¹ Ci yi atadodoamɛxwe lɔ kpɔtɔɔ ŋkeke amadɛn ɔ yesu vayi Betani kɔxwimɛ afi ci yi Laza ci yi efɔn sɔso ekuwodi vayi nɔnɔ. ² Wo ɖa enu nɔ yesu le nɔtɔxu sɔ enuɖuɖu nɔ wo Laza le amɛ ciwo yi ɖuɖuɔ enu koɖo yesu mɛ. ³ Eyi Mali sɔ aminhwɛnte ehovevitɔ lita mamu ɖeka sɔ kodo afɔwo ji nɔ yesu le i godu ɔ e sɔ yi ɖawo sɔ cucu afɔwo nii yi amihwɛnte lɔ hwɛnhwɛn gbando exɔ lɔ mɛ. ⁴ Yesu nukplaviwo domɛtɔ ɖeka yuda Ishikaliwɔti ci yi a va sa yesu nu mɔ. ⁵ Nyi yi na taɖo yi wo de sa amihwɛnte lɔdo eho gajunsanŋditɔn (300) keŋ a sɔ eho lɔ ma nɔ ayanɔwo o ɔ. ⁶ Ɖe nyi kpɔ mɔ ɖo yuɖa ɖoɖoɔ eŋui ayanɔwo taɖo yi nunuɔ nɛnɛ go vɔ ɔ ci yi e nyi flafinɔ yi e nyi taɖo yi e nunuɔ nɛnɛ e yi hɛnnɔ ehogba yi nɔ wo sɔ eho ɖe ɖo gbɔ ɔ efinɔ e nu. ⁷ Vɔ ɔ yesu nu do nu nii mɔ Tashi nyɔnu lɔ edoŋkɔ yi shi amihwɛnte nɔ ŋ sɔ daɖɛ nɔ anyi ɖyidyigbe. ⁸ Wamɛnɔwo a kpɔtɔ a le mi gbɔ tɛgbɛɛ vɔ enyɛ yɛ ɔ ŋ da le mi gbɔ tɛgbɛɛ go. ⁹ Yuɖatɔ sugbɔ se mɔ yesu le Betani kɔxwimɛ eyi wo vayi nɔtɔxu de nyi mɔ yesu ɖekɛ taɖo yi wo va do go vɔ ɔ wo va a gbe va sɔ kpɔ Laza ci yi yesu fɔn sɔso ekuwodi lɔ. ¹⁰ Gahunnɔmɛ ɔ avɔnsatɔwo gawo va sɔ gbeta mɔ yewo a wu Laza hɛnnɛ. ¹¹ Ɖo ɔ yuɖatɔ sugbɔ sosoɔ gbeɖɛ wo ɖɛ do Laza taɖo yi va xɔxɔ yesu ji se. ¹² Le i ŋkegbu ɔ amɛ ciwo yi lɔ ahwa a zeluzalɛmu nɔ atadodoamɛxwe lɔ ɖuɖu se mɔ yesu gbɔgbɔ jugan lɔ mɛ. ¹³ Eyi wo ji bayawo yi to sɔso jugan lɔ mɛ a va do ego yiyi dodoɔ axwa mɔ kanfukanfu nɔ Mawu shicu nɔ amɛ ci yi gbɔgbɔ le tɔhonɔ nyikɔ mɛ shicu nɔ Israyɛli fiɔ lɔ. ¹⁴ Yesu kpɔ esɔkete hwɛhwɛ ɖeka yi la ji shigbe lehan yi wo ŋwlii do Mawu nyɔ wema mɛ ɖaɖɛ do nɛ mɔ. ¹⁵ Siyɔn jugan ŋgbe vɔn go kpɔ ɖa awu fiɔ gbɔgbɔ e nɔ anyinɔnɔ do esɔkete ashitɔ hwɛhwɛ ɖeka ji. ¹⁶ Ɖoŋkɔ ɔ yesu nukplaviwo de se enu ci yi jɔjɔ gɔnmɛ go vɔ hwenu yi Mawu va ɖe yesu klɛnklɛn gangan lɔ doasɛ ɔ wo va ɖo eŋui mɔ Mawu nyɔ wemawo doŋkɔ yi nu enŋɔ hunnɔwo sɔso nu yi enyɔ lɔwo ji yi ahwakɔn lɔ wa do. ¹⁷ Amɛ ciwo pleŋ yi bɔdo yesu gbɔ gbecigbe yi e yɔ Laza yɔdu mɛ yi fɔin sɔso ekuwadi ɖeɖeɔ kunu nii nɔ amɛwo. ¹⁸ Enu ci yi na taɖo yi amɛwo lɔ ahwa va do ego yesu nɛ ɖo wo se mɔ yi wa enujiŋ hunnɔ. ¹⁹ Eyi falisitɔwo va tɔ nunu le wowonɔnɔwo mɛ mɔ mi de kpɔ mɔ mi da sɛn eŋ a wa enuɖe go ba Amɛshamɛ nɛ kplɔɛ do. ²⁰ Glɛkitɔ ɖekawo can le amɛ ciwo yi va zeluzalɛmu a va sɛn Mawu le exwe lɔ ji mɛ. ²¹ Wo tegogo filipu ci yi so Bɛtisayida jugan mɛ le Galile kan mɛ yi nu nii mɔ mɛgan mi jijiɛ a kpɔ yesu. ²² Filpu vayi nui nɔ Anŋdre yi wo amɛve lɔ zɔn va sɔ yi nu nɔ yesu. ²³ Yesu doŋci nɔ wo mɔ ega lɔ xo hɔnnɔ mɔ Mawu a doasɛ agbetɔvi lɔ klɛnklɛn gangan. ²⁴ Le nyɔnɔnui mɛ ɔ ŋ nunuɔ nɔ mi mɔ eliku ekui kuɖeka a gbe kpɔtɔ a nyinyiɔ ekui kuɖeka nɔ ɖe je ekɔ mɛ yi nyinyɔ vɔ nɔ e nyinyɔ ɔ a va sɛn eku sugbɔ. ²⁵ Amɛ ci yi lɔnnɔ yi gbe ɖoɖu a va bui vɔ amɛ ci yi de lenɔ ebu nɔ yi gbe ɖoɖu le xexe mɛ goɔ liliɛ do ete ɖɛ nɔ agbemavɔ. ²⁶ Nɔ amɛɖe ji mɔ ye a nyi anyi dɔwaviɔ e ɖo a kplɔ ŋ do. nɛnɛ nɔ ŋ le afiɖe ɔ anyi dɔwavi lɔ a le nɔ tɔxu hɛnnɛ edanyɛ yi a va do bubu eduawavi lɔ nu. ²⁷ Yesu nu mɔ ecɛyɛ ɔ anyi susu caka enyɔ ci yi na n u yɛ ɔ nu na tɔ nunu mɔeda hwlɛn ŋ toi le vevesese egaxoxo cɛ mɛ a oo enuci taɖo yi ŋ va xexe lɔ mɛ do nɛ. ²⁸ Eda doasɛ do klɛnklɛn gangan nɔ agbetɔwo a kpɔ a kanfu ao nyikɔ eyi egbe ɖeka ɖyi sɔso jeŋkuisimɛ mɔ ŋ doasɛ i vɔ yi na gbe trɔ a gbe doasɛ i ke. ²⁹ Amɛ ciwo yi lɔ ahwa yi bɔdo nɔtɔxu yi se egbe lɔ ɖyiɖyi nu mu ejiɖezo ji do egbe amɛ buwo nunuɔ mɔ cikplɔtɔ ɖe yi xo nuxu nii. ³⁰ Vɔ ɔ yesu xɔ nuxu yi nu mɔ enyɛɛ taɖo yi egbe lɔ ɖyi do go miwo taɖo yi e ɖyi do. ³¹ Hwe lɔ nu sun eviyɛ mɔ Mawu a ɖo kojo nɔ xexe lɔ mɛtɔwo yi eviyɛ ɔ hwe lɔ nu sun mɔ Mawu a nya anyigban ji cɛkpatɔ lɔ soi. ³² Eyi hwenu yi Mawu a va kɔ ŋ sɔso anyigban a sɔyi eji ɔ na dɔn agbetɔwo pleŋ va enyɛɖeki gbɔ. ³³ Sɔ sɔto enyɔ nɔtɔwo mɛ ɔ yesu dredreɔ eku alɔkpa ci yi a ku mɛ. ³⁴ Ahwa ci yi bɔdo nɔtɔxu lɔ nu nɔ yesu mɔ mi se yi Mawu nyɔ wemawo nu mɔ klisolɔ a nɔ agbe tɛgbɛɛ le yi a wɛɛ a va nunuɔ wo a kɔ agbetɔvi lɔ do eji ɔ mi yi nyi agbetɔvi cɛtɔ lɔ ɔ. ³⁵ Yesu nu nɔ wo mɔ klɛnklɛn lɔ gbe kpɔtɔ le mi gbɔ sɔnanɔ egaxoxo kleŋ ɖe mi zɔn zɔnlin hwenu ji klɛnklɛn gbe kpɔtɔ kpɔkpɔ enu nɔ mi nɔ ŋgbe va do do mi zinfru kpata go do amɛ ci yi zɔnzɔn zɔnlin le zinfru mɛ de jenɔshi afi ci yi e yiyiɛ go. ³⁶ Kaka a va sɔsɛndo hwenu yi klɛnklɛn a kptɔ a le mi gbɔɔ mi xɔɛ ji se nɛnɛ ɔ mi a va trɔ klɛnklɛn eviɛwo. ci yi yesu nu enyɔ hunnɔwo ɖegbɔ ɔ e so yi vayi be do ahwankɔn lɔwo le afi jinjin ɖeka. ³⁷ Ci yi yesu wa jeshidu nu sugbɔ le ŋmɛ nɔ wo can ɔ wo de xɔɛ ji se go. ³⁸ Ahan yi enyɔ ɖeka ci yi Mawu ŋɛdotɔ ezayi nu daɖɛ va mɛ do nɛ e nu mɔ tɔhonɔ mi yin xɔ eŋɛ ci yi mi do yi wo se ji se ɔ mi yi tɔhonɔ doasɛ yi ŋsɛn nɔ ɔ. ³⁹ Mawu ŋɛdotɔ zayi gbe nu enu ci taɖo yi amɛ hunnɔ lɔwo de sɛn eŋ a xɔɛ ji se go hɛnnɛ mɔ. ⁴⁰ Mawu na mɔ wowo ŋkuviwo de kpɔkpɔ enu go e na yi wowo susu cu nɔ wowo ŋkuviwo ŋgbe kpɔ enu o yi nɔ wowo susu ŋgbe mɔŋje nunuɔ mɔ wo de trɔ ɖaɖa eye gbɔ nɔ ye a da edɔ nɔ wo o. ⁴¹ Ezanyi nu nɛnɛ ɖo e kpɔ yesu klɛnklɛn gangan lɔ yi xo nuxu sɔso nu. ⁴² Gankegan le yuɖatɔwo gawo ŋtɔwo mɛ can ɔ amɛ sugbɔ xɔ yesu jin se vɔ do falisitɔwo taɖo ɔ wo de ɖe mɛ agbaŋgba go do wo vɔnvɔn mɔ falisitɔwo a va nyza yewo toi le Mawusɛnxu lɔ. ⁴³ Wo lɔn mɔ agbetɔwo le kanfu yewo sɔwu ci yi Mawu a fanfu wo. ⁴⁴ Yesu do axwa yi nu mɔ nɔ amɛɖe xɔ ŋji se ɔ dé nyi enyɛ ji ji e xɔse go vɔ ɔ amɛ ci yi dɔ ŋ ɖaɖa ji yi e xɔse. ⁴⁵ Amɛ ci yi kpɔ ŋ kpɔ amɛ ci yi dɔ ŋ daɖa. ⁴⁶ Enyɛ ci yi nyi klɛnklɛn lɔɔ ŋ va xexe lɔ mɛ nɔ amɛɖekpokpoi ci yi a xɔ ŋ ji se ŋgbe ci zinfru mɛ go. ⁴⁷ Nɔ amɛe seseɔ anyi nyɔwo yi de sɔ wawa edɔ go ɔ de nyi kpɔ mɔ enyɛ yi ɖoɖoɔ kojo koɖoi go do ŋ de va kojo ɖogbe nɔ xexe go vɔ ɔ va ŋ va yi a va hwliin gan yɔ. ⁴⁸ Amɛ ci yi gbe ŋ yi de lɔn xɔxɔ anyi nyɔwo o ɔ e kpɔ enu ci yi a va ɖo kojo kojoi enyɔ ci yi ŋ nu a va ɖo kojo kodoi le ŋkeke vɔvɔ kpɛtɛkpɛtɛ lɔ ji. ⁴⁹ Ɖo le nyɔnɔnui mɛ ɔ ŋ de xo nuxu le enyɛɖe kishinu go vɔ ɔ eda ci yi dɔ ŋ ɖaɖa yi ɖe egbe nɔ ŋ sɔso enyɔ ciwo pleŋ yi ŋɖo a nu koɖo ciwo yi ŋ ɖo a kpla amɛ wo doashi nɔ ŋ. ⁵⁰ Eyi ŋ nya mɔ enu ci yi e dɔ mɔ wo le wa nanɔ agbemavɔ amɛ nɛnɛ ɔ enyɔ ciwo yi ŋ nunu ɔ ɔ ŋ nunuɔ wo shigbe lehan yi eda dɔ ŋ do nɛ.