¹ Ŋsu ɖeka ci yi wo yɔnɔ mɔlaza ledɔ e nɔnɔ Betani kɔxwi ci mɛ yi Mali koɖo nɔviɛ Mata nɔnɔ. ² Mali yi nyi nyɔnu ɖeka ci yi sɔ amihwɛnte kɔdo afɔwo ji nɔ axwetɔ yi sɔ yi ɖawo cucui. Mali lɔ nɔviɛ nyi Laza ci yi ledɔ. ³ Laza fofoɔ nyɔnu amɛve lɔwo dɔ amɛ ɖaɖa yesu gbɔ yi amɛ lɔ va nu nii mɔ axwetɔ ao xlɔ Laza ledɔ. ⁴ Ci yi yesu se nɛnɛ ɔ e nu mɔ Laza d'a ku do edɔ cɛ mɛ go vɔ ɔ edɔ lɔ va vɔ Mawu a to mɛ a doasɛ yi ŋsɛn yi a ɖe eviɛ ɔ klɛnklɛn gangan doasɛ. ⁵ Yesu lɔnnɔ Mata koɖo Mali koɖo wowo nɔvi Laza nyɔ gbɔ. ⁶ Keŋ kwenu yi wo va do eŋɛ nii mɔ Laza ledɔ ɔ e gbe ci afi cinyi e le lɔ yi wa nyisɔ. ⁷ Le i godu ɔ e nu nɔ yi nukplaviwo mɔ mi na nɔ mi a trɔyi zuɖe kan mɛ. ⁸ Yi nukplanvi lɔwo nu nii mɔ cicagan yuɖatɔwo ji sabaaɖe yɛ mɔ yewo a xo ekpe co nɔ na ku gankegan yi e gbe jijiɛ mɔ ye a trɔyi hunnɔtɔxu a. ⁹ Yesu nu nɔ wo mɔ de egaxoxo wive yi le kedemɛ ba nɔ amɛɖe zɔnzɔn emɔ keɖemɛ ɔ da klɛnn afɔ go do xexemɛ klɛnklɛn kpɔnɔ enu nii petii. ¹⁰ Vɔ nɔ amɛɖe zɔnzɔn emɔ ezanmɛ ɔ klɛn afɔ do klɛnklɛn de le ezanmɛ go. ¹¹ Ci yi yesu nu enyɔ hunnɔwo ɖegbɔ ɔ e sɔ dado ji mɔ miwo xlɔ Laza dɔn alɔn vɔ ɔ na yi fɔin. ¹² Nukplavi lɔwo nu nii mɔ axwetɔ nɔ enyi kpɔ mɔ alɔn dɔn yi e le ɔ a nyi edɔ lɔ a mi nii. ¹³ Le mɛ ɔ yesu nunuɔ mɔ Laza ku vɔ nukplavi lɔwo bubuɔ mɔ alɔndɔndɔn kpoŋ nyɔ nunɔ yi yi le. ¹⁴ Eyi yesu va ɖe mɛ nɔ wo mɔ Lawu ku ¹⁵ Ɖo mi wo taɖo ɔ e jɔ eji nɔ ŋ mɔ ŋ de le hunnɔtɔxu go. nɛn ɔ mi a sɛn eŋ xɔ ŋ ji se mi na nɔ mi a yi Laza gbɔ. ¹⁶ Gahunnɔmɛ ɔ Tɔma ci yiwo gbe yɔnɔ mɔ togbo nu nɔ nukplavi kpɛtɛwo mɔ mi na nɔ mi a yi miwo can mi a yi ku koɖo yesu. ¹⁹ Hwenu yi yesu va ɖo Betani kɔxwi lɔ mɛ ɔ e kpɔ mɔ wo dyi Laza soso ŋkeke amɛnɛ ke dii. ¹⁷ Keŋ Betani kɔxwi lɔ sɔ zeluzalɛmu jugan gbɔ kpeci amɛtɔn han yi ma wo mɛ. ¹⁸ Eyi yuɖatɔ sugbɔƥ so zeluzalɛmu yi va Mata koɖo Mali gbɔ yi va fafa akɔn nɔ wo do wowo nɔvi ci yi ku taɖo. ²⁰ Ci yi Mata se mɔ yesu gbɔgbɔ ɔ e vayi do ego yi vɔ ɔ Mali yɛ nɔ anyinɔnɔ do axwe mɛ. ²¹ Ci yi Mata kpɔ yesu ɔ ɔe nu nii mɔ axwetɔ nɔ e nyi kpɔ mɔ le e le elɛ sasa ɔ sɔ vinyɛ ŋsu a ku ba. ²² Gankegan ecɛyɛ can ɔ ŋ nya mɔ enuɖekpokpoi ci yi a biɔ Mawu ɔ a sɔɛ na co. ²³ Yesu nu ni mɔ nvio a fɔn soso ekuwodi. ²⁴ 24 Mata ɖoŋci nii mɔ nya mɔ yi a va fɔn gbecigbe yi amɛnkukuwo pleŋ a va fɔn soso ekuwodi le ŋkeke kpɛtɛkpɛtɛ lɔ ji. ²⁵ Yedu nu nii mɔ enyɛ yi nyi fɔnfɔnsossokuwodi koɖo agbe nɔ amɛɖe xɔ ŋji se ɔ akpɔtɔ a le agbe nɔ e ku can. ²⁶ Yi amɛ ci yi le agbe yi xɔ ŋ ji se da ku gbeɖe go. e xɔɛ ji se a. ²⁷ Mata ɖoŋci nii mɔ ɛɛ axwetɔŋ xɔse mɔ eo yi nyi klisolɔ Mawu eviɛ amɛ ci yi do a va xexe lɔ mɛ. ²⁸ Ci yi Mata ɖo enyɔ lɔ nu nɔ yesu ahan ɖegbɔ e vayi yɔ nɔviɛ nyɔnu Mali yi ɖɔ ekpa nii mɔ cicagan va yi yɔyɔ eo. ²⁹ Kaka Malia se ahan vɔ e so je ete bleŋ yi kpe yesu gbɔ. ^{32 30} Hwenɔnu yesu de ɖo kɔxwi lɔ mɛ hɔɖe go e kpɔtɔ le afi ci yi Mata va do ego yi do. ³¹ Ci yi yudatɔ ciwo yi va akɔn fagbe nɔ Mali le axwe lɔ mɛ kpɔ yi e so je ete yi ɖe eblɛ yi to ɔ wo kplɔɛ do wo bubuɔ mɔ yɔ du lɔ gbɔ yi yi yiyiɔ a vayi fan avin. Hwenu yi Mali va ɖo afi ci yi yesu le lɔ yi kpɔɛ ɔ e je ekloji do akɔnmɛ nii gbloo yi nu nii mɔ axwwtɔ nɔ e nyi kpɔ mɔ le e le elɛ sasa ɔ nɔvinyɛ ŋsu a ku ba. ³³ Yesu kpɔ yi e fanfan can fanfan avin eyi e wa ɖeka do lanmɛ nii yi e caka. ³⁴ Yi biɔ wo se mɔ fiŋge mi ɖyi do ɔ woɖoŋci nii mɔ Axwetɔ va kpɔ afi ci mi ɖyi do. ³⁵ Eyi yesu fan avin. ³⁶ Ci yi Yuɖatɔ lɔwo kpɔɛ wo nu mɔ mi kpɔ lehan yi e lɔn Laza sugbɔ do ɖa. ³⁷ Vɔ ɔwowo domɛtɔ ɖekawo nu mɔ eyɛ ci yi hun ŋkuvi nɔ ŋkuvitɔnnɔ lɔ ɖee d'a sɛn eŋ xe emɔ nɔ Laza ŋgbe ku sasa dru hɛnnɛ go ba. ³⁸ Enu lɔ gbe wa ɖeka do lanmɛ nɔ yesu do ji ke yi e vayi yɔdu lɔ gbɔ ekpegbaja ɖeke tuimmɛ yɔ yi wo sɔ ekpe gangan ɖeka cu enu nii. ³⁹ Yesu nu mɔ mi ɖe ekpe gangan lɔ soso enu nii ɔMata ci yi nyi amɛtrɔdo lɔfofo ɔ nyɔnu nu nɔ yesu mɔ axwetɔ e ɖo a tɔ hwɛnhwɛn vɔ ɖo soso ŋkeke amɛnɛ ke ɖii yi wo ɖyii. ⁴⁰ Yesu ɖoŋci nii mɔ ŋ de nu nɔeo vayi mɔ nɔ e xɔ ŋ ji se ɔ a kpɔ Mawu ŋsɛn gangan lɔ ba. ⁴¹ Eyi wo ɖe ekpe lɔ soso enu nɔ yɔdu lɔ yesu fɔn eta yi eji yi nu mɔ eda ŋ do akpe nɔ eo mɔ e ɖo eto ŋ. ⁴² Ŋ nya mɔ e ɖonɔ eto ŋ tɛgbɛɛ vɔ ɔ ŋ le enyɔ cɛwo nuɔ do amɛ cɛwo ciwo yi lɔ ahwa va bɔdo ŋ gbɔ taɖo nɔ wo a xɔɛ ji se mɔ eo ji dɔ ŋ ɖaɖa. ⁴³ Ci yi yesu nu ahan ɖe gbɔ ɔ e do axwa cicici Lazaa to soso entɔxu. ⁴⁴ Eyi amɛkuku lɔ to soso yɔdu lɔ mɛ nyao yi gaga eyi ci yi wo sɔ trɔ do alɔwo koɖo afɔwo koɖo avɔ eyi ci wo sɔ bla ŋmɛ nii gbe kpɔtɔ le nu hwenɔnu ɔ yesu va nu nɔ wo mɔ mi cu enu lɔwo le nu yi a tashi nɔ a yi. ⁴⁵ Yuɖatɔ sugbɔ le amɛ ciwo yi va Mali gbɔ mɛ yi ci wo kpɔ enu ci yi yesu wa lɔɔ wo xɔɛ ji se. ⁴⁶ Vɔ ɔ amɛɖekawo le wo mɛ yi vayi falisitɔwo yi to enu ci yi yesu wa lɔ nɔ wo. ⁴⁷ Eyi avɔnsatɔwo gawo koɖo falistɔwo bɔ yuɖatɔwo sɛnsɛn kojoɖo xunɔtɔwo yi nu wo mɔ le yi mi a wɛɛ do ɔ ɖo ɖajɛ cɛ wawa jeshidu nu sugbɔ. ⁴⁸ Nɔ mi bɔ enu do mɛni yi e wawa enu nɛnɛ yi yiyiɛ ɔ amɛ shamɛ a va xɔɛ ji se le i godu mɛ ɔ hlɔmɔtɔwo a va yi a va gban miwo. ⁴⁹ Ŋsu ɖeka le yuɖatɔwo ga lɔwo domɛ wo yɔɛni mɔ kayifu eyi nyi avɔnsatɔ gangantɔ ɔexwenɔxwe e nu nɔ wo mɔ mi de se enuɖekpokpo gɔnmɛ go. ⁵⁰ Susu de kpɔɛ nɔ mi ba nɔ amɛ kuɖeka ku do jukɔn lɔ pleŋ ta ɔa do mi ji sɔwu ci yi jukɔn lɔ pleŋ a vɔ. ⁵¹ De nyi kayifu ŋtɔ dro yi xo nuxu hunnɔwo go vɔɔ ci e nyi avɔsatɔ gangantɔ yi e nyi exwenɔxwe ɔ Mawu do eŋɛ sɔto ji m ɔyesu ɖo a ku do yuɖatɔwo jukɔn lɔ ta. ⁵² Ɖe nyi do jukɔn hunnɔ lɔ ɖe kɛ ta yɔ go vɔ a dɔn Mawu vi ciwo pleŋ yi kaka do egbe bɔdolankpu kuɖeka mɛ hɛnnɛ sɔto eku ci yi a ku mɛ. ⁵³ Eyi soso gbenɔgbe ji ɔ yuɖatɔwo ganwo sɔ gbeta mɔ yewo a wu yesu. ⁵⁴ E yi na taɖo yi yesu de gbe totoɔ agbaŋgba do afi ciwo yi yuɖatɔwo bɔdo go. e yi eflayimu jugan mɛ le ekan ɖeka ci yi do lixo koɖo zoxu sakli sakli lɔ mɛ yi ci e nɔtɔxu koɖo yi nukplaviwo. ⁵⁵ Yuɖatɔwo xwe ci yi nyi atadodoamɛxwe gogo eyi amɛ sugbɔ so afi vovovo yi vayiyiɛ zeluzalɛmu ke yi a wa eɖyiklɔklɔ kɔnu gbɔxwe nɔ exwe lɔ a va ɖo. ⁵⁶ Wo jijiɛ yesu kpɔ yi hwenu wo va le Mawuxwe mɛ ɔ wo va biɔbiɔ wowonɔnɔwo se mɔ le yi mi kpɔɛ do ɔ de jijiɛ a va exwe lɔ ɖugbe ba. ⁵⁷ Eyi avɔnsatɔ gangantɔ lɔwo koɖo falisitɔ lɔ wo ɖe egbe nɔ amɛwo mɔ nɔ amɛɖe nya afi ci yi yesu le ɔ yi le va nui nɔ ye wo nɔ yewo a yi lii.