¹ E kpɔtɔ esɔ yi wo a ɖu atadodoamɛxwe lɔ yesu nya mɔ ega xo nɔ eye mɔ ye a so le xexe cɛ mɛ a yi yedaye gbɔ e lɔn yi mi ciwo yi le xexe lɔ mɛ yi kpɔtɔ lɔnlɔn wo kaka sɔyi vɔvɔnu. ² Yesu koɖo yinukpaviwo ɖuɖuɔ fiɛfi nu kaka hunnɔwocu ɔ legba sɔ do susu mɛ nɔ yuɖa simɔ ishikaliwɔti eviɛ mɔ yi le vayi sa yesu. ³ Yesu nya mɔ eda na acɛ eye do enuwo pleŋ ji egbe nya hɛnnɛ mɔ Mawu gbɔ yi ye so yi va yi Mawu gbɔ yi ye gbe trɔyiyiɛ. ⁴ Eyi ci yi wo le enu lɔ ɖuɔɔ e so je ete yi ɖe awuvlaya ci yi e do do awu ji da keŋ yi sɔ avɔn ɖeka sɔ sa do alinji. ⁵ Le i goɖu ɔ e ku eshi do yawavi ɖeka mɛ yi tɔ afɔwo klɔklɔ nɔ nukplavi lɔwo keŋ yi sɔ avɔn ci yi e sɔ sa do alinji lɔ cucuɔ afɔ lɔwo. ⁶ Ci yi e va ɖo simɔ Piyɛ ji ɔ yɛ nu nii mɔ axwetɔ eo yi a klɔ afɔwo nɔ ŋ a. ⁷ Yesu ɖoŋci nii mɔ de se enu ci yi ŋ wawa lɔ gɔnmɛ hɔɖe go vɔ ɔ a va mɔ ŋjemɛ. ⁸ Piyɛ ɛnu nii mɔ gbeɖe a klɔ afɔwo nɔ ŋ go yesu ɖoŋci nii mɔ nɔ ŋ de klɔ afɔwo nɔ eo oɔ a nyi enyɛ koɖo eo de gbe ɖo enyɔ ɖe go. ⁹ Eyi simɔ Piyɛ va nu nii mɔ ci yi e le ahan ɖe axwetɔ ŋgbe klɔ afɔ ɖekɛ nɔ ŋ go vɔ ɔ klɔ alɔ wo koɖo eta nɔ ŋ hɛnnɛ. ¹⁰ Yesu ɖoŋci nii mɔ amɛ ci yi le eshi vɔ ɔ afɔwo ɖekɛ yi e zan mɔ a klɔ do e mɛ sɔso eji vayi gɔnmɛ miwo ɔ mi mɛ gankegan de nyi amɛ pleŋ yi mɛ go. ¹¹ Yesu jeshi amɛ ci yi a va sɛɛ ɖɛ nyuiɖe e yi na taɖo yi e nu mɔ mi pleŋ de mɛ go. ¹² Hwenu yi yesu klɔ afɔwo nɔ wo ɖegbɔ ɔ e trɔsɔ yi wuvlaya do yi trɔvayi afi ci yi wo a ɖu enu le keŋ yi biɔ wo se mɔ mi mɔŋ enu ci yi ŋ wa nɔ mi mɛ a. ¹³ Mi yɔyɔ ŋ mɔ cicagan koɖo axwetɔ miwo nyɔ jɔ ŋ nyi cicagan koɖo axwetɔ nyao. ¹⁴ Ci yi e le ahan ɔ nɔenyɛ ci yi nyi axwetɔ koɖo cicagan klɔ afɔwo nɔ mi ɔ miwo can ɖo a klɔnɔ afɔwo nɔ miwonɔnɔwo hɛnnɛ. ¹⁵ Kpɔwɛ yi e nyi yi ŋ na mi nɔ mi a kpɔdonu a wawa shigbe lehan yi ŋ wɛɛ nɔ mi do nɛ. ¹⁶ Le nyɔnɔnui mɛ ɔ ŋ nunuɔ nɔ mi mɔ gbe edɔwavi ɖe de wunɔ egan yi xwetɔ go yi amɛdɔdɔ ɖe de wunɔ egan amɛ ci yi dɔɛ ɖaɖa edɔgbe go. ¹⁷ Ecɛyɛ ɔ mi va jeshi enu hunnɔwo pleŋ enu yi nyɔ nɔ mi nɔ mi wa do woji. ¹⁸ Ɖe nyi mi pleŋ nu yi ŋ xoxoɔ nuxu sɔso ahan ho ŋ jeshi amɛ ciwo yi ŋ can ɖɛ vɔ ɔ e le mɔ enyɔ ci yi wo ŋwlɛ ɖɛ do Mawu nyɔ wemawo mɛ a jɔ wo ŋwlɛ ɖɛ mɔ amɛ ci yi ɖunɔ enu le agban kuɖeka mɛ koɖ ŋ can fɔn egu do ŋ ji. ¹⁹ Ŋ doŋkɔ yi nuinuiɛ nɔ mi yɛ gbɔxwe nɔ enu lɔ a va jɔ gahunɔmɛ nɔ e va jɔ ɔ mi a xɔɛ ji se mɔ ŋ nyi amɛ ci yi ŋ nyi. ²⁰ Le nyɔnɔnui mɛ ɔ ŋ nunuɔ nɔ mi mɔ amɛɖekpokpoi ci yi axɔ amɛ ci yi ŋ dɔ ɖaɖa xɔ enyɛ can eyi amɛɖekpokpoi ci yi a xɔ ŋ ɔ e xɔ amɛ ci yi dɔ ŋ ɖaɖa hɛnnɛ. ²¹ Hwenu yi yesu nu enyɔ hunnɔwo ɖegbɔ ɔ susu mɛ caka nii yi e ɖe mɛ nɔ yi nukplaviwo mɔ le nyɔnɔnui mɛ ɔ ŋ nunuɔ nɔ mi mɔ miwo domɛtɔ ɖeta a va sa ŋ. ²² Eyi nukplavi lɔwo tɔ wowonɔnɔwo gloglo kpɔ klan klan klan yi sɔbiɔɔbiɔ wowoɖekiwo se mɔ mi nu yi ye xoxoɔ nuxu sɔso. ²³ Nukplavi lɔwo domɛtɔ ɖeka amɛ ci yi yesu lɔnnɔ le wo mɛ nɔ anyinɔnɔ do axa nɔ yesu. ²⁴ Simɔ Piyɛ wa ŋkuivi nɔ nukplavi hunnɔ lɔ mɔ yi biɔ yesu se mɔ mi nu yi yɛ xoxoɔ nuxu sɔso mɛ. ²⁵ Eyi nukplavi hunnɔ lɔ go ɖaɖa yesu gbɔ yi biɔɛ se mɔ axwetɔ mi yi nyi amɛ lɔ ɔ. ²⁶ Yesu ɖoŋci nii mɔ na kan kpɔnnɔ yɛ a sɔ tɔ enutɔnu amɛ ci yi na sɔ jo nɔ ɔ e yi yɔ eyi e kan kpɔnnɔ lɔ yi sɔ tɔ enutɔnu keŋ yi sɔ jo nɔ yuda simɔ ishikaliwɔti eviɛ. ²⁷ Yuɖa xɔ kpɔnnɔ lɔ le i godu ɔ egba ɖo eji mɛ nii eyi yesu nu nii mɔ enu ci yi e ɖo a wa wɛɛ kaba. ²⁸ Amɛ ciwo yi le enu lɔ ɖuɔ koɖoi ɖekpokpoi de se enu ci taɖo yi e nunuɔ ahan nii do go. ²⁹ Ci e nyi yuɖa yi nyi ehojikpɔtɔ nɔ wo ɔ amɛ sugbɔ bu mɔ dɔ yi yesu dɔɛdɔɛ mɔ yi le yi xwle enu ciwo yi yewo a va sɔ ɖu exwe lɔ yɔ alo yi le na enuɖe ayanɔwo yɔ. ³⁰ Ci yi yuɖa xɔ kpɔnnɔ lɔ ahan ɔ e to zeɖeka ezan do. ³¹ Ci yi yuɖa to ɖegbɔ ɔ yesu nu mɔ ecɛyɛ ɔ Mawu ɖe agbetɔvi lɔ klɛnklɛn gangan doasɛ yi sɔ sɔto eyɛ mɛ ɔ e ɖe yiŋtɔtɔ can doasɛ. ³² Eyi nɔ wo ɖe Mawu klɛnklɛn gangan doasɛ sɔto ji ahan ɔ Mawu can a gbe ɖe yi klɛnklɛn doasɛ sɔto ji sabaaɖe ŋtɔkpu yi a doasɛ i. ³³ Evinyɛnwo hwenu kleŋ ɖe mɛ yi na gbe nɔ mi gbɔ sɛn mi a va ji ŋ vɔ ɔ nunuɔ nɔ mi ecɛyɛ hɛnnɛ sgigbe lehan yi ŋ nui nɔ yuɖatɔ kpɛtɛwo do nɛ mɔ mi da sɛn eŋ a va afi ci yi ŋ yiyiɛ go. ³⁴ Ŋ le gbeta yoyu nana mi mɔ mi lɔn miwonɔnɔwo mi ɖo a lɔn miwonɔnɔwo shigbe lehan yi ŋ lɔn mi do nɛ. ³⁵ Nɔ mi lɔn miwonɔnɔwo ɔamɛshamɛ a nya mɔ anyi nukpaviwo yi mi nyi. ³⁶ Simɔ Piyɛ biɔ yesu se mɔ axwetɔ fiege yi e yikɔ ɔ yesu ɖoŋci nii mɔ da sɛn eŋ a kplɔ ŋ de yɛ yi a yi afi ci yi ŋ yikɔ go vɔ e jinjin boo ɔ a va kplɔ ŋ do. ³⁷ Piyɛ ɖoŋci yi biɔɛ se mɔ axwetɔ nyi yi na taɖo yi ŋ da sɛn eŋ a kplɔ eo do yɛ goɔ ŋ le egbesɔsɔ a sɔ anyi gbe ke ku do ao ta. ³⁸ Yesu ɖoŋci nii mɔ e le egbesɔsɔ a sɔ ao gbe ke eku eku do eta nɔ ŋ nyao a le nyɔnɔnui mɛ o ŋ nunuɔ nɔ eo mɔ gbɔxwe yi koklo a ɖe atɔ ɔ a nu zetɔn mɔ ye de jeshi enyɛ ɖɛ go.