔ mɛtɔwo yi mi de gbe nyi xexe lɔ mɛtɔwo go. E yi na taɖo yi xexe lɔ mɛtɔwo gbe eŋua nɔ mi. ²⁰ Mi ɖo enui enyɔ ci yi ŋ nu nɔ mɔ mi ji mɔ : Edɔwavi de wunɔ egan eyi xwetɔ go. Nɔ e nyi kpɔ mɔ xexe lɔ mɛto lɔwo ci yomɛ wo a ci yomɛ nɔ mi hɛnnɛ Nɔ wo wa do anyi nukplamɛnyɔwo ji ɔ, wo a wa do miwo nukplamɛnyɔwo ji hɛnnɛ. ²¹ Vɔ ɔ wo a wa enu hunnɔwo plɛŋ kodo mi do enyɛ taɖo. Ɖo wo de jeshiamɛ ciyi dɔ ŋ ɖada ɖe go. ²² Nɔ e nyi mɔ ŋ de va yi va xo nuxu nɔ wo sasa go ɔ, kpo enuvɔn ɖekɛ d'a le ekɔ nɔ wogo. Vɔ ecɛɖɛye ɔ, kuku ɖe de li yi wo a va ɖɛ ɖo eta nɔ wowo nuvɔn go. ²³ Amɛ ci yi yi gbe eŋua nɔ ŋ ɔ egbe eŋua nɔ Edanyɛ hɛnnɛ. ²⁴ Nɔ ŋ de va wa edɔ ciwo yi amɛ bu ɖekpokpoiu de wa kpɔ gbeɖe go le wo gbɔ sasa go ɔ, kpɔ enuvɔn ɖe d'a le ekɔ nɔ wo go. Vɔ ecɛɖɛyɛ: wo kpɔ edɔ ciwo yi ŋ wa kɛn yi trɔ yi gbe eŋua nɔ enyɛ koɖo Eɖanyɛ. ²⁵ Vɔ ɔ enu lɔ jɔjɔ ahan nɔ enyɔ ci yi wo nu do wowo se wemawo mɛ a sɛn eŋ jɔ. Wo nu mɔ ! Wo gbe eŋua nɔ ŋ sansan » ²⁶ «Na dɔ kpedonutɔ lɔ ɖaɖa mi. E yi nyi nyɔnɔnui gbɔngbɔn ci yi sonɔ Eda gbɔ. Nɔ e va ɔ, a va ɖe anyi kunu nɔ mi. ²⁷ Eyi miwo can ɔ anyi kunu nɔ amɛwo. Ɖo ɔ, sɔso gɔnmɛjeje ɖii yi mi tɔ zɔnzɔn koɖo ŋ»